Máɖékà 1
1
1Wuɖu ɓɛ́ Bounɓoɔ̀ dèìn ma Máɖékà wĩín, ɓɛ́ ɔ ké ma Éézùɖùɛ̀-nyɔ̀ ɓěɔ̀ gbo cɛ̃ɛ kɛà kɛ̀.
Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ Bounɓoɔ̀ ɓéɖé ɓó Éézùɖùɛ̀-nyɔ̀ ɓěɔ̀ bììɛ
2Bounɓoɔ̀ cɛ̃ɛ, ké ɔ ɖá, “Ní nyɔ ɓě, ḿ ɖɛ̀ɓɛ̀ ɓě mú. Kɛɛ ɓě cɛ̃ɛ, ké ɓě ɖá, ‘Xwɛ̌ m̀ nyuà à mú ɖɛ̀ɓɛ̀ɛ̀ kɛ́?’ Ḿ mɛ cɛ̃ɛ ɓě gboɛɛ, má, Íìsɔ́ɔ̀ mɔ̀ ma Jékɔ̀ɛ̀ ɖíí-gààe? Kɛɛ wɛ̃́ɛ́ kɛɛ, ḿ ɖɛ̀ɓɛ̀ ma Jékɔ̀ mú, 3ké ḿ nyɛ́ ma Íìsɔ́ɔ̀ mú. Ké ḿ ɖǎa nyu ké Íìsɔ́ɔ̀ɛ̀ xwíníín-dyù ɓěɔ̀ nììn cĩ́-naín mɔ̀à toɖo-ɓòɖòɔ̀ kɛɛ ɖǎ wáɖá, ké ɖé mɔ̀ǎ xwáɖá-xwíɖíi-nìmìì ɓěɔ̀ cĩ́-naín.
4“Ɔ jǔ ké Íìsɔ́ɔ̀ nììn xwíníín-dyù ɓě mɔ̀à Íɖɔ̀ùn-nyɔ̀ ɓěɔ̀ kɛɛ dyiɛ cɛ̃, ké wa dyi níiń, ‘À ɓóɖóɔ̀ ɖǎ wáɖá, ké ɔ hwɔìn hwùɖùǎ dyɛo, kɛɛ à muɛ poùn ɖeo’ ní, mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ ɖǎa cɛ̃ kà kɛbì wa mɛ poɛ kɛɛ, ní muɛ wáɖáùn ɖeɛ. Nyɔǔn ɓě mu wa hwòɖǒ-kɔ̃in-nyìnììn-ɓòɖò kè nyɔ ɓě ɓɛ́ Bounɓoɔ̀ dyoɖoɔ̀ nì kɔ̃ kánáá pūɛɛ ɖáìn.
5“Ɓě mìɔùn nììn dyéɖé muɛ dyéìn, ké ɓě muɛ cɛ̃ìn, ɓɛ́ ɓě ké níiń, ‘Bounɓoɔ̀ tɛ̀mɛ̀ìn ɔ kpé vɛ̀nɛ̀ɔ̀ ɓóɖó-dù kà kò ɖò ɓěɛ̀ nyɔ ɓěɔ̀ dyí ɖekè wà!’ ”
Bounɓoɔ̀ kpɔ̃̀ìn sáa-zà-nyɔ̀ ɓěɔ̀ zaa
6Bounɓo mɔ̀ nyɔ nìà ɖɛ séín kɔ̃in nyɛɛ cɛ̃ɛ ɖe, ké ɔ ɖá, “Sáa-zà-nyɔ̀ ɓě, dyú dyé ɔ xwíníín-zà-ɓǎ kpéín, ké gbo-nì-nyɔ̀ dyé ɔ gbo-nì-ɓǎ kpéín. Ɔ jǔ ké ḿ dyi ɓěɛ̀ ɓǎ jǔ ní, dɛ̌ ní kpéín-dyé-dyéɔ̀ ɖé? Ɔ jǔ ké ḿ dyi ɓěɛ̀ gbo-nì-ɓǎ jǔ ní, dɛ̌ ní dyi-fɛ̃̀ìn-fɛ̃̀ìnɔ̀ nì kɛ́? Ɓě zàìn ní nyɛ́nɛ́ɔ̀ zùǔn. Kɛɛ ɓě cɛ̃ɛ, ké ɓě ɖá, ‘Xwɛ̌ à nyu nì nyɛ́nɛ́ɔ̀ zùǔn zàìn nyɛ́?’ 7Ɔ mɔ̀ sepóɛɖé ɓě zàìn ɖii-ɖɛ̀ se mú hwɛ̀ kɛɛ sáa ɓó ní sáa-kɔ̃-zàìn-gbààɔ̀ kɔ̃. Ké ɓě ɖá, ‘Xwɛ̌ à nyuɛ náa nyuɛ kɛ́?’ Ɔ mɔ̀, ɓěɛ̀ hwòɖǒ ɖá ɓě ɓɛ́ìn ní sáa-kɔ̃-zàìn-gbààɔ̀ jè dyií dyi poɛ pū. 8Ɓě dyi nyúà-ɖɛ̀ ɓěɔ̀ nyɔ kpè dyéɖéín dyiɛɛ sáa zàìn ní, ɔ se ɖɛ gbàe? Ké ɓě dyi nyúà-ɖɛ̀ ɓě ɓɛ́ wa kɔ́ dyí, mɔɔ ɓɛ́ wa wɛ́ kɛɛ sáa zàìn ní, ɔ se ɖɛ gbàe? Ɓě nyí nyúà-ɖɛ̀ nì náa ɓěɛ̀ wuɖuí-kɔ̃̀-nyɔ̀ɔ̀ dɔ̃̌ùn. Ɓěɛ̀ hwòɖǒ ɖá ɔ hwòɖǒ mu ɓě múin dèìn, ɓɛ́ ɔ ké ɓě nɔ̀mɔ̀ dyíin dyí nyue? Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.
9“Ɓó kàǔn wɛ̃ɛ, ɓě ɓaà, ɓɛ́ ḿ ké ɓě wìǐn dyé. Nyíí-ɖɛ̀ nì kà ɓó ɓě ɓɛ́ ɓě tòà kɛɛ ɓɛ́ìn nyuɛ ɓɛ́ ní hwòɖǒ ké ɓě múin dèìne? 10Nyɛ́ ɖá nyɔ ɖò nìɔ̌ má ɖé ɓě hwìɛ̀, ɓɛ́ ɔ kéɔ́ má ní gbǒɔ̀ kã, ɓɛ́ ɓě ké seɔ́ má ɓó ní sáa-kɔ̃-zàìn-gbààɔ̀ kɔ̃ nyɛ dyí po pídyiɛ́? Ní hwòɖǒ se ɓě múin dèìn, ké ḿ se ɓě nyíí-ɖɛ̀ ɖò xwaún kpɔ̃ɔ́ mu. 11Sɔ̀ìn ɖé dyóɖóɔ̀ xwáɖáún-wóɖóìn-naín kéɛ dyi-kpáìn-naín dyɛ̀ìn nyɛɛ, ní nyɛ́nɛ́ɔ̀ mu ní ɖé ɓóɖó-dù ɓěɔ̀ hwìɛ̀. Ké wa fɔ̃ nyɔ́ún-nɔ̀mɔ̀-ɖɛ̀, ké wa nyu sáa-zà-zà hwɛ̀ǐn-hwɛ̀ǐn ɓó ní nyɛ́nɛ́ɔ̀ jè, sepóɛɖé ní nyɛ́nɛ́ɔ̀ mu ní, ɖé ɓóɖó-dù ɓěɔ̀ hwìɛ̀. 12Kɛɛ ɓě zàìn ní nyɛ́nɛ́ɔ̀ zùǔn ti ɓɛ́ ɓě cɛ̃ɛ, ké ɓě ɖá, ‘Bounɓoɔ̀ sáa-kɔ̃-zàìn-gbààɔ̀ se mú hwɛ̀, ké ɖii-ɖɛ̀ nì ɓóɛ kɔ̃ɛɛ, à ɓɛ́ìn ɔ jè dyií dyi poɛ pūo’ kɛ. 13Ɓě cɛ̃ɛ, ké ɓě ɖá, ‘Ɖɛ séín ɓěɛ̀ mɔ̀ nyɔ-saà-ɖɛ̀ cá wà!’ Ké ɓě cṹìn ḿ. Sáa-zàìn-ɖɛ̀ ɓě ɓɛ́ ɓě dyà ḿ wɛ̃ɛ mɔ̀ ɖɛ ɓě ɓɛ́ ɓě zàìn nyɔǔn ɓě gana xwa, mɔɔ ɓɛ́ wa kɔ́ dyí, mɔɔ ɓɛ́ wa wɛ́ kɛ. Ḿ mɛ kpɔ̃ sáa-zàìn-ɖɛ̀ nì ná ɓěa ɓě xwaún pūe? 14Gboò-wùɖù nì nyɔ-cá-nyɔ̀ ɓɛ́ ɔ ɖáìn ḿ ɓáɖáá ɓíɔ́ ɔ ɓéɖéɛɛ nyɛ́nɛ́ín, hwɛ̀ ɓɛ́ ɔ dyi nyúà-ɖɛ̀ se mú wóɖóɛɛ ḿ gbo sáa zàìn nyɛɛ kɔ̃, sepóɛɖé ḿ mɔ̀ kã́á vɛ̀nɛ̀, ké ɓóɖó-dù séín dyé ḿ kpéín. Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”
Currently Selected:
Máɖékà 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
