Ɖìvéɖékɔ̀ 8
8
Eɖóún kè ɔ dyú-gàà ɓěɔ̀ kũ̀à-kɔ̃ún-po-poɔ̀
(Ɛ́séɖɔ̀ 29:1-37)
1Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 2“Ɖú Eɖóún kè ɔ dyú-gàà ɓěɔ̀ kè waà mú-po-ɖɔ̀ ɓě ɓá sáa-zà-kũ̀àɔ̀ jè dyíɛ kè bũ̌-po-cànàɔ̀ kè ɓìɖǐ ɓíɔ́ kè ɓáɖáá ɓíɔ́ sɔ̃́ kè bɛɖɛɛ̀ ɓɛ́ wa se dyáìn-ɖɛ̀ gbo poɛɛ tìě-wèɔ̀ dyí, ɓɛ́ m̀ ké wa ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín dyà. Ɓìɖǐ ɓíɔ́ɔ̀ mu nàmàǔn-sàǎ-zàìn-ɖɛ̀ jǔùn. 3Ɔ ɖǎ ná nìǐn, nìí, poìn Éézùɖùɛ̀-dyù séín ɓěɔ̀ dyí ɓó jàɖàìn-gbòɔ̀ wĩín.”
4Ké Mózè nyuɛ ma kà Bounɓoɔ̀ nyuɛ ma kà ɔ gbo cɛ̃ɛ kɛ. Ti ɓɛ́ Éézùɖùɛ̀-nyɔ̀ séín ɓěɔ̀ ɖǎ ma ɓó jàɖàìn-gbòɔ̀ wĩín dyí poìn nyɛɛ, 5Mózè cɛ̃ɛ ma wa gbo, ké ɔ ɖá, “Ɖɛ ḿ nìà nyuɛń dyiɛń nyɛɛ mɔ̀ ɖɛ Bounɓoɔ̀ ɖǎ ḿ gbo cɛ̃ ɓɛ́ ḿ ké nyuɛ.”
6Púɛɛ, Mózè nyuɛ ké Eɖóún kè ɔ dyú-gàà ɓěɔ̀ dyi ma ɓó ɔ dyúa, ké wa dèɖè ma bũ̌in. 7Hwɛ̀ ké ɔ ɖú ma ɖɔ ɓě ɓɛ́ nyɔ mɔ̀ sáa-zà-nyɔ̀ vɛ̀nɛ̀ɔ̀ kɛɛ ké mú poɛɛ dyí, ké ɔ poɛ ma Eɖóún mú. Kĩ́ín-kĩ́ín nyɛɛ, ɔ po ɔ gã́ùn xwã́-xwã́ ɖò mú, ké ɔ jìnììn ma ɔ gbo-jìnììn-ɖɛ̀ ɖò gbo. Hwɛ̀ ké ɔ po ma gã́ùn zɛin ɖò ɓóɛ kɔ̃in, ké ɔ po ma ífɔ̀#8:7 Ífɔ̀ nì kà Ɓǎsɔ́ɔ̀-nyɔ̀ nììn ɓùɓá ɓɛ́ wa po múɛɛ nìà kɛ. Sáa-zà-nyɔ̀ vɛ̀nɛ̀ɔ̀ ɓéɖéɛ kpa ɖɛ ɖò. ɖò ɓóɛ kɔ̃in, ké ɔ sã̀ìn ma ífɔ̀ɔ̀ gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin nìɛ̀ ma wɔ̃ɛɛ ɓóɛ kɔ̃in, ké ɔ dèɛ̀ kpoí. 8Sɔ̀ìn ɓóɛ gboɛɛ, ɔ jìɖǐ ma ɔ kɛ́í-jìɖǐ-ɖɛ̀#8:8 Wa sã̀ìn kɛ́í-jìɖǐ-ɖɛ̀ɔ̀ ɓó ífɔ̀ɔ̀ kɔ̃in. Gmɔ̀ ɖé Ɛ́séɖɔ̀ 28:15-30 mú. ɖò kɛ́ín, ké ɔ po ma Dyúwìɖììn kè Túmì#8:8 Dyúwìɖììn kè Túmì mɔ̀ gbo-ɖàɓàìn-ɖɛ̀ ɓě ɓɛ́ sáa-zà-nyɔ̀ vɛ̀nɛ̀ɔ̀ nyùìn kũ̀à mú, ɓɛ́ ɔ ké Gèɖèpɔ́ɔ̀ mɔ́ɔ́-ɖɛ̀ dyuòɛ. ɖé kɛ́í-jìɖǐ-ɖɛ̀ɔ̀ mú. 9Hwɛ̀ ké ɔ dèìn ma dúi-bĩìn-ɖɔ̀ ɖò ɓɛ́ wa ɖǎ páɖá kĩ́ín nyɛɛ ɔ dú, ké ɔ dèɛ̀n ma góò-pĩ̀à ɖò ɓɛ́ ɔ tɛ̀mɛ̀ìn nyɔǔn dyí kà ɔ ɖǎ wáká kpá ɓó Gèɖèpɔ́ɔ̀ bììɛɛ dyúa. Mózè nyu ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.
10Hwɛ̀ ké Mózè ɖú ma bũ̌-po-cànàɔ̀ dyí, ké ɔ poɛ ma jàɖàìn-gbòɔ̀ kè ɖɛ séín nìà ɖéɛ múɛɛ bũ̌. Kǎà ɔ nyu ma wa wáká poɛ ɓó Gèɖèpɔ́ɔ̀ bìì. 11Sɔ̀ìn ɓóɛ gboɛɛ, ɔ po ma sáa-kɔ̃-zàìn-gbààɔ̀ cáná bũ̌in ɖekè. Ɔ mɛ́nɛ́ìn maa cáná bũ̌in kpa mɛ̀nɛ̌ìn-sɔ̃́. Ké ɔ po ma kũ̀à-mú-nyùìn-ɖɛ̀ ɓě ɓáa dyíɛɛ cáná bũ̌ ɖekè. Ké ɔ po ma mú-dèɖèìn-ɖɛ̀ɔ̀#8:11 Gmɔ̀ ɖé Ɛ́séɖɔ̀ 30:17-21 mú. kèɛ̀ kɔ̃-dè-ɖɛ̀ɔ̀ cáná bũ̌ ɖekè. Ɔ nyu ɖɛ ɓěɛ̀ ɓɛ́ ɔ ké wa wáká po ɓó Gèɖèpɔ́ɔ̀ bìì. 12Hwɛ̀ ké ɔ púè ma bũ̌-po-cànàɔ̀ ɖò Eɖóún dúún. Ɔ nyuɛ ma náa ɓɛ́ Eɖóún ké ma wáká kpá ɓó Gèɖèpɔ́ɔ̀ bìì. 13Sɔ̀ìn ɓóɛ gboɛɛ, Mózè nyuɛ ké Eɖóúnɛ̀ dyú-gàà ɓěɔ̀ dyi ma ɓó ɔ dyúa. Ké ɔ po ma wa gã́ùn ɓě mú, ké ɔ jìnììn ma wa gbo-jìnììn-ɖɛ̀ ɓě gbo. Ké ɔ jìnììn wa dú-jìnììn-ɖɛ̀ ɓě dú. Ɔ nyu ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.
14Sɔ̀ìn ɓóɛ gboɛɛ, ɔ dyà ma ɓìɖǐ ɓíɔ́ mɔ̀à nàmàǔn-sàǎ-zàìn-ɖɛ̀ kɛ. Ké Eɖóún kè ɔ dyú-gàà ɓěɔ̀ dè ma ɓìɖǐ ɓíɔ́ɔ̀ sɔ̃ dúún. 15Hwɛ̀ ké Eɖóún ɖáɓá ma ɓìɖǐ ɓíɔ́ɔ̀, ké Mózè ɓéɖéɛ̀n ma nyɔmɔɔ̀ ɖò jìì mánáín, ké ɔ poɛ ma ɖɛ hwɔìn nimii-gmɛ̌ ɓě nìà ɓó sáa-kɔ̃-zàìn-gbààɔ̀ gã hĩinyɛɔ̀ kɔ̃ɛɛ bũ̌. Ké ɔ púè ma nyɔmɔɔ̀ nyɔ sè ɓóɛɛ ɖé sáa-kɔ̃-zàìn-gbààɔ̀ gbɔí. Ɔ nyu ma ɖɛ ɓěɛ̀ ɓɛ́ gbààɔ̀ ké ma mú hwɛ̀. Kǎà Mózè nyu ma gbààɔ̀ wáká poɛ ɓó Gèɖèpɔ́ɔ̀ bìì. 16Hwɛ̀ ké Eɖóún ɖú ma ɓìɖǐɔ̀ cáná séín ɓáìn mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛɛ dyí. Ké Mózè fɔ̃̀ìn maa ɓóɛ gbààɔ̀ kɔ̃. 17Kɛɛ ɔ ɖú ma ɓìɖǐ ɓíɔ́ɔ̀ kúɖúùɔ̀ kèɛ̀ fɔ́ɔ̀ kèɛ̀ mɛ́ɔ̀ dyí, ké ɔ fɔ̃̀ìn wa ɖé jàɖàìn-hwɔ̀ɖɔ̀ɔ̀ ɖeín. Ɔ nyu ɖɛ séín ɓěɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ.
18Sɔ̀ìn ɓóɛ gboɛɛ, ɔ dyà ma ɓáɖáá ɓíɔ́ ɓěɔ̀ ɖò, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ. Ké Eɖóún kè ɔ dyú-gàà ɓěɔ̀ dèɛ̀ ma sɔ̃ dúún. 19Hwɛ̀ ké Eɖóún ɖáɓáa ma, ké Mózè mɛ́nɛ́ìn ma nyɔmɔɔ̀ sáa-kɔ̃-zàìn-gbààɔ̀ wáká hĩinyɛɔ̀ bũ̌in. 20-21Ké Eɖóún cɛ̃ìn ma ɓáɖáá ɓíɔ́ɔ̀ dyi, ké ɔ wɔɔ̀ maa mɛ́ séín ɓěɔ̀ kèɛ̀ pɔ̃́ sɔ̃́ɔ̀. Ké Mózè fɔ̃̀ìn ma suaɖɛ̀ɔ̀ dúɔ̀ kèɛ̀ kpo ɓěɔ̀ kèɛ̀ cánáɔ̀ ɓó gbààɔ̀ kɔ̃. Ɖɛ nìà kɛ mɔ̀ fɔ̃ɔ-sàǎ-zàìn-ɖɛ̀. Ɔ mɔ̀ nyíí-ɖɛ̀ ɓɛ́ ɔ mɔ̀ ɖii-ɖɛ̀ kɔ̃̀ nyɔ́ dè Bounɓoɔ̀ hwìɖǐiɛ. Mózè nyu ɖɛ séín ɓěɛ̀ kà Bounɓoɔ̀ nyuɛ ma ɔ gbo cɛ̃ɛ kɛ.
22Hwɛ̀ ké Mózè dyà ma ɓáɖáá ɓíɔ́ tɔ̀ɔ̀. Ɔ mɔ̀ ɓáɖáá ɓíɔ́ ɓáà sáa-zà-nyɔ̀ kũ̀à kɔ̃ún po jè dyíɛ. Ké Eɖóún kè ɔ dyú-gàà ɓěɔ̀ dèɛ̀ ma sɔ̃ dúún. 23Hwɛ̀ ké Eɖóún ɖáɓáa ma, ké Mózè ɖúɛ ma nyɔmɔɔ̀ ɖò dyí, ké ɔ poɛ ma ɓóɛ Eɖóúnɛ̀ ɖiaún-ɖùǔ-tééɔ̀ kè ɔ ɖiaùn-sɔ̃̀ɔ̀ jìì-kpòɖòɔ̀ kè ɔ ɖiaùn-ɓòɔ̀ ɓìɛ̀-kpòɖòɔ̀ bũ̌. 24Ké ɔ nyuɛ ké Eɖóúnɛ̀ dyú-gàà ɓěɔ̀ dyi ma ɓó ɔ dyúa. Ké ɔ po nyɔmɔɔ̀ ɖò ɓó waà ɖiaún-ɖùǔ-téé ɓěɔ̀ kè waà ɖiaún-jìì-kpòɖò ɓěɔ̀ kè waà ɖiaún-ɓìɛ̀-kpòɖò ɓěɔ̀ bũ̌. Hwɛ̀ ké ɔ ɖú nyɔmɔɔ̀ nyɔ sè ɓóɛɛ dyí, ké ɔ mɛ́nɛ́ìn sáa-kɔ̃-zàìn-gbààɔ̀ wáká hĩinyɛɔ̀ bũ̌in. 25Sɔ̀ìn ɓóɛ gboɛɛ, Mózè ɖú ma ɓáɖáá ɓíɔ́ɔ̀ cáná séín nìɛ̀ múɛɛ dyí. Ɔ xwíníín mɔ̀, ɔ ɖúɛ ma vɔ̃-gbòò nì cánáúnɔ̀ kè cáná séín ɓáìn ɔ mɛ́ɔ̀ bũ̌in nyɛ kèɛ̀ pìùɔ̀ dà kpa ɖɛɔ̀ kèɛ̀ pɔnɔ-mɛ́ sɔ̃́ɔ̀ kè cáná ɓáìn wa kɔ̃in nyɛ kèɛ̀ ɖiaún-pɔ̃̀ɔ̀ dyí. 26Ké ɔ zà bɛɖɛɛ̀-kpò ɖò-ɖò ɖé tìě kɔ̃̀ mú ɓɛ́ bɛɖɛɛ̀-se-dyáìn-ɖɛ̀-gbo-nì-dù kò-kò ɓěɔ̀ nìà kɛ. Ɔ mɔ̀ bɛɖɛɛ̀ nìà ɓó Bounɓoɔ̀ dyúa kɛ. Ɔ xwíníín mɔ̀ bɛɖɛɛ̀-kpò kuún-kuún ɖò kè bɛɖɛɛ̀-kpò ɓɛ́ wa nyùàìn cáná kɛɛ ɖò ɔ kè bɛɖɛɛ̀-kpò se mú kuɛɛ ɖò. Ké ɔ po wa ɓó ɓáɖáá ɓíɔ́ɔ̀ cánáɔ̀ kèɛ̀ ɖiaún-pɔ̃̀ɔ̀ kɔ̃. 27Ké ɔ nyí ma ɖɛ séín ɓěɛ̀ Eɖóún kè ɔ dyú-gàà ɓěɔ̀ xwa, ké wa vũà wa dyi, ɓɛ́ wa ké nyíí-ɖɛ̀ kpa ɖɛ jǔ ɓó Bounɓoɔ̀ bìì. 28Hwɛ̀ ké Mózè zà ma ɖii-ɖɛ̀ ɓěɛ̀ wa xwa ɖe, ké ɔ fɔ̃̀ìn ma wa ɓó gbààɔ̀ kɔ̃, ɓó fɔ̃ɔ-sàǎ-zàìn-ɖɛ̀ɔ̀ kɔ̃in, ɓɛ́ wa ké nyɔ-kũ̀à-kɔ̃ún-po-sàǎ-zàìn-ɖɛ̀ jǔ. Ɖɛ nìà kɛ mɔ̀ ma ɖii-ɖɛ̀-nyìǐ-ɖɛ̀ kɔ̃̀ nyɔ́ dè Bounɓoɔ̀ hwìɖǐiɛ. 29Ké Mózè ɖú ma ɓáɖáá ɓíɔ́ɔ̀ kɛ́ɔ̀ dyí, ké ɔ vũàà ma dyi, ɓɛ́ ɔ ké nyíí-ɖɛ̀ kpa ɖɛ jǔ ɓó Bounɓoɔ̀ bìì. Ɓáɖáá ɓá nyɔ kũ̀à kɔ̃ún po jè dyíɛɛ kɛ́ɔ̀ mɔ̀ Mózè nììn. Ɔ nyu ɖɛ séín ɓěɛ̀ kà Bounɓoɔ̀ nyuɛ ma ɔ gbo cɛ̃ɛ kɛ.
30Hwɛ̀ ké Mózè ɖú ma bũ̌-po-cànàɔ̀ kè nyɔmɔɔ nìà ɓó gbààɔ̀ kɔ̃ɛɛ ɖò dyí, ké ɔ mɛ́nɛ́ìn Eɖóún kè ɔ mú-po-ɖɔ̀ɔ̀ kè ɔ dyú-gàà ɓěɔ̀ kè wa nììn mú-po-ɖɔ̀ ɓěɔ̀ kɔ̃in. Kǎà ɔ nyu ma Eɖóún kè ɔ dyú-gàà ɓěɔ̀ kè waà mú-po-ɖɔ̀ ɓěɔ̀ wáká poɛ ɓó Bounɓoɔ̀ bìì.
31Hwɛ̀ ké Mózè cɛ̃ɛ ma Eɖóún kè ɔ dyú-gàà ɓěɔ̀ gbo, ké ɔ ɖá, “Ɓáɖáá ɓá nyɔ kũ̀à kɔ̃ún po jè dyíɛɛ suaɖɛ̀ɔ̀ nyɔ sèà ɓóɛɛ, ɓě mɛ pĩ̀ɛ̀n ɓó jàɖàìn-gbòɔ̀ wĩín, ɓɛ́ ɓě kéɛ ɓóɛ bɛɖɛɛ̀ nìà tìěɔ̀ múɛɛ dyí ɖììn. Ɔ mɔ̀ bɛɖɛɛ̀-dù kò-kò ɓě mɔ̀à nyɔ-kũ̀à-kɔ̃ún-po-sàǎ-zàìn-ɖɛ̀, ɓɛ́ wa nìà ɖé tìěɔ̀ múɛ. Ḿ cɛ̃ɛ náa, sepóɛɖé Bounɓoɔ̀ cɛ̃ɛ ma náa ḿ gbo, ké ɔ ɖá, ‘Eɖóún kè ɔ dyú-gàà ɓěɔ̀ ɖòùn mɛ ɖiɛ.’ 32Ké bɛɖɛɛ̀ɔ̀ kè suaɖɛ̀ɔ̀ nyɔ mu ɓó sèìn nyɛɛ, ɓě mɛ fɔ̃ɔ. 33Ké ɓěǐn ɖá ɓɛ́ ɓě ké jàɖàìn-gbòɔ̀ wĩín sɔ̀, ɓɛ́ wé mɛ̀nɛ̌ìn-sɔ̃́ mɔ̀à ɓěɛ̀ kũ̀à-kɔ̃ún-po-wèɔ̀ kɛɛ ké zi hwɛ̀. Sepóɛɖé ɓěɛ̀ kũ̀à-kɔ̃ún-po-wèɔ̀ mɔ̀ wé mɛ̀nɛ̌ìn-sɔ̃́. 34Ɖɛ ɓɛ́ ḿ nyuà ɓó zɛ̃̌ɛ̀ kɛɛ, ɔ mɔ̀ ɖɛ ɓɛ́ Bounɓoɔ̀ ɖǎ cɛ̃ ɓɛ́ ḿ ké nyuɛ. Ḿ nyuɛ náa ɓɛ́ ɔ ké ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ jǔ. 35Ɓě mɛ gã̀ ɓó jàɖàìn-gbòɔ̀ wĩín dyi ɓó máaún kè dyóɖóaún ɓó wé mɛ̀nɛ̌ìn-sɔ̃́ xwíníín, ɓɛ́ ɓě ké ɖɛ Bounɓoɔ̀ cɛ̃ kɛɛ nyu, ɓɛ́ ɓě ní kɔ̃̀ ɖà mɛ́. Sepóɛɖé ɖɛ Bounɓoɔ̀ cɛ̃ ḿ gboɛɛ nìàǒ wɛ̀.” 36Ɔ jèɛɛ, Eɖóún kè ɔ dyú-gàà ɓěɔ̀ nyu ma ɖɛ séín ɓě ɓɛ́ Bounɓoɔ̀ cɛ̃ ma kà wa gbo dyììn ɖé Mózè múɛ.
Currently Selected:
Ɖìvéɖékɔ̀ 8: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
