Ɛ́séɖɔ̀ 34

Bounɓoɔ̀ céè gma ɓěɔ̀ sɔ́ɔ́-pĩ̀à ɖìè sɔ̃́ kɔ̃ ɖe

(Dìtɔ̀wáɖánámɛ̀ 10:1-5)

1Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo, ké ɔ ɖá, “Wa sɔ́ɔ́-pĩ̀à sɔ̃́ bũ̌in kà ɔ kĩ́ín-kĩ́ín nììn ɓěɔ̀ nì ma kà kɛ. M̀ ɖǎa náa nyu ní, nìí, ní mu wuɖu ɓě nì ma kà sɔ́ɔ́-pĩ̀à kĩ́ín ɓě ɓɛ́ m̀ wàìn ma kà dyiɛ kɔ̃ɛɛ ɓó wa kɔ̃ céèìn ɖe. 2M̀ mɛ dyé ti ɓó gàɖàà gànà-kṹún, nìí, ɓɛ́ m̀ ké ɖé ḿ gbo dyi ɖé Sányà-tòɖòɔ̀ dya, ɓɛ́ ḿ kè mɔ̀ ké ɖé dyéìn. 3M̀ kè nyɔ ɖò mɛ ɓɔ́ ɖé toɖoɔ̀ dya dyiɛ, mɔɔ ké ḿ mɛ ɓɔ́ nyɔ ɖò ɖé toɖoɔ̀ dya dà ɖò dyéɛ fɔɔ cá, hwɛ̀ ḿ po níiń, nyúà-ɖɛ̀ ɖò ké ɓó toɖoɔ̀ xwíɖíi dyi ɖi dyɛ mɔ̀ùn.”

4Ɔ jèɛɛ, Mózè wa ma sɔ́ɔ́-pĩ̀à sɔ̃́ bũ̌in kà ɔ nyɔ kĩ́ín ɓěɔ̀ nì ma kà kɛ, ké ɔ mu ma ɖé Sányà-tòɖòɔ̀ dya ɓó gànà-kṹún mɛ̀nɛ̀ɛ̀ kà Bounɓoɔ̀ nyuɛ ma kà ɔ gbo cɛ̃ɛ kɛ. Ɔ kpa ma sɔ́ɔ́-pĩ̀à sɔ̃́ɔ̀ ní. 5Ké Bounɓoɔ̀ dyi ma ɓíɖíi ɖé ní-kpòɔ̀ mú, ké ɔ nyànà ma ɓó dɛ̀ Mózè nì ma kà kɛɛ dyi, ké ɔ pòìn ma ɔ Bounɓo-nyɛ̀nɛ̀ɔ̀ jè zio mú. 6Ké ɔ zĩ̀ìn ma ɓó Mózè dyúa, ké ɔ ɓéɖé ma zio poɛń, ké ɔ ɖá, “Mɔ̄ mɔ̀ Bounɓoɔ̀. Mɔ̄ mɔ̀ jĩ́á-jè kè wìì Gèɖèpɔ́ɔ̀. Ní dyoɖo-hwòɖò mɛɛ̀ ní, ké ɖɛ̀ɓɛ̀ǐn-ɖɛ̀ɓɛ̀ǐn kè jǎà dyíìn ḿ múin. 7Ní nyu nyɔ táázĩ̀ìn kúɖúú ɓě nɔ̀mɔ̀ dyíin dyí, ké ḿ zĩ̀ìn ɖɛ-gbà-nyu-nyɔ̀ ɓě kè wuɖuún-jaɖa-nyɔ̀ ɓě ɔ kè nàmàǔn-nyɔ̀ tɔ̀ɔ̀ ɓě kɔ̃in. Kɛɛ wɛ̃́ɛ́ kɛɛ, nyɔ ɓě ɓɛ́ zaa wáɖá dúún wɛ̃ɛ, ḿ tò wa gǎ kɔ̃ wɛ̃́ɛ́ pū. Ḿ tò waà dyú ɓě kè waà dyú ɓěɔ̀ nììn dyú ɓě gǎ kɔ̃ ɓó wa ɓǎ ɓěɛ̀ nàmàǔn ɓěɔ̀ jè, ké ɔ dyɛ̀ìn waà xwéɖé-dù deìn dúún tã kè hĩinyɛ nììnɔ̀.”

8Púɛɛ, Mózè taɓa ma dú hwuɖu wàɖà, ké ɔ ɓiè ma Bounɓoɔ̀. 9Ɔ cɛ̃ɛ ma, ké ɔ ɖá, “Óó Ɖɛɓíɔ́, ɔ jǔ ké nì hwòɖǒ dyi ḿ múin dèìn ní, nìí, à kè mɔ̀ mɛ naìn mú. Nyɔ ɓěɛ̀ dú kùmù ní dyɛo, kɛɛ m̀ mɛ zĩ̀ìn à ɖɛ gbà ɓěɔ̀ kè à nàmàǔn tɔ̀ɔ̀ ɓěɔ̀ kɔ̃in, ɓɛ́ m̀ ké à dyí ɖú, ɓɛ́ à ké nì nyɔ ɓě jǔ kánáá pū.”

Gèɖèpɔ́ɔ̀ kè Éézùɖùɛ̀-nyɔ̀ ɓěɔ̀ dè wuɖu ɖe ɖie

(Ɛ́séɖɔ̀ 23:14-19; Dìtɔ̀wáɖánámɛ̀ 7:1-5; 16:1-17)

10Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá, “Gmɔ̀ nɔ̄, ḿ kè mɔ̀ kè nì nyɔ ɓěɔ̀ nì wuɖu dèɛ̌n ɖe ɖie. Ní mu dĩ́ín-dĩ̀ìn-ɖɛ̀ ɓě ɓɛ́ ḿ séè nyu ɖò ɓó ɓóɖó-kpà gànáà dà ɖòɛɛ nyuùn ɓó nì nyɔ séín ɓěɔ̀ dyéɖé waí. Nyɔ ɓě kɔ̃̀ hwìɛ̀ ɓɛ́ ɓě cĩ́à kɛɛ mu ɖɛ vɛ̀nɛ̀ ɓɛ́ ní mu nyuùn wɛ̃ɛ dyéìn, sepóɛɖé mɔ̄ mɔ̀à Bounɓoɔ̀ kɛɛ mu ɖɛ ku kɔ̃in ɓě nyuùn ɓó ɓě bìì. 11Ɓě mɛ nyu ɖɛ ḿ cɛ̃à ɓě gbo ɓó zɛ̃̌ɛ̀ kɛ. Ɔ mɛ nì ɓě hwìɖǐi kà ní mu Ámɔ̀-nyɔ̀ ɓěɔ̀ kè Kénà-nyɔ̀ ɓěɔ̀ kè Hítì-nyɔ̀ ɓěɔ̀ kè Pɛ́wìɖì-nyɔ̀ ɓěɔ̀ kè Hívì-nyɔ̀ ɓěɔ̀ ɔ kè Jɛ́ɓù-nyɔ̀ ɓěɔ̀ ɓó ɓě dyúa dyi kúmúùn wɛ̃. 12Ɓěǐn ɖá ɓɛ́ ɓě kè nyɔ ɓě cĩ́ ɖé ɓóɖó kɔ̃̀ kɔ̃ ɓě nìà muɛń nyɛɛ ké wuɖu ɖò dè. Ɓě dyiɛ náa nyu ní, nìí, wa mu xwáɖá-gbǎ-mú jǔùn ɓó ɓě bìì. 13Kɛɛ ɓě mɛ wáɖá waà sáa-kɔ̃-zàìn-gbàà ɓěɔ̀, ké ɓě mɛ wàìn ɓiè-sɔ̀ɔ̌-kpò ɓě ɓɛ́ wa nyànàìn dyiɛɛ dyi, ɓɛ́ ɓě ké cu-kpóɖó ɓě mɔ̀à waà gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓɛ́ wa nyànàìn dyiɛɛ ɖaɓa. 14Ɓěǐn ɖá ɓɛ́ ɓě ké gèɖèpɔ́ɔ̀ kà kò ɖò ɓiè, sepóɛɖé mɔ̄ mɔ̀à Bounɓoɔ̀ kɛɛ mɔ̀ hwɛ̀nɛ̌ Gèɖèpɔ́ɔ̀.

15“Ɓěǐn ɖá ɓɛ́ ɓě kè nyɔ ɓě cĩ́à ɖé ɓóɖóɔ̀ kɔ̃ɛɛ ké wuɖu ɖò dè. Ɔ dyi ná nìǐn, ti ɓɛ́ wa mu waà kũùn-kpò-gèɖèpɔ́ɔ̀ ɓěɔ̀ ɓièɛ̌n nììn, ɓɛ́ wa ké wa gbo sáa zàǔn nìɛɛ, nìí, wa mu ɓě ɖáùn, ké ɓěɛ̀ hwòɖǒ mu waà sáa-zàìn-ɖɛ̀ ɓěɔ̀ ɖò ɖiɛ mɔ́ùn. 16Ké ti ɖíɛ́ ɓě ní, ɓěɛ̀ dyú-gàà ɓěɔ̀ mu waà dyú-màà ɓěɔ̀ dyi kpɔ̃ùn, ké màa ɓěɔ̀ muɛ nyuùn ɓɛ́ ɓěɛ̀ dyú-gàà ɓěɔ̀ ké ḿ kɔ̃ín pòìn, ɓɛ́ wa ké kũùn-kpò-gèɖèpɔ́ɔ̀ ɓě ɓɛ́ màa ɓěɔ̀ ɓièà kɛɛ ɓiè ɖekè.

17“Ɓěǐn ɖá ɓɛ́ ɓě ké ɖɛ ɖò ɖèìn, ɓɛ́ ɓě kéɛ wáɖá, ɓɛ́ ɓě kéɛ kũùn-kpò mú nyu.

18“Ɓě mɛ pa Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀. Ɓó hwɔɔ̀ ɓaɖaa, ɓě mɛ ɖi bɛɖɛɛ̀ ɓɛ́ ɔ se dyáìn-ɖɛ̀ ɖò gbo nì kɛɛ ɓó wé mɛ̀nɛ̌ìn-sɔ̃́ xwíníín kà ḿ nyuɛ ma kà ɓě gbo cɛ̃ɛ kɛ. Ɓě mɛ nyu ɖɛ nìà kɛ ɖé ti ɓɛ́ ḿ ɖǎ ma kà cɛ̃ ɖé dɛ̀nɛ̀ mɔ̀à Áɓì kɛɛ xwíníín, sepóɛɖé ɔ mɔ̀ dɛ̀nɛ̀ kɔ̃̀ xwíníín ɓě sɔ̀ ma kà ɖé Íjè-ɓòɖòɔ̀ kɔ̃ɛ̀.

19“Nyíɔ́-dyù-gàà séín ɓɛ́ wa wóɖó ɖé wa ɖe xwíníín nyɛɛ mɔ̀ ní kɔ̃̀ɔ̀-ɖɛ̀. Kǎà ɖɛ dyúáɖòɔ̀ nì ɓá ɓěɛ̀ nyúà-ɖɛ̀ ɓěɔ̀ ɓíɔ́-dyù jè dyí ɖekè, kɛbì ɔ mɛ mɔ̀ ɓáɖáá mɔɔ wiɖi mɔɔ ɓìɖǐ kɛ. 20Ɓě mɛ gbǎà ɓěɛ̀ jǎkasì ɓěɔ̀ nyíɔ́-dyù ɓěɔ̀ dyììn ɖé wa ɓáɖáá bɛ̃̌ǐn po-po mú. Kɛɛ ɔ jǔ ké ɓě se wa gbǎà ní, ɓě ɓéɖé ɓɛ́ ɓě ké wa bùnù jaɖa. Ké ɓě mɛ gbǎà ɓěɛ̀ nyíɔ́-dyù-gàà séín ɓěɔ̀ ɖekè.

“Nyɔ ɖò ní ɖá ɓɛ́ ɔ ké xwa fɔ̀nɔ̀, ɓɛ́ ɔ ké ḿ ɓièɛ̌n dyi.

21“Ɓě mɛ nyu kũ̀à ɓó wé mɛ̀nɛ̌ìn-ɖò xwíníín, kɛɛ wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ fɔ̀. Kɛbì ɔ mɛ mɔ̀ ɖɛ-ɓá-tìɛ mɔɔ geɖe ɓěɔ̀ kɔ́-tìɛɛ, ɓě ɓéɖé ɓɛ́ ɓě ké fɔ̀ ɓó wéa ɓaɖa.

22“Ɓě mɛ pa Wíkì-hwɔ̀ɔ̀.#34:22 Wíkì-hwɔ̀ɔ̀ kè Geɖe-Kɔ́-Ɓàɖà-hwɔ̀ɔ̀ mɔ̀ ɖɛ dyúáɖò. Ɓó tia ɓaɖaa, ɓě mɛ dyà hwítì kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛ, ɓɛ́ ɓě kéɛ hwɔɔ̀ pàìn. Ké ɓě mɛ pa Ɓáá-Ɖɛ̀-Geɖeín-Hwɛ̀-hwɔ̀ɔ̀ ɖé ɓěɛ̀ zɔ̃ɔ̀ mánáín. 23Ɓó zɔ̃ séín xwíníín nyɛɛ, ɓěɛ̀ gàa séín ɓěɔ̀ mɛ dyi ɓó mɔ̄ Bounɓo Ɖɛɓíɔ́ mɔ̀à Éézùɖùɛ̀ Gèɖèpɔ́ɔ̀ kɛɛ dyúa. Ɓě mɛ nyùìn ɖɛ nìà kɛ kpa dyúáɖò ɓó hwɔ tã ɓěɔ̀ ɖò-ɖò ɓaɖa. 24Ní mu ɓóɖó-dù ɓěɔ̀ ɓó ɓě dyúa dyi kúmúùn, ɓɛ́ ḿ ké ɓěɛ̀ ɓóɖóɔ̀ kɔ̃ po. Ɔ jǔ ké ɔ dyi ná nìǐn, ti ɓɛ́ ɓě mu ɓó ḿ dyúa dyìɛ̀n kpa tã nyuùn ɓó zɔ̃ xwíníín nyɛɛ, nyɔ ɖò se ɓěɛ̀ ɓóɖóɔ̀ ɓě xwa zàǎ mu.

25“Ɓěǐn ɖá ɓɛ́ ɓě ké suaɖɛ̀ ɓɛ́ ɓě zàìn ḿ gbo sáa kɛɛ bɛɖɛɛ̀ ɓɛ́ ɔ nì dyáìn-ɖɛ̀ gboɛɛ caìn. Ké ɓěǐn ɖá ɓɛ́ sáa-zàìn-ɖɛ̀ ɓá Zĩ̀ìn-Kɔ̃in-hwɔ̀ɔ̀ jè dyíɛɛ suaɖɛ̀ɔ̀ ɖò ké goò.

26“Ɓě mɛ dyà ɓěɛ̀ ɖii-ɖɛ̀ kĩ́ín-kĩ́ín sɔ̀ ɖé ɓěɛ̀ geɖe ɓěɔ̀ gboɛɛ ɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ gbǒɔ̀ mú.

“Ɓě ɖò ní ɖá ɓɛ́ ɓě ké wiɖi-dyù ɖò mɔɔ ɓáɖáá-dyù ɖò ɔ ɖeɛ̀ nɛɛ̀-nì dyí pĩ̀ìn.”

27Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Céè wuɖu ɓěɛ̀ ɓíɖíi, sepóɛɖé wa mɔ̀ dèè-wùɖù nìà ɓó ḿ kè mɔ̀ kè Éézùɖùɛ̀-dyù tɔ̀ɔ̀ ɓěɔ̀ pṹa kɛ̀.” 28Mózè nyu ma ɓó Bounɓoɔ̀ gbo dyóɖóaún-wè kpáɖá-nyɔ sɔ̃́ kè máaún-hwùɖù kpáɖá-nyɔ sɔ̃́. Ɔ se ma ɖɛ ɖò ɖi, ké ɔ se ma ní ɖò ná fɔɔ cá. Ké Gèɖèpɔ́ɔ̀ céè ma dèè-wùɖù mɔ̀à gma ɓaɖa-bùè ɓěɔ̀ kɛɛ ɓó sɔ́ɔ́-pĩ̀à ɓěɔ̀ kɔ̃ ɖe.

Mózè sɔ̀ Sányà-tòɖòɔ̀ dya

29Sɔ̀ìn ɓóɛ gboɛɛ, Mózè sɔ̀ ma ɖé Sányà-tòɖòɔ̀ dya, ké sɔ́ɔ́-pĩ̀à sɔ̃́ kɔ̃̀ kɔ̃ ɓɛ́ gma ɓěɔ̀ céè ma kàa nì ma ɔ xwaún. Ké ɔ dyúa-kpàɔ̀ fã ma ní, sepóɛɖé ɔ kè Bounɓoɔ̀ ɖǎ ma dɔ́ɔ́ dè jè, kɛɛ ɔ seɛ ma dyuò kà ɔ dyúa-kpàɔ̀ nì ma fãuń wɛ̃. 30Ti ɓɛ́ Eɖóún kè Éézùɖùɛ̀-nyɔ̀ séín ɓěɔ̀ dyé ma Mózèɛ̀ dyúa-kpàɔ̀ fãa kɛɛ, wa fɛ̃̀ìn ma, ké wa se ma ɔ bũ̌in xwɛ̃́ìn mɔ́. 31Kɛɛ Mózè ɖá ma wa ní. Ké Eɖóún kè Éézùɖùɛ̀-nyɔ̀ vɛ̀nɛ̀ séín ɓěɔ̀ dyi ma Mózè gbo, ké Mózè wùɖù ma wa gbo. 32Sɔ̀ìn ɓóɛ gboɛɛ, Éézùɖùɛ̀-nyɔ̀ séín ɓěɔ̀ xwɛ̃́ìn ma Mózè bũ̌in, ké ɔ zaìn ma wa gma séín ɓě ɓɛ́ Bounɓoɔ̀ nyí ma kà ɔ ɖé Sányà-tòɖòɔ̀ dyaa gbo kɔ̃in. 33Ti ɓɛ́ Mózè hwɔ ma wa gbo wùɖùɛ̀ kɛɛ, ɔ wáɖá ma ɖɔ ɖò dúi. 34Kɛɛ ti séín ɓɛ́ ɔ mu ɖé Bounɓoɔ̀ jàɖàìn-gbòɔ̀ mú muùn, ɓɛ́ ɔ kè Bounɓoɔ̀ ké wùɖùɛɛ ní, ɔ zà ɖɔɔ̀ dúi, ké kǎà ɔ gã̀ ma tee, ké ɔ sí ma píé. Ké ti séín ɓɛ́ ɔ dyi, ké ɔ zaìn ɖɛ Bounɓoɔ̀ cɛ̃ ma ɔ gboɛɛ Éézùɖùɛ̀-nyɔ̀ ɓěɔ̀ gbo kɔ̃in nyɛɛ, 35nìí, wa dyé ɔ dyúa-kpàɔ̀ fãa. Ɔ ɖǎ ná nìǐn, nìí, Mózè wáɖá ma ɖɔɔ̀ dúi ɖe, ké ɖɔɔ̀ gã̀ ma ɓó dyi tee, ké ɔ mu ma Bounɓoɔ̀ gbo wùɖùùn ɖe hwɛ̀.

Currently Selected:

Ɛ́séɖɔ̀ 34: ƁB02

Highlight

Copy