Ɛ́séɖɔ̀ 32
32
Góò-ɓìɖǐ-dyùɔ̀
(Dìtɔ̀wáɖánámɛ̀ 9:6-29)
1Ti ɓɛ́ Éézùɖùɛ̀-nyɔ̀ ɓěɔ̀ hwòɖǒ ɖǎ ma mú nyíní, ké wa se ma Mózè toɖoɔ̀ dya sɔ̀ɔ̀ dyéɛń nìɛɛ, púɛɛ, wa poìn ma dyí ɓó Eɖóún gbo, ké wa ɖá, “Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké gàa mɔ̀à Mózè zà ma kà à ɖé Íjè-ɓòɖòɔ̀ kɔ̃ɛɛ gbo kpáa dyí dyuò.”
2Ké Eɖóún cɛ̃ɛ ma wa gbo, ké ɔ ɖá, “Ɓě zà ɓěɛ̀ gmàà ɓěɔ̀ kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ góò-ɖùǔn-po-ɖɛ̀ ɓě ɖùǔn, ɓɛ́ ɓě kéɛ ḿ gbo dyà.” 3Ɔ jèɛɛ, nyɔ séín ɓěɔ̀ zà ma waà góò-ɖùǔn-po-ɖɛ̀ ɓěɔ̀ ɖùǔn, ké wa dyàà ma Eɖóún gbo. 4Ké ɔ ɖú ma góò wa dyà ma kà ɔ gboɛɛ dyí, ké ɔ ɖèɛ̀n ma, ké ɔ mɛɛ ma ɖɛ hwɔìn ɓìɖǐ-dyù ɖò mú.
Hwɛ̀ ké Éézùɖùɛ̀-nyɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Ɓěà gèɖèpɔ́ɔ̀ ɓɛ́ ɔ zà ma kà ɓěà ɖé Íjè-ɓòɖòɔ̀ kɔ̃ɛɛ, ɔ kɛà kɛ̀.”
5Ti ɓɛ́ Eɖóún dyéɛ ma kɛɛ, ɔ nyu ma sáa-kɔ̃-zàìn-gbàà ɖò ɓó ɓìɖǐ-dyùɔ̀ dyúa, ké ɔ po ma wuɖui, ké ɔ ɖá, “Ɓěà mu hwɔ ɖò paùn Bounɓoɔ̀ bìì ɓó gàɖàà.” 6Ɔ jèɛɛ, wéɔ̀ nyɔ kɔ ma ɓó dyíɛɛ, nyɔ ɓěɔ̀ sɔ̀ ma dyí ɓó gànà-kṹún mɛ̀nɛ̀ɛ̀, ké wa nyu ma fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě. Sɔ̀ìn ɓóɛ gboɛɛ, wa kò ma dyi, ké wa ɖi ma ɖɛ, ké wa ná ma, ké wa po ma gbàɖàùn ɓó pá dyúáɖòɔ̀ mú.
7Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Mu ɖé ɓíɖíi wàɖà, sepóɛɖé nì nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ɛɛ ɖǎ wa mìɔùn dyíin nyìnììn. 8Ɔ se hwèɖèìn ké wa ɖǎ ɖɛ ɓě ɓɛ́ ḿ pòìn ma wa náún wɛ̃ɛ kɔ̃ín pòìn. Wa ɖǎ wa mìɔùn bìì kũùn-kpò hwɔìn ɓìɖǐ-dyù ɖò kɛɛ mɛ, ké wa ɖǎa dyúa dú hwuɖu taɓa, ké wa ɖǎa gbo sáa zà. Ké wa ɖǎa gbo cɛ̃ìn cɛ̃̀ìn, ké wa ɖá, ‘Ɓěà gèɖèpɔ́ɔ̀ ɓɛ́ ɔ zà ma kà ɓěà ɖé Íjè-ɓòɖòɔ̀ kɔ̃ɛɛ, ɔ kɛà kɛ̀.’ 9Ḿ ɖǎ nyɔ ɓěɔ̀ dyé kà wa mɔ̀ dú-kùmù-nyɔ̀ ɓě kɛ. 10Ɔ jèɛɛ, sɔ̀ìn ḿ hwìǐ, sepóɛɖé ḿ kpáìn wa dyoɖoún mìɔ, ké ní mu wa mú gbɔɔ̀ùn. Ɔ ɖǎ ná nìǐn, ní mu ɓóɖó-dù vɛ̀nɛ̀ ɖò nyuùn sɔ̀ìn ɖé m̀ mú.”
11Kɛɛ Mózè ɓaà ma Bounɓo mɔ̀à ɔ Gèɖèpɔ́ɔ̀ kɛ, ké ɔ ɖá, “Óó Bounɓo, ɖɛ́ kɔ̃̀ jè m̀ kéà nì nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ ɖé nì gana-sɔ̃̀ɔ̀ múɛɛ ná dyoɖoún kpáìn nyɛ́? 12M̀ dyiɛ náa nyuín, nìí, Íjè-nyɔ̀ ɓěɔ̀ muɛ cɛ̃ìn, ɓɛ́ wa ké níiń, ‘Gèɖèpɔ́ɔ̀ ɓéɖé ma wa hwòɖǒ gbà jè, ké ɔ zà ma kà wa nɔ̄ Íjè-ɓòɖòɛ̀ kɔ̃ɛ̀, ɔ mɔ̀ ɓɛ́ ɔ ké wa ɖé toɖo ɓěɔ̀ gbo ɖáɓáìn, ɓɛ́ ɔ ké wa ɓóɖó-kpàà kɔ̃ dyi sámá jè.’ Ɔ jèɛɛ, ɓɔ́ɔ náa nyuɛ. M̀ mɛ kpɔ̃ nì dyoɖo-hwòɖò ku wɔ̃ɔ̀ dyí, ké m̀ mɛ ɓɔ́ nì nyɔ ɓěɔ̀ ɖɛ gbà ɓɛ́ m̀ sɔ́à dyíɛɛ kɔ̃ dyàà. 13Ɖɛ m̀ ɖáìn zɔ̃̌ɔ̀ kà nì gbo-nì-nyɔ̀ ɓě mɔ̀à Ééɓòɖòhɛ̃́ɛ̀ kè Áázè ɔ kè Éézùɖùɛ̀ kɛɛ nyɛ́nɛ́ín nyɛɛ jè mɛ nì m̀ hwìɖǐi. M̀ gboò zɔ̃̌ɔ̀ nì kpéɔ̀ dyí, ké m̀ ɖá, ‘Ní mu ɓěɛ̀ xwíníín-dyù ɓě nyuùn ɓɛ́ wa ké dyí vò kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛɛ jĩ̀à kɛ. Ké ní mu ɓěɛ̀ xwíníín-dyù ɓěɔ̀ ɓóɖó ɓɛ́ ḿ ɖáìn wa nyɛ́nɛ́ín nyɛɛ nyíìn, ké ɔ mu waà kɔ̃̀ɔ̀-ɖɛ̀ jǔùn kánáá pū.’ ” 14Hwɛ̀ ké Bounɓoɔ̀ dyoɖo-hwòɖòɔ̀ wáɖá ma, ké ɔ se ma mú-gbɔɔ̀-gbɔɔ̀ kɔ̃̀ jè ɔ cɛ̃ ma kàa wa kɔ̃ dyà ɖe.
15Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè sɔ̀ ma dyí, ké ɔ ɖú ma toɖoɔ̀ dèɖě kpàǐ. Sɔ́ɔ́-pĩ̀à sɔ̃́ kɔ̃̀ kɔ̃ ɓɛ́ gma ɓěɔ̀ céè ma kà kɛɛ nì ma ɔ xwa. Gma ɓěɔ̀ céè ma sɔ́ɔ́-pĩ̀à ɓěɔ̀ wáká sɔ̃́ɔ̀ xwíníín kèɛ̀ kɔ̃ún. 16Gèɖèpɔ́ɔ̀ mìɔùn mɔ̀ nyɔ nɔ̀mɔ̀ìn ma sɔ́ɔ́-pĩ̀à ɓěɔ̀ xwa, ké ɔ mìɔùn mɔ̀ nyɔ céè ma gma ɓěɔ̀ ɓó wa kɔ̃.
17Ti ɓɛ́ Mózè dyɛ̀ìn ma Jasúé, ké wa nì ma toɖoɔ̀ dèɖěɛń nyɛɛ, Jasúé wɔ̃́ ma nyɔ ɓěɔ̀ kuɖu-kuɖuɔ̀, ké ɔ cɛ̃ɛ ma Mózè gbo, ké ɔ ɖá, “Toɛ̀ jĩ̌ nì dyiɛń ɖé jàɖàìn-hwɔ̀ɖɔ̀ɔ̀ mú.”
18Ké Mózè ɖá, “Jĩ̌ɔ̀ se to-ɖu-ɖuɛ̀ múà-jĩ̌, mɔɔ ké ɔ se nyɔ ɓě ɓɛ́ to ɖǎ ɖuɛɛ jĩ̌. Kɛɛ ɔ mɔ̀ wɛ́ɖɛ́-wùɖù ɖé ḿ wɔ̃́à kɛ̀.”
19Ti ɓɛ́ Mózè nìǎ ma jàɖàìn-hwɔ̀ɖɔ̀ɔ̀ dyáuń, ké ɔ dyé ma ɓìɖǐ-dyùɔ̀, ké ɔ dyé ma nyɔ ɓěɔ̀ wɛ́ɖɛ́ kpáa kɛɛ, ɔ kpá ma dyoɖoún mìɔ, ké ɔ ɓaɖa ma sɔ́ɔ́-pĩ̀à ɓě nì ma kà ɔ xwaún wɛ̃ɛ ɓíɖíí ɓó toɖoɔ̀ dyéɖé zɔ̃̌, ké wa wɛ̀ìn ma dyi. 20Ké ɔ ɖú ma ɓìɖǐ-dyù ɓɛ́ wa nyu ma kà kɛɛ dyí, ké ɔ ɖèɛ̀n ma, ké ɔ nyuɛ ma pù-ɓóɖó nìɛ̀-nìɛ̀ mú, ké ɔ mɛ́nɛ́ìn ma pù-ɓóɖó nìɛ̀-nìɛ̀ɔ̀ ɓó Éézùɖùɛ̀-nyɔ̀ ɓěɔ̀ náá-nìɔ̀ kɔ̃ dyi, ké ɔ kpɔ̃̀ìn ma wa ganaún, ɓɛ́ wa ké níɔ̀ ná. 21Hwɛ̀ ké ɔ diè ma Eɖóún dyi, ké ɔ ɖá, “Ɖɛ́ nyɔ ɓěɛ̀ nyu m̀ bũ̌ jè, ɓɛ́ m̀ dyià wa nàmàǔn ɓɛ́ kà nìà kɛɛ mú poɛ́?”
22Ké Eɖóún jǔ ma ɔ gɔ̃̌, ké ɔ ɖá, “Ɓɔ̌ɔ̀, mɔ̀ǔn ɖá ɓɛ́ m̀ ké dyoɖoún kpá. M̀ mìɔùn dyuò kà nyɔ ɓěɛ̀ hwòɖǒ jìnììn ɖɛ gbà nyu jè kɔ̃ɛ. 23Wa cɛ̃ɛ ma ḿ gbo, ké wa ɖá, ‘Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké gàa mɔ̀à Mózè zà ma kà à ɖé Íjè-ɓòɖòɔ̀ kɔ̃ɛɛ gbo kpá kɛɛ dyuò.’ 24Ɔ jèɛɛ, ḿ cɛ̃ɛ ma wa gbo, ké ḿ ɖá, ‘Nyɔ mɔ̀ nyɔ ɓɛ́ ɔ ɓéɖé góò-bɛ̃̀ìn-ɖɛ̀ kɛɛ mɛ zàà bũ̌in.’ Ké wa nyí ma waà góò-bɛ̃̀ìn-ɖɛ̀ ɓěɔ̀ ḿ, ké ḿ poɛ ma dyéɖé, ké ɓìɖǐ-dyù nìà kɛ sɔ̀à ɓó kɛ̀.”
25Ti ɓɛ́ Eɖóún ɖǎ ma wùɖùɛ̀ hwɔɛɛ, Mózè dyéɛ ma kà Eɖóún ɖǎa nyu ké nyɔ ɓěɔ̀ se dyí kpɔ̃ɔ ɓɛ́ìn, ké ɖɛ nìà kɛ ɖǎa nyu ké wa ɖǎ dyɔ́-cù jǔ ɖé waà mú-nyɛ́-nyɔ̀ ɓěɔ̀ gboɛ. 26Ɔ jèɛɛ, Mózè nyànà ma ɓó jàɖàìn-hwɔ̀ɖɔ̀ɔ̀ dyáìn-naínɔ̀ dyi, ké ɔ ɖá, “Nyɔ kã̀ìn séín ɓɛ́ wa nì ɖé Bounɓoɔ̀ nììn wáká kɔ̃ɛɛ mɛ dyi nɔ̄ ḿ gbo.” Ké Ɖíìváà-nyɔ̀ séín ɓěɔ̀ poìn ma ɓó ɔ gbo dyí. 27Hwɛ̀ ké ɔ cɛ̃ɛ wa gbo, ké ɔ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá ɓě nyɔ ɖò-ɖò séín mɛ jìnììn gàsíà gbo, ɓɛ́ ɔ ké jàɖàìn-hwɔ̀ɖɔ̀ɔ̀ múin té, ɓɛ́ ɔ ké ɔ ɖíí-gàà ɓě kè ɔ ɓǎto ɓě ɔ kè ɔ mǔè ɓě ɖáɓá.” 28Hwɛ̀ ké Ɖíìváà-nyɔ̀ ɓěɔ̀ nyu ɖɛ ɓɛ́ Mózè cɛ̃ ma kà wa gboɛ. Ké Éézùɖùɛ̀-nyɔ̀ ɓěɔ̀ nyɔ ɓɛ́ìn ma táázĩ̀ìn tã jǔɛ kɛɛ mɛ́ ma ɓó wéa ɓaɖa. 29Ké Mózè cɛ̃ɛ ma Ɖíìváà-nyɔ̀ ɓěɔ̀ gbo, ké ɔ ɖá, “Ɓě ɖǎ wáká kpá ɓó Bounɓoɔ̀ bìì ɓó zɛ̃̌ɛ̀, sepóɛɖé ɓě ɖǎ ɓě mìɔùn nììn ɖíí ɓěɔ̀ gbo vɔ̃. Ɔ jèɛɛ, Bounɓoɔ̀ mu ɓě mana kɔ̃ poùn ɓó zɛ̃̌ɛ̀.”
30Wéɔ̀ nyɔ kɔ ma ɓó dyíɛɛ, Mózè cɛ̃ɛ ma nyɔ ɓěɔ̀ gbo, ké ɔ ɖá, “Nàmàǔn ɓɛ́ ɓě nyuà kɛɛ ɓúá kpéín mìɔ. Ɔ jèɛɛ, ní mu ɖé toɖoɔ̀ dya muùn ɖe ɖé Bounɓoɔ̀ gbo, ɓɛ́ ḿ ké ɔ ɓaà. Ti ɖíɛ́ ɓě ní, ɔ mu dyɛ̀ ɓěɛ̀ nàmàǔnɔ̀ kɔ̃in zĩ̀ìn.” 31Ɔ jèɛɛ, Mózè mu ma ɖé Bounɓoɔ̀ gbo ɖe, ké ɔ ɖá, “Ɓɔ̌ɔ̀, nàmàǔn ɓɛ́ nyɔ ɓěɔ̀ ɖǎà nyuɛɛ ɓúá kpéín mìɔ cá! Wa ɖǎ wa mìɔùn bìì kũùn-kpò ɖò mɛ sɔ̀ìn ɖé góò mú. 32Kɛɛ ɓó kàǔn wɛ̃ɛ, ɓɔ̌ɔ̀, ní ɓaà m̀ ní, zĩ̀ìn waà nàmàǔnɔ̀ kɔ̃in. Ɔ jǔ ké ɔ se ná nìɛ̀ ɓɛ́ìn ní, nìí, zà níǐn nyɛ́nɛ́ɔ̀ ɖé céè-ɖɛ̀ kɔ̃̀ mú m̀ ɖǎà nì nyɔ ɓěɔ̀ nyɛ́nɛ́ céèɛ.”
33Ké Bounɓoɔ̀ cɛ̃ɛ ma ɔ gbo, ké ɔ ɖá, “Nyɔ mɔ̀ nyɔ ɓɛ́ ɔ nyu ḿ nàmàǔn bũ̌ɛɛ, ɔ kɔ̃̀ nyɛ́nɛ́ ɖéɛ̀ ní mu ɖé ní céè-ɖɛ̀ɔ̀ mú zàùn. 34Ɓó kàǔn wɛ̃ɛ, mu, ɓɛ́ m̀ ké nyɔ ɓěɔ̀ nàìn, ɓɛ́ m̀ ké wa ɓóɖó kɔ̃̀ jè ḿ ɖǎ ma kà cɛ̃ɛ mú kpa. Ɔ mɛ nì m̀ hwìɖǐi kà ní ínjàɔ̀ mu ɓó m̀ dyúa nììn nyɛ. Kɛɛ wɛ̃́ɛ́ kɛɛ, ti ɖò mu dyiìn, ɓɛ́ ḿ ké nyɔ ɓěɔ̀ gǎ kɔ̃ tò ɓó waà nàmàǔnɔ̀ jè.”
35Ti ɓɛ́ tiɔ̀ nyini ma ɓóɛɛ, Bounɓoɔ̀ tò ma nyɔ ɓěɔ̀ nyɔ-gǎ-dyéìn-ɖɛ̀ ɖò kɔ̃, sepóɛɖé wa kpɔ̃̀ìn ma Eɖóún ganaún ɓó góò-ɓìɖǐ-dyùɔ̀ nyu jè.
Currently Selected:
Ɛ́séɖɔ̀ 32: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
Ɛ́séɖɔ̀ 32
32
Góò-ɓìɖǐ-dyùɔ̀
(Dìtɔ̀wáɖánámɛ̀ 9:6-29)
1Ti ɓɛ́ Éézùɖùɛ̀-nyɔ̀ ɓěɔ̀ hwòɖǒ ɖǎ ma mú nyíní, ké wa se ma Mózè toɖoɔ̀ dya sɔ̀ɔ̀ dyéɛń nìɛɛ, púɛɛ, wa poìn ma dyí ɓó Eɖóún gbo, ké wa ɖá, “Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké gàa mɔ̀à Mózè zà ma kà à ɖé Íjè-ɓòɖòɔ̀ kɔ̃ɛɛ gbo kpáa dyí dyuò.”
2Ké Eɖóún cɛ̃ɛ ma wa gbo, ké ɔ ɖá, “Ɓě zà ɓěɛ̀ gmàà ɓěɔ̀ kè ɓěɛ̀ dyú-gàà ɓěɔ̀ kè ɓěɛ̀ dyú-màà ɓěɔ̀ góò-ɖùǔn-po-ɖɛ̀ ɓě ɖùǔn, ɓɛ́ ɓě kéɛ ḿ gbo dyà.” 3Ɔ jèɛɛ, nyɔ séín ɓěɔ̀ zà ma waà góò-ɖùǔn-po-ɖɛ̀ ɓěɔ̀ ɖùǔn, ké wa dyàà ma Eɖóún gbo. 4Ké ɔ ɖú ma góò wa dyà ma kà ɔ gboɛɛ dyí, ké ɔ ɖèɛ̀n ma, ké ɔ mɛɛ ma ɖɛ hwɔìn ɓìɖǐ-dyù ɖò mú.
Hwɛ̀ ké Éézùɖùɛ̀-nyɔ̀ ɓěɔ̀ cɛ̃ìn cɛ̃̀ìn ma gbo, ké wa ɖá, “Ɓěà gèɖèpɔ́ɔ̀ ɓɛ́ ɔ zà ma kà ɓěà ɖé Íjè-ɓòɖòɔ̀ kɔ̃ɛɛ, ɔ kɛà kɛ̀.”
5Ti ɓɛ́ Eɖóún dyéɛ ma kɛɛ, ɔ nyu ma sáa-kɔ̃-zàìn-gbàà ɖò ɓó ɓìɖǐ-dyùɔ̀ dyúa, ké ɔ po ma wuɖui, ké ɔ ɖá, “Ɓěà mu hwɔ ɖò paùn Bounɓoɔ̀ bìì ɓó gàɖàà.” 6Ɔ jèɛɛ, wéɔ̀ nyɔ kɔ ma ɓó dyíɛɛ, nyɔ ɓěɔ̀ sɔ̀ ma dyí ɓó gànà-kṹún mɛ̀nɛ̀ɛ̀, ké wa nyu ma fɔ̃ɔ-sàǎ-zàìn-ɖɛ̀ ɓě kè gbo-kpɔ̃ìn-sàǎ-zàìn-ɖɛ̀ ɓě. Sɔ̀ìn ɓóɛ gboɛɛ, wa kò ma dyi, ké wa ɖi ma ɖɛ, ké wa ná ma, ké wa po ma gbàɖàùn ɓó pá dyúáɖòɔ̀ mú.
7Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá, “Mu ɖé ɓíɖíi wàɖà, sepóɛɖé nì nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ɛɛ ɖǎ wa mìɔùn dyíin nyìnììn. 8Ɔ se hwèɖèìn ké wa ɖǎ ɖɛ ɓě ɓɛ́ ḿ pòìn ma wa náún wɛ̃ɛ kɔ̃ín pòìn. Wa ɖǎ wa mìɔùn bìì kũùn-kpò hwɔìn ɓìɖǐ-dyù ɖò kɛɛ mɛ, ké wa ɖǎa dyúa dú hwuɖu taɓa, ké wa ɖǎa gbo sáa zà. Ké wa ɖǎa gbo cɛ̃ìn cɛ̃̀ìn, ké wa ɖá, ‘Ɓěà gèɖèpɔ́ɔ̀ ɓɛ́ ɔ zà ma kà ɓěà ɖé Íjè-ɓòɖòɔ̀ kɔ̃ɛɛ, ɔ kɛà kɛ̀.’ 9Ḿ ɖǎ nyɔ ɓěɔ̀ dyé kà wa mɔ̀ dú-kùmù-nyɔ̀ ɓě kɛ. 10Ɔ jèɛɛ, sɔ̀ìn ḿ hwìǐ, sepóɛɖé ḿ kpáìn wa dyoɖoún mìɔ, ké ní mu wa mú gbɔɔ̀ùn. Ɔ ɖǎ ná nìǐn, ní mu ɓóɖó-dù vɛ̀nɛ̀ ɖò nyuùn sɔ̀ìn ɖé m̀ mú.”
11Kɛɛ Mózè ɓaà ma Bounɓo mɔ̀à ɔ Gèɖèpɔ́ɔ̀ kɛ, ké ɔ ɖá, “Óó Bounɓo, ɖɛ́ kɔ̃̀ jè m̀ kéà nì nyɔ ɓě ɓɛ́ m̀ zà ma kà ɖé Íjè-ɓòɖòɔ̀ kɔ̃ ɖé nì gana-sɔ̃̀ɔ̀ múɛɛ ná dyoɖoún kpáìn nyɛ́? 12M̀ dyiɛ náa nyuín, nìí, Íjè-nyɔ̀ ɓěɔ̀ muɛ cɛ̃ìn, ɓɛ́ wa ké níiń, ‘Gèɖèpɔ́ɔ̀ ɓéɖé ma wa hwòɖǒ gbà jè, ké ɔ zà ma kà wa nɔ̄ Íjè-ɓòɖòɛ̀ kɔ̃ɛ̀, ɔ mɔ̀ ɓɛ́ ɔ ké wa ɖé toɖo ɓěɔ̀ gbo ɖáɓáìn, ɓɛ́ ɔ ké wa ɓóɖó-kpàà kɔ̃ dyi sámá jè.’ Ɔ jèɛɛ, ɓɔ́ɔ náa nyuɛ. M̀ mɛ kpɔ̃ nì dyoɖo-hwòɖò ku wɔ̃ɔ̀ dyí, ké m̀ mɛ ɓɔ́ nì nyɔ ɓěɔ̀ ɖɛ gbà ɓɛ́ m̀ sɔ́à dyíɛɛ kɔ̃ dyàà. 13Ɖɛ m̀ ɖáìn zɔ̃̌ɔ̀ kà nì gbo-nì-nyɔ̀ ɓě mɔ̀à Ééɓòɖòhɛ̃́ɛ̀ kè Áázè ɔ kè Éézùɖùɛ̀ kɛɛ nyɛ́nɛ́ín nyɛɛ jè mɛ nì m̀ hwìɖǐi. M̀ gboò zɔ̃̌ɔ̀ nì kpéɔ̀ dyí, ké m̀ ɖá, ‘Ní mu ɓěɛ̀ xwíníín-dyù ɓě nyuùn ɓɛ́ wa ké dyí vò kà dɛ̀nɛ̀ mɛ́nɛ́ɛ́ ɓě nìà ɖé dyɔɔ̀ dyíɛɛ jĩ̀à kɛ. Ké ní mu ɓěɛ̀ xwíníín-dyù ɓěɔ̀ ɓóɖó ɓɛ́ ḿ ɖáìn wa nyɛ́nɛ́ín nyɛɛ nyíìn, ké ɔ mu waà kɔ̃̀ɔ̀-ɖɛ̀ jǔùn kánáá pū.’ ” 14Hwɛ̀ ké Bounɓoɔ̀ dyoɖo-hwòɖòɔ̀ wáɖá ma, ké ɔ se ma mú-gbɔɔ̀-gbɔɔ̀ kɔ̃̀ jè ɔ cɛ̃ ma kàa wa kɔ̃ dyà ɖe.
15Ti ɓɛ́ Bounɓoɔ̀ ɖǎ ma Mózè gbo wùɖùɛ̀ hwɔɛɛ, Mózè sɔ̀ ma dyí, ké ɔ ɖú ma toɖoɔ̀ dèɖě kpàǐ. Sɔ́ɔ́-pĩ̀à sɔ̃́ kɔ̃̀ kɔ̃ ɓɛ́ gma ɓěɔ̀ céè ma kà kɛɛ nì ma ɔ xwa. Gma ɓěɔ̀ céè ma sɔ́ɔ́-pĩ̀à ɓěɔ̀ wáká sɔ̃́ɔ̀ xwíníín kèɛ̀ kɔ̃ún. 16Gèɖèpɔ́ɔ̀ mìɔùn mɔ̀ nyɔ nɔ̀mɔ̀ìn ma sɔ́ɔ́-pĩ̀à ɓěɔ̀ xwa, ké ɔ mìɔùn mɔ̀ nyɔ céè ma gma ɓěɔ̀ ɓó wa kɔ̃.
17Ti ɓɛ́ Mózè dyɛ̀ìn ma Jasúé, ké wa nì ma toɖoɔ̀ dèɖěɛń nyɛɛ, Jasúé wɔ̃́ ma nyɔ ɓěɔ̀ kuɖu-kuɖuɔ̀, ké ɔ cɛ̃ɛ ma Mózè gbo, ké ɔ ɖá, “Toɛ̀ jĩ̌ nì dyiɛń ɖé jàɖàìn-hwɔ̀ɖɔ̀ɔ̀ mú.”
18Ké Mózè ɖá, “Jĩ̌ɔ̀ se to-ɖu-ɖuɛ̀ múà-jĩ̌, mɔɔ ké ɔ se nyɔ ɓě ɓɛ́ to ɖǎ ɖuɛɛ jĩ̌. Kɛɛ ɔ mɔ̀ wɛ́ɖɛ́-wùɖù ɖé ḿ wɔ̃́à kɛ̀.”
19Ti ɓɛ́ Mózè nìǎ ma jàɖàìn-hwɔ̀ɖɔ̀ɔ̀ dyáuń, ké ɔ dyé ma ɓìɖǐ-dyùɔ̀, ké ɔ dyé ma nyɔ ɓěɔ̀ wɛ́ɖɛ́ kpáa kɛɛ, ɔ kpá ma dyoɖoún mìɔ, ké ɔ ɓaɖa ma sɔ́ɔ́-pĩ̀à ɓě nì ma kà ɔ xwaún wɛ̃ɛ ɓíɖíí ɓó toɖoɔ̀ dyéɖé zɔ̃̌, ké wa wɛ̀ìn ma dyi. 20Ké ɔ ɖú ma ɓìɖǐ-dyù ɓɛ́ wa nyu ma kà kɛɛ dyí, ké ɔ ɖèɛ̀n ma, ké ɔ nyuɛ ma pù-ɓóɖó nìɛ̀-nìɛ̀ mú, ké ɔ mɛ́nɛ́ìn ma pù-ɓóɖó nìɛ̀-nìɛ̀ɔ̀ ɓó Éézùɖùɛ̀-nyɔ̀ ɓěɔ̀ náá-nìɔ̀ kɔ̃ dyi, ké ɔ kpɔ̃̀ìn ma wa ganaún, ɓɛ́ wa ké níɔ̀ ná. 21Hwɛ̀ ké ɔ diè ma Eɖóún dyi, ké ɔ ɖá, “Ɖɛ́ nyɔ ɓěɛ̀ nyu m̀ bũ̌ jè, ɓɛ́ m̀ dyià wa nàmàǔn ɓɛ́ kà nìà kɛɛ mú poɛ́?”
22Ké Eɖóún jǔ ma ɔ gɔ̃̌, ké ɔ ɖá, “Ɓɔ̌ɔ̀, mɔ̀ǔn ɖá ɓɛ́ m̀ ké dyoɖoún kpá. M̀ mìɔùn dyuò kà nyɔ ɓěɛ̀ hwòɖǒ jìnììn ɖɛ gbà nyu jè kɔ̃ɛ. 23Wa cɛ̃ɛ ma ḿ gbo, ké wa ɖá, ‘Nyu à bìì gèɖèpɔ́ɔ̀, ɓɛ́ ɔ ké à nàìn, sepóɛɖé à se ɖɛ ké gàa mɔ̀à Mózè zà ma kà à ɖé Íjè-ɓòɖòɔ̀ kɔ̃ɛɛ gbo kpá kɛɛ dyuò.’ 24Ɔ jèɛɛ, ḿ cɛ̃ɛ ma wa gbo, ké ḿ ɖá, ‘Nyɔ mɔ̀ nyɔ ɓɛ́ ɔ ɓéɖé góò-bɛ̃̀ìn-ɖɛ̀ kɛɛ mɛ zàà bũ̌in.’ Ké wa nyí ma waà góò-bɛ̃̀ìn-ɖɛ̀ ɓěɔ̀ ḿ, ké ḿ poɛ ma dyéɖé, ké ɓìɖǐ-dyù nìà kɛ sɔ̀à ɓó kɛ̀.”
25Ti ɓɛ́ Eɖóún ɖǎ ma wùɖùɛ̀ hwɔɛɛ, Mózè dyéɛ ma kà Eɖóún ɖǎa nyu ké nyɔ ɓěɔ̀ se dyí kpɔ̃ɔ ɓɛ́ìn, ké ɖɛ nìà kɛ ɖǎa nyu ké wa ɖǎ dyɔ́-cù jǔ ɖé waà mú-nyɛ́-nyɔ̀ ɓěɔ̀ gboɛ. 26Ɔ jèɛɛ, Mózè nyànà ma ɓó jàɖàìn-hwɔ̀ɖɔ̀ɔ̀ dyáìn-naínɔ̀ dyi, ké ɔ ɖá, “Nyɔ kã̀ìn séín ɓɛ́ wa nì ɖé Bounɓoɔ̀ nììn wáká kɔ̃ɛɛ mɛ dyi nɔ̄ ḿ gbo.” Ké Ɖíìváà-nyɔ̀ séín ɓěɔ̀ poìn ma ɓó ɔ gbo dyí. 27Hwɛ̀ ké ɔ cɛ̃ɛ wa gbo, ké ɔ ɖá, “Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖá ɓě nyɔ ɖò-ɖò séín mɛ jìnììn gàsíà gbo, ɓɛ́ ɔ ké jàɖàìn-hwɔ̀ɖɔ̀ɔ̀ múin té, ɓɛ́ ɔ ké ɔ ɖíí-gàà ɓě kè ɔ ɓǎto ɓě ɔ kè ɔ mǔè ɓě ɖáɓá.” 28Hwɛ̀ ké Ɖíìváà-nyɔ̀ ɓěɔ̀ nyu ɖɛ ɓɛ́ Mózè cɛ̃ ma kà wa gboɛ. Ké Éézùɖùɛ̀-nyɔ̀ ɓěɔ̀ nyɔ ɓɛ́ìn ma táázĩ̀ìn tã jǔɛ kɛɛ mɛ́ ma ɓó wéa ɓaɖa. 29Ké Mózè cɛ̃ɛ ma Ɖíìváà-nyɔ̀ ɓěɔ̀ gbo, ké ɔ ɖá, “Ɓě ɖǎ wáká kpá ɓó Bounɓoɔ̀ bìì ɓó zɛ̃̌ɛ̀, sepóɛɖé ɓě ɖǎ ɓě mìɔùn nììn ɖíí ɓěɔ̀ gbo vɔ̃. Ɔ jèɛɛ, Bounɓoɔ̀ mu ɓě mana kɔ̃ poùn ɓó zɛ̃̌ɛ̀.”
30Wéɔ̀ nyɔ kɔ ma ɓó dyíɛɛ, Mózè cɛ̃ɛ ma nyɔ ɓěɔ̀ gbo, ké ɔ ɖá, “Nàmàǔn ɓɛ́ ɓě nyuà kɛɛ ɓúá kpéín mìɔ. Ɔ jèɛɛ, ní mu ɖé toɖoɔ̀ dya muùn ɖe ɖé Bounɓoɔ̀ gbo, ɓɛ́ ḿ ké ɔ ɓaà. Ti ɖíɛ́ ɓě ní, ɔ mu dyɛ̀ ɓěɛ̀ nàmàǔnɔ̀ kɔ̃in zĩ̀ìn.” 31Ɔ jèɛɛ, Mózè mu ma ɖé Bounɓoɔ̀ gbo ɖe, ké ɔ ɖá, “Ɓɔ̌ɔ̀, nàmàǔn ɓɛ́ nyɔ ɓěɔ̀ ɖǎà nyuɛɛ ɓúá kpéín mìɔ cá! Wa ɖǎ wa mìɔùn bìì kũùn-kpò ɖò mɛ sɔ̀ìn ɖé góò mú. 32Kɛɛ ɓó kàǔn wɛ̃ɛ, ɓɔ̌ɔ̀, ní ɓaà m̀ ní, zĩ̀ìn waà nàmàǔnɔ̀ kɔ̃in. Ɔ jǔ ké ɔ se ná nìɛ̀ ɓɛ́ìn ní, nìí, zà níǐn nyɛ́nɛ́ɔ̀ ɖé céè-ɖɛ̀ kɔ̃̀ mú m̀ ɖǎà nì nyɔ ɓěɔ̀ nyɛ́nɛ́ céèɛ.”
33Ké Bounɓoɔ̀ cɛ̃ɛ ma ɔ gbo, ké ɔ ɖá, “Nyɔ mɔ̀ nyɔ ɓɛ́ ɔ nyu ḿ nàmàǔn bũ̌ɛɛ, ɔ kɔ̃̀ nyɛ́nɛ́ ɖéɛ̀ ní mu ɖé ní céè-ɖɛ̀ɔ̀ mú zàùn. 34Ɓó kàǔn wɛ̃ɛ, mu, ɓɛ́ m̀ ké nyɔ ɓěɔ̀ nàìn, ɓɛ́ m̀ ké wa ɓóɖó kɔ̃̀ jè ḿ ɖǎ ma kà cɛ̃ɛ mú kpa. Ɔ mɛ nì m̀ hwìɖǐi kà ní ínjàɔ̀ mu ɓó m̀ dyúa nììn nyɛ. Kɛɛ wɛ̃́ɛ́ kɛɛ, ti ɖò mu dyiìn, ɓɛ́ ḿ ké nyɔ ɓěɔ̀ gǎ kɔ̃ tò ɓó waà nàmàǔnɔ̀ jè.”
35Ti ɓɛ́ tiɔ̀ nyini ma ɓóɛɛ, Bounɓoɔ̀ tò ma nyɔ ɓěɔ̀ nyɔ-gǎ-dyéìn-ɖɛ̀ ɖò kɔ̃, sepóɛɖé wa kpɔ̃̀ìn ma Eɖóún ganaún ɓó góò-ɓìɖǐ-dyùɔ̀ nyu jè.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.