Ɛ́séɖɔ̀ 30

Gbàà mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naín nyɛ

(Ɛ́séɖɔ̀ 37:25-28)

1Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Éézùɖùɛ̀-dyù ɓěɔ̀ mɛ nyu gbàà ɖò ɓó nyɔ́ún-nɔ̀mɔ̀-ɖɛ̀ fɔ̃̀ìn-naín jè. Cu wa mɛ nyùɛ̀n nyɛɛ mɛ mɔ̀ àkésìà-cù. 2Gbààɔ̀ wáká hĩinyɛɔ̀ mɛ ɓɛ́ìn wɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ sɔ̃́, ké ɔ dya-tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ hĩinyɛ. Gbààɔ̀ kè ɖɛ hwɔìn nimii-gmɛ̌ ɓě nìà ɔ gã hĩinyɛɔ̀ kɔ̃ɛɛ mɛ mɔ̀ ɖɛ dyúáɖò. 3Ɔ ɖǎ ná nìǐn, wa mɛ po gbààɔ̀ kɔ̃in kèɛ̀ bũ̌in dà séín kèɛ̀ gmɛ̌ ɓěɔ̀ góò hwɛ̀ zɛ̀nɛ̌ǐn bũ̌in, ɓɛ́ wa kéɛ góò-kpã̀ wĩin dè. 4Ké wa mɛ nyu góò-gbɛ̌ɛ̀ sɔ̃́ ɓó gbààɔ̀ bìì, ɓó góò-kpã̀ɔ̀ xwíɖíi. Wa mɛ nìɛ̀ wáká sɔ̃́ ɓɛɖɛìn dyíɛɛ kɔ̃, ɓɛ́ wa ké wa cu-kpóɖó ɓě wa ké gbààɔ̀ ɓéɖéìn nyɛɛ mú sṹ. 5Cu-kpóɖó ɓěɔ̀ mɛ mɔ̀ àkésìà-cù, ké wa mɛ po wa góò bũ̌in. 6Ɔ ɖǎ ná nìǐn, wa mɛ dè gbààɔ̀ ɓó faà-ɖɔ̀ zĩ̀àìn gma-gbɔ̀ɖɔ̀ɔ̀ dyíɛɛ dyúa. Ɔ mɔ̀ gma-gbɔ̀ɖɔ̀ɔ̀ kɔ̃̀ kɔ̃ mɔ̀à ní nyɔ-wìì-kɔ̃-ɓéɖéìn-naínɔ̀ kɛ. Ɔ mɔ̀ dà ɓɛ́ ḿ kè mɔ̀ kéà gmɔ̌ìn nyɛ. 7Ɔ ɖǎ ná nìǐn, Eɖóún mɛ fɔ̃̀ìn nyɔ́ún-nɔ̀mɔ̀-ɖɛ̀ ɓó gbààɔ̀ kɔ̃ ɓó gànà-kṹún ti séín ti ɔ mu ɖáùnpò ɓěɔ̀ xwa nɔ̀mɔ̀ǐn dyiìn nyɛ. 8Ké ɔ mɛ fɔ̃̀ìn ɓó nyɔ́ún-nɔ̀mɔ̀-ɖɛ̀ ɖe ɓó hwìo ti séín ɔ mu ɖáùnpò ɓěɔ̀ dyí kpɔ̃̀ǐn muùn wɛ̃. Eɖóún kè ɔ xwíníín-dyù ɓěɔ̀ mɛ nyu ɖɛ ɓěa, ɓɛ́ nyɔ́ún-nɔ̀mɔ̀-ɖɛ̀ ké fɔ̃ ɓó ḿ dyúa kánáá pū. 9Nyɔ ɖò ní ɖá ɔ ké nyɔ́ún-nɔ̀mɔ̀-ɖɛ̀ ɓɛ́ ḿ se mɔ́ɛɛ ɓó gbààɔ̀ kɔ̃ fɔ̃̀ìn. Nyɔ ɖò ní ɖá ɔ ké fɔ̃ɔ-sàǎ-zàìn-ɖɛ̀ ɖò mɔɔ ɖii-ɖɛ̀-sàǎ-zàìn-ɖɛ̀ ɖò ɓóɛ kɔ̃ fɔ̃̀ìn. Ké nyɔ ɖò ní ɖá ɔ ké náá-ɖɛ̀-sàǎ-zàìn-ɖɛ̀ ɖò ɓóɛ kɔ̃ púè. 10Eɖóún mɛ ɖú nyúà-ɖɛ̀ mɔ̀ nàmàǔn-sàǎ-zàìn-ɖɛ̀ ɖòɛɛ nyɔmɔɔ̀ ɖò dyí, ɓɛ́ ɔ kéɛ gbààɔ̀ gmɛ̌ ɓěɔ̀ bũ̌ po, ɓɛ́ ɔ ké nàmàǔn ɓá gbààɔ̀ jè dyíɛɛ kɔ̃in-ɓáìn-ɖɛ̀ jǔ, ɓɛ́ gbààɔ̀ ké wáká kpá gàná cá ɓó ḿ bìì. Eɖóún kè ɔ xwíníín-dyù ɓěɔ̀ mɛ nyùìn ɖɛ nìà kɛ kpa dyúáɖò ɓó zɔ̃ xwíníín kánáá pū.”

Tácì-wìɖì ɓá Bounɓoɔ̀ jàɖàìn-gbòɔ̀ jè dyíɛ

11Hwɛ̀ ké Bounɓoɔ̀ wùɖù ma Mózè gbo ɖe, ké ɔ ɖá, 12“Ti wa mu Éézùɖùɛ̀-dyù ɓěɔ̀ zɛɖɛìn nyɛɛ, gàa ɖò-ɖò séín mɛ pɛ́ɛ̀ wíɖí ɖò, ɓɛ́ ɔ ké ɔ fɛ̀ɛ̀ɔ̀ gbǎìn-ɖɛ̀ jǔ. Ɔ dyi ná nìǐn, nyɔ-gǎ-dyéìn-ɖɛ̀ ɖò se nyɔ ɓěɔ̀ kɔ̃ dyiɛ́ mu ti ɓɛ́ wa mu wa zɛɖɛìn nyɛ. 13Gàa kã̀ìn séín ɓɛ́ wa mu zɛɖɛìn nyɛɛ mɛ tò séɓàɖà-cɛ̀kò fáún-fáún dyììn ɖé kà sáa-zà-nyɔ̀ ɓěɔ̀ nììn séɓàɖà-cɛ̀kò nyu nìɛ̀ kɛɛ mú. Géwàɖà-pĩ̀à kpáɖá-nyɔ ɖò sɔ̀ cɛ́kò dyúáɖò mú. Cɛ́kò fáún-fáúnɔ̀ mɔ̀ nyíí-ɖɛ̀ ɓó ḿ bìì. 14Ti ɓɛ́ wa mu gàa ɓěɔ̀ zɛɖɛìn nyɛɛ, gàa ɖò-ɖò séín ɓɛ́ ɔ nyuá zɔ̃ kpáɖá-nyɔ mɔɔ zi kɔ̃ɛɛ mɛ nyí ḿ cɛ́kò fáún-fáúnɔ̀. 15Bã-nyɔ̀ ɖò nììn nyíí-ɖɛ̀ɔ̀ mɛ ɓɔ́ cɛ́kò fáún-fáún kɔ̃ ziɛ, ké gǎ-dyé-nyɔ̀ ɖò nììn nyíí-ɖɛ̀ɔ̀ ɓéɖé ɔ ké cɛ́kò fáún-fáúnɔ̀ kɔ̃ nyini wɛ̃́ɛ́. Ɔ mɛ nì ná ti ɓɛ́ wa mu ḿ wíɖí nìà kɛ nyíìn, ɓɛ́ ɔ ké waà nàmàǔn ɓěɔ̀ kɔ̃in-ɓáìn-ɖɛ̀ jǔɛ. 16Wa mɛ kpɔ̃ nàmàǔn-kɔ̃in-ɓáìn-wìɖìɔ̀ Éézùɖùɛ̀-dyù ɓěɔ̀ xwaún, ɓɛ́ wa kéɛ ní jàɖàìn-gbòɔ̀ kũ̀à nyùìn. Wíɖí nìà kɛ muɛ nyuùn ɓɛ́ Éézùɖùɛ̀-dyù ɓěɔ̀ jè ké ḿ hwìɖǐi dyi, ɓɛ́ ḿ ké wa kɔ̃in zĩ̀ìn.”

Mú-dèɖèìn-ɖɛ̀ ɓɛ́ ɔ mɔ̀ bàɖàsǐ kɛ

17Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 18“Éézùɖùɛ̀-dyù ɓěɔ̀ mɛ ɖú bàɖàsǐ dyí, ɓɛ́ wa kéɛ mú-dèɖèìn-ɖɛ̀ ɖò kèɛ̀ kɔ̃-dè-ɖɛ̀ mú nyu. Ké wa mɛ dèɛ̀ ɓóɛ jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ muà dyéìn nyɛ kè sáa-kɔ̃-zàìn-gbààɔ̀ pṹa, ɓɛ́ wa kéɛ ní mú po. 19Ɖéɛ̀ Eɖóún kè ɔ dyú-gàà ɓěɔ̀ mɛ dèɖèìn waà ɓo kè sɔ̃ dyi. 20Wa mɛ nyuɛ náa, hwɛ̀ ɓɛ́ wa ké ɖé jàɖàìn-gbòɔ̀ mú dyá, mɔɔ hwɛ̀ ɓɛ́ wa ké sáa-kɔ̃-zàìn-gbààɔ̀ bũ̌in xwɛ̃́ìn ɓó sáa-zàìn-ɖɛ̀ fɔ̃ jè, wa ní kɔ̃̀ ɖà mɛ́. 21Wa ɓéɖé wa ké waà ɓo kè sɔ̃ ɓěɔ̀ dyi dèɖè, nìí, wa ní kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó Eɖóún kè ɔ xwíníín-dyù ɓěɔ̀ bìì.”

Bũ̌-po-cànàɔ̀

22Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, 23“Wa mɛ ɖú nyɔ́ún-nɔ̀mɔ̀-ɖɛ̀-dù kò-kò ɓě dyí dyììn ɖé sáa-zà-nyɔ̀ ɓěɔ̀ nììn pṹá-dyèɖè mú. Nyɔ́ún-nɔ̀mɔ̀-ɖɛ̀ ɓěɔ̀ mɛ mɔ̀ mɛ́ɛ̀-nì kɔ̃̀ xwa-ku-ku ɖu pṹá-dyèɖè ɓaɖa-bùè sè sɔ̃́ kɛ kè sínímà kɔ̃̀ xwa-ku-ku ɖu pṹá-dyèɖè mɛ̀nɛ̌ìn-ɖò kɛ kè kĩ́ìn kɔ̃̀ xwa-ku-ku ɖu pṹá-dyèɖè mɛ̀nɛ̌ìn-ɖò kɛ 24ɔ kè kàsíà kɔ̃̀ xwa-ku-ku ɖu pṹá-dyèɖè ɓaɖa-bùè sè sɔ̃́ kɛ. Wa mɛ caìn ɖɛ ɓěɛ̀ kè ɔ́ɖè-cànà kópò-wè ɓaɖa-bùè sè mɛ̀nɛ̌ìn-ɖò, 25ɓɛ́ wa kéɛ bũ̌-po-cànà hwɛ̀ǐn-hwɛ̀ǐn mú nyu. Wa mɛ poìn wa dyí kà nyɔ́ún-nɔ̀mɔ̀-cànà nyu-nyɔ̀ nyuà kɛ, ɓɛ́ ɔ ké bũ̌-po-cànà hwɛ̀ǐn-hwɛ̀ǐn jǔ. 26Ɔ ɖǎ ná nìǐn, m̀ mɛ nyùɛ̀n kũ̀à mú, ɓɛ́ m̀ kéɛ ní jàɖàìn-gbòɔ̀ kè gma-gbɔ̀ɖɔ̀ɔ̀ 27kè téɓèɖèɔ̀ kè kũ̀à-mú-nyùìn-ɖɛ̀ séín ɓá téɓèɖèɔ̀ dyíɛ kè ɖáùnpò-kɔ̃-dè-ɖɛ̀ɔ̀ kè kũ̀à-mú-nyùìn-ɖɛ̀ séín ɓá ɖáùnpò-kɔ̃-dè-ɖɛ̀ɔ̀ dyíɛ kè nyɔ́ún-nɔ̀mɔ̀-ɖɛ̀ kɔ̃-fɔ̃̀ìn-gbààɔ̀ 28kè sáa-kɔ̃-zàìn-gbààɔ̀ kè kũ̀à-mú-nyùìn-ɖɛ̀ séín ɓá sáa-kɔ̃-zàìn-gbààɔ̀ dyíɛ ɔ kè mú-dèɖèìn-ɖɛ̀ɔ̀ kèɛ̀ kɔ̃-dè-ɖɛ̀ɔ̀ bũ̌ po. 29M̀ mɛ po wa wáká, ɓɛ́ wa ké mú hwɛ̀. Nìí, ɖɛ kã̀ìn séín mu wa dyi tìnììn nyɛɛ, ɖɛ gbà ɖò mu ɔ gbo kpáùn. 30Ké m̀ mɛ po Eɖóún kè ɔ dyú-gàà ɓěɔ̀ cánáɔ̀ ɖò dúún, ɓɛ́ m̀ ké wa wáká po, ɓɛ́ wa ké ní sáa-zà-nyɔ̀ ɓě jǔ. 31M̀ mɛ cɛ̃ɛ Éézùɖùɛ̀-dyù ɓěɔ̀ gbo kà wa kè waà xwíníín-dyù ɓěɔ̀ mɛ nyùìn bũ̌-po-cànà hwɛ̀ǐn-hwɛ̀ǐn nìà kɛ kũ̀à mú ɖé ní kũ̀à-kpàɔ̀ dyí kánáá pūɛ. 32Nyɔ ɖò ní ɖá ɓɛ́ ɔ kéɛ nyɔ séín bũ̌ po pū, mɔɔ ké nyɔ ɖò ní ɖá ɓɛ́ ɔ ké cáná tɔ̀ɔ̀ ɓě caìn kà wa nyuà cáná nìà kɛ caìn nyɛ. Ɔ hwɛ̀ mú, ké ɔ mɛ mɔ̀ mú-hwɛ̀-cànà ɖé wa dyéɖéín. 33Nyɔ mɔ̀ nyɔ mu kà nyɔ́ún-nɔ̀mɔ̀-cànà ɖò caìn nyuùn wɛ̃ mɔɔ nyɔ mɔ̀ nyɔ ɓɛ́ ɔ muɛ nyɔ ɖò ɓɛ́ ɔ se sáa-zà-nyɔ̀ kɛɛ bũ̌ poùn wɛ̃ɛ, wa ɓéɖé ɓɛ́ wa ké nyɔɔ̀ woɖo gbo cɛ̃.”

Nyɔ́ún-nɔ̀mɔ̀-ɖɛ̀ ɓɛ́ wa fɔ̃ɛ

34Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Wa mɛ ɖú nyɔ́ún-nɔ̀mɔ̀-ɖɛ̀ kò-kò ɓě dyí. Wa mɛ mɔ̀ sáɖátè kè ɔ́nécà kè gáɓànɔ̀ ɔ kè fánákésĩ̀ìn ɓɛ́ wa se ɖɛ ɖò caìn nyɛ. Wa ɖò-ɖòɛ̀ xwa-ku-ku mɛ ɓɛ́ìn wɔ̃. 35Wa mɛ caìn ɖɛ ɓěɛ̀ kà nyɔ́ún-nɔ̀mɔ̀-cànà nyu-nyɔ̀ nyuà kɛ, ɓɛ́ wa ké wa nyɔ́ún-nɔ̀mɔ̀-ɖɛ̀ ɓɛ́ nyɔ fɔ̃ɛɛ mú nyu. Ké wa mɛ po ɖé tɔ̃́, ɓɛ́ tɔ̃́ɔ̀ kéɛ nyu ɓɛ́ ɔ ké mú hwɛ̀, ɓɛ́ ɔ ké ɖɛ kpa. 36Ɔ ɖǎ ná nìǐn, wa mɛ nyuɛ ɖò pù-ɓóɖó nìɛ̀-nìɛ̀ mú, ɓɛ́ wa kéɛ ɓóɛ gma-gbɔ̀ɖɔ̀ɔ̀ dyúa dyi mɛ́nɛ́ìn ɖé ní jàɖàìn-gbòɔ̀ mú, dɛ̀ ḿ kè wa kéà gmɔ̌ìn nyɛ. Ɔ mɛ mɔ̀ ɖɛ ɓɛ́ ɔ hwɛ̀ mú mìɔ ɖé wa dyéɖéín nyɛ. 37Nyɔ ɖò ní ɖá ɓɛ́ ɔ ké ná nyɔ́ún-nɔ̀mɔ̀-ɖɛ̀ ɖò caìn nyu ɓó ɔ mìɔùn bìì. Wa mɛ dyé ɖɛ nìà kɛ kpéín kà ɔ kpá wáká ɓó ḿ bììɛ. 38Nyɔ mu ná ɖɛ nì kàà ɖò nyuùn, ɓɛ́ ɔ ké ɔ fiè-cànà jǔɛɛ, wa ɓéɖé ɓɛ́ wa ké nyɔɔ̀ woɖo gbo cɛ̃.”

Currently Selected:

Ɛ́séɖɔ̀ 30: ƁB02

Highlight

Copy