Ɛ́séɖɔ̀ 28

Sáa-zà-nyɔ̀ ɓěɔ̀ mú-po-ɖɔ̀

1Hwɛ̀ ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Nyuɛ ɓɛ́ wa ké Eɖóún mɔ̀à nì ɖíí-gààɔ̀ kɛ kè ɔ dyú-gàà ɓě mɔ̀à Náɖà kè Àbíhùɛ̀ kè Ɛ̀ɖɛ̀ázà ɔ kè Ìfámà kɛɛ Éézùɖùɛ̀-dyù ɓěɔ̀ hwìɛ̀ zà, ɓɛ́ wa ké wa ɓó m̀ dyúa dyà, ɓɛ́ m̀ ké wa wáká po, ɓɛ́ wa ké mú hwɛ̀, ɓɛ́ wa ké ní sáa-zà-nyɔ̀ ɓě jǔ. 2Nyu mú-po-ɖɔ̀ ɓó m̀ ɖíí-gàà Eɖóún bìì, ɓɛ́ ɔ ké ɖɔ hwɛ̀ǐn-hwɛ̀ǐn jǔ, ɓɛ́ ɔ kéɛ nyu ɓɛ́ Eɖóún ké díɖí kè dya-dè-dè ɓéɖé. 3Cɛ̃ɛ sɛ́ɖɛ́-dyuò-nyɔ̀ séín ɓɛ́ ḿ ɖǎà fɔ̀nɔ̀-hwòɖǒ nyí ɓá ɖɛ nì kà ɓěɛ̀ nyu jè dyíɛɛ gbo, ɓɛ́ wa ké mú-po-ɖɔ̀ ɓěɔ̀ nyu ɓó Eɖóún bìì, ɓɛ́ ɔ ké wáká kpá, ɓɛ́ ɔ ké sáa-zà-kũ̀àɔ̀ nyu ɓó ḿ bìì. 4Kà mú-po-ɖɔ̀ ɓě wa kéà nyu ɓó ɔ bììɛɛ ké nìɛ̀ nyuɛɛ kɛà kɛ̀. Wa mɛ mɔ̀ kɛ́í-jìɖǐ-ɖɛ̀ kè ífɔ̀ kè gã́ùn zɛin kè gã́ùn xwã́-xwã́ ɓɛ́ wa ɖaɓa kɛ kè dúi-bĩìn-ɖɔ̀ ɓɛ́ wa ké páɖá kɛ ɔ kè gbo-jìnììn-ɖɛ̀. Wa mɛ nyu ɖɔ kpa ɖɛ ɓě nìà kɛ ɓó nì ɖíí-gàà Eɖóún kè ɔ dyú-gàà ɓěɔ̀ bìì, ɓɛ́ wa ké sáa-zà-kũ̀àɔ̀ nyu ɓó ḿ bìì. 5Wa mɛ nyùìn mú-po-ɖɔ̀ ɓěɔ̀ ɖénì-ɖɔ̀ nɔ̀mɔ̀ dyíin ɓɛ́ wa ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ.

Ífɔ̀ɔ̀

(Ɛ́séɖɔ̀ 39:2-7)

6“Sɛ́ɖɛ́-dyuò-nyɔ̀ ɓěɔ̀ mɛ ɖú ɖénì-ɖɔ̀ nɔ̀mɔ̀ dyíin dyí, ɓɛ́ wa kéɛ ífɔ̀ɔ̀ mú nyu. Ké wa mɛ ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã ɓóɛ kɔ̃. 7Ífɔ̀ɔ̀ mɛ ɓéɖé ɖúú sɔ̃́ ɓó kɔún, ɓɛ́ wa kéɛ sã̀ìn-ɖɛ̀ jǔ. 8Ké gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin mɛ nìɛ̀ wɔ̃. Gbo-jìnììn-ɖɛ̀ɔ̀ mɛ mɔ̀ ɖénì-ɖɔ̀ nɔ̀mɔ̀ dyíin ɓɛ́ wa ɖàɓàìn góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã kɛ. 9Ɔ ɖǎ ná nìǐn, wa mɛ ɖú ɔ́nɛ̀-sɔ̀ɔ̌ sɔ̃́ dyí, ɓɛ́ wa ké ɓó wa kɔ̃ Éézùɖùɛ̀ɛ̀ dyú-gàà ɓaɖa-bùè sè sɔ̃́ ɓěɔ̀ nyɛ́nɛ́ céè. 10Kà waà wóɖó-wóɖó nyu ɖeín dyi deɛ̀n nyɛɛ, kǎà wa mɛ nyu waà nyɛ́nɛ́ ɓěɔ̀ ɖeín dyi deɛ̀n. Nyɔ mɛ̀nɛ̌ìn-ɖòɛ̀ nyɛ́nɛ́ mɛ nì sɔ́ɔ́-kpò dyúáɖò kɔ̃, ɓɛ́ nyɔ mɛ̀nɛ̌ìn-ɖò tɔ̀ɔ̀ nììn nyɛ́nɛ́ ké sɔ́ɔ́-kpò tɔ̀ɔ̀ kɔ̃ nì. 11Wa dyi nyɛ́nɛ́ ɓěɔ̀ céè ní, wa mɛ nyuɛ kà nyɔ ɓě mɔ̀à ɖɛ-sɔ̃-bɛ̃̀-kɔ̃-pòìn-ɖɛ̀ nyu-nyɔ̀ ɓěɛɛ nyuà kɛ. Ɔ ɖǎ ná nìǐn, wa mɛ dèìn sɔ́ɔ́ sɔ̃́ ɓěɔ̀ góò-dèìn-ɖɛ̀. 12Ké wa ɖǎa náa nyuɛ hwɔ ní, wa mɛ sã̀ìn wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ kɔ̃ dyi, ɓɛ́ wa ké nyɔ-ɖɛ-hwìɖǐi-dyàìn-sɔ̀ɔ̌ ɓě jǔ. Eɖóún mɛ ɓéɖéìn nyɛ́nɛ́ ɓěɔ̀ ɓó ɔ kɔún ɓó ḿ dyúa, ɓɛ́ ɔ ké ḿ ɖɛ-hwìɖǐi-dyàìn-ɖɛ̀ jǔ ɓá Éézùɖùɛ̀-dyù ɓěɔ̀ dyí. 13Ɔ ɖǎ ná nìǐn, wa mɛ nyu góò-gbǎ sɔ̃́ 14kè góò-hwɛ̀-zɛ̀nɛ̌ǐn-cɛ̃̀ɛ̀ sɔ̃́ ɓɛ́ wa kéɛ páná kà ɖúú nìà kɛ. Góò-gbǎ ɓěɔ̀ mɛ ɓá góò-cɛ̃̀ɛ̀ ɓěɔ̀ dyí, ké góò-cɛ̃̀ɛ̀ ɓěɔ̀ mɛ ɓá ífɔ̀ɔ̀ ɖúú ɓě nìà ɓó kɔún wɛ̃ɛ dyí.

Kɛ́í-jìɖǐ-ɖɛ̀ɔ̀

(Ɛ́séɖɔ̀ 39:8-21)

15“Ɔ ɖǎ ná nìǐn, m̀ mɛ nyuɛ ɓɛ́ sɛ́ɖɛ́-dyuò-nyɔ̀ ɓěɔ̀ ké kɛ́í-jìɖǐ-ɖɛ̀ kɔ̃̀ mú ní nyɔ ɓěɔ̀ ké ní mɔ́ɔ́-ɖɛ̀ dyuòɛɛ nyu. Wa mɛ nyùɛ̀n ɖɛ dyúáɖò ɓě wa nyùàìn ífɔ̀ɔ̀ kɛ. Ɖɛ ɓěɔ̀ mɔ̀ ɖénì-ɖɔ̀ nɔ̀mɔ̀ dyíin kè góò kè dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. 16Ɔ wáká hĩinyɛɔ̀ mɛ ɓɛ́ìn wɔ̃, ké ɔ mɛ jaɖaìn kɔ̃. Wáká ɖò-ɖòɛ̀ tɔ̀mɔ̀-tɔ̀mɔ̀ mɛ mɔ̀ jìì-ɓàɖàǎ dyúáɖò. 17Ɔ ɖǎ ná nìǐn, wa mɛ deìn sɔ́ɔ́ kpa ɖɛ dɔ̃̀ǐn hĩinyɛ ɖeín dyi ɓó kɛ́í-jìɖǐ-ɖɛ̀ɔ̀ kɔ̃. Sɔ́ɔ́ ɓě mɛ nì dɔ̃̀ǐn kĩ́ín-kĩ́ínɔ̀ múɛɛ mɛ mɔ̀ wúɖúɓì kè tópà ɔ kè bɛ́wòɖò. 18Sɔ́ɔ́ ɓě mɛ nì dɔ̃̀ǐn sɔ̃́ nììnɔ̀ múɛɛ mɛ mɔ̀ tɔ́kɔ̀ì kè sááfɔ̀ ɔ kè dámɔ̀. 19Sɔ́ɔ́ ɓě mɛ nì dɔ̃̀ǐn tã nììnɔ̀ múɛɛ mɛ mɔ̀ jásɛ̃̀ kè ágè ɔ kè ámɛ́tèɖè. 20Ké sɔ́ɔ́ ɓě mɛ nì dɔ̃̀ǐn hĩinyɛ nììnɔ̀ múɛɛ mɛ mɔ̀ kɛ́ɖɛ́sòɖàì kè ɔ́nɛ̀ ɔ kè jásàpà. Wa mɛ dèìn wa góò. 21Sɔ́ɔ́-kpò ɓaɖa-bùè sè sɔ̃́ ɓěɔ̀ ɖò-ɖò mɛ ɓéɖé Éézùɖùɛ̀ɛ̀ dyú-gàà ɓaɖa-bùè sè sɔ̃́ ɓěɔ̀ ɖò-ɖòɛ̀ nyɛ́nɛ́ kà ɖɛ-sɔ̃-bɛ̃̀-kɔ̃-pòìn-ɖɛ̀ nìà kɛ, ɓɛ́ wa ké Éézùɖùɛ̀-xwèɖè-dù ɓaɖa-bùè sè sɔ̃́ ɓěɔ̀ bìì nì. 22Ɔ ɖǎ ná nìǐn, wa mɛ nyu góò-hwɛ̀-zɛ̀nɛ̌ǐn-cɛ̃̀ɛ̀ sɔ̃́ ɓɛ́ wa kéɛ páná kà ɖúú nìà kɛ, ɓó kɛ́í-jìɖǐ-ɖɛ̀ɔ̀ bìì. 23Ké wa mɛ nyu góò-gbɛ̌ɛ̀ sɔ̃́, ɓɛ́ wa ké wa ɓó kɛ́í-jìɖǐ-ɖɛ̀ɔ̀ gã sɔ̃́ nìà ɖé kɔ̃in nyɛɛ dyí ɓá. 24Ɔ ɖǎ ná nìǐn, wa mɛ ɓá góò-cɛ̃̀ɛ̀ sɔ̃́ ɓěɔ̀ ɓó góò-gbɛ̌ɛ̀ ɓě nìà kɛ́í-jìɖǐ-ɖɛ̀ɔ̀ gã ɓěɔ̀ kɔ̃ɛɛ dyí. 25Ké wa mɛ ɓá góò-cɛ̃̀ɛ̀ ɓěɔ̀ máná tɔ̀ɔ̀ góò-gbǎ ɓě nìà ɓó ífɔ̀ɔ̀ ɖúú ɓě nìà ɓó kɔún wɛ̃ɛ dyí. 26Ɔ ɖǎ ná nìǐn, wa mɛ nyu góò-gbɛ̌ɛ̀ sɔ̃́ ɖò ɖe, ɓɛ́ wa ké wa kɛ́í-jìɖǐ-ɖɛ̀ɔ̀ gã tɔ̀ɔ̀ sɔ̃́ ɓěɔ̀ xwíníín dyi ɓá, hwɔ ɓó ífɔ̀ɔ̀ gbo dyí. 27Ɔ ɖǎ ná nìǐn, wa mɛ nyu góò-gbɛ̌ɛ̀ sɔ̃́ ɖò ɖe, ɓɛ́ wa ké wa ɓó ífɔ̀ɔ̀ ɖúú ɓě nìà ɓó kɔún wɛ̃ɛ gbɔ-sí-naín ɓěɔ̀ dyí ɓá ɓó gbo-jìnììn-ɖɛ̀ ɖaɓa-ɖaɓa nɔ̀mɔ̀ dyíin ɓɛ́ ɔ nìà ífɔ̀ɔ̀ wɔ̃ɛɛ kɔ̃in jɛ́ɛ́. 28Ké wa mɛ sã̀ìn kɛ́í-jìɖǐ-ɖɛ̀ɔ̀ nììn gbɛ̌ɛ̀ sɔ̃́ hwɔà ɖé ɓíɖíi dyíɛɛ ɓó ífɔ̀ɔ̀ nììn gbɛ̌ɛ̀ sɔ̃́ ɓěɔ̀ bũ̌in. Wa mɛ sã̀ìn wa ɖúú ɖàɓàìn kpèɛ̀ ɖò, ɓɛ́ ɔ kè ífɔ̀ɔ̀ gbo-jìnììn-ɖɛ̀ɔ̀ ké dyí deìn, nìí ɓɛ́ kɛ́í-jìɖǐ-ɖɛ̀ɔ̀ ní kɔ̃̀ ɖà ífɔ̀ɔ̀ bũ̌ buɛ̀.

29“Ti séín ɓɛ́ Eɖóún mu ɖé Pá Hwɛ̀ǐn-hwɛ̀ǐnɔ̀ mú dyáùn wɛ̃ɛ, nìí, Éézùɖùɛ̀-xwèɖè-dù ɓěɔ̀ nyɛ́nɛ́ ɓěɔ̀ mu ɓó ɔ kɛ́ dyéɖéí nììn ɓó kɛ́í-jìɖǐ-ɖɛ̀ kɔ̃̀ mú ní nyɔ ɓěɔ̀ ké ní mɔ́ɔ́-ɖɛ̀ dyuòɛɛ kɔ̃, ɓɛ́ ní nyɔ ɓěɔ̀ jè ké ḿ hwìɖǐi nì kánáá pū. 30Ké ɓó kɔ̃in ɖeɛɛ, m̀ mɛ po Dyúwìɖììn kè Túmì#28:30 Dyúwìɖììn kè Túmì mɔ̀ gbo-ɖàɓàìn-ɖɛ̀ ɓě ɓɛ́ sáa-zà-nyɔ̀ vɛ̀nɛ̀ɔ̀ nyùìn kũ̀à mú, ɓɛ́ ɔ ké Gèɖèpɔ́ɔ̀ mɔ́ɔ́-ɖɛ̀ dyuòɛ. ɖé kɛ́í-jìɖǐ-ɖɛ̀ɔ̀ mú, ɓɛ́ wa ké ɓó Eɖóún kɛ́ dyéɖéí nì ti séín ɔ mu ɓó ḿ dyúa dyiìn nyɛ. Dyììn ɖéɛ múɛɛ, nìí, Eɖóún mu ɖɛ kɔ̃̀ mú ɓɛ́ ɔ ké ní mɔ́ɔ́-ɖɛ̀ dyuò ɓá Éézùɖùɛ̀-dyù ɓěɔ̀ jè dyíɛɛ ɓó ɔ kɛ́ dyéɖéí ɓéɖéìn kánáá pū ɓó ḿ dyúa.”

Sáa-zà-nyɔ̀ ɓěɔ̀ mú-po-ɖɔ̀ tɔ̀ɔ̀ ɓěɔ̀ jè

(Ɛ́séɖɔ̀ 39:22-31)

31Ké Bounɓoɔ̀ cɛ̃ɛ ma Mózè gbo ɖe, ké ɔ ɖá, “Gã́ùn zɛin ɓɛ́ ɔ nìà ífɔ̀ɔ̀ xwíɖíiɛɛ mɛ mɔ̀ ɖɔ kɔ̃̀ dyéɖé ɖàɓàìn kpèɛ̀ kɛ. 32Wa mɛ cɛ̃ ɓí ɖò ɓóɛ hwòɖǒǔn, ɓɛ́ ɓó ké dú-pòìn-naín jǔ ɓóɛ mú-po-tìǐn. Ké wa mɛ po ɓíɔ̀ wĩin, ɓɛ́ gã́ùnɔ̀ ní kɔ̃̀ ɖà fá. 33Ké wa mɛ ɖaɓa cu-ɓò kɔ̃̀ nyɛ́nɛ́ mɔ̀à pɔ́mɛ́gàɖànɛ̀ kɛɛ hwɔìn-ɖɛ̀ ɓě ɓó gã́ùnɔ̀ wĩin. Pɔ́mɛ́gàɖànɛ̀ ɓěɔ̀ mɛ mɔ̀ dyèě-ɖúú ɖàɓàìn kpèɛ̀ kɛɛ dú kò-kò ɓě kèɛ̀ dyéɖé zĩ-zã. Ké wa mɛ ɓá góò-kpèè ɓě ɓó pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ pṹa dyi ɓó gã́ùnɔ̀ wĩin dà séín. 34Góò-kpèè ɓěɔ̀ kè pɔ́mɛ́gàɖànɛ̀ɔ̀ hwɔìn-ɖɛ̀ ɓěɔ̀ mɛ ɓaɖaìn múin. 35Eɖóún mɛ po gã́ùn nìà kɛ mú ti ɓɛ́ ɔ mu sáa-zà-kũ̀àɔ̀ nyuɛń nììn nyɛ. Ti ɓɛ́ ɔ mu ɖé Pá Hwɛ̀ǐn-hwɛ̀ǐnɔ̀ mú dyáùn ɓó ḿ dyúa kɛ kè ti ɔ mu síìn nyɛɛ, nìí, wa mu kpeeɔ̀ wuɖu wɔ̃́ùn, ké ɔ se mɛ́ɛ mu.

36“Ɔ ɖǎ ná nìǐn, wa mɛ nyu góò-hwɛ̀-zɛ̀nɛ̌ǐn-pĩ̀à ɖò. Ké wa mɛ céè ɓóɛ kɔ̃ kà nyɔ kéɔ́ kà ɖɛ-sɔ̃-bɛ̃̀-kɔ̃-pòìn-ɖɛ̀ ɖò nyuɛ. Wuɖu wa kéà ɓó céèɛɛ mɛ ɖá, ‘Nyɔ nìà kɛ kpá wáká ɓó Bounɓoɔ̀ bìì.’ 37Ké wa mɛ ɓáa ɖúú ɖàɓàìn kpèɛ̀ ɖò dyí, ɓɛ́ wa kéɛ dúi-bĩìn-ɖɔ̀ ɓɛ́ wa ɖǎ páɖá kɛɛ dyúa dyi ɓá. 38Eɖóún mɛ ɓéɖéìn góò-pĩ̀àɔ̀ ɓó ɔ dyúa-kpàɔ̀ kɔ̃, ɓɛ́ mɔ̄ Bounɓoɔ̀ ké sáa-zàìn-ɖɛ̀ séín ɓɛ́ Éézùɖùɛ̀-dyù ɓěɔ̀ mu ḿ gbo dyàùn wɛ̃ɛ dyi kpɔ̃, sepóɛɖé dyììn ɖé góò-pĩ̀àɔ̀ múɛɛ, Eɖóún mu nyɔ ɓěɔ̀ nàmàǔn ɓě ɓá sáa-zàìn-ɖɛ̀ ɓěɔ̀ dyíɛɛ ɓéɖéìn.

39“Ɔ ɖǎ ná nìǐn, wa mɛ ɖú ɖénì-ɖɔ̀ nɔ̀mɔ̀ dyíin dyí, ɓɛ́ wa kéɛ gã́ùn xwã́-xwã́ ɓɛ́ Eɖóún kéà mú po ɖé gbɔɛ kè dúi-bĩìn-ɖɔ̀ ɓɛ́ wa páɖá kɛɛ mú nyu. Ké wa mɛ ɖaɓa gbo-jìnììn-ɖɛ̀ ɖò ɓó Eɖóún bìì ɖekè.

40“Ɔ ɖǎ ná nìǐn, wa mɛ nyu gã́ùn ɓě kè gbo-jìnììn-ɖɛ̀ ɓě kè dú-jìnììn-ɖɛ̀ ɓě ɓó Eɖóún dyú-gàà ɓěɔ̀ bìì ɖekè, ɓɛ́ wa kéɛ nyu ɓɛ́ Eɖóún dyú-gàà ɓěɔ̀ ké díɖí kè dya-dè-dè ɓéɖé. 41Ɔ ɖǎ ná nìǐn, m̀ mɛ po m̀ ɖíí-gàà Eɖóún kè ɔ dyú-gàà ɓěɔ̀ ɖɔ ɓěɔ̀ wa mú, ɓɛ́ m̀ ké wa cáná dúún po, ɓɛ́ m̀ ké wa kũ̀à kɔ̃ún po. M̀ mɛ po wa wáká, ɓɛ́ wa ké ní sáa-zà-nyɔ̀ ɓě jǔ.

42“Hwɛ̀ ɓɛ́ m̀ kéà náa nyuɛɛ, wa mɛ nyu ɖénì-ɓɔ̀ùn-ɓɔ́ún ɓě ɓó Eɖóún kè ɔ dyú-gàà ɓěɔ̀ bìì. Ɓɔ́ún-ɓɔ́ún ɓěɔ̀ mɛ sèìn wa pɔ̃́ gbɔ̀ǔn, ɓɛ́ ɔ ké waà dɛ̃-dà ɓěɔ̀ vǐè. 43Eɖóún kè ɔ dyú-gàà ɓěɔ̀ mɛ po wa mú ti séín wa mu jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ mú dyáa mɔ́ùn wɛ̃, mɔɔ ti séín wa mu sáa-kɔ̃-zàìn-gbààɔ̀ bũ̌in xwɛ̃́ìn, ɓɛ́ wa ké kũ̀à nyu ɖé Pá Hwɛ̀ǐn-hwɛ̀ǐnɔ̀ múɛɛ, nìí ɓɛ́ zaa ní kɔ̃̀ ɖà wa dúún wáɖá, wa ní kɔ̃̀ ɖà mɛ́. Ɖɛ nìà kɛ mɛ mɔ̀ gma kánáá pū ɓó Eɖóún kè ɔ xwíníín-dyù ɓěɔ̀ bìì.”

Currently Selected:

Ɛ́séɖɔ̀ 28: ƁB02

Highlight

Copy