Ɛ́séɖɔ̀ 20

Gma ɓaɖa-bùè ɓěɔ̀

(Dìtɔ̀wáɖánámɛ̀ 5:1-21)

1Ti ɓɛ́ Mózè ɖǎ ma ɖé toɖoɔ̀ dya sɔ̀ɛɛ, Gèɖèpɔ́ɔ̀ wùɖù ma nyɔ ɓěɔ̀ gbo, ké ɔ ɖá, 2“Mɔ̄ mɔ̀ Bounɓo mɔ̀à ɓěɛ̀ Gèɖèpɔ́ɔ̀ kɛ̀. Mɔ̄ zà ma kà ɓě ɖé Íjè-ɓòɖò kɔ̃̀ kɔ̃ ɓě mɔ̀ ma kà gǐìɛ.

3“Ɔ jèɛɛ, ɓě ɖò ní ɖá ɓɛ́ ɓě ké gèɖèpɔ́ɔ̀ kà kò ɖò ɓéɖé, ɔ sèìn ḿ ɖòǔn.

4“Ɓě ɖò ní ɖá ɓɛ́ ɓě ké kũùn-kpò ɓɛ́ ɔ kè ɖɛ ɖò nì ɖé dyɔɔ̀ dyíɛ mɔɔ ɓóɖó-kpàɔ̀ kɔ̃ɛ mɔɔ ɖé níɔ kɛɛ hwɔìn nyɛɛ ɖò nyu. 5Ɓě ɖò ní ɖá ɓɛ́ ɓě ké ɖɛ nì náa ɖò dyúa dú hwuɖu taɓa, hwɛ̀ ḿ po níiń, ɓě kéɛ ɓiè, sepóɛɖé mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ, ḿ mɔ̀ hwɛ̀nɛ̌ Gèɖèpɔ́ɔ̀. Ní mu nyɔ ɓě ɓɛ́ wa nyɛ́ ḿ múɛɛ dyú ɓě gǎ kɔ̃ tòùn ɓó wa ɓǎ ɓěɛ̀ nàmàǔn ɓě jè, ɓɛ́ ɔ ké waà xwéɖé-dù deìn dúún tã kè hĩinyɛ dyɛ̀ìn. 6Kɛɛ ní mu nyɔ táázĩ̀ìn kúɖúú ɓě ɓɛ́ wa ɖɛ̀ɓɛ̀ ḿ mú, ké wa kpɔ̃ ní gma ɓěɔ̀ dyiɛɛ nɔ̀mɔ̀ dyíin dyí nyuùn tee.

7“Ɓě ɖò ní ɖá ɓɛ́ ɓě ké mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ nyɛ́nɛ́ɔ̀ jè pééín dyi nyùìn, sepóɛɖé ní mu nyɔ mɔ̀ nyɔ mu ní nyɛ́nɛ́ɔ̀ jè pééín dyi nyùìn nyɛɛ gǎ kɔ̃ tòùn wɛ̃́ɛ́.

8“Ní fɔ̀-wèɔ̀ jè mɛ nì ɓě hwìɖǐi, ɓɛ́ ɓě kéɛ wáká po ɓó ḿ bìì. 9Wé mɛ̀nɛ̌ìn-ɖò tɔ̀ɔ̀ ɓě nìà ɓó ɖeɛɛ xwíníín nyɛɛ, ɓě mɛ nyu ɓěɛ̀ kũ̀à séín ɓě, 10kɛɛ wéɔ̀ mɛ̀nɛ̌ìn-sɔ̃́ nììnɔ̀ mɔ̀ mɔ̄ Bounɓo mɔ̀à ɓěɛ̀ Gèɖèpɔ́ɔ̀ kɛɛ fɔ̀-wè. Ɓě ɖò mɛ ɓɔ́ kũ̀à ɖò nyuɛ ɓó wéa ɓaɖa, hwɛ̀ ḿ po níiń, ɓěɛ̀ dyú-gàà ɖò mɔɔ ɓěɛ̀ dyú-màà ɖò mɔɔ ɓěɛ̀ gbo-nì-gàà ɖò mɔɔ ɓěɛ̀ gbo-nì-màà ɖò mɔɔ ɓěɛ̀ nyúà-ɖɛ̀ ɖò mɔɔ ɖíà ɖò ɓɛ́ ɔ nì ɖé ɓěɛ̀ ɓóɖóɔ̀ kɔ̃ɛ. 11Sepóɛɖé ḿ mɛ ma dyɔɔ̀ kè ɓóɖó-kpàɔ̀ kè dyóóɔ̀ kè ɖɛ séín nì ɖé dyɔɔ̀ dyíɛ kè ɖé ɓóɖó-kpàɔ̀ kɔ̃ɛ ɔ kè ɖé níɔ gboɛɛ ɓó wé mɛ̀nɛ̌ìn-ɖò xwíníín. Kɛɛ ḿ fɔ̀ ma ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa. Ɔ jèɛɛ, ḿ po ma wéɔ̀ mɛ̀nɛ̌ìn-sɔ̃́ nììnɔ̀ mana kɔ̃, ké ḿ poɛ ma wáká.

12“Dyé m̀ ɖe kè m̀ ɓǎ kpéín, nìí, ɓɛ́ m̀ ké ɓóɖó ɓɛ́ mɔ̄ Bounɓo mɔ̀à nì Gèɖèpɔ́ɔ̀ kɛɛ muà m̀ nyíìn nyɛɛ kɔ̃ hwèɖèìn.

13“Ɓě ɖò ní ɖá ɓɛ́ ɓě ké kú ɖáɓá.

14“Ɓě ɖò ní ɖá ɓɛ́ ɓě ké gmaɖe po.

15“Ɓě ɖò ní ɖá ɓɛ́ ɓě ké dyíɖí.

16“Ɓě ɖò ní ɖá ɓɛ́ ɓě ké seɛ̀-zàse nyu ɓá ɓě mǔè ɖò dyí.

17“Ɓě ɖò ní ɖá ɓɛ́ ɓě mǔè ɖòɛ̀ kɔ̃̀ɔ̀-ɖɛ̀ɛ̀ kɔ̃̀-tò ké ɓě nyu. Ɔ hwɔìn kà ɓě mǔèɔ̀ gbǒ mɔɔ ɔ gmàà mɔɔ ɔ gbo-nì-gàà mɔɔ ɔ gbo-nì-màà mɔɔ ɔ ɓìɖǐ mɔɔ ɔ jǎkasì mɔɔ ɔ kɔ̃̀ɔ̀-ɖɛ̀ tɔ̀ɔ̀ ɓěɔ̀ ɖò.”

Nyɔ ɓěɔ̀ peɖe fã̀à

(Dìtɔ̀wáɖánámɛ̀ 5:22-33)

18Ti ɓɛ́ nyɔ ɓěɔ̀ dyé ma wɛ́ɖɛ́-wɛ́ɖɛ́ɔ̀ poɛ, ké wa wɔ̃́ ma zɛɔ̀ páná-wùɖù, ké wa wɔ̃́ ma gã̀à-wùɖùɔ̀, ké wa dyé ma toɖoɔ̀ nyànà-sò mú ɓúɛ kɛɛ, wa fɛ̃̀ìn ma ní mìɔ, ké wa tɛɖɛ ma kɔ̃in. Wa nyànà ma ɖé nya dyi vɛ̃in, 19ké wa cɛ̃ɛ ma Mózè gbo, ké wa ɖá, “Mɔ̀ mɔ̀ nyɔ mɛ wùɖù à gbo, ké à mu nì wuɖuɔ̀ wɔ̃́ùn, kɛɛ Gèɖèpɔ́ɔ̀ mìɔùn mɛ ɓɔ́ à gbo wùɖùɛ̀, à ní kɔ̃̀ ɖà mɛ́.”

20Ké Mózè cɛ̃ɛ ma wa gbo, ké ɔ ɖá, “Ɓě ɓɔ́ fɛ̃̀ìn, sepóɛɖé Gèɖèpɔ́ɔ̀ dyi, ɓɛ́ ɔ ké ɓě mú dɔ̃̌, ɔ kè ɓɛ́ ɓě ké ɔ dyi fɛ̃̀ìn, ɓɛ́ ɓě ní kɔ̃̀ ɖà ɔ nàmàǔn bũ̌ nyu.”

21Wɛ̃́ɛ́ kɛɛ, nyɔ ɓěɔ̀ nì ma ɖé nya vɛ̃in, kɛɛ Mózè mu ma ní-kpò kpɛ̃̀ kɔ̃̀ mú Gèɖèpɔ́ɔ̀ nì ma kà kɛɛ wɔ̃.

Gma ɓě ɓá sáa-kɔ̃-zàìn-gbàà jè dyíɛ

22Ti ɓɛ́ Mózè nyini ma ɖé toɖoɔ̀ dyaa, Bounɓoɔ̀ cɛ̃ɛ ma ɔ gbo, ké ɔ ɖá, “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá wa mìɔùn ɖǎa dyé kà ḿ ɖǎ wa gbo wùɖù sɔ̀ìn ɖé dyɔún wɛ̃. 23Ɓě ɖò ní ɖá ɓě ké gèɖèpɔ́ɔ̀ kà kò ɖò ɓéɖé ɓó ḿ wáún. Ɓě ɖò ní ɖá ɓě ké séɓàɖà mɔɔ góò ɖò dyí ɖú, ɓɛ́ ɓě kéɛ gèɖèpɔ́ɔ̀ ɖò mú mɛ. 24Kɛɛ ɓě mɛ ɖú ɓóɖó dyí, ɓɛ́ ɓě kéɛ tèě ɖò pòìn ɓó ḿ bìì, ɓɛ́ ɔ ké sáa-kɔ̃-zàìn-gbàà jǔ, ɓɛ́ ɓě ké ɓó ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ kè ɓěɛ̀ gbo-kpɔ̃ìn-sàǎ-zàìn-ɖɛ̀ ɓěɔ̀ nyùìn. Sáa-zàìn-ɖɛ̀ ɓěɔ̀ mɛ mɔ̀ ɓáɖáá kè wiɖi ɔ kè ɓìɖǐ. Pá séín kɔ̃̀ mú ní mu gãùn, ɓɛ́ ɓě ké kà ɖé ḿ ɓièɛ̀n nyuɛɛ, ní mu ɖé ɓě gbo dyiìn, ɓɛ́ ḿ ké ɖé ɓě mana kɔ̃ pòìn. 25Ɔ jǔ ké ɓě dyi ní sáa-kɔ̃-zàìn-gbààɔ̀ sɔ́ɔ́-kpò nyùìn ní, ɓě ní ɖá ɓɛ́ ɓě ké sɔ́ɔ́ɔ̀ bũ̌in wa. Sepóɛɖé ɓě dyiɛ náa nyuín, nìí, gbààɔ̀ ɖǎ zùǔn sɔ̀ìn ɓó kũ̀à-mú-nyùìn-nɛ̀ɛ̀-kpà ɓɛ́ ɓě nyùìn kà kũ̀à múɛɛ jè. 26Ké ɓě ní ɖá ɓɛ́ ɓě ké gbààɔ̀ kɔ̃-dyáìn-ɖɛ̀ ɖò ɓó po, ɓě ní kɔ̃̀ ɖà gbààɔ̀ kɔ̃ dyáuń nìǐn, nyɔ ɖò ní kɔ̃̀ ɖà dyéɖé dyií ɖúín, ɔ ní kɔ̃̀ ɖà ɓěɛ̀ gbɔ-fɔ̀nɔ̀-fɔ̀nɔ̀ɔ̀ dyé.”

Currently Selected:

Ɛ́séɖɔ̀ 20: ƁB02

Highlight

Copy