Ɛ́séɖɔ̀ 18

Jɛ́tòɖò té Mózè gboi

1Ɓó tia ɓaɖaa, Jɛ́tòɖò mɔ̀à Míɖìàùn-ɓòɖòɔ̀ sáa-zà-nyɔ̀, ɓɛ́ ɔ mɔ̀à Mózèɛ̀ bùǐ-gààɔ̀ kɛɛ wɔ̃́ ma ɖɛ séín ɓɛ́ Gèɖèpɔ́ɔ̀ ɖǎ ma Mózè kè Éézùɖùɛ̀-nyɔ̀ séín ɓěɔ̀ bìì nyuɛɛ jè. Ɔ wɔ̃́ɔ ma kà Bounɓoɔ̀ ɖǎ Éézùɖùɛ̀-nyɔ̀ ɓěɔ̀ ɖé Íjè-ɓòɖòɔ̀ kɔ̃ zà kɛ. 2-3Ɔ nì ná kɛɛ, Mózè ɖǎ ma ɔ gmàà mɔ̀à Zìpówàɖà kɛ kè ɔ dyú-gàà sɔ̃́ ɓěɔ̀ ɖé Jɛ́tòɖò gbo ɖe ɖoɓo. Ɔ jèɛɛ, Jɛ́tòɖò dyà ma wa Mózè gbo ɖe. Mózèɛ̀ dyú-gàà sɔ̃́ ɓěɔ̀ ɖòɛ̀ nyɛ́nɛ́ mɔ̀ Gésɔ̃̀,#18:2-3 Gésɔ̃̀-nyɛ̀nɛ̀ kè wuɖu mɔ̀à ɖéèɛɛ hwɔìn ní ɖé Híìbúɖúù-wùɖùɔ̀ mú. sepóɛɖé Mózè ɖá, “Ḿ mɔ̀ ɖéè nɔ̄ ɓóɖó ɖìàǔn.” 4Ké ɔ dyú-gàà tɔ̀ɔ̀ nyɛ́nɛ́ mɔ̀ Ɛ̀ɖìɛ́zɛ̀ kɔ̃̀ xwíníín mɔ̀à Gèɖèpɔ́ɔ̀ mɔ̀ ní gbo-kpá-nyɔ̀ kɛ, sepóɛɖé ɔ ɖá, “Ní ɓǎà Gèɖèpɔ́ɔ̀ mɔ̀ ní gbo-kpá-nyɔ̀. Ɔ póìn ma ḿ sɔ̀ìn ɖé Féwòɖòɛ̀ gàsíàɔ̀ xwaún.” 5Jɛ́tòɖò dyà ma wa ɖé Mózè gbo ɖé gbǎùn-fúɖúáɔ̀ kɔ̃ dɛ̀ ɓɛ́ Éézùɖùɛ̀-nyɔ̀ ɓěɔ̀ nyànàìn ma kà waà jàɖàìn-gbò ɓěɔ̀ dyi ɓó Gèɖèpɔ́ɔ̀ toɖoɔ̀ wáún wɛ̃. 6Hwɛ̀ ɔ ké ma ná nìɛɛ, Jɛ́tòɖò ɖoɓo ma wuɖu dyúa kĩ́ín, ké ɔ ɖá, “Mɔ̄ mɔ̀à nì bùǐ-gàà Jɛ́tòɖò kɛ kè nì gmààɔ̀ kè nì dyú-gàà sɔ̃́ ɓěɔ̀ nì ɖé m̀ gbo dyiɛńo.” 7Ɔ jèɛɛ, Mózè mu ma ɔ bùǐ-gààɔ̀ hwìǐ. Ti ɔ dyɛ̀ìn ma ɔ bùǐ-gààɔ̀ kɛɛ, ɔ taɓa ma dú hwuɖu ɓó ɔ dyúa, ké ɔ nyá ma ɔ wɔ̃ ɖé ɔ nyíɔún-zà-zà mú. Wa zaìn ma nyíɔún, ké wa wáɖáìn ɖé Mózèɛ̀ jàɖàìn-gbòɔ̀ mú. 8Ké Mózè zaìn ma ɖɛ séín ɓě ɓɛ́ Bounɓoɔ̀ ɖǎ ma Féwòɖò kè Íjè-nyɔ̀ tɔ̀ɔ̀ ɓěɔ̀ bũ̌ nyu ɓó Éézùɖùɛ̀-nyɔ̀ ɓěɔ̀ jèɛɛ ɔ bùǐ-gààɔ̀ gbo kɔ̃in. Mózè cɛ̃ ma ɖɛ ku wɔ̃ ɓě ɓɛ́ wa ɖǎ ma dyí dyé ɓó hwìèɔ̀ kɔ̃ɛ kè kà Bounɓoɔ̀ nyu ma wa póɛ̀n nyɛɛ jè ɔ gbo ɖekè.

9Ti ɓɛ́ Jɛ́tòɖò wɔ̃́ ma ɖɛ nɔ̀mɔ̀ kɔ̃in séín ɓě ɓɛ́ Bounɓoɔ̀ ɖǎ ma Éézùɖùɛ̀-nyɔ̀ ɓěɔ̀ bìì nyu ɖé wa Íjè-nyɔ̀ ɓěɔ̀ xwaún-póìn-póìn múɛ jèɛɛ, ɔ kpá ma múàǔn mìɔ. 10Ké ɔ cɛ̃ɛ ma, ké ɔ ɖá, “Ɓàìn-ɓàìn mɛ nì Bounɓoɔ̀ kɔ̃, sepóɛɖé ɔ mɔ̀ nyɔ ɖǎ ɓě póìn sɔ̀ìn ɖé Féwòɖò kè Íjè-nyɔ̀ tɔ̀ɔ̀ ɓěɔ̀ xwaún. 11Ɓó kàǔn wɛ̃ɛ, ḿ ɖǎa dyí dyuò jɛ́ɛ́ kà Bounɓoɔ̀ kpé ɓúá dyí ké ɔ zi gèɖèpɔ́ɔ̀ tɔ̀ɔ̀ séín dyíɛ, sepóɛɖé ɔ ɖǎ ɖɛ nìà kɛ nyɔ ɓě ɓɛ́ wa zàìn ma Éézùɖùɛ̀-nyɔ̀ ɓěɔ̀ zùǔn wɛ̃ɛ bũ̌ nyu.” 12Hwɛ̀ ké Jɛ́tòɖò nyu ma fɔ̃ɔ-sàǎ-zàìn-ɖɛ̀ kè sáa-zàìn-ɖɛ̀ tɔ̀ɔ̀ ɓě ɓó Gèɖèpɔ́ɔ̀ bìì. Ké Eɖóún kè Éézùɖùɛ̀-nyɔ̀ vɛ̀nɛ̀ séín ɓěɔ̀ dyi ma, ɓɛ́ wa kè Jɛ́tòɖò ké ma ɖɛ ɖi ɓó Gèɖèpɔ́ɔ̀ dyúa.

Tɔ̀ɔ̀-ɓìɔ̀ ɓě gã-gã

(Dìtɔ̀wáɖánámɛ̀ 1:9-18)

13Wéɔ̀ nyɔ kɔ ma ɓó dyíɛɛ, Mózè ɖú ma nyɔ ɓěɔ̀ zaa wɔ̃ po kpàǐ, ké nyɔ ɓěɔ̀ nyanaìn ma ɔ ɖei sɔ̀ìn gànà-kṹún gbo dyɛ̀ìn hwìo. 14Ti ɓɛ́ Mózèɛ̀ bùǐ-gààɔ̀ dyé ma ɖɛ jĩ̀ kà Mózè nì ma nyɔ ɓěɔ̀ bìì nyuɛń nyɛɛ, ɔ diè ma Mózè dyi, ké ɔ ɖá, “Ɖɛ́ kɔ̃̀ jè m̀ ɖòùn kò dyi, ké m̀ nì zaa wɔ̃ poɛń, ɓɛ́ nyɔ séín ɓěɛ̀ dyià m̀ ɖei nyanaìn sɔ̀ìn gànà-kṹún gbo dyɛ̀ìn hwìo kɛ́? Ɖɛ́ kɔ̃̀ jè m̀ nì ɖɛ jĩ̀ kàà nyɔ ɓěɔ̀ bìì nyuɛń nyɛ́?”

15Ké Mózè jǔ ma ɔ gɔ̃̌, ké ɔ ɖá, “Ɖɛ kɔ̃ jè ɔ nìà náa mɔ̀ sepóɛɖé nyɔ ɓěɔ̀ dyi ḿ gbo, ɓɛ́ wa ké ɖɛ mɔ̀ Gèɖèpɔ́ɔ̀ mɔ́ɔ́-ɖɛ̀ kɛɛ dyí dyuò. 16Nyɔ ɖò kè ɔ mǔè ɖò dyi zàǔn-zàǔn ɖò ɓéɖé ní, wa dyàà ḿ gbo, ké ní po zaaɔ̀ wɔ̃, ké ní zàìn wa Gèɖèpɔ́ɔ̀ gma ɓěɔ̀ da.”

17Ké Mózèɛ̀ bùǐ-gààɔ̀ cɛ̃ɛ ma ɔ gbo, ké ɔ ɖá, “Ɖɛ m̀ nìà nyuɛń nyɛɛ se dyíin nɔ̀mɔ̀. 18M̀ kè nyɔ ɓě nyanaìn ɓó m̀ ɖeiɛɛ mu saùn mìɔ, sepóɛɖé kũ̀à nìà kɛ ku xwa mìɔ ɓó m̀ bìì. M̀ ɖòùn seɛ nyuɛ ɓɛ́ìn. 19Tò ɖɛ ní muà m̀ gbo cɛ̃ìn nyɛɛ gbo ɖùǔ nɔ̀mɔ̀ dyíin, ké Gèɖèpɔ́ɔ̀ mu ɓó m̀ gbo nììn. Mɔ̀ mɔ̀ nyɔ mɛ ɓaɖa nyɔ ɓěɔ̀ bìì kɛ́ ɓó Gèɖèpɔ́ɔ̀ dyúa, ɓɛ́ m̀ ké waà zaa ɓěɔ̀ ɓó ɔ gbo dyà. 20Ké m̀ mɛ tɛ̀mɛ̀ìn nyɔ ɓěɔ̀ Bounɓoɔ̀ gma ɓěɔ̀, ɓɛ́ m̀ ké kà wa ké cĩ́ɛ nyuɛ kè ɖɛ ɓě ɓɛ́ wa kɔ̃̀ wa ké nyuɛɛ tɛ̀mɛ̀ìn. 21Ɓó kɔ̃in ɖeɛɛ, m̀ mɛ gã gàa ɓɛ́ìn kpé ɓě sɔ̀ìn ɖé nyɔ séín ɓěɔ̀ hwìɛ̀. Wa mɛ mɔ̀ gàa ɓě ɓɛ́ wa fɛ̃̀ìn Gèɖèpɔ́ɔ̀ dyiɛ, ké wa mɛ mɔ̀ gàa ɓě ɓɛ́ nyɔǔn-dyù ɓɛ́ìn hwòɖǒ kɔ̃ dèɛ̀, ké wa nyɛ́ kpáná se dyí sɛ́ɖɛ́ìn po-po múɛ. M̀ mɛ gã wa, ɓɛ́ wa ké tɔ̀ɔ̀-ɓìɔ̀ ɓě jǔ ɓó nyɔ táázĩ̀ìn ɓě kè nyɔ hɔ̃dɛ̀ɖɛ̀ ɓě kè nyɔ kpáɖá-nyɔ sɔ̃́ ɓaɖa-bùè ɓě ɔ kè nyɔ ɓaɖa-bùè ɓě bìì. 22M̀ mɛ nyu wa tɔ̀ɔ̀-ɓìɔ̀ ɓě mú ɓó nyɔ ɓěɔ̀ bìì ɓó ti séín. Zaa ɓě ku wɔ̃ mìɔ kɛɛ ɖòùn, wa mɛ dyà m̀ gbo, kɛɛ zaa mɛ́nɛ́ɛ́ ɓěɔ̀, wa mìɔùn mɛ poɛ wɔ̃. Dyììn ɖé ɖɛ nìà kɛ múɛɛ, m̀ kè wa mu nì gbɛ̌ɔ̀ geìn, ké ɔ mu xwa fɛ̃́ìn ɓó m̀ bìì. 23Ɖɛ nìà kɛ mɔ̀ Gèɖèpɔ́ɔ̀ mɔ́ɔ́-ɖɛ̀. M̀ dyiɛ náa nyuín, nì gbɛ̌ɔ̀ mu xwa fɛ̃́ìn, ké nyɔ ɓěɛ̀ séín zɔ̃́ín mu wɔ̃ kpáùn nɔ̀mɔ̀ dyíin, ké waà hwòɖǒ mu dyi dèìn, ké wa mu wa ɓíɖí-taún ɖe muùn.”

24Ké Mózè wɔ̃́ìn ma ɔ bùǐ-gààɔ̀ wuɖuɔ̀ gbo, ké ɔ nyu ɖɛ séín ɔ cɛ̃ ma kà ɔ gboɛ. 25Ɔ gã ma gàa ɓɛ́ìn kpé ɓě sɔ̀ìn ɖé Éézùɖùɛ̀-nyɔ̀ séín ɓěɔ̀ hwìɛ̀, ké ɔ nyu ma wa nyɔ ɓěɔ̀ tɔ̀ɔ̀-ɓìɔ̀ ɓě mú. Ɔ nyu ma wa nyɔ táázĩ̀ìn ɓě kè nyɔ hɔ̃dɛ̀ɖɛ̀ ɓě kè nyɔ kpáɖá-nyɔ sɔ̃́ ɓaɖa-bùè ɓě ɔ kè nyɔ ɓaɖa-bùè ɓěɛ̀ tɔ̀ɔ̀-ɓìɔ̀ ɓě mú. 26Gàa ɓě nìà kɛ mɔ̀ ma nyɔ ɓěɔ̀ tɔ̀ɔ̀-ɓìɔ̀ ɓě ɓó ti séín. Zaa ɓěɔ̀ nyɔ ɓě ku ma wɔ̃ mìɔ kɛɛ mɔ̀ zaa ɓě wa dyà ma Mózè gbo, kɛɛ zaa mɛ́nɛ́ɛ́ ɓěɔ̀, wa mìɔùn poɛ ma wɔ̃.

27Sɔ̀ìn ɓóɛ gboɛɛ, Mózè cuò ma ɔ bùǐ-gààɔ̀, ké ɔ mu ma ɔ ɓíɖí ɖe.

Currently Selected:

Ɛ́séɖɔ̀ 18: ƁB02

Highlight

Copy