Àpɔ́sò 22

1“Ḿ ɓǎ kè ḿ ɖíí ɓě, ɓě mɛ tò ḿ gbo ɖùǔ kà ɓɛ́ ní muà ḿ mìɔùn jè ɓě gbo kɔ̃in zaìn nyɛ.” 2Ké ti nyɔ ɓěɔ̀ wɔ̃́ ma wa mìɔùn nììn ɓíɖí-wùɖùɔ̀ ɔ wĩín nyɛɛ, wa tò ma ɔ ɖùǔ gbo nɔ̀mɔ̀ dyíin. Ké ɔ ɖá, 3“Ḿ mɔ̀ Júù, ké ḿ wóɖóìn ma ɖé Tásɔ̀-hwɔ̀ɖɔ̀ nìà ɖé Sàɖésìà-ɓòɖòɔ̀ kɔ̃ɛɛ mú, ké wa gmɛ̀ìn ma ḿ nɔ̄ hwɔɖɔɛ̀ mú. Gàmɛ́ɖìè mɔ̀ nyɔ tɛ̀mɛ̀ìn ma ḿ ɖɛ. Ɔ tɛ̀mɛ̀ìn ma à ɓǎ nììn ɓǎ ɓěɔ̀ gma séín ɓěɔ̀ ḿ nɔ̀mɔ̀ dyíin. Ní hwòɖǒ fṹà ma mìɔ ɓó Gèɖèpɔ́ɔ̀ bìì kũ̀à nyu jè kà ɓě séín nìà ɓó zɛ̃̌ɛ̀ kɛ. 4Ḿ dyéìn ma nyɔ ɓě ɓɛ́ wa nì ma fɛ̀ɛ̀ ɖìèɔ̀ dyi kpɔ̃uń wɛ̃ɛ gǎ, ké ḿ dyé ma ti ɓɛ́ ḿ ké wa ɖáɓá ɖekè. Ḿ sã ma gàa kè màa, ké ḿ po ma wa kpɔɖɔ ɖeín. 5Sáa-zà-nyɔ̀ vɛ̀nɛ̀ɔ̀ kè Júù-nyɔ̀ ɓěɔ̀ nyɔ vɛ̀nɛ̀ séín ɓěɔ̀ mɔ̀ ní zàse. Wa dèìn ma ḿ céè-ɖɛ̀ ɓě ɓɛ́ ḿ ké ɖé à mǔè Júù-nyɔ̀ ɓě nì ɖé Dìmásìkɔ̀-hwɔ̀ɖɔ̀ɔ̀ múɛɛ gbo kpa kɛɛ xwa. Ḿ nì ma ɖé muɛń, ɓɛ́ ḿ ké ma cɔ́cì-nyɔ̀ ɓě nì ma ɖéɛɛ kpɔ̃, ɓɛ́ ḿ ké ma wa sã, ɓɛ́ ḿ ké ma wa nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú dyà, ɓɛ́ wa ké wa gǎ dyéìn.

Pɔ́ɔ̀ cɛ̃ɛ kà ɔ nyu Gèɖèpɔ́ɔ̀ gbo dyiɛ kɛɛ jè

(Àpɔ́sò 9:1-19; 26:12-18)

6“Ti ḿ nì ma hwìè kɔ̃, ké ḿ nìǎ ma Dìmásìkɔ̀-hwɔ̀ɖɔ̀ɔ̀ bũ̌in xwɛ̃́ǐn nyɛɛ, ɓó dyóɖó-kò-dú-hwìɛ̀ kɛɛ, ce vɛ̀nɛ̀ ɖò sɔ̀ìn ma ɖé dyií wàɖà, ké ɔ fã̀ìn ma ḿ ɖei. 7Ké ḿ ɓùɖùìn ma ɓó ɓóɖó-kpàɔ̀ kɔ̃, ké ḿ wɔ̃́ ma wuɖu ɖò, ké wuɖuɔ̀ ɖá, ‘Sɔ́ɔ̀, Sɔ́ɔ̀, ɖɛ́ kɔ̃̀ jè m̀ nìà ḿ gǎ dyéɛ̌n nyɛ́?’ 8Ké ḿ zà ma ɖé wuɖu, ké ḿ ɖá, ‘Ɓɔ̌ɔ̀, m̀ mɔ̀ nyɛ́ɛ̀?’ Ké ɔ cɛ̃ɛ ma ḿ gbo, ké ɔ ɖá, ‘Mɔ̄ mɔ̀ Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ múɛ. Mɔ̄ mɔ̀ nyɔ m̀ nìà gǎ dyéɛ̌n nyɛ̀.’ 9Ɓó tia ɓaɖaa, nyɔ ɓě nì ma ɓó ḿ gboɛɛ dyé ma ceɔ̀ ní, kɛɛ wa se ma nyɔ nì ma kà ḿ gbo wùɖùɛ̌n nyɛɛ wuɖuɔ̀ wɔ̃́. 10Ké ḿ ɖá, ‘Ɖɛ́ ḿ mɛ nyuɛ́, Bounɓo?’ Ké Bounɓoɔ̀ cɛ̃ɛ ma ḿ gbo, ké ɔ ɖá, ‘Sɔ̀ dyí, ɓɛ́ m̀ ké ɖé Dìmásìkɔ̀-hwɔ̀ɖɔ̀ɔ̀ mú mu. Ɖéɛ̀ wa mu kũ̀à ɓě ɓɛ́ ḿ mɔ́ ɓɛ́ m̀ ké nyuɛɛ m̀ gbo cɛ̃ìn.’ 11Ḿ se ma dyi dyéɛ ɓɛ́ìn, sepóɛɖé ceɔ̀ zi ma ḿ fã̀ǐn mìɔ cá. Ɔ jèɛɛ, nyɔ ɓě nì ma ɓó ḿ gboɛɛ kpɔ̃ ma ḿ sɔ̃in tee, ké à nyini ma ɖé Dìmásìkɔ̀-hwɔ̀ɖɔ̀ɔ̀ mú.

12“Ké gàa ɖò kɔ̃̀ nyɛ́nɛ́ mɔ̀ ma Ánànádyà kɛɛ nì ma ɖé. Ɔ ku ma dúún ɓó gma ɓěɔ̀ dyi kpɔ̃ jè. Ké ɔ nyɛ́nɛ́ín-nyɛ̀nɛ̀ nì ma Júù-nyɔ̀ séín ɓě cĩ́ ma ɖéɛɛ wĩín. 13Ɔ dyi ma ḿ gbo, ké ɔ nyànà ma ɓó ḿ gbo dyi, ké ɔ ɖá, ‘Ḿ ɖíí Sɔ́ɔ̀, m̀ mɛ dyé dyi ɖe.’ Ké wàɖà cá kɛɛ, ḿ dyé ma dyi ɖe, ké ḿ dyé ma ɔ. 14Ké ɔ ɖá, ‘À ɓǎ nììn ɓǎ ɓěɛ̀ Gèɖèpɔ́ɔ̀ ɖǎ m̀ gã, ɓɛ́ m̀ ké ɔ mɔ́ɔ́-ɖɛ̀ dyí dyuò, ɓɛ́ m̀ ké Dyí-sɛ́ɖɛ́ìn-nyɔ̀ɔ̀ dyéɖé kɔ̃ po, ɔ kè ɓɛ́ m̀ ké wuɖu sɔ̀ ɔ wĩín nyɛɛ wɔ̃́. 15Sepóɛɖé ɖɛ ɓě ɓɛ́ m̀ ɖǎà wɔ̃́, ké m̀ ɖǎà dyéɛ jèɛɛ, nì mu Jízɛ̀ zàse nyuùn ɓó nyɔ séín gbo. 16Ké kàǔn wɛ̃ɛ, ɖɛ́ m̀ nì fòèɛ̌n nyɛ́? Sɔ̀ dyí, ɓɛ́ m̀ ké níɔ kpá, ɓɛ́ m̀ ké Bounɓoɔ̀ nyɛ́nɛ́ɔ̀ ɖá, ɓɛ́ m̀ ké nì nàmàǔn ɓěɔ̀ bũ̌in dèɖè.’

Gèɖèpɔ́ɔ̀ ɖá Pɔ́ɔ̀ ɓɛ́ ɔ ké ɓóɖó-dù kà kò ɖò ɓěɛ̀ nyɔ ɓěɔ̀ gbo wùɖù

17“Ti ɓɛ́ ḿ kɔ́ìn ma nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú ɖe, ké ḿ nì ma ɓaàǔn ɖé Gèɖèpɔ́ɔ̀ gbǒɔ̀ múɛɛ, ḿ dyé ma dyí-tɛ̀mɛ̀ìn-ɖɛ̀ ɖò. 18Ḿ dyé ma ɖé Bounɓoɔ̀, ké ɔ cɛ̃ɛ ma ḿ gbo, ké ɔ ɖá, ‘Fṹà ɓɛ́ m̀ ké nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ mú dyí sɔ̀ wàɖà, sepóɛɖé wa se zàse ɓě ɓɛ́ m̀ nyuà ɓó ḿ bììɛɛ dyi kpɔ̃ɔ́ mu.’ 19Hwɛ̀ ké mɔ́ún ɖá, ‘Bounɓo, wa dyuòɛ̀ kà ḿ po ma nyɔ ɓě taɓa ma m̀ hwìɖǐǐɛɛ kpɔɖɔ ɖeín, ké ḿ ɓaɖa ma wa ɖé Júù-nyɔ̀ ɓěɔ̀ cɔ́cì-gbò séín ɓěɔ̀ múɛ. 20Ké ti wa wáɖáìn ma Síɖíɓììn mɔ̀ ma kà nì zàseɛɛ nyɔmɔɔ̀ dyiɛɛ, ḿ nyànà ma ɓó dyi, ké ní hwòɖǒ wɔ̃́ ma ɓɛ́ wa ké ma kà ná Síɖíɓììn ɖáɓá, ké ḿ nì ma nyɔ ɓě nì ma ɔ ɖáɓáuń wɛ̃ɛ ɖɔ ɓěɔ̀ dyí gmɔ̀ǔn.’ 21Kɛɛ Bounɓoɔ̀ cɛ̃ɛ ma ḿ gbo, ké ɔ ɖá, ‘Mu, sepóɛɖé ní mu m̀ dà vɛ̃in ɖò ɖoɓoùn ɖé ɓóɖó-dù kà kò ɖò ɓěɛ̀ nyɔ ɓěɔ̀ gbo.’ ”

22Ɓó tia ɓaɖaa, nyɔ kúɖúú ɓěɔ̀ tò ma Pɔ́ɔ̀ gbo ɖùǔ tee, kɛɛ ti ɔ cɛ̃ ma wuɖuà kɛɛ, wa páná ma mú, ké wa ɖá, “Ɓě ɖáɓá ɔ, ɓɛ́ ɔ jè ké dyi zi. Ɔ nɔ̀mɔ̀ dyíin ɓɛ́ gàa nì kà kɛɛ ké mɛ́ pū.” 23Wa nì ma mú pánáuń, ké wa nì ma waà ɖɔ ɓěɔ̀ dyií dyi vũàǔn, ké wa nì ma púu-púu dyií wáɖáuń. 24Ɔ jèɛɛ, sójà-ɓǎɔ̀ cɛ̃ɛ ma, ɓɛ́ wa ké Pɔ́ɔ̀ ɖé gbǒɔ̀ mú dyáìn. Ké ɔ cɛ̃ɛ ma, ɓɛ́ sójà ɓěɔ̀ ké Pɔ́ɔ̀ gbàtò ɓàɖàìn, ɓɛ́ wa ké ɔ dyi diè, ɓɛ́ ɔ ké ɖɛ kɔ̃̀ jè nyɔ ɓěɔ̀ nì ma kà ɔ dúi pánáìn nyɛɛ múin wɔ̃́. 25Kɛɛ ti wa ɖǎ ma ɔ sã, ɓɛ́ wa kéá ma ɔ ɓaɖaa, Pɔ́ɔ̀ diè ma sójà hɔ̃dɛ̀ɖɛ̀ ɖòɛ̀ ɓǎ ɖò ɓɛ́ ɔ nyànà ma ɓó dyiɛɛ dyi, ké ɔ ɖá, “Ɔ nɔ̀mɔ̀ dyíin ɓɛ́ ɓě ké nyɔ mɔ̀ Wóɖóùn-dyù, ké zaa ɖò se ɔ kpɔ̃ɛɛ gbàtò ɓàɖàìnǹ?”

26Ti sójàɔ̀ wɔ̃́ ma ɖɛa kɛɛ, ɔ mu ma waà sójà-ɓǎɔ̀ gbo, ké ɔ ɖá, “Ɖɛ́ m̀ mɔ́ ɓɛ́ m̀ ké nyuɛ́? Gàa nìà kɛ mɔ̀ Wóɖóùn-dyùo!”

27Ké sójà-ɓǎɔ̀ mu ma Pɔ́ɔ̀ gbo, ké ɔ ɖá, “Cɛ̃ɛ ḿ gbo, m̀ mɔ̀ Wóɖóùn-dyùù?”

Ké Pɔ́ɔ̀ ɖá, “Ǹdye.”

28Ké sójà-ɓǎɔ̀ ɖá, “Ḿ pɛ́ɛ̀ ma wíɖí ɓáún-ɓáún, ɓɛ́ ḿ ké ma Wóɖóùn-dyù jǔ.”

Hwɛ̀ ké Pɔ́ɔ̀ mɔ̀ùn ɖá, “Wóɖóùn-nyɔ̀ wóɖóìn ma mɔ́úno.”

29Ké nyɔ ɓě ké ma kà ɔ ɓaɖaa, wa sɔ̀ ma ɔ jè kíɖíí wàɖà cá. Ké sójà-ɓǎɔ̀ mìɔùn fɛ̃̀ìn ma ɖekè, sepóɛɖé ɔ dyuòɛ̀ ma dyí kà Pɔ́ɔ̀ mɔ̀ ma Wóɖóùn-dyù, ké ɔ ɖǎ ma ɔ sã kɛ.

Pɔ́ɔ̀ nì ɖé tɔ̀ɔ̀-ɓìɔ̀ ɓěɔ̀ dyúa

30Ɓó tia ɓaɖaa, sójà-ɓǎɔ̀ mɔ́ ɓɛ́ ɔ ké ma ɖɛ jɛ́ɛ́ ɓě kɔ̃̀ jè Júù-nyɔ̀ ɓěɔ̀ kpɔ̃ ma kà Pɔ́ɔ̀ kɛɛ múin wɔ̃́. Ɔ jèɛɛ, wéɔ̀ nyɔ kɔ ma ɓó dyíɛɛ, ɔ ɖá ma sáa-zà-nyɔ̀ kpa ɖɛ ɓěɔ̀ kè tɔ̀ɔ̀-ɓìɔ̀ séín ɓěɔ̀, ɓɛ́ wa ké dyí poìn. Ké ɔ buɛ̀ ma Pɔ́ɔ̀, ké ɔ nyànàìn ma ɔ ɓó wa dyúa dyi.

Currently Selected:

Àpɔ́sò 22: ƁB02

Highlight

Copy