2 Kɔ̀ɖéíntĩ̀ɔ̀ 6
6
1À mɔ̀ nyɔ ɓɛ́ à kè Gèɖèpɔ́ɔ̀ nìà kũ̀à nyuɛń nyɛɛ, à ɓaà ɓě ní, ɓě mɔ̀ nyɔ ɓɛ́ ɓě ɖǎà Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ dyi kpɔ̃ɛɛ, ɓěǐn ɖá ɓɛ́ ɔ ké ná nì pídyi. 2Ɖɛ ɓɛ́ Gèɖèpɔ́ɔ̀ cɛ̃ɛ kɛà kɛ̀. Ɔ ɖá,
“Ɖé ti ɓɛ̀ɖɛ̀ìn dyí ní hwòɖǒ ɖǎ gbɔ poɛ múɛɛ, ní mu m̀ gɔ̃̌ jǔùn.
Nì póìn-tìɔ̀ dyi ɓó nyini ní, ní mu m̀ gbo kpáùn.”
Ɓě tò ɖùǔ. Ti nìà kɛ mɔ̀ ti nɔ̀mɔ̀ dyíinɔ̀. Zɛ̃̌ɛ̀ mɔ̀ pó-wèɔ̀.
3À ní po ɖɛ kéɛ nyu ɓɛ́ nyɔ ɖò ké gbǒ kɛɛ ɔ hwìèɔ̀ dyí, ɓɛ́ wa ní kɔ̃̀ ɖà à kũ̀àɔ̀ ɖɛ nyìnììn dyíin ɖò mú dyé. 4Kɛɛ ɖɛ séín ɓě ɓɛ́ à nyuɛɛ, à tɛ̀mɛ̀ìn nyɔǔn dyí kà à mɔ̀ Gèɖèpɔ́ɔ̀ gbo-nì-nyɔ̀ kɛ. À ku hwòɖǒ mìɔ ɖé gǎ-dyé-dyé kè ti kàmàǔn-kàmàǔn ɔ kè fũ̀à-fṹá-ɖɛ̀ séín ɓě mú. 5Wa ɖǎ à ɓaɖa, ké wa ɖǎ à kpɔɖɔ ɖeín po, ké wa ɖǎ à ɖe hwɛ̀ìn. À ɖǎ à mìɔùn sàìn ɖé kũ̀à-nyu-nyu mú. Ti ɖíɛ́ ɓě ɓaɖaín, à ní mɔ́, ké à ní ɖi ɖɛ ɖò. 6À tɛ̀mɛ̀ìn nyɔǔn dyí kà à mɔ̀ Gèɖèpɔ́ɔ̀ gbo-nì-nyɔ̀ ɓěɛɛ ɖé à hwòɖǒ wáɖáá kè à hwòɖǒ-fɔ̀nɔ̀-fɔ̀nɔ̀ɔ̀ kè à hwòɖǒ-ku-kuɔ̀ kè à hwòɖǒ-kɔ̃in-nɔ̀mɔ̀-nɔ̀mɔ̀ɔ̀ kè Zùù Hwɛ̀ǐn-hwɛ̀ǐnɔ̀ kè à jǎà-ɖɛ̀ɓɛ̀ǐn-ɖɛ̀ɓɛ̀ǐnɔ̀ 7kè à jǎà-wùɖù ɓěɔ̀ ɔ kè Gèɖèpɔ́ɔ̀ kpéɔ̀ mú. À ɓéɖé dyí-sɛ́ɖɛ́ìn-sɛ́ɖɛ́ìn vɔ̃̀ìn-ɖɛ̀ ɖé à ɖiaún ɔ kè ɖé à kunuaún. 8Wa dyé à kpéín, ké wa zàìn à zùǔn. Wa ɖá à nyɛ́nɛ́ gbà, ké wa ɖá à nyɛ́nɛ́ín-nyɛ̀nɛ̀. Wa kpɔ̃ à kà wa kpɔ̃à nyɔ-cá-nyɔ̀ ɓěɛ, kɛɛ à cɛ̃ ɖɛ mɔ̀ jǎà kɛ. 9Wa kpɔ̃ à kà wa kpɔ̃à nyɔ wa se dyí dyuò wɛ, kɛɛ ɔ jèɛɛ, nyɔ séín dyuò à dyí. Wa nyu à kà à seà nyɔǔn-dyù ɓěɛ, kɛɛ wɛ̃́ɛ́ kɛɛ à cĩ́ kánáá pū. Wa dyéìn à gǎ dyɛo, kɛɛ à se mɛ́. 10À kò wìì-ɓò, kɛɛ à kpá múàǔn ti séín ɓàɖà. À mɔ̀ gǎ-dyé-nyɔ̀ dyɛo, kɛɛ à nyuɛ ké nyɔ ɓáún-ɓáún bã. À se ɖɛ ɖò ɓéɖé dyɛo, kɛɛ à kɔ̃̀ ɖɛ séín.
11Kɔ́ɖèìn-nyɔ̀ ɓě, à ɖǎ ɓě gbo wùɖù wáɖáá. À ɖǎ à hwòɖǒ-dyùàà gbǒ-wɔ̃̀ ɓěɔ̀ kaà cá. 12À se à hwòɖǒ-dyùàà gbǒ-wɔ̃̀ ɓěɔ̀ ɓě dyí kã̀ìn. Ɓě mɔ̀ nyɔ kã̀ìn ɓěɛ̀ hwòɖǒ-dyùàɔ̀ gbǒ-wɔ̃̀ ɓěɔ̀ à dyí. 13Ḿ wùɖù ɓě gbo kà ɓɛ́ ɓě mɔ̀ɔ̌ kà ní dyú ɓěɛ. Ɖɛ ɓě à ɖǎ ma kà ɓě bìì nyuɛɛ, ɓě mɛ nyu ɖò ɓó à mɔ̀ùn bìì. Ɓě kaà ɓěɛ̀ hwòɖǒ-dyùàɔ̀ gbǒ-wɔ̃̀ ɓěɔ̀ cá.
Ɓě mɔ̀ nì-nì Gèɖèpɔ́ɔ̀ gbǒ ɓě
14Ɓěǐn ɖá ɓɛ́ ɓě kè nyɔ ɓě se Gèɖèpɔ́ɔ̀ hwìɖǐǐ taɓaa ké gbo kpɔ̃̀ìn. Xwɛ̌ ɓě ɓɛ́ìn ɖɛ mɔ̀ ɖɛ sɛ́ɖɛ́ìn dyíɛ ɔ kè ɖɛ se dyí sɛ́ɖɛ́ìn nyɛɛ dyí poɛ̀n nyɛ́? Xwɛ̌ tíe-kpò kè ce ɓɛ́ìn gbo kpɔ̃̀ìn nyuɛ kɛ́? 15Xwɛ̌ Kɛ́ɖɛ́ì kè Nɔɔ́-nàmàǔn wuɖu ɓɛ́ìn dyúáɖò nìɛ̀ nyuɛ kɛ́? Ɖɛ́ nyɔ taɓa Gèɖèpɔ́ɔ̀ hwìɖǐǐɛ kè nyɔ se Gèɖèpɔ́ɔ̀ hwìɖǐǐ taɓaa ɓɛ́ìn dyí poɛ̀n nyɛ́? 16Xwɛ̌ Gèɖèpɔ́ɔ̀ gbǒɔ̀ kè kũùn-kpò ɓɛ́ìn wuɖu táí poɛ nyuɛ kɛ́? Sepóɛɖé à mɔ̀ nì-nì Gèɖèpɔ́ɔ̀ gbǒ. Ɖɛ Gèɖèpɔ́ɔ̀ cɛ̃ɛ kɛà kɛ̀. Ɔ ɖá,
“Ní mu ɖé wa mú cĩ́ìn,
ké ní mu ɖé wa hwìɛ̀ nììn.
Ní mu waà Gèɖèpɔ́ɔ̀ jǔùn,
ké wa mu ní nyɔ ɓě jǔùn.”
17Ɔ jèɛɛ, Bounɓoɔ̀ ɖá,
“Ɓě mɛ sɔ̀ ɖé wa hwìɛ̀,
ɓɛ́ ɓě kè wa ké gbo zaìn.
Ɓěǐn ɖá ɓɛ́ ɓě ké se-mú-hwɛ̀-ɖɛ̀ ɓěɔ̀ ɖò dyi tìnììn,
nìí, ní mu ɓě jè dyi kpɔ̃ùn.
18Ní mu ɓěɛ̀ ɓǎ jǔùn,
ké ɓě mu ní dyú-gàà kè dyú-màà ɓě jǔùn.
Mɔ̄ Bounɓo mɔ̀ nyɔ nìà ɖɛ séín kɔ̃in nyɛɛ mɔ̀ nyɔ cɛ̃à kɛ̀.”
Currently Selected:
2 Kɔ̀ɖéíntĩ̀ɔ̀ 6: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
