2 Kɔ̀ɖéíntĩ̀ɔ̀ 1
1
Pɔ́ɔ̀ zà Kɔ́ɖèìn-nyɔ̀ ɓěɔ̀ nyíɔún
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ɔ mɔ̀ Gèɖèpɔ́ɔ̀ mɔ́ɔ́-ɖɛ̀, ké ḿ mɔ̀à Kɛ́ɖɛ́ì Jízɛ̀ɛ̀ àpɔ́sò kɛ̀.
Ḿ kè à ɖíí-gàà Tímétè zà ɓě mɔ̀à Gèɖèpɔ́ɔ̀ cɔ́cì-nyɔ̀ ɓě nìà ɖé Kɔ́ɖèìn-hwɔ̀ɖɔ̀ɔ̀ múɛ kè Gèɖèpɔ́ɔ̀-nyɔ̀ séín ɓě nìà ɖé Àkédyà-ɓòɖòɔ̀ kɔ̃ dà séín nyɛɛ nyíɔún.
2Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Pɔ́ɔ̀ po Gèɖèpɔ́ɔ̀ zùo
3Ɓěà mɛ ɓàìn Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ì Ɓǎ kɛ. Ɔ mɔ̀ nyɔ-wìì-kɔ̃-ɓéɖé-Ɓǎ. Ɔ kɔ̃̀ xwaún ɖéɛ nyɔ hwòɖǒ-dyi-dè-dè séín sɔ̀ìn kà kɛ̀. 4Ɔ dè à hwòɖǒ dyi ɖé à gǎ-dyé-dyé séín mú, ɓɛ́ à ké kpé ɓɛ́ìn, ɓɛ́ à mɔ̀ùn ké nyɔ ɓě ɓɛ́ wa nì gǎ-ɖɛ̀ kã̀ìn-kã̀ìn dyí dyéɛń nyɛɛ hwòɖǒ dyi dè. À dè wa mɔ̀ùn hwòɖǒ dyi dyììn ɖé hwòɖǒ-dyi-dè-dè dyúáɖò ɓɛ́ à mɔ̀ùn dyé ma ɖé Gèɖèpɔ́ɔ̀ gboɛɛ mú. 5Kà dyúáɖò ɓɛ́ à kè Kɛ́ɖɛ́ì peɖeìn kà ɔ gǎ-dyé-dyé kúɖúú ɓěɔ̀ múɛɛ, kà dyúáɖòɔ̀ kǎà dyììn ɖé Kɛ́ɖɛ́ì múɛɛ, à kèɔ̀ kè peɖeìn ɔ hwòɖǒ-dyi-dè-dè zià dyí ɓúáuń wɛ̃ɛ mú ɖekè. 6À mɔ̀ùn dyi gǎ dyéín, nìí, ɔ mɔ̀ ɓɛ́ ɓě ké hwòɖǒ-dyi-dè-dè kè pó-pó ɓéɖé jè. À hwòɖǒ dyi dyi dèǐn, nìí, ɔ mɔ̀ ɓɛ́ ɓě ké hwòɖǒ-dyi-dè-dè ɓéɖé jè. Ɔ mɔ̀ hwòɖǒ-dyi-dè-dè ɓɛ́ Gèɖèpɔ́ɔ̀ nyuɛ ké ɓě ɓéɖéà, ké ɓě kuà hwòɖǒ, ké ɓě kùìn kà gǎ-dyé-dyé ɓě ɓɛ́ à mɔ̀ùn kùìn kà hwòɖǒɛɛ hwòɖǒ kɛ. 7À dè ɓě hwòɖǒ kɔ̃, ké hwòɖǒ-kɔ̃-dè-dè ɓɛ́ à ɓéɖéà ɓó ɓě bììɛɛ ní túò dyi, sepóɛɖé à dyuòɛ̀ kà ɓɛ́ à kè ɓě peɖeìn à gǎ-dyé-dyé ɓěɔ̀ múɛ. Ké kà dyúáɖòɔ̀ kǎà à kè ɓě mɔ̀ùn peɖeìn à hwòɖǒ-dyi-dè-dèɔ̀ mú ɖekè.
8Ɖíí ɓě, à mɔ́ ɓɛ́ ɓě ké gǎ à dyé ma ɖé Ésìà-ɓòɖòɔ̀ kɔ̃ɛɛ jè dyuò. À gbɛ̌ ɓěɔ̀ zi ma kpéín ɓúáuń mìɔ, ké à seɛ ma xwa ɓɛ́ìn. Ké ɔ nyuɛ ké à se ma ɖé à wóɖó jè hwòɖǒ kɔ̃ dè. 9À nì ma pū kà zaa kpɔ̃à à nììn, ké à ɓéɖé ɓɛ́ à kéà mɛ́ɛ. Kɛɛ ɖɛ nìà kɛ kpá ɓɛ́ ɔ kéɛ nyu ɓɛ́ à ké se à mìɔùn hwòɖǒ kɔ̃ dè, kɛɛ ɓɛ́ à ké Gèɖèpɔ́ɔ̀ mɔ̀ nyɔ zàà nyɔ gĩɔ kɛɛ hwòɖǒ kɔ̃ dè. 10Ɔ póìn à gĩɔ nìà kɛ xwaún, ké ɔ mu à póìn. Ké à ɖǎ ɔ hwòɖǒ kɔ̃ dè kà ɓɛ́ ɔ mu à póìn ɖe, 11ɔ jǔ ké ɓě dyi à gbo kpá ɖé ɓěɛ̀ Gèɖèpɔ́ɔ̀ ɓaà-ɓaà mú ɓó à bìì ní. Ké Gèɖèpɔ́ɔ̀ mu à bìì ɖɛ nɔ̀mɔ̀ dyíin ɖò nyuùn dyììn ɖé nyɔ ɓáún-ɓáún ɓěɛ̀ Gèɖèpɔ́ɔ̀ ɓaà-ɓaà mú, ké ɔ muɛ nyuùn ɓɛ́ nyɔ ɓáún-ɓáún ké Gèɖèpɔ́ɔ̀ zùo po ɓó à jè.
Pɔ́ɔ̀ dyí-sɔ́-ɖɛ̀ɔ̀ zàìn dyí
12Ɖɛ kɔ̃̀ jè ɓɛ́ à ɓɔ́ɖɔ́à kɛɛ, ɔ kɛ̀. Ɔ mɔ̀, à hwòɖǒ-xwíníín-hwòɖò-dyùàɔ̀ cɛ̃ɛ à gbo kà ɓɛ́ à cĩ́-cĩ́ ɓɛ́ à nyu ɓóɖó-kpàà kɔ̃ɛ kè kpeɖe ɓɛ́ à nyu ma ɖé ɓě gboɛɛ, Gèɖèpɔ́ɔ̀ nyuɛ ké ɔ se ma kɛɛ ɖò ɓéɖéɛ, ké ɖɛ ɓě à nyu ma kà kɛɛ sɔ̀ ma ɖé à hwòɖǒ bũ̌. Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuɛ ma náa. Ɓóɖó-kpàà nììn hwòɖǒ-fɔ̀nɔ̀-fɔ̀nɔ̀ɔ̀ seɛ ma nyu. 13-14Sepóɛɖé ɖɛ ɓě ɓɛ́ìn wuɖuún zàà kɛ kè ɖɛ ɓě ɓɛ́ìn múin wɔ̃́ɔ kɛɛ ɖòùn ɖé à céè ɓě gbo. Ɔ nyɔ wè ɓɛ́ ɓě wɔ̃́à múin kàǔn wɛ̃ɛ, ḿ dèɛ̀ hwòɖǒ kɔ̃ kà ɓɛ́ ɓě muɛ múin wɔ̃́ùn, ɓɛ́ Bounɓo Jízɛ̀ɛ̀ wéɔ̀ dyi dyiín, ɓɛ́ ɓě ké à jè ɓɔ́ɖɔ́ kà ɓɛ́ à mɔ̀ùn muà ɓɔ́ɖɔ́ùn ɓó ɓě nììn jèɛ.
15Ḿ dè ma ɖɛ séín ɓě nìà kɛ hwòɖǒ kɔ̃ jèɛɛ, ḿ nì ma hwìɖǐi poɛ̌n ɓɛ́ ḿ ké ma ɖé ɓě gbo zĩ̀ìn kĩ́ín, ɓɛ́ ɓě ké ma gbo-kpá-kpáɔ̀ dyéìn sɔ̃́. 16Ḿ nìɛ̀ ma hwìɖǐi poɛ̌n, ɓɛ́ ɔ jǔ ké ḿ dyi ma ɖé Màsèdónìà-ɓòɖòɔ̀ kɔ̃ muɛń nìǐn, ḿ ké ma ɖé ɓě gbo zĩ̀ìn. Kɛɛ ɔ jǔ ké ḿ dyi ma ɖé Màsèdónìà-ɓòɖòɔ̀ kɔ̃ sɔ̀ǔn nìǐn, ḿ ké ma ɖé ɓě gbo dyììn ɖe, ɓɛ́ ɓě ké ḿ cuò, ɓɛ́ ḿ ké ɖé Júɖìà-ɓòɖòɔ̀ kɔ̃ mu. 17Ti ḿ nì ma ɖɛ ɓě nìà kɛ hwìɖǐi poɛ̌n nyɛɛ, ɔ xwíníín mɔ̀, ḿ mɔ́ ḿ ké ma ní wuɖu ɓěɔ̀ gbo zĩàìnǹ? Ḿ dyi ɖɛ ɖò gbɔ poín, nìí, ḿ nì kà ɓóɖó-kpàà nyɔ ɓě nìà kɛ, ké ḿ nyuà ǹdye kè gbào ɓó ti dyúáɖòɔ̀ xwínííne? 18Kà ɓɛ́ Gèɖèpɔ́ɔ̀ mɔ̀à hwòɖǒ-kɔ̃-dè-nyɔ̀ jɛ́ɛ́ kɛɛ, wuɖu ɓě ɓɛ́ à cɛ̃ ma ɓě gboɛɛ se ma ǹdye kè gbào pū. 19Sepóɛɖé Gèɖèpɔ́ɔ̀ Dyú-gàà mɔ̀à Jízɛ̀ Kɛ́ɖɛ́ì, nyɔ kɔ̃̀ jè ɓɛ́ ḿ kè Sɔ̀vénà kè Tímétè poà zio ɖé ɓě hwìɛ̀ kɛɛ se ma ǹdye kè gbào. Kɛɛ ǹdye nì ɖé ɔ mú kánáá pū. 20Sepóɛɖé ɔ mɔ̀ ǹdye ɓó Gèɖèpɔ́ɔ̀ nyɛ́nɛ́ín-ɖáìn-ɖɛ̀ séín ɓěɔ̀ bìì. Ɖɛa kɔ̃̀ jè, à ɖá kà ɔ mɛ nì dyììn ɖé ɔ mú, ɓɛ́ Gèɖèpɔ́ɔ̀ ké ɓàìn-ɓàìn ɓéɖé. 21Gèɖèpɔ́ɔ̀ mɔ̀ nyɔ kùìn à kè ɓě dyi ɖé Kɛ́ɖɛ́ì mú, ké ɔ ɖǎ à wáká po. 22Ɔ ɖǎ ɔ dyí-dyuòìn-bɛ̃̀ɔ̀ à kɔ̃ po, ké ɔ tò ɔ Zùùɔ̀ ɖé à hwòɖǒ-dyùàɔ̀ mú ɓɛ́ ɔ ké ɖɛ séín ɓě ɓɛ́ ɔ ɓéɖé à bììɛɛ ɓo-kɔ̃-pòìn-ɖɛ̀ jǔ.
23Gèɖèpɔ́ɔ̀ mɛ mɔ̀ ní zàse. Ní fɛ̀ɛ̀ɔ̀ nì ɔ xwaún. Ɔ jèɛɛ, ḿ poɛ ma kà gbɔ, ɓɛ́ ḿ ké se ma kà ɖé ɓě gbo dyi ɖé Kɔ́ɖèìn-hwɔ̀ɖɔ̀ɔ̀ múɛ̀, sepóɛɖé ḿ se mɔ́ ɓɛ́ ɓěɛ̀ hwòɖǒ ké ma ɖé ɖei kpá. 24Ɔ se ɖɛ ɓɛ́ à ké ɓě kɔ̃ nɛ́iń nì ɓó ɖɛ ɓě ké hwìɖǐǐ taɓaa jèɛ, sepóɛɖé ɓě nyànà dyi kóɖó-kóɖó ɖé ɖɛ ɓě taɓaà hwìɖǐǐɛɛ mú. Kɛɛ à kè ɓě nì kũ̀à nyuɛń, ɓɛ́ ɓě ké múà ɓéɖé.
Currently Selected:
2 Kɔ̀ɖéíntĩ̀ɔ̀ 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.
2 Kɔ̀ɖéíntĩ̀ɔ̀ 1
1
Pɔ́ɔ̀ zà Kɔ́ɖèìn-nyɔ̀ ɓěɔ̀ nyíɔún
1Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ɔ mɔ̀ Gèɖèpɔ́ɔ̀ mɔ́ɔ́-ɖɛ̀, ké ḿ mɔ̀à Kɛ́ɖɛ́ì Jízɛ̀ɛ̀ àpɔ́sò kɛ̀.
Ḿ kè à ɖíí-gàà Tímétè zà ɓě mɔ̀à Gèɖèpɔ́ɔ̀ cɔ́cì-nyɔ̀ ɓě nìà ɖé Kɔ́ɖèìn-hwɔ̀ɖɔ̀ɔ̀ múɛ kè Gèɖèpɔ́ɔ̀-nyɔ̀ séín ɓě nìà ɖé Àkédyà-ɓòɖòɔ̀ kɔ̃ dà séín nyɛɛ nyíɔún.
2Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.
Pɔ́ɔ̀ po Gèɖèpɔ́ɔ̀ zùo
3Ɓěà mɛ ɓàìn Gèɖèpɔ́ɔ̀ mɔ̀à à Bounɓo Jízɛ̀ Kɛ́ɖɛ́ì Ɓǎ kɛ. Ɔ mɔ̀ nyɔ-wìì-kɔ̃-ɓéɖé-Ɓǎ. Ɔ kɔ̃̀ xwaún ɖéɛ nyɔ hwòɖǒ-dyi-dè-dè séín sɔ̀ìn kà kɛ̀. 4Ɔ dè à hwòɖǒ dyi ɖé à gǎ-dyé-dyé séín mú, ɓɛ́ à ké kpé ɓɛ́ìn, ɓɛ́ à mɔ̀ùn ké nyɔ ɓě ɓɛ́ wa nì gǎ-ɖɛ̀ kã̀ìn-kã̀ìn dyí dyéɛń nyɛɛ hwòɖǒ dyi dè. À dè wa mɔ̀ùn hwòɖǒ dyi dyììn ɖé hwòɖǒ-dyi-dè-dè dyúáɖò ɓɛ́ à mɔ̀ùn dyé ma ɖé Gèɖèpɔ́ɔ̀ gboɛɛ mú. 5Kà dyúáɖò ɓɛ́ à kè Kɛ́ɖɛ́ì peɖeìn kà ɔ gǎ-dyé-dyé kúɖúú ɓěɔ̀ múɛɛ, kà dyúáɖòɔ̀ kǎà dyììn ɖé Kɛ́ɖɛ́ì múɛɛ, à kèɔ̀ kè peɖeìn ɔ hwòɖǒ-dyi-dè-dè zià dyí ɓúáuń wɛ̃ɛ mú ɖekè. 6À mɔ̀ùn dyi gǎ dyéín, nìí, ɔ mɔ̀ ɓɛ́ ɓě ké hwòɖǒ-dyi-dè-dè kè pó-pó ɓéɖé jè. À hwòɖǒ dyi dyi dèǐn, nìí, ɔ mɔ̀ ɓɛ́ ɓě ké hwòɖǒ-dyi-dè-dè ɓéɖé jè. Ɔ mɔ̀ hwòɖǒ-dyi-dè-dè ɓɛ́ Gèɖèpɔ́ɔ̀ nyuɛ ké ɓě ɓéɖéà, ké ɓě kuà hwòɖǒ, ké ɓě kùìn kà gǎ-dyé-dyé ɓě ɓɛ́ à mɔ̀ùn kùìn kà hwòɖǒɛɛ hwòɖǒ kɛ. 7À dè ɓě hwòɖǒ kɔ̃, ké hwòɖǒ-kɔ̃-dè-dè ɓɛ́ à ɓéɖéà ɓó ɓě bììɛɛ ní túò dyi, sepóɛɖé à dyuòɛ̀ kà ɓɛ́ à kè ɓě peɖeìn à gǎ-dyé-dyé ɓěɔ̀ múɛ. Ké kà dyúáɖòɔ̀ kǎà à kè ɓě mɔ̀ùn peɖeìn à hwòɖǒ-dyi-dè-dèɔ̀ mú ɖekè.
8Ɖíí ɓě, à mɔ́ ɓɛ́ ɓě ké gǎ à dyé ma ɖé Ésìà-ɓòɖòɔ̀ kɔ̃ɛɛ jè dyuò. À gbɛ̌ ɓěɔ̀ zi ma kpéín ɓúáuń mìɔ, ké à seɛ ma xwa ɓɛ́ìn. Ké ɔ nyuɛ ké à se ma ɖé à wóɖó jè hwòɖǒ kɔ̃ dè. 9À nì ma pū kà zaa kpɔ̃à à nììn, ké à ɓéɖé ɓɛ́ à kéà mɛ́ɛ. Kɛɛ ɖɛ nìà kɛ kpá ɓɛ́ ɔ kéɛ nyu ɓɛ́ à ké se à mìɔùn hwòɖǒ kɔ̃ dè, kɛɛ ɓɛ́ à ké Gèɖèpɔ́ɔ̀ mɔ̀ nyɔ zàà nyɔ gĩɔ kɛɛ hwòɖǒ kɔ̃ dè. 10Ɔ póìn à gĩɔ nìà kɛ xwaún, ké ɔ mu à póìn. Ké à ɖǎ ɔ hwòɖǒ kɔ̃ dè kà ɓɛ́ ɔ mu à póìn ɖe, 11ɔ jǔ ké ɓě dyi à gbo kpá ɖé ɓěɛ̀ Gèɖèpɔ́ɔ̀ ɓaà-ɓaà mú ɓó à bìì ní. Ké Gèɖèpɔ́ɔ̀ mu à bìì ɖɛ nɔ̀mɔ̀ dyíin ɖò nyuùn dyììn ɖé nyɔ ɓáún-ɓáún ɓěɛ̀ Gèɖèpɔ́ɔ̀ ɓaà-ɓaà mú, ké ɔ muɛ nyuùn ɓɛ́ nyɔ ɓáún-ɓáún ké Gèɖèpɔ́ɔ̀ zùo po ɓó à jè.
Pɔ́ɔ̀ dyí-sɔ́-ɖɛ̀ɔ̀ zàìn dyí
12Ɖɛ kɔ̃̀ jè ɓɛ́ à ɓɔ́ɖɔ́à kɛɛ, ɔ kɛ̀. Ɔ mɔ̀, à hwòɖǒ-xwíníín-hwòɖò-dyùàɔ̀ cɛ̃ɛ à gbo kà ɓɛ́ à cĩ́-cĩ́ ɓɛ́ à nyu ɓóɖó-kpàà kɔ̃ɛ kè kpeɖe ɓɛ́ à nyu ma ɖé ɓě gboɛɛ, Gèɖèpɔ́ɔ̀ nyuɛ ké ɔ se ma kɛɛ ɖò ɓéɖéɛ, ké ɖɛ ɓě à nyu ma kà kɛɛ sɔ̀ ma ɖé à hwòɖǒ bũ̌. Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ nyuɛ ma náa. Ɓóɖó-kpàà nììn hwòɖǒ-fɔ̀nɔ̀-fɔ̀nɔ̀ɔ̀ seɛ ma nyu. 13-14Sepóɛɖé ɖɛ ɓě ɓɛ́ìn wuɖuún zàà kɛ kè ɖɛ ɓě ɓɛ́ìn múin wɔ̃́ɔ kɛɛ ɖòùn ɖé à céè ɓě gbo. Ɔ nyɔ wè ɓɛ́ ɓě wɔ̃́à múin kàǔn wɛ̃ɛ, ḿ dèɛ̀ hwòɖǒ kɔ̃ kà ɓɛ́ ɓě muɛ múin wɔ̃́ùn, ɓɛ́ Bounɓo Jízɛ̀ɛ̀ wéɔ̀ dyi dyiín, ɓɛ́ ɓě ké à jè ɓɔ́ɖɔ́ kà ɓɛ́ à mɔ̀ùn muà ɓɔ́ɖɔ́ùn ɓó ɓě nììn jèɛ.
15Ḿ dè ma ɖɛ séín ɓě nìà kɛ hwòɖǒ kɔ̃ jèɛɛ, ḿ nì ma hwìɖǐi poɛ̌n ɓɛ́ ḿ ké ma ɖé ɓě gbo zĩ̀ìn kĩ́ín, ɓɛ́ ɓě ké ma gbo-kpá-kpáɔ̀ dyéìn sɔ̃́. 16Ḿ nìɛ̀ ma hwìɖǐi poɛ̌n, ɓɛ́ ɔ jǔ ké ḿ dyi ma ɖé Màsèdónìà-ɓòɖòɔ̀ kɔ̃ muɛń nìǐn, ḿ ké ma ɖé ɓě gbo zĩ̀ìn. Kɛɛ ɔ jǔ ké ḿ dyi ma ɖé Màsèdónìà-ɓòɖòɔ̀ kɔ̃ sɔ̀ǔn nìǐn, ḿ ké ma ɖé ɓě gbo dyììn ɖe, ɓɛ́ ɓě ké ḿ cuò, ɓɛ́ ḿ ké ɖé Júɖìà-ɓòɖòɔ̀ kɔ̃ mu. 17Ti ḿ nì ma ɖɛ ɓě nìà kɛ hwìɖǐi poɛ̌n nyɛɛ, ɔ xwíníín mɔ̀, ḿ mɔ́ ḿ ké ma ní wuɖu ɓěɔ̀ gbo zĩàìnǹ? Ḿ dyi ɖɛ ɖò gbɔ poín, nìí, ḿ nì kà ɓóɖó-kpàà nyɔ ɓě nìà kɛ, ké ḿ nyuà ǹdye kè gbào ɓó ti dyúáɖòɔ̀ xwínííne? 18Kà ɓɛ́ Gèɖèpɔ́ɔ̀ mɔ̀à hwòɖǒ-kɔ̃-dè-nyɔ̀ jɛ́ɛ́ kɛɛ, wuɖu ɓě ɓɛ́ à cɛ̃ ma ɓě gboɛɛ se ma ǹdye kè gbào pū. 19Sepóɛɖé Gèɖèpɔ́ɔ̀ Dyú-gàà mɔ̀à Jízɛ̀ Kɛ́ɖɛ́ì, nyɔ kɔ̃̀ jè ɓɛ́ ḿ kè Sɔ̀vénà kè Tímétè poà zio ɖé ɓě hwìɛ̀ kɛɛ se ma ǹdye kè gbào. Kɛɛ ǹdye nì ɖé ɔ mú kánáá pū. 20Sepóɛɖé ɔ mɔ̀ ǹdye ɓó Gèɖèpɔ́ɔ̀ nyɛ́nɛ́ín-ɖáìn-ɖɛ̀ séín ɓěɔ̀ bìì. Ɖɛa kɔ̃̀ jè, à ɖá kà ɔ mɛ nì dyììn ɖé ɔ mú, ɓɛ́ Gèɖèpɔ́ɔ̀ ké ɓàìn-ɓàìn ɓéɖé. 21Gèɖèpɔ́ɔ̀ mɔ̀ nyɔ kùìn à kè ɓě dyi ɖé Kɛ́ɖɛ́ì mú, ké ɔ ɖǎ à wáká po. 22Ɔ ɖǎ ɔ dyí-dyuòìn-bɛ̃̀ɔ̀ à kɔ̃ po, ké ɔ tò ɔ Zùùɔ̀ ɖé à hwòɖǒ-dyùàɔ̀ mú ɓɛ́ ɔ ké ɖɛ séín ɓě ɓɛ́ ɔ ɓéɖé à bììɛɛ ɓo-kɔ̃-pòìn-ɖɛ̀ jǔ.
23Gèɖèpɔ́ɔ̀ mɛ mɔ̀ ní zàse. Ní fɛ̀ɛ̀ɔ̀ nì ɔ xwaún. Ɔ jèɛɛ, ḿ poɛ ma kà gbɔ, ɓɛ́ ḿ ké se ma kà ɖé ɓě gbo dyi ɖé Kɔ́ɖèìn-hwɔ̀ɖɔ̀ɔ̀ múɛ̀, sepóɛɖé ḿ se mɔ́ ɓɛ́ ɓěɛ̀ hwòɖǒ ké ma ɖé ɖei kpá. 24Ɔ se ɖɛ ɓɛ́ à ké ɓě kɔ̃ nɛ́iń nì ɓó ɖɛ ɓě ké hwìɖǐǐ taɓaa jèɛ, sepóɛɖé ɓě nyànà dyi kóɖó-kóɖó ɖé ɖɛ ɓě taɓaà hwìɖǐǐɛɛ mú. Kɛɛ à kè ɓě nì kũ̀à nyuɛń, ɓɛ́ ɓě ké múà ɓéɖé.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.