1 Kɔ̀ɖéíntĩ̀ɔ̀ 3

Gèɖèpɔ́ɔ̀ gbo-nì-nyɔ̀ ɓě

1Kɛɛ ní ɖíí ɓě, ɔ kàmà ma mú ɓɛ́ ḿ ké ma ɓě gbo wùɖù kà ɓɛ́ ḿ ɓéɖé ɓɛ́ ḿ kéɔ́ nyɔ ɓě ɓéɖéà Zùùɔ̀ kɛɛ gbo wùɖùɛ̀. Ḿ wùɖù ma ɓě gbo kà nyɔ wùɖùɔ̌ kà nyɔǔn-dyù fóɖóún gboɛ. Ḿ wùɖù ma ɓě gbo kà ɓě mɔ̀ɔ̌ má kà dyú-pɛ̀ɖɛ̀ ɓě ɖé Kɛ́ɖɛ́ì múɛ. 2Ḿ nyí ma ɓě nɛɛ̀-nì, kɛɛ ḿ se ma ɓě ɖii-ɖɛ̀ kà kò ɖò nyí, sepóɛɖé ɓě séèɛ̀ ma ɖiɛ ɓɛ́ìn ke. Ké ɓě séèɛ̀ ɖiɛ ɓɛ́ìn ke ɓó kàǔn, 3sepóɛɖé ɓě mìɔùn nììn mɔ́ɔ́-ɖɛ̀ kɔ̃̀ ɓě wuɖuí ke. Kà hwɛ̀nɛ̌ kè ɖɛín-zà-zà nìà ɖé ɓě pṹa keɛɛ, nìí, ɓě mìɔùn nììn mɔ́ɔ́-ɖɛ̀ séè ɓě wuɖuí kɔ̃̀ keè? Ɓěɛ̀ nyuu-ɖɛ̀ ɓě kè nyɔ tɔ̀ɔ̀ ɓěɛ̀ nyuu-ɖɛ̀ se hwɔìne? 4Sepóɛɖé nyɔ ɖíɛ́ ɓě ɖá wa nì ḿ níǐn wáká kɔ̃, ké nyɔ ɖíɛ́ ɓě ɖá wa nì Àpɔ́ɖè nììn wáká kɔ̃ɛɛ, nìí, ɓě se nì kà nyɔ tɔ̀ɔ̀ ɓě nìà kɛɛ̀?

5Nyɛ́ mɔ̀ Àpɔ́ɖè kɛ́? Ké mɔ́ún mɔ̀ nyɛ́ɛ̀? À mɔ̀ Gèɖèpɔ́ɔ̀ gbo-nì-nyɔ̀ ɓě pū. À mɔ̀ nyɔ nyuɛ ké ɓě taɓa ma Gèɖèpɔ́ɔ̀ hwìɖǐǐ. À ɓéɖé ɖɛ ɓě ɓɛ́ Bounɓoɔ̀ nyí à kɛɛ ɖò-ɖò. 6Ḿ ɓá ma ɓáá-ɖɛ̀ɔ̀, ké Àpɔ́ɖè wáɖáa ma ní gbo, kɛɛ Gèɖèpɔ́ɔ̀ mɔ̀ nyɔ nyuɛ ké ɔ mɛ ma. 7Ɔ jèɛɛ, nyɔ ɓáà ɓáá-ɖɛ̀ɔ̀ kɛ kè nyɔ wáɖáà ní gboɛɛ se ɖɛ kpa fɔɔ. Kɛɛ Gèɖèpɔ́ɔ̀ mɔ̀ nyɔ nyuɛ ké ɔ mɛà kɛɛ ɖòùn mɔ̀ nyɔ kpa ɖɛ. 8Nyɔ ɓáà ɓáá-ɖɛ̀ɔ̀ kɛ kè nyɔ wáɖáà ní gboɛɛ, wa ɓɛ́ìn wɔ̃, ké wa mu waà pɛ́ɛ̀-ɖɛ̀ dyéìn ɖò-ɖò dyììn ɖé kà wa kũ̀à-sɔ̃̀ mu nìɛ̀ nyuùn wɛ̃ɛ mú. 9Àpɔ́ɖè mɔ̀ ḿ mǔè, ké ḿ kèɔ̀ kè mɔ̀ Gèɖèpɔ́ɔ̀ bìì kũ̀à-nyu-nyɔ̀. Ɓě mɔ̀ geɖe ɓɛ́ Gèɖèpɔ́ɔ̀ nìà nyuɛń nyɛ. Ɓě mɔ̀ gbǒ ɓɛ́ Gèɖèpɔ́ɔ̀ nìà poɛń nyɛ.

10Ḿ nì kà gbǒ-po-nyɔ̀ nɔ̀mɔ̀ dyíin nìà kɛ. Gèɖèpɔ́ɔ̀ kpeɖe nɔ̀mɔ̀ dyíinɔ̀ nyuɛ ké ḿ dè ma gbǒɔ̀ poɛ gbɔ. Ké nyɔ kà kò ɖò nìɛ̀ poɛń. Nyɔ séín mɛ ma mú ɖé gbǒɔ̀ po-poɔ̀ mú. 11Jízɛ̀ Kɛ́ɖɛ́ì mɔ̀ gbǒɔ̀ hìɖì-kpàɔ̀. Nyɔ ɖò se ɖɛ kà kò ɖò dyí ɖúɛ ɓɛ́ìn ɖe, ɓɛ́ ɔ kéɛ gbǒɔ̀ gbɔ dèìn. 12Nyɔ ɖò dyi hìɖì-kpàɔ̀ kɔ̃ góò kè séɓàɖà kè sɔ́ɔ́ kpa ɖɛ ɓě mɔɔ cu mɔɔ mɔɔ́-fèɖè ɔ kè pìǐ pòìn ní, 13nìí, kũ̀à ɓɛ́ nyɔǔn séín nyuɛɛ se gàǐn mu ɖé dyúa. Zaa-wɔ̃-po-wèɔ̀ muɛ píé wóɖóìn, sepóɛɖé ɔ mu nyɛ-tò jǔùn ɓó wéa ɓaɖa. Ké nyɛɔ̀ muɛ mú dɔ̃̌ùn, ɓɛ́ ɔ kéɛ dyé kà nyɔ ɓěɔ̀ kũ̀à nyu ɖɛ kpaa ɖò-ɖò kɛ. 14Ɔ jǔ ké ɖɛ nyɔ ɖò mɔ̀ùn poà hìɖì-kpàɔ̀ kɔ̃ɛɛ dyió sèǐn, nìí, ɔ muɛ pɛ́ɛ̀-ɖɛ̀ dyéìn. 15Ɔ jǔ ké ɖɛ nyɔ ɖò mɔ̀ùn po ɓóɛɛ dyi sĩín, ɔ mu ɔ pɛ́ɛ̀-ɖɛ̀ɔ̀ xwáɖáún sèìn. Ɔ mìɔùn mu póùn, kɛɛ ɔ pó-póɔ̀ mu nììn kà nyɔ bǎà ɓó nyɔ nyɛ-ɓɔ́ɔ́ ɖò múɛ.

16Ɓě seɛ dyí dyuò kà ɓě mɔ̀ Gèɖèpɔ́ɔ̀ gbǒɔ̀, ké Gèɖèpɔ́ɔ̀ Zùùɔ̀ cĩ́ ɖé ɓě múɛɛ̀? 17Nyɔ ɖò dyi Gèɖèpɔ́ɔ̀ gbǒɔ̀ mú gbɔɔ̀ ní, nìí, Gèɖèpɔ́ɔ̀ mu ɔ mɔ̀ùn mú gbɔɔ̀ùn. Sepóɛɖé Gèɖèpɔ́ɔ̀ gbǒɔ̀ kpa ɖɛ mìɔ, ké ɓě mɔ̀ gbǒɔ̀.

18Nyɔ ɖò ní ɖá ɓɛ́ ɔ ké ɔ mìɔùn cá. Nyɔ ɖò dyi ɖé ɓě hwìɛ̀ nì, ké ɔ dyiɛ hwìɖǐi poìn kà ɔ fɔ̀nɔ̀ hwòɖǒ nɔ̄ ɓóɖó-kpàà kɔ̃ɛɛ ní, nìí, ɔ mɛ jǔ zuɖuu-nyɔ̀, ɓɛ́ ɔ ké hwòɖǒ fɔ̀nɔ̀. 19Sepóɛɖé ɓóɖó-kpàà nììn hwòɖǒ-fɔ̀nɔ̀-ɖɛ̀ ɓěɔ̀ mɔ̀ ɖɛ cá-cá ɓó Gèɖèpɔ́ɔ̀ gbo. Gèɖèpɔ́ɔ̀-cèè-ɖɛ̀ɔ̀ ɖá, “Ɔ kpɔ̃̀ìn hwòɖǒ-fɔ̀nɔ̀-nyɔ̀ ɓěɔ̀ ɖé wa mìɔùn nììn sɛ́ɖɛ́-po-poɔ̀ mú.” 20Ké Gèɖèpɔ́ɔ̀-cèè-ɖɛ̀ɔ̀ cɛ̃ɛ ɖe, ké ɔ ɖá, “Bounɓoɔ̀ dyuòɛ̀ dyí kà nyɔǔn-dyùɛ̀ hwìɖǐi-poìn-ɖɛ̀ ɓěɔ̀ mɔ̀ ɖɛ fóɖóún wɛ̃.” 21Ɔ jèɛɛ, nyɔ ɖò ní ɖá ɓɛ́ ɔ ké nyɔǔn jè ɓɔ́ɖɔ́, sepóɛɖé ɖɛ séín mɔ̀ ɓěɛ̀ kɔ̃̀ɔ̀-ɖɛ̀. 22Kɛbì ɔ mɛ mɔ̀ mɔ̄ mɔɔ Àpɔ́ɖè mɔɔ Sífà mɔɔ ɓóɖó-kpàà mɔɔ fɛ̀ɛ̀ mɔɔ gĩɔ mɔɔ ɖɛ ɓě nì kàǔn wɛ̃ ɔ kè ɖɛ ɓě ké dyiɛɛ, wa séín mɔ̀ ɓěɛ̀ kɔ̃̀ɔ̀-ɖɛ̀. 23Ké Kɛ́ɖɛ́ì kɔ̃̀ ɓě, ké Gèɖèpɔ́ɔ̀ kɔ̃̀ Kɛ́ɖɛ́ì mɔ̀ùn.

Currently Selected:

1 Kɔ̀ɖéíntĩ̀ɔ̀ 3: ƁB02

Highlight

Copy