1 Kɔ̀ɖéíntĩ̀ɔ̀ 10

Náún-po-wùɖù ɓá kũùn-kpò jè dyíɛ

1Ḿ ɖíí ɓě, ní mɔ́ ɓɛ́ ɓě kéɛ dyuò kà à ɓǎ nììn ɓǎ séín ɓěɔ̀ nì ma ní-kpòɔ̀ xwíɖíiɛ. Wa séín mùìn dyóóɔ̀ mú. 2Ɔ nì kà wa séín kpá ma níɔ ɖé ní-kpòɔ̀ kè dyóóɔ̀ kɔ̃ɛ, ké wa jǔ ma Mózèɛ̀ nyɔ ɓěɛ. 3Ké wa séín ɖi ma Gèɖèpɔ́ɔ̀ nììn ɖii-ɖɛ̀ dyúáɖòɔ̀, 4ké wa séín ná ma Gèɖèpɔ́ɔ̀ nììn ní dyúáɖòɔ̀. Sepóɛɖé wa ɖɛ̀ɓɛ̀ ɓɛ́ wa ké ní sɔ̀ìn ɖé Gèɖèpɔ́ɔ̀ nììn sɔ́ɔ́-kpò ɓɛ́ ɔ sí ma kà wa kíɖííɛ múɛɛ ná. Sɔ́ɔ́-kpòɔ̀ mɔ̀ ma Kɛ́ɖɛ́ì. 5Kɛɛ wɛ̃́ɛ́ kɛɛ, Gèɖèpɔ́ɔ̀ hwòɖǒ se ma wa ɓáún-ɓáún gboi dèìn. Wa xwɛ́ ɓěɔ̀ ɓeìn ma ɖé gbǎùn-fúɖúáɔ̀ kɔ̃ dyi.

6Ɖɛ ɓě nìà kɛɛ, wa mɔ̀ dyí-tɛ̀mɛ̀ìn-ɖɛ̀ ɓě ɓó ɓěà mɔ̀ùn bìì, ɓɛ́ ɖɛ-gbà-nyu-tò nyu ma kà waa ní kɔ̃̀ ɖà ɓěà mɔ̀ùn nyu. 7Ɓěǐn ɖá ɓɛ́ ɓě ké kũùn-kpò ɓiè kà wa ɖíɛ́ ɓě nyuɛ ma kà kɛ. Kà ɓɛ́ Gèɖèpɔ́ɔ̀-cèè-ɖɛ̀ɔ̀ nyuɛ cɛ̃ɛ kɛɛ, ɔ kɛ̀. Ɔ ɖá, “Nyɔ ɓěɔ̀ kò ma dyi, ké wa ɖi ma ɖɛ, ké wa ná ma, ké wa po ma gbàɖàùn ɓó pá dyúáɖòɔ̀ mú.” 8À ní ɖá ɓɛ́ à ké kpeɖe gbà nyu kà wa ɖíɛ́ ɓě nyuɛ ma kà kɛ. Ké nyɔ-kpò táázĩ̀ìn kpáɖá-nyɔ sè tã kpá ma dyi ɓó wé dyúáɖò xwíníín. 9À ní ɖá ɓɛ́ à ké Bounɓoɔ̀ mú dɔ̃̌ kà wa ɖíɛ́ ɓě nyuɛ ma kà ɓɛ́ sɛɔ̀ dyi ma kà wa mú gbɔɔ̀ kɛ. 10Ɓěǐn ɖá ɓɛ́ ɓě ké ka kà wa ɖíɛ́ ɓě nyuɛ ma kà ɓɛ́ Nyɔ-mú-gbɔɔ̀-nyɔ̀ɔ̀ dyi ma kà wa mú gbɔɔ̀ kɛ.

11Kɛɛ ɖɛ ɓě kpá ma kà wa gboɛɛ mɔ̀ ma dyí-tɛ̀mɛ̀ìn-ɖɛ̀ ɓě, ké wa céè ma ɓó à mɔ̀ nyɔ ɓě ɓɛ́ ti ɓěɔ̀ mánáín-hwɛ̀-hwɛ̀ ɖǎ à bũ̌in xwɛ̃́ìn nyɛɛ nììn náún po jè.

12Ɔ jèɛɛ, nyɔ ɓě ɓɛ́ wa poìn hwìɖǐi kà wa nyànà dyiɛɛ, wa mɛ ma mú ɓɛ́ wa ní kɔ̃̀ ɖà ɓuɖu. 13Mú-dɔ̃̌-dɔ̃̌ séín ɓě ɓɛ́ ɓě dyé dyíɛɛ, ɔ mɔ̀ ɖɛ nyɔ séín dyéɛ. Gèɖèpɔ́ɔ̀ mɔ̀ hwòɖǒ-kɔ̃-dè-nyɔ̀, ké ɔ se wɔ̃́ɔ mu ɓɛ́ mú-dɔ̃̌-dɔ̃̌ɔ̀ nyɔ ɓě se xwa ɓɛ́ìn nyɛɛ ké ɓě kɔ̃ dyi. Kɛɛ ɔ jǔ ké mú-dɔ̃̌-dɔ̃̌ dyi ɓě kɔ̃ dyiɛń nìǐn, ɔ mu hwìè ɓɛ́ ɓě kéɛ xwaún póɛ nyuùn, ɓɛ́ ɓě kéɛ xwa ɓɛ́ìn.

14Ɔ jèɛɛ, ní ɖɛ̀ɓɛ̀-nyɔ̀ ɓě, ɓě fɛ̃̀ìn kũùn-kpò ɓiè-ɓiè dyi. 15Ɓě mɔ̀ hwòɖǒ-fɔ̀nɔ̀-nyɔ̀ ɓě. Ɔ jèɛɛ, kǎà ní mu kà ɓě gbo wùɖùùn. Ɓě mìɔùn mɛ po ɖɛ ɓě ḿ muà cɛ̃ìn nyɛɛ wɔ̃. 16Zùo-pòìn-kòpò kɔ̃̀ jè à poà Gèɖèpɔ́ɔ̀ zùo wɛɛ, ɔ mɔ̀ ɓɛ́ à kè Kɛ́ɖɛ́ì ké ɔ nyɔmɔɔ̀ mú peɖeìn. Ɔ se ná nìì? Bɛɖɛɛ̀ ɓɛ́ à jaɖaìn kpóiɛɛ mɔ̀ ɓɛ́ à kè Kɛ́ɖɛ́ì ké ɔ kpóɖó-dyùàɔ̀ mú peɖeìn. Ɔ se ná nìì? 17Bɛɖɛɛ̀-kpò dyúáɖòɔ̀ nyuɛ ké à mɔ̀ nyɔ vòà dyíɛɛ mɔ̀ǎ kpóɖó-dyùà dyúáɖò, sepóɛɖé à séín dyé à nììn ɖò-ɖò sɔ̀ìn ɖé bɛɖɛɛ̀-kpò dyúáɖòɔ̀ mú.

18Ɓě poìn Éézùɖùɛ̀-nyɔ̀ ɓěɔ̀ jè hwìɖǐi. Nyɔ ɓě ɖià sáa-zàìn-ɖɛ̀ ɓěɔ̀ kɛɛ, wa kè nyɔ kɔ̃̀à sáa-kɔ̃-zàìn-gbààɔ̀ kɛɛ se sáa-kɔ̃-zàìn-gbààɔ̀ mú peɖeìne? 19Ké ɖɛ́ ḿ nìà cɛ̃iń nyɛ́? Ḿ nìɛ̀ cɛ̃iń kà ɖii-ɖɛ̀ wa ɖǎ kũùn-kpò gbo sáa zàìn nyɛɛ mɔ̀ ɖɛ ɖòɛɛ̀? Ké kũùn-kpò mɔ̀ ɖɛ ɖòò? 20Gbào. Ɖɛ ḿ nìà cɛ̃iń nyɛɛ mɔ̀ kà sáa-zàìn-ɖɛ̀ ɓě ɓɛ́ wa tòà kɛɛ, wa nyíɛ zùù gbà ɓě mɔ̀à ɖɛ ɓě se Gèɖèpɔ́ɔ̀ kɛ. Ḿ se mɔ́ ɓɛ́ ɓě kè zùù gbà ké gbo kpɔ̃̀ìn. 21Ɓě se Bounɓoɔ̀ kópòɔ̀ mú ɖɛ ɖò náìn ɓɛ́ìn, hwɛ̀ ɓɛ́ ɓě ké zùù gbà ɓěɔ̀ nììn kópòɔ̀ mú ɖɛ ɖò náìn. Ɓě se Bounɓoɔ̀ téɓèɖèɔ̀ gbɔ sɔ̀ɔ̀ ɓɛ́ìn, hwɛ̀ ɓɛ́ ɓě ké zùù gbà ɓěɔ̀ nììn téɓèɖèɔ̀ gbɔ mu. 22À mɛ po Bounɓoɔ̀ dyoɖoúne? À ku dyi ké à zi ɔ dyíì?

23Ɓě ɖá, “À ɓéɖé kpé ɓɛ́ à ké ɖɛ séín nyu.” Ǹdye, kɛɛ ɖɛ ɓěɔ̀ séín ní kpá ná nyɔ gbo. Ɓě ɖá, “À ɓéɖé kpé ɓɛ́ à ké ɖɛ séín nyu,” kɛɛ ɖɛ séín ní kùìn nyɔ dyi. 24Nyɔ ɖò mɛ ɓɔ́ ɔ mìɔùn nììn nɔ̀mɔ̀ dyíin dyi mɔ́ɔ. Ɔ mɛ mɔ́ ɔ mǔè ɖò nììn nɔ̀mɔ̀ dyíin dyi.

25Ɓě mɛ ɖi ɖɛ séín wa peɖe ɖé suaɖɛ̀-pèɖèìn-naínɔ̀ kɛ. Ɓěɛ̀ hwòɖǒ ní ɖá ɓɛ́ ɔ ké gbǎ, ɓɛ́ ɓě ké ɖɛɔ̀ jè dyi diè. 26Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Ɓóɖó-kpà gànáɔ̀ kè ɖɛ séín nìɛ̀ kɔ̃ɛɛ mɔ̀ Bounɓoɔ̀ kɔ̃̀ɔ̀-ɖɛ̀.”

27Ɔ jǔ ké nyɔ seà Gèɖèpɔ́ɔ̀ hwìɖǐǐ taɓaa ɖò dyi ɓě ɖii-ɖɛ̀ jè ɖá, ké ɖé mu-tò dyi ɓě nyu, ké ɓě dyi ɖé mu ní, nìí, ɓě mɛ ɖi ɖɛ séín ɓɛ́ wa mu ɓě dyúa dyàùn wɛ̃. Ɓěɛ̀ hwòɖǒ ní ɖá ɓɛ́ ɔ ké gbǎ, ɓɛ́ ɓě ké ɖɛ ɖò dyi diè. 28Kɛɛ ɔ jǔ ké nyɔ ɖò dyiɛ ɓě gbo cɛ̃, ké ɔ dyi níiń, “Wa ɖǎ ɖɛ nìà kɛ kũùn-kpò gbo sáa zàìno” ní, nìí, ɓěǐn ɖá ɓɛ́ ɓě kéɛ ɖi ɓó ɖɛ nyɔ cɛ̃à ɓě gboɛ ɔ kè hwòɖǒɛ̀ gbǎ jè. 29Ḿ se níiń, ɓě nììn hwòɖǒ gbǎ jè, kɛɛ ɔ mɔ̀ nyɔ cɛ̃à ɓě gboɛɛ, ɔ nììn hwòɖǒɛ̀ gbǎ jè.

Kpé ɓɛ́ ḿ ɓéɖé ɓɛ́ ḿ ké ɖɛ ɖò ɖiɛɛ, ɖɛ́ kɔ̃̀ jè nyɔ ɖò kéà ɔ jè wɔ̃ po ɓó ɔ hwòɖǒ gbǎ jèɛ́? 30Ɔ jǔ ké ḿ dyi Gèɖèpɔ́ɔ̀ zùo po, ké ḿ dyi ɖɛɔ̀ ɖiín, ɖɛ́ kɔ̃̀ jè wa kéà ní nyɛ́nɛ́ gbà ɖá ɓó ɖɛ kɔ̃̀ jè ḿ poà zùo wɛɛ jèɛ́?

31Ɔ jèɛɛ, kɛbì ɓě mɛ ɖi ɖɛ, mɔɔ ɓě mɛ ná ɖɛ ɖòɛɛ, mɔɔ ɖɛ séín ɓě mu nyuùn wɛ̃ɛ, ɓě mɛ nyu wa ɓɛ́ Gèɖèpɔ́ɔ̀ ké ɓàìn-ɓàìn ɓéɖé. 32Ɓě ní ɖá ɓɛ́ ɓě ké ɖɛ muɛ nyuùn ɓɛ́ Júù-nyɔ̀ kè ɓóɖó-dù kà kò ɖòɛ̀ nyɔ ɔ kè Gèɖèpɔ́ɔ̀ cɔ́cì-nyɔ̀ ɓěɔ̀ ké gbǒɛɛ nyu. 33Ɓó mɔ́ún jèɛɛ, ḿ vɔ̃ ɓɛ́ ḿ ké nyɔǔn séín hwòɖǒ dyi dè ɖé ɖɛ séín ɓɛ́ ḿ nyuɛɛ mú. Mɔ́ún vɔ̃ ḿ mìɔùn nììn nɔ̀mɔ̀ dyíin dyé jè, kɛɛ ḿ vɔ̃ nyɔ ɓáún-ɓáún nììn nɔ̀mɔ̀ dyíin dyé jè, ɓɛ́ wa mɔ̀ùn ké pó.

Currently Selected:

1 Kɔ̀ɖéíntĩ̀ɔ̀ 10: ƁB02

Highlight

Copy