Sálmos 9
9
Piradé udaque gajnesṍri u piradedie irajasṍripísi. David ipesudé Sálmo u.
1Pangarádejná, a yicota ua ome yáyipie jnese jne. Ga a yatata bate pitijabádode udore jnese.
2A yirasique yu jne, ga yinguíra yibijnani aja ua ome yininaquéjnai gu ua. A yedo bei ueradéjnai uté iji yachachagúgode uje yicota ua ome yijñiecade, Dupade Gatajnoquei Achamisṍri á.
3Uje yetesórone udore ore chajníja daquigade, ga ore cṍra iji dagajñua, ga ore toi ¡paque! uje ore chayóji baquei.
4Uje ũré bajiritigade ome yu, ga bãrarare yibai ome yúringai areque; bácariji bayaripi ueradi gai ome báringai Padode Ajirisõre ũré.
5Ua u uje badosója purása quedéjnane udore ore iji ore unirone. Ga ua upo rĩ uje bejnaque pisijnaringuéone ipesusórone udore ore; ga banoningase udore ore íode jeta jé ca páyipie gaidápo ore rĩ iji deréjna pitade jnese.
6Bamajosórone udore ore chise deruéode jnese, uje que bisitique cusapome ore rĩ; ga nóña ga guidai toque ore idáyode udore to, uje bejna ore. Ga que qué cucha pajmitique dépoji udore idánique rĩ ga erã́ta erámi.
7Mu Pangarádejnai uté jé jogate iji deréjna pitade jnese gatuaque; ga chácariji dayaripi ueradéjnai gai uje e dimane ome dáringai Padode Ajirisõre.
8Ga a uté u jne jeta chajire erámi unirisórone adode aja quigode, ga a ũrei u jne ome dajiritigade udore. A chajire ore adode jne, enga a ca cho parágome darecujaidie quigode udore uñeque jne ome ayoré chojmara, chojmarane ore jnese iji dedáyode udore iji erámi údode.
9Pangarádejnai u ayoré pumajórique Gãrésõri, ga poragadé yoríco upo uté rĩ ome darotade udore uje ore déji cucha dacate iménuone udore jmainie.
10Pangarádejná, udore ore uje ore chiraja bei ueradéjnai, a ore chicha danguretigai aja ua jne. Uje érãtique ajíome ayoré iji te uje gosi chucué ua ome re.
11Ajñiecacho jnese ome uacacotaquéode ome Pangarádejnai uté uje chácariji dayaridi iji Sión uaté, uje íode uñai u Jerusalén. Atatayo ome pidáyode idaisórone udore ore Pangarádejnai uté átedatéode udore.
12Uje Pangarádejnai jnusina ayoré chutique iyoi úringai pijnimique bisideque, ga cho dajnutabádu uté. Uje chudute ayoré áyuguhebátatique agoyedie ga érãtique chicadígui ayoré ugórique uté.
13Pangarádejná, be ga osõre yu. Ga adójnangapísa yajnenie pujurei, uje yejnáreque yetesórone udore ore isocade ome yu gu; uje ua u uje bajnime yu iji pitoringai pijnanai.
14Ga jé u ujetiga yatata bacotaqué gajnéone cucha jnese jne, jé iji Jerusalén piagode ejode; ga yininaquei gajnengóri tupúsu ua jne uje baqueta yu.
15Uje purása quedéjnane udore ore pésu dejopiedie ome dojode ayoré iji darosadode, mu jé ore gajnei dejopiedie udire uje ore basája ¡tínipe! Jé basa ga ore chungare enuéone iji dajuyadie trámpa uñanie uje ore pógu udire ome detique dojo ayoré yui, mu ore ujuyadie udire isaque ore guídade.
16Pirajaque Pangarádejnai gu dajirigode pacho uje ũrei tu uté ome dajirigode gu. Ga ate gajnaréngone udore ore ujuyadie jé isaque ore uje ore ipesudei ome dojode ayoré, mu chajni ore gai.
17A parãte cucha gajnaréngone ipesusórone ore jnese aja pitoringai, jé aja punirone udore ore jnese uje ore chicadígui Dupade.
18Cho jetiga Dupade chicadígui jmatágode ore, mu a chise dínique jne, ga que chicadígapo ore rĩ; áyuguhebátade uje ore chirote dátajasónique yui iji deréjnane, mu pijoque uje a chise ore jne.
19¡Ãriji, Pangarádejná! Ga jé ca ajuéga jeta ayoréode ore chimate raja dáringai etoque ome ua. Be ga acha punirone udore ore aja baquei enga ajire ore adode aja quigode ga o bajuñame ore.
20Pangarádejná, apésu ga ore chiraja pisadodéringadatéi ome ua, jeta pijoque ome punirone achamisórone udore ore uje gusu ore úringane jnanío iji udore ore.
Currently Selected:
Sálmos 9: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
