Sálmos 73
73
Asaf gajné Sálmo udaque.
1Urénga, jé ũrepise uje paraque Dupade ome israélgosode, ome ore uje icha udore ore áyipiedie.
2Mu ome yu ga idógosi jeta yicṍra diríca, uje yirípiedie chorase caru iji jnumi.
3U gu uje tãrarachugué yáyipie ome ayoré dicotárechoquíode udore ore, uje yimo ate gajnaréngone udore ore ugúchade úringane dipeséo.
4Uje que udore ore chejnáreque pute dosótique ome re jé aja ore úringáringo toque yui, uje ayoré ijoréjna ore gatuaque, ga etócho ore.
5Jé ore cãraque re ome dojode ayoré ore, uje que ore chimo pujuré pipesudéraque ome re; ga que ore chejnáreque re ome dequejnaréngone isatígo cucha udore uje jecucha chisa ore ujode ayoré ore.
6Jecute udore ore cho dajnápeguiji dacotaquéode ome re, ga jé basa ga udore ore cho daguidé gajnujna iji dáringane ayoré josipíerãcho.
7Ga udore, ayorédaté ore ga cutejmanie ore edójnai, uje que ore chajire re ome dapotigádode cucha dipeséo uje chise ore ga páyipie noñánguenie yore ore áyipiedie gai.
8Udore ore cho damitiguéo, ga ore uruode quigode noñánguipíso; ga ome dáringane ijoyatácho ga ore chĩ́care pijosipiedie, pijmongaquéode udore ore, jeta ore pésu.
9Ga ore chinguíra dabijnanone aja gatajnoquei uté ome dadojnóngamátigade ome uté, ga ore aréode udore chayo iji jnumi udé gai ome dáringane josipíerãcho.
10Jecute ore urasade tajia ore yui, ga que ore chise ore uruode iyoguérique gotique.
11Ga ore chojninga:
–¿Ama Dupade chorási ringome jetiga chiraja ya? ¿Jeoga Dupade Gatajnoquei Achamisõre irajatigárique cuse a?–
12Urénga, sijnángone udore ore adi jé u uté, uje érãtique ore chimo pujuréragome re iji deréjnane, ga jé ore chajnera dáringane ugúcharã́cho údi.
13Jé ũrepise uje yujuse yáyipie guio jeta icha gatuaque bisideque, ga yuru yijmainie jeta ichai udire ome cucha gajnaréngone úringáringo pisacho, mu yisocade u jórogu udore, uje que cuchárique tṍraji gotique.
14Jecucha ore chujé yúdode iji guedé batigade jnese, ga yo pujuyade iji durasedie gatuaque.
15Ujetiga yojningárasa:
–A qué yirate ore aja ore uru gajnaréngone jne.–
Urénga, Dupade á, yẽrapáidode urásu barasade udore, diríe jogonóño.
16Yidójnangapísa cuchade udore uje yipota jóroga jeta udore quigode choqui guesi ome yu, mu ibiraguipíso quigode gu, ga na yu aja jnumone.
17Gusu uje yicáji Dupade uté iguíjna cuchábi ajé puyai uté, ga quene yiraja sijnángone udore ore quique obiréjnai uté.
18Jé ũré uje bachajapite udore ore aja jnupe carujnai uté, ga ua u uje barãte udore ore aja ore úringáringo pinoningañacho.
19Mu jĩraque pejnacho ore ¡jaripe! ga que ore chisa dejóringome pisadodéringadatéi uté uje chatéta ore.
20Uje gosi edodie cho jnaque ome darigode mu cachi purique. Ga adi jé u to ome ua jne, Pangarádejná, ujetiga ãriji jne, uje a etaque sijnángone ore, ga ore gajnúone u purique chojmarárique ome ua jne uje jĩraque íjnoque.
21Uje yáyipie chejnáreque re, jé aja uje yusũrujnáji yáyipie uaté ajépisi,
22Ga gose yitáyipietigade uté, uje que yiraja cuchárique. Uje yajnui tu cuchiso bisidétique iji baquei.
23Mu jecucha yugúsi bari gatuaque, uje e basa yijmana yãrachua.
24Ga yijñangóri tu ua aja yajesúode, uje bango báyuquetotiguéode quigode aja yu. Quigade jne, enga a ajna uyu aja bari iji bangoningájnai jogadi iji gaté.
25¿Ama gosi dérasiji gaté ome yu ujetiga unejángome ua? Enga iji erámi udé ga que yipotigátique cucha uñeque cuse, gusúpusu ua.
26Yáyipie jé aja yúringai ayoré udé a ore chicáji jnumi ome dáringane basucho. Mu Dupade u yáyipie etotiguei guẽrasṍri uté, enga yajneque uté iji deréjna pitade jnese gatuaque.
27Udore ore uje idája ore iji ua ga a ore u jeta ore topísi jne. Bejna udore ore jnese uje que ũré ore ome ua.
28Mu ome yu ga ueratigai u ome yu ujetiga yijose Dupade uté yui. E yo Yãrésõri iji Pangarádejna Dupa Pujnuéngaisṍri uté; uje yigaidi u ujetiga yatata basocade udore ore jnese jne.
Currently Selected:
Sálmos 73: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
