Sálmos 58
58
Piradé udaque gajnesṍri u piradedie irajasṍripísi. David ipesudé u.
1¿Ama jé ũré uaque á? uje uacajnepídi urásu ujetiga atatayo cucha uréone quigode. ¿Ga jé ũré uágome uacajirigode pacho, erámi unirisórone abode uaque á?
2Mu quigójma udore ome uaque uje uacáyipiedie ipesudode u cucha noñángone quigode. Uje uacáyipiedie dépisi chigócai iji uacaniri, ga uacapéso udore quigode ome uacajmainie.
3Ate gajnaréngone udore ore chumuchase cucha arégode quigode uje ore base iji datedie. Uje quene udore ore base mu jĩraque ore chicáji quedéjnane ga ore gajnei purupatáringa jogate ore aja guesi iji datedie.
4Udore ore jogotodie venéno jé chopise uga chagúode jogotodie venéno udire. Ore gajnui tu uga pequesarangóri uté uje i tu cóbra ga ugai uté que tangári cuchárique gotique.
5Uje uga pequesarangóri uté que tangári daijna pori uté ubuchugode agoyedie ujetiga chubúchu dabuchugode, uje daijna pori uté chirajapise ujetiga tagúome uga pequesarangóri uté uje cho darúja gosi ome dajosipiedie mu.
6Urénga, Dupade á, amochẽre ore patarane iji ore pijnanone. Be ga ajnangarase caraté quedéjnanie udire ũríarone ga ejna ore ũríarone udore aja guesi, Pangarádejná.
7Yipésupú ga jnani sijnángone udore ore íjnoque bisideque jne jõ, ga a ore gajnúone u yodode uje chisa jnumi mu jĩraque íjnocapo rĩ ga chicáji daquitique. Ujetiga udore pota na dojodie aja doji carubi jeta ore chayo doji údi, mu apésu ujetiga ore ojodie udire pépita jne.
8Ajuéga ujetiga ore nejñu aja dajesui jnese, ga ore cho docaramé uje noñome pacataringuei aja dajesui. Ga ore chopo disi carujnátique rĩ uje que chimo guedérique to.
9A pĩraca déji pioi gai, uje ore apósedie u ugarape ojnacúcodie iji údi, ga cáma jũrua pĩraca uaté, mu ate gajnaréngone udore ore chuniname eti Dupade uté jno udore ore údi jne iji dájningamíe ga cho úyujnamia uje chijnirósi jnumi taja dajesui uje tṍraji ome udore ore enga chubúchu ore aja dajesui.
10A uréone udore ore nína raque jne ujetiga ore chimo dáringane pirotacho ome re, ga a ore churu darídade iji ate gajnaréngone udore ore iyojnanie jne.
11Ga jnanione a ore chojninga jne:
–Jé ũrepise uje pisi ate arégode udore ore ome cucha ueradode. Jé ũré uje Dupade cuse uje chajire cuchade aja quigode jnese iji erámi udé údode.–
Currently Selected:
Sálmos 58: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
