Sálmos 44
44
Piradé udaque gajnesṍri u piradedie irajasṍripísi. Coré abode gajné Sálmo udaque.
1Urénga, e yudúco ome yocangoninguinone, Dupade á, uje yocayode ore chatata bapesudode cucha pitijabácho iji dajade nanique, iji dire iyajmane udore iji yoquiquigáningo.
2Bajmainie upúsu uje bajócãre purása quedéjnane udore ore iji ore unirone ga bacha yocáquiode ore aja udore ore jogadode. Uje babéro punirone unirisórone udore ore, jé basa ga bapésu barasade udore ore iquéraningai.
3Que yocáquiode ore õráchatique u nanique ujeta ore cho dajnenguíji jnumi uté, jé aja uje que ore chinguíra udore ore aja dajmanecade jeta ore chise dáringáringo pujnuéngaisóño. Mu bajmana bãrachua tu, jé aja bajmanecai, benochai idírecaringuéi ore. Bapésu cuchade udore ome ore nanique gu uje bajnóra ore.
4Yeduguéjna Cuchábi tu ua, Yudupá. Be ga apésu Jacob urasade ore úringáringo pujnuéngaisóño.
5Ua u gu uje yijoco yocumajosórone udore ore, ga ome bei ueradi uté yuchiejnángo yoquetesórone udore iji jnumi uje ore chiringare re aja gaté ome yoque.
6Que yi ga yangureta yoji ome yu gotique, jeoga yijnosocoi uté u, mu que chisíome yúringárique pujnuéngaisṍre ome yu.
7Mu ua u uje bapésu ga yujnuéngo yocumajosórone udore ore gai. Ua upo rĩ uje banguíra dipoi taja yoquetesórone udore ore.
8Yoco dicotárerigo ome yocajéchietaringuéi uté iji deréjnai údode, mu gusu yoquisígai tu Pangarádejnai uté isocade ome yoque, ga a jecucha yicotágo bei ueradi uté jne iji deréjna pitade gatuaque.
9Mu e bṍra yógaja ti yui, ga basíome pajegátigai ome yoque. Ga que opo bajõra iji yoque rĩ aja pocaningane.
10Ga ua u uje basi ome yocumajosórone ore jeta ore chose yoque, ga yayógome udore ore. Ga yoquetesórone udore ore chajnose yoque ga ore jno yocugúchade údi aja dajesúode.
11Enga bapésu ga yocajnunie u áyasadie uje yungóremétique chujé udire. Ga basite yógaja quedéjnane iji purása quedéjnane ore ujade.
12Ga bẽra barasade ore ga que ese ore oréraque, enga que o badíji udore oréraque gotique.
13Bapésu ga yocajnéone u yoquejominórone yocujo ayoré ore ichietabáitigade. Yocujode ayoréo iji yoquirosadode ore dojnóngaja yoque enga ore cana yoquibáyode.
14Bapésu ga purása quedéjnane ore cho daboti cucha iji yoqui uté uje ore chĩ́care yoqui uté; ga ore idaisórone udore chungurase datoidie iji ome yoque.
15Yúringai ajegátaque déji yedominone iji guedé batigade udore jnese, enga que chimoque. Enga yedodie cho pepeque piguidíji dipoi uté ome dáringanie dipóguei.
16Ga dipónguerã yu gu ore ujñiequéode ome yu, uje ore uruode gajnarécho ome yu ga ore pojna yúdode, ga gose yumajosórone udore ore, uje ore gaidi u dáringáringo jnutácho.
17¡Ga cucha dacadode udore jnese tṍraji ome yoque uje que yicadíjoi ua mu! ¡Chimo jóroque re uje que aringáca yógome baru iyiejnane quigode uje basíome yocáquiode ore nanique mu!
18Que yocáyipieraque cho caru ome ua, ga que yoquirídade chicai quedéjnarique ome bajesu ũrei uté gotique to.
19Mu bapésu yoque ga ejaque yóguiji jnumi, ga bẽra yógome cuchiso chagúrigo ore iji ore jogadébei iji erãpe eyutiguei uté. Ga bacha yógaja ijnangunu cuchábedie ajã́ro uje pitoringai uburúdi tu.
20Ujetiga jé ũré ga yicadíjorasi Yocudupade uté i, jeoga yicórasi ga yarangoi yoquijmanecade iji gatéode ome dupa quedéjnarique yui,
21¿ama ca Dupade uté chuchẽri cuchade udore iji guesode a? uje uté chirajapise páyipie pipoguiédedie udire quigode jnese.
22Yoco yoquiba badode, uje pitoringai socárome yoque iji deréjnai údode. Ga yocajnunie u áyasadie uje yungóremétique chujé udire.
23Be ga ãriji, Pangarádejná. ¿Cuchárique u gu a uje bamo? Ãriji, enga jé ca o betéguiji yoque iji deréjna pitade.
24¿Cuchárique u gu a uje bapógu bedodie, ga bacadique yocúringai áyuguhebátaque, jé aja uje yejnárejo cuchade isagode gatuaque?
25Uje yitecucóji jnumi ome yocúringane eyúcho, ga yocaode catája jnumi uté.
26Pangarádejná, be ga ayáguena yoqui ome báringai Yocátajasṍre; ga aqueta yoque gu bajnoraquédatéi uté.
Currently Selected:
Sálmos 44: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
