Sálmos 41
41
Piradé udaque gajnesṍri u piradedie irajasṍripísi. David ipesudé Sálmo udaque.
1Pininaquei gajnesṍri tu gosi uje chiraja posongaquei ome dojórique ayoré uje garósi gosi etotiguei; uje Pangarádejnai a chijnime osõratai uté gosi iji gajnenie pujuré jmainie to jne.
2A Pangarádejnai gãreque uté gosi ga suse uté ucuecaringuei guio jne. Ga a Pangarádejnai pésu uté úringai pininaquei gajnesõre iji erámi, enga a jé ca timiningara uté gosi ome umajosórone ore josipiedie udore jne.
3A Pangarádejnai chisíome gosi uajatiguei ome jne rĩ jeta déji damochápi ome dejnarétigo. Ga a chiqueta uté gosi ome ejnaréngone udore jne enga chinoningase uté gosi ejnaréngone enga nóña ga ijõrápo gosi rĩ.
4Uje yojninga diríca:
–¡Urénga, Pangarádejná, be ga osṍrape yu! Ga aqueta yu ome yejnaréngone udojo, uje yiraja uje yipésu cucha gajnaréngone ome ua.–
5Ga yumajosórone ore uruode gajnarécho ome yu uje ore chojninga:
–¿Ga cho pírique jetiga toi, ga íjnoque uté i úringai pirajaque?–
6Ga gosi tibágui yu jeta chimo yu, mu narare ome daringaquéode. Uje uté chajmitapise dajutarétiga gajnéone cucha jnese iji dáyipie ga e chise dajere iji guesi ga que pógupo udore rĩ ga jé u uje chedo yu iji udore, udore.
7Yetesórone udore ore jnese chimáta ñane jeta ore chedo yu ome dabujadie. Ga ore jnátu yúringárique pajnangarañaque yui iji dáyipie gajnarénguenie quigode.
8Ga udore ore chósi tome daruode ome yu:
–Dequejnareque noñánguipísi tu uje yore uté gai, ga a jé ca pejñunguíji uté údode jne. Uje moji damochápi ga que tocápo chaguesírique ome uté rĩ.–
9Yijõrápisi uje yangureta ome cuchade diríca, uje jecucha yacásãcoa ñane, mu uté nóña ga chuchiéjna yu ome dajadia.
10Mu Pangarádejná, be ga osṍrape yu. Be ga aringare yu aja gaté ga jé u jeta yo yetesórone udore ore etétigade ujo ome yu.
11Yiraja uje e bamesẽre yu, u gu uje yumajosórone udore que ore nína re ome dáringáringo yujnuéngaisóño, ga que udore ore chigójna yibai.
12Mu uyu ga basa yu iji gaté ome yadode úringane arécho, enga jecucha bacha yu aja baquei gatuaque.
13¡Jé tiógarapísa Pangarádejnai uté úringai pisígai, uje israélgosode ore Angureni Dupa jé u uté, ga jé upúsu iji dirode udojo jé aja siqueré uásejnanie iji yoquiquigade, yoquiquei ore gatuaque! ¡Amén!
Currently Selected:
Sálmos 41: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
