Sálmos 25
25
Peduguéjna David iradedie uña u.
1Pangarádejná, ua u uje yorei yáyipie iji bari iji te.
2¡Urénga, Yangureni Dupade á! Yedu yangureta ua ome yu, jecute ca ajuéga jeta pinguíraja dipoi aja yu. Ga jé ca ajuéga jetiga yetesórone ore sué yibai.
3A jé ca pinguíraja dipoi aja gosi ujetiga chirote bei ome re, arĩa. Amóngara jeta udore ore tiógara dáringane dipócho gu uje ore tẽra rome dáringane aringácachoquí, uje que quitique cuse mu.
4Angongara basocade aja yu, Pangarádejná, ga acate yu ome pigabode uje bajnane u udore.
5O yiquigome báringai ũré uté, enga acate yu. Yangureni Dupa u ua gu, ga Yiquetasṍri upo ua rĩ, enga yirodi tu ua iji deréjnai údode.
6Pangarádejná, be ga jé ca amurase bosongaquédatéi, bajnoraquei udore ore iji bajénique, uje ore jé jogate ao.
7Mu be ga amurase yisijnaringuéone iji bajei uje yipésu uje qué disi urẽjájna yu ica, jé aja yisoca gajnaré casodica uje yagu baruode aja; ga ome bajnoraquédatéi uté ajnusina uyu, u gu uje paraguipise ua, Pangarádejná.
8Pangarádejnai u uje chejna pipararinguei aja re, ga ujñapetaque uté to rĩ. Jecute Pangarádejnai uté cho jnani ate gajnaréngone udore ore quique ome pisoca uréone quigode.
9Uté cho jnani pajnotágode udore ore quique ome cucha arégode udore quigode, jé aja uje chacate ore ome dasocade.
10Pangarádejnai uté jmapiedie jnese chingongara uté osongaquei jé aja uté úringai ũré aja udore ore uje ore dopísi uru iyiejájnane quigode, jé aja uje ore suse uté pijogúsorone daru quigode guio.
11Pangarádejná, urénga, yipesudi cucha gajnareque querúpise. Mu be ga acadígui yipesudi uté pisijnaringué, u gu uje bajnóra bei ueradi uté úringai pisígai.
12¿Ama jnanírique gosi a uje tõrorája Pangarádejnai uté iquei? A jnani uté u jne ujetiga Pangarádejnai chacate dáyipie gaidode cucha isocade ome uté gosi.
13Ga gosi agutíyabádode cucha a chaparu uté gosi gai jne, ga jogadi u uje tijode cho jnángome uté gosi, ga uté ájnape disi ejórigo a ore cho dajnéngu jnumi ueratigai jne.
14Pangarádejnai cho dajõranguipísode iji udore ore uje ore tõrorája iquei, ga chingo daru iyiejájnane aja ore.
15Ga jecucha yajire Pangarádejnai uté iji yibai ga yitoji gai. U gu uje uté a chijnime yirídade udore iji ore ujuyágaidóde ducaricho jmainie jne.
16Cajirape yu to, ga angongara báringai osongáca aja yu, Pangarádejná, uje gusúpusu yu, ga yáyuguhebátigade cucha udore nápisa yu aja jnumi.
17Yáyipie ujuré gajnéone cucha jé chajnera dádi iji yu. Mu be ga arame yu ome yirañímeone udore cucha.
18Cajmitape yáyuguhebátigade udore, jé aja yejnaréngone udore cucha, enga ãro yate gajnaréngone udore ore jnese.
19Adójnanga uje yumajosórone udore e jiei ore; enga ore etétiga dequejnangórone que chajire re ome yu gotique to.
20Be ga ajuse yucuecaringuei guio, ga arame yu. Jé ca aminingara yu ome pajegátigai, uje yayója ua jeta ãraque yu gu.
21Ajuéga ujetiga cucha ujñapetade, cucha arégode udore ore gãreque uyu, uje yirodi tu ua ome yu gu.
22¡Urénga, Dupade á, ajnime israélgosode udore ore iji ore gajnenie pujurei jnese!
Currently Selected:
Sálmos 25: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
