Sálmos 145
145
Picotaquéode gajné piradé udaque. Peduguéjnai David iradedie uña u.
1Yedoi u ua, Yudupa, Yeduguéjná, ga a jecucha yacacãre bei ome cucha omone gatuaque iji deréjna pitade jnese.
2A jé ca yimoque dínique jne jeta yacacãre ua ome cucha omone; a jecucha ga yicota bei gatuaque jne iji deréjna pitade jnese.
3Cuchadaté Pangarádejnai, ga jé tiógara dáringai picotaque opejã. Ga uté úringai cuchadaté érãtique pirajaque uté isocárique.
4Bamaningone úringáringo picotacho a jé chuságaja pape ejórigo ore jne; ga a ore chatata bamaningone udore úringane cuchadatéo jne.
5A yáyipie jogadípise bangoningájna ueratígajnai ome báringai nanganataque cuchape jne, jé aja bamanique cuchadaté ueradode udore ore.
6A jnanione ore tujua bamaningone udore cucha etotiguejnai ujnomei jne, uje érãtique pirajaque udore isocárique. Ga a yatata báringai cuchadaté jne.
7A ore chatata cutejmai bosongaquédaté ujnomerãque jne, ga a ore icotai u báringai ũré jne iji dachachagúgode udore.
8Pangarádejnai paraque ga osõrataque, ga que jĩraque cho júruru gotique, enga uté úringai ijnorataque cuchape que ajéninga re gotique.
9Pangarádejnai parágome ore jnese, ga uté osongaquei déji ome imaningone cucha jnese.
10A bapesudode cucha jnese ore chacãre babai jne, Pangarádejná, ga banguresórone a ore chacacãre ua jne ome daru ueradode.
11Udore a ore chatata bangoningájnai tiji gatajnoquei uje bayarite ueradi déji ome báringai eduguéjna cuchape, ga a ore tujua báringai ujopíerãque cuchape to jne.
12U gu jeta erámi unirisórone ore chiraja uje bapésu cuchadatéode ome cutejmai betotiguejna, ga ore chirajápo bangoningájnai tiji gatajnoquei uje bayarite ueradi déji ome báringai eduguéjna cuchape rĩ.
13Báringai peduguéjna cuchape eteque eyui uje togójma; ga báringai pujnuéngaisṍre a jé chuságaja disi ejórigo ore ape ejórigo ore jnese jne. Pangarádejnai que chó daru quitique gai uje pésu udore quigode jnese, jé aja uje osõrataque ome damaningone cucha jnese.
14Pangarádejnai chiringarápo cõrachugode ore aja gaté rĩ, jé aja udore ore uje cuchade na ore aja jnumi, ga chipotingarápo ore aja gaté rĩ.
15Erámi jogosórone jnese toji bei uté yui gai, uje ore chirote bei, ga bẽra cucha pibosode ome udore ore uje bojningai dire jé u.
16Bangare bajmanai ga que cucha uecárique uñeque charoriguíji dapotigátique cucha ome ua.
17Pangarádejnai uté ũrepise ome dasocade jnese, ga paraguipise uté ome dapesudode cucha jnese.
18Pangarádejnai ujápisaja udore ore jnese uje ore tibidi uté, udore ore jnese u uje ore tibidi uté ome dáringane ũréo.
19Uté chisíome udore ore ajegaidode ome ore uje ore dosóñime uté, ga tangárapoi ore agoyedie rĩ, ga jé u uje chiqueta ore.
20Pangarádejnai chusípise udore ore guio jnese uje ore chijnóra uté, mu a chinoningase sijnángone ore jnese jne.
21¡Yibijnani júdi u Pangarádejnai úringai picotaquéode gajnengore jne!
¡Ga jé tiógara jeta erámi unirisórone jnese jecucha ore doi ga chacacãre Pangarádejnai i pirosobádejnai iji deréjna pitade gatuaque!
Currently Selected:
Sálmos 145: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
