Sálmos 143
143
Peduguéjnai David iradedie uña u.
1Angári yicatecãraitigade, Pangarádejná; ajuéga bangoninguinone ome yu jeta guesája gadoi ome yajei jochaquéode udojo. Ome báringai ũrepise achajnai yuruode, ome bajiritíga uréone udore.
2Enga jé ca ajire baroi uyu yadode aja quedéjnane, uje que ayoré uecárique déji ujetiga ũrepise ome datígo iji baquei.
3U gu uje yumajósõri chajna yu aja quedéjnane; ga chusũrurase yucuecaringuei aja jnumi. Uté chicha yuja ijnangununie ajei, ga yo toque baja casodica ore uje ore nóña ga jnupabejna udore ore.
4Jecute yáyipie betápisaja iji yajei. Yáyipie cho piñoñai isaguéraque.
5Yujnusinamánone u deréjnane udore uje déji yoquiquiga cásodicáite. Yáyipie que chirame bate ueradode udore ore jnese uje bapésu udore. Yajmita bamaningone udore cucha ome bajmainie.
6Yorei yijmainie iji gaté iji bei; ga yáyipie cajnóriji ome báringai pipotigate ome yu. Ga yajnui tu jnutique uje que guérique chutapo erã́tique iji uté rĩ.
7¡Aquejname yutaquéode udojo yui, Pangarádejná! ¡Cucha dacadode na yáyipie aja jnumi! Jé ca apógu bedodie ome yu, u gu jeta jé ca yo udore ore uje ore basája togode ore gajnei eruque.
8Ajuéga jeta yudute bajnoraquédatéi ujnomei iji dúrasabía, u gu uje yicha yanguretigai aja ua. Acate yu ome dajei uté jetiga yajna, u gu uje yãrai yáyipie iji gaté ome ua.
9¡Pangarádejná, arame yu iji yumajosórone udore ore jmainie! Uje yucué báringai Pãrésõre ome yu.
10Acate yu ome bajequigode, uje Yangureni Dupa u ua. Ajuéga jetiga Bajopié ueradé cho jnumi tirótigai quigome yu jeta jé ca yirípieraque gajnarengue iji uté.
11¡Bei u gu, Pangarádejná, ujeta ajuse yucuecaringuei guio! Ome bajiritíga uréone ga ajnime yu iji yúringai pajópi uté jmainie.
12Ome bajnoraquédatéi anoningase yumajosórone udore ore, ga ejna yetesórone udore ore jnese, uje baroi tu yu gu.
Currently Selected:
Sálmos 143: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
