Nehemías 9
9
Judíode ore chacãre Dupade gai ome úringai posõrasõre uje chĩro ore isijnaringuéone gu
1Uje chise diri nanique uje 24 u iji guedosi uje gare iji ti enga israélgosode ore chimátapo ñane aja ore idáidatéi Jerusalén nanique rĩ. Ore gaidi tu jeta ore cho dayágome re. Enga ore chigui daguidedie uje ore úringane jnusiétaque gajnenie u nanique uje ore cho dayágome raque nanique. Ga ore chisa jnumi to enga ore chijninguese datoidie gáyode. 2Israélgosipísode ore cãra dáguedie ome purása quedéjnane uáguedie. Ga jé u uje israélgosipísode ore chague ga ore jnusina dasijnaringuéone, enga ore jnusinápo ore dayode isijnaringuéone to rĩ.
3Enga guedé batigade gadioque uje ore tangári Pangarádejnai Dupade uruode iji dacadisórone ore pijnanone uje ore naráraja Moisés urusarane udore gáyode ome ore. Jé basa ga gadiógapo guedé batigade rĩ uje ore chatata dasijnaringuéone enga ore chacãre Pangarádejnai Dupade gai ome úringai posõrasõre uje chĩro ore isijnaringuéone gu. 4Ga udojo quigade ga levígosode ore choru gaserani to ga ore chejnapúsu daruode ga ore catecã́ri Dupade enga ore chutõrapoi Dupade ome darasade ore rĩ. Ga yojningane udore ore íode u udojo nanique: Jesúa u uñai, jé Bani upo uñai rĩ, Cadmiel upo uñai to rĩ, Sebanías upo uñai to rĩ, Buni upo uñai to rĩ, Serebías upo uñai te rĩ, Bani uñai tupo rĩ, jé aja Quenáni to. 5Ga levígosode ore nararápo rĩ enga ore chojninga: "Ayágueyo jnese. Ga acotáyo Pangarádejnai, uacangureni Dupade to. Mu que gusu uacacotaquéode iji de mu beyoi ga acotáyo uté iji deréjna pitade jnese. Enga oyo uaquerángu Yocangureni uté i ueradéjnai gatuaque to." Ga ore chojninga ome dacotaquéode: "¡A ca ajéninga dáringai picotágome uyoque, israélgosode Yocangureni Dupa Pujnuéngaisṍre uté!" Enga levígosode udore ore íode u udojo nanique: Jesúa, Cadmiel, Bani, Hasabnías, Serebías, Hodías, Sebanías, Petaías ore.
6Enga jé u uje Ésdras catecã́ri Dupade iji ore iquei ga chósi te ome dacatecãraitigade: "Pangarádejnai tu ua, Dupade á, enga pangarádejnai uñeque que déji erã́tique. Ga jé ua u uje bapesute gaté, jé aja gatajnoqué gaté rĩ. Ua upo uje bapesudei guédodie to rĩ. Ua upo uje bapesute jnumi tudé to rĩ, enga jé bapesudápo yote quedéjnane jnese to rĩ, enga jé bapesudápo yote quedéjnai ujṍsore dipeséjnane ore to rĩ. Ga jé ua upo rĩ uje bapesute yote quedéjna ujõsórone ore ujñarone to rĩ, jé aja jnumi tudé unirisórone ujñarone to rĩ. Que cuchisórique, ayorérique udore uñeque eca bisidéguiji erámi tudé bisidec. Mu ayoréode, cuchisode yiquecágo gu ua uje basíome bajñari ome yoque. Que gusu yoque mu guédodie ore chicota ua to iji gatajnoquei.
7Pangarádejnai Dupade á, que gusu jeta Yocangarádejna ua. Mu yocáqui casicaite Abram angureni Dupa togójma ua to nanique uje bajegaite uté nanique iji urasade caldéogose ore ujade. Bajnime bajegaidi uté iji idai nanique uje idai uté i tu Ur nanique, enga barógaja doi nanique iji uté. Enga baya uté i bajai nanique ga bapésu i ichai nanique ga bapesudi i icha i tu Abraham nanique. 8Enga baraja uté nanique uje changuretapise ua nanique ga jé u uje basi ome baru iyiejájnane pirosobácho ore ome uté nanique. Enga bósi tome uté nanique: "Bape disi ejórigo a ore cho daniri iji cananéogosode ore uniri jne, mu purása quedéjnane qué jiei ore iji yojningai punire uté. Uje hitítagosode déji, jé aja amorréogosode ore, jé aja ferezéogosode ore, jé aja jebuséogosode ore, jé aja gergeséogosode ore to." Mu Ésdras chojningame Dupade iji dacatecãraitigade: "Enga jé ũrepise uje baruode udore tocade ome Abram ape disi ejode ore uyoque. Uje baruode que toja enga baruode tocachucho jnese. 9Dupade á, bamo uje bajire yocayode iji egíptogosode ore josipiedie jmainie nanique. Uje bamo nanique uje ore popise dejode iji Yote Quedéjnai Caraté edúdi ga badute ore agoyedie iji uté. 10Ua u nanique uje baroque bajuyaquéode ome Faraón, iróquegatéode ore, jé aja egíptogosode ore jnese, uje barungu babai nanique enga bajnimique israélgosode ore nanique iji Faraón, ore josipiedie jmainie. Enga jé u nanique uje bajnomé pirosobádi chise erámi údode jnese nanique. 11Uje yocurasade chise Yote Quedéjnai Caraté nanique enga que ore chiraja dasocáringome re jeta ore chicáji uéchai, mu ua u uje bajúgome ore nanique ga yote quedéjnai chajuque re nanique ga nóña ga dajeque cajnore nanique uje ore chajna dajeque cajnóri aja uéchamitó nanique. Enga ua upo nanique rĩ uje Faraón urasade ore chajna barasade nanique ome dajocaningai mu ore chise yote quedéjna ajei nanique ga yodi dopoi ñane nanique ga chaco ore gai nanique ga chejna Faraón irógode ore jnese nanique. Ga ore gajnua tu cucarané iménuraque uje gosi tṍraja yote quedéjnai ajedatei ¡chong! ga tirágaja údi, ga chijnare raja yote quedéjnadatéi ajedatei údi. 12Mu ua u to nanique uje bacha gue abuja asiaté aja barasade ore iquéode nanique ujetiga ore chajna uaté iji jnumone. Becãraque gue abujá uaté adode iji dejade, ga cho pioque ocaraidie iji dejade ga chijñate ore gáyode enga chijñate ore iquéode gáyode nanique iji dejade.
13-14Ga ua upo to nanique rĩ uje babé jnumi tiji bedáidatéi iji gatajnoquei nanique, ga bacatecã́ri yocurásai Moisés nanique iji cucarani ójo nanique uje i tu Sinaí. Enga bango baruode aja uté nanique enga baru quigode ueradéjnapise ome uté nanique. Enga bango cucha uréone quigode ome yoque nanique, enga bangopo bapotigádode cucha ome yoque to nanique rĩ iji uté enga bangopo betégode cucha aja yoque nanique rĩ iji uté. Enga bojningane jõrai u nanique jeta yiyágo yoquisagode yoquejo nanique iji baréngone dire puyácho jnese nanique. Enga baroi Moisés u nanique uje chajnerame bojningane udore ome yocayode jeta yirajágo quigode to jnese nanique. 15Enga ua upo nanique rĩ uje bosõre yocayode ore nanique enga basíome arureque quedéjnane ome ore nanique enga tṍraji gaté ome ore nanique ga ore tagu jnese nanique. Enga ore cajnóriji jnese nanique ome dayádode mu bapésu cucarani ga yodi tṍraji nanique ga ore chóji jnese nanique. Basíome baruode ome yocayode jnani bajácho nanique ujetiga basíome punire ueradéjnai ome ore jne. Enga chise diri nanique uje baruode udore tocade ome ore ga bojningame ore nanique: 'Beyoi ga oyo uacaniri iji yojningai uté punire ueradéjnai.'
16Mu yocayode jnani bajácho ore jecucha ducusuréchoquí ore nanique enga que ore tangári bojningane udore cucha nanique. 17Ga udore ore chiraja bapesudode cuchadatéo nanique mu que ore tangári ua nanique ga que ore jnusinápo bátedatéode udore nanique rĩ. Mu ducusuréchoquí udore ome ua enga ore pota dasutedie nanique jeta ore asutérigui chatirépo ore aja Egípto nanique rĩ. Mu bamo ore angoninguite paritigade udore nanique mu jé bajína ore aja quedéjnane nanique enga que ajíñome ore iji te jmete nanique. Uje jĩraque bacadígui ayoréode yoquisijnaringuéone gu. Enga jecucha bosõre ayoréode ore enga banejé ore údode. Enga badota ua ome ore isoca gajnaréngone. Enga bejna bajnoraquei taja ore gatuaque. 18Enga yocayode udore ore pésu aquirájna ica guejnai oré iji óropisedie nanique enga ore chojninga nanique: 'Yoque idupade u udé uje chijnime yóguiji egíptogosode ore jmainie ica.' Enga ore chimate dorai nanique ga ore doi dasoca gajnaréngone iji uté ejode nanique. 19Ga gajnareque ore isocade udore iji erãpetarei nanique mu que ajíñome ore iji te jmete nanique. Uje bosongaquédatéi jiépisi ome ore nanique gu. Enga que ajnime gue abujá uaté tiji ore iquei ga jé jogate ore iquéode nanique uje ore cho dajéguiji nanique. Enga ore chimo jnese nanique uje bécãre gue abujá tuaté isocade iji dejade jnese enga cho pioque ocaraidie nanique enga chijñate ore iquéode gáyode nanique iji dejade. 20-21Enga Bajopié ingoningájnai nóna ore aja quedéjnai nanique enga cho quique ore nanique ome cucha arégode quigode. Enga que cucha pibotique chona ore nanique uje que chimoque dínique nanique uje beranone arureque quedéjna tṍraji gaté ome ore nanique. Enga jecucha basi ome yodi ome ore to nanique jeta jé ca ãre chejna ore nanique. Enga ore chóji yodi gatuaque nanique. Enga ore iguidedie que tarata to nanique ga jecucha ichai gatuaque nanique. Enga jiei ore iriguítigade iji erámone nanique mu uñeque que guídanique guejna nanique. Uje yocayode ore guejnanie siqueré chejna ayoré gárode nanique iji erãpetarei uté mu ore etéquetí cuchárique chona uñeque nanique.
22Dupade á, uje yocayode jnani bajácho ore chicáji bojningai punire ueradéjnai yui nanique enga bṍra purása quedéjnane ore eduguéjna pirosobádode aja quedéjnane iji yocayode ore iquéode nanique. Enga yocayode uñane ore cho daniri iji ore uniri Hesbón uje hesbóngosode ore eduguéjna cuchábi i tu Sehón. Enga ore chopo daniri iji basángosode ore uniri to nanique rĩ uje udore eduguéjna cuchábi i tu Og. 23Ũrepíso baruode ome yocáquiode ore nanique uje bojninga nanique: 'A jiépisi uacape disi ejórigo jne enga a ore gajnunie u guédo dipeséjnanie jne iji gaté.' Uje jiépisi ore nanique uje borei ore iji bojningai uté punire ueradéjnai uje bachagája yocáquiode ore nanique. 24Uje ore chise bojningai tuté punire ueradéjnai nanique enga basíome ore úringáringo ayoré pujnuéngaisṍre ome yocayode ore nanique. Jé basa ga bajosi punire ueradéjnai uté unirisórone iji jnumi nanique enga bajópo ore aja ñane nanique rĩ. Enga bachai ore aja yocayode jmainie nanique ga que ore ujñapéguiji ore jmainie nanique. Enga jé u uje ore eduguéjna cuchábode que qué ore bisitique pijoque nanique ome ua. 25Enga dimane yocáquiode ore gajnéone cucha iji puniri tuté unirisórone ore ugúchade nanique. Uje ore cho dajnéngu puniri uté unirisórone ore idáidatéode nanique uje ore ujuyaquéode de jórogui ore gáyode nanique. Ore cho dajnéngu ore acade cucha to nanique uje jnumi ueradéjnapísiji ore acade cucha jogadode nanique. Ore chopo dajnéngu ore iguíjna cuchábode nanique rĩ uje ore ugúchade jiéji ajéode nanique. Enga ore chopo dajnéngu ore jopidedie nanique uje yodi déji ajéode. Enga ore chopo dajnéngu ore acadie pori uje utájnapísiji ore iquéode. Ga ore acadie udire ore adie cãra rome ñane nanique. Enga yocayode ore subudépise ore iji ore acade cucha udojo adie nanique enga ore agutíyabádi tu cutejmai bacaniratiguejna nanique.
26Mu chise diri nanique uje ore tagu baruode aja enga que ore dopoi baroi Moisés urusarane barúo quigode to nanique rĩ. Enga ore angoninguite paritigade pijoguipise ome ua nanique. Uje barógui jóroque baruode atatasórone aja ore nanique, mu ore chetaque ore nanique ga ore chujépise ore nanique. Ore etétigai tu iji baruode júsorone uje ore chósi tome ore nanique: 'Uje uacajóyo uágaja cutejmane uacasijnaringuédatéo ga jé uacajnimique Dupápisi ájningai ome uaque. Jecute ayáyo uacasijnaringuéone ga jĩraque ajníño uacangureni Dupade gai.' Mu yocayode que ore tangári baruode júsorone aquĩraquéode nanique ga jé ore cho ore báji ore aquĩraquéode nanique ga ore chujé ore nanique. 27Ga jé u uje basíome purása quedéjnane ore úringáringo dequejnangóño ome ore nanique ujetiga ore sué yocayode ore gáyode nanique. Mu udore ore déji damajosórone ore jmainie nanique enga jé u nanique uje quene ore jnusinápo ua nanique rĩ. Enga jé u uje ore chutṍri ua ome damajosórone ore nanique. Enga jĩraque bangári ore icatecãraitigade ome ua iji bedáidatéi iji guéode uéchai. Enga jĩraque basiapome bajnoraquédatéode ome ore rĩ. Ga batṍri bajopiédaté ome jnanione uñane nanique iji udore ore ujade ujetiga eduguéjna ore nanique ujetiga ore chátaja darasade nanique ga ore chijnime ore iji damajosórone jmainie nanique.
28Mu bajnime ore iji pujuredie jmainie nanique enga jĩraque ore potapo betégode cucha nanique rĩ. Mu jé basocai upo ome ore nanique rĩ. Jĩraque bachapo ore aja ore umajosórone jmainie nanique rĩ. Mu jé ore isocádatépise ome ua nanique. Uje ore déji damajosórone ore jmainie nanique enga jĩraque ore jnusinápo báringai Dupa Posõrasõre nanique rĩ. Enga e ore chijóchapo bajei údi nanique rĩ ome re ujetiga ajnimápo ore iji ore umajosórone jmainie nanique rĩ. Enga jecucha ga basocapise nanique uje bangári ore icatecãraitigade ome ua uje ore chutṍri ua nanique iji bedai tiji gatajnoquei uéchai. Enga jecucha ga bajnime yocayode ore iji ore umajosórone jmainie nanique. 29Mu jecucha bo quique ore nanique ujetiga ore dopoi baruode quigode nanique rĩ uje baroi Moisés churúsãre udore quigode ome ore nanique ga obiréjna quigode ome ore nanique. Mu ore changureta jóroque re ome cuchade nanique, ga ore chicha baru uréone aja ti yui nanique. Mu ore chiraja nanique mu ujetiga gosi doi baru quigode enga petotiguei déji gosi nanique, mu ore pésu betégode cucha nanique. Enga ore tagu baruode aja nanique ga dicotárechoquí ore nanique ome raque. 30Mu jiei siqueredie nanique uje badota ua ome udore ore ate gajnaréngone nanique. Mu baroque Bajopié Espíritu Sánto aja ore nanique jetiga cho ore quique ome cucha arégode, mu que ore tangári aquĩraquéode nanique. Jé chopo ome baruode atatasórone ore to nanique rĩ, ore di iji ore nanique ga ore chaquĩ́ra jóroque ore ome betégode cucha nanique mu que pangarate ore nanique ome ore. Mu chise diri nanique uje bajíñome udore iji ore umajosórone jmainie nanique. Yojningane u punire ueradéjnai uté unirísõre bajade udore, uje yocayode ore sué ore gai nanique mu jé basa ga ore suépo yocayode gai gaté rĩ. 31Mu que ajuéga nanique jeta pejnaque yocáquiode ore ome ore umajosórone udore nanique, enga que ajíñome ore iji te jmete to nanique rĩ. Uje Dupápise ua ga bañuru yoquio, enga bejna bosongaquei aja yoque gatuaque.
32Yocacaranguipise uje Yocangureni tu ua, Dupade á. Uje Dupa Pirosobate ua gu, uje Pagutéjoragose ua ga Yocangureni tu ua Dupade á. Uje ua u uje basi ome baruode udore quigode ome gosi enga que bacadígui baruode udore quigode ome gosi. Bajnoraquei jiépisi ome gosi ga bajnoraquei tuté ome gosi que chise deruénique. Bamo uje yocumajosórone upúsu asíriagosode ore eduguéjnane nanique enga jecucha ga ore socárome yoque gatuaque. Enga yejnárejo jóroque yóguiji udore ore josipiedie jmainie gatuaque. Enga yoqueduguéjnapísi cásodicáite ore narañi jórogome ore josipiedie to nanique, ga jé chuságaja baruode atatasórone, baroguipísode ore to nanique uje ore narañi jórogome ore josipiedie to nanique, ga jé chuságaja yoque to iji deréjnane udojo to. Dupade á, be ga jé ca o cucha bisidéguiji yóguiji udore ore josipiedie jmainie. 33Mu, Dupadé, que yojningai tu ua, jé uyoque u uje jé yoquipesudei yocujuredie udire ome ua. Mu yoque u uje yipéco cucha gajnaréngone, enga que ua u gotique. Uje bamo uje icha bamainie ga babé baruode quigode ome yoque gatuaque. 34Mu márane jé upúsu yoqueduguéjna cásodicáite ore to nanique ome ua, jé aja udore ore ujode eduguéjna to nanique, ga jé chuságaja baroguipísode sacerdote ore to uje ore gajnepídi tu picatecãraitigade ome ua ome darasade nanique ga máraque ore to ome ua nanique uje que ore tangári baruode atatasórone ore uru quigode to iji baruode nanique. Uje udore ore chaquĩ́ra jóroque ore ome betégode cucha nanique, mu que uñeque tangári ore nanique ome betégode cucha. 35Enga báta cuchade aja ore nanique iji bojningai punire ueradéjnai ga que cuchárique chona uñeque nanique. Uje bapesute udore ore úringane pujnuéngaisóño nanique, mu jĩraque ore chicadígui ua nanique rĩ, enga que picatecãraite ua nanique ome uñeque enga ore suru dabijnanone ome ua nanique ga que putocaite ua nanique ome ore. Mu ore ajegaidode upúsu cucha gajnaréngone gatuaque nanique ga que ore chajire bérique nanique.
36Dupade á, jé bamo yóguiji de uje bachaga punire ueradéjnai ome yoque nanique mu qué yugúcoji purása quedéjnane ore josipiedie jmainie. Uje yugúcoji bojningai uté punire ueradéjnai ajei mu yugúcoji bisideque, uje yicoi oréraque ome yoque gu ome purása quedéjnane ore gatuaque. 37Jecute bacha yógaja purása quedéjnane eduguéjnane ore josipiedie jmainie gu yocangoninguite paritigade ome ua. Jecute ore chagutíyame yoquimaningone cucha iji de, mu uyoque ga yisígome pijmátaringuéi ome yoque. Yoquisadodéringane jé chopise yocachidode ore isadodéringane ome purása quedéjnane ore uje ore cho dajnéngu yoque jnese gu. Jecute bamo barasade ore uyoque iji de uje yicatecãcoi ua iji yocajnenie pujuré jmainie.
Judíode ore chimate dáyipiedie ome Dupade jeta ore doi uruode to
38Jecute bamo barasade israélgose ore uyoque jnese iji baquei tudé jé aja baroguipísode uñane to rĩ, jé aja yoqueduguéjnane ore, jé aja barógode levígose ore to rĩ. Uje e yimáco yocáyipiedie ome ua jeta yicopoi baruode to rĩ uje baroi Moisés churúsãre udore quigode nanique. Enga yisígo yocuru iyiejájnane ome ua jnese enga a yurúsãco yoquíode iji darujna aode udojo jne jeta araja yoquíode jnese enga araja yocuruode quigode iji yoquigode darujna ao to."
Currently Selected:
Nehemías 9: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
