Josué 4
4
Josué chiroque datocaidode aja tié jochaguipísi ujetiga ore chijna jochai jongotodie cucaranei aja guesi ujeta gare cucaranenie udire iji yirídai
1Uje e ore chise uéchai jnese ga Yocangarádejnai Dupade catecã́ri Josué nanique. 2Enga chojninga: "Be jnanione udore uje ore urasade ajegaite ore que iji dáguedie jnese uje gare ore iji yirídai. 3Enga aroque ore aja tié casé jochaguipísi ga ore chijna jochai jongotodie cucaranei aja guesi to jne uje cucaranenie udire idógosiji yuruode pi jnungórone ore. A gare iji yirídai ore jnunguenie cucaranei udire jne, ga ore jno udire údi aja uacarengúi gatócoro ga ore pésu unéraque iji jogadi uté jne uje a amóño iji uté iji dejai tudé jne."
4Ga jé u nanique uje Josué tibidi jnanione udore aja re uje gare ore iji yirídai jetiga catecã́ri ore. 5Enga chojningame ore: "Boyo ga beyoi tié jochai jongotodie cucaranei uje ore déji gatócoropise iji Dupade uruode pi cajo jnungórone iquei. Enga gare uáguiji yirídai, enga a jé oyópise yoca cásodicáite uñai Jacob ujnacarode uje gare ore iji yirídai to nanique. Enga cho ujetiga uacajnunguenie cucaranei gajnesõripísode u Jacob ujnacarode ore jnese, uje yocáqui gatéode upo ore to rĩ. Mu iménujnapise uacajnunguenie udire jne, enga ajnóchoji uacorotadode ga ajnóchoja uacarengúi jne." 6Ga Josué qué jnopo daruode údi ome ore rĩ, enga chósi tome ore: "A chise dínique jne jetiga uacape disi ejórigo ore chojningame uaque: '¿Ama cucaranenie udire tṍraji rique a? uje uacapéso unucodé iji uacarengúi gatócoro.' 7Enga a achajnáñoi ore urúrigo to jne enga a ojnichome ore jne: 'Chimo cuchade arĩa. Uje yajujo tiédaté Jordán nanique ga Dupade uruode pi cajo jnungórone ore chuchiéjna yodi pijnanai jnese nanique ome darídade ga jé u uje Dupade chaquĩ́ra tié iji ore dosadode nanique iji daruode pi cajo iquei. Ga nóña ga jnupe cajnore ga israélgosode uyoque yirijoji uéchai jnese nanique. Ga yijnójo tié jochai jongotodie cucaranei aja guesi nanique ga yipéco unucodé iji yoquirengúi gatócoro nanique. Yoquigaidi tu nanique gu jeta yimóngo yocujnunguenie udire ga yujnusínango Dupade ipesútedatéode ome yoque to.'"
8Ga jé u nanique uje jnanione udore uje gare ore iji yirídai ore dopísi Josué uruode. Ga ore doi cucaranenie iji yote quedéjnai jochai ga ore chijnónguiji dorotadode aja darengúi to. Ga ore jnusina Dupade uruode uje ore jnunguenie cucaranei gajnesõripísode u dáqui gatéode, jnani bajai Jacob ujnacarode ore. Enga ore dopísi Dupade uruode quigode jnese uje chingome Josué nanique ga ore pésu unucodé iji darengúi uté gatócoro. 9Ga Josué qué doi tié jongotodie cucaranei uñanie rĩ ga chijnongapo cucaranenie udire aja Dupade uruode pi cajo jnungórone ore iyáguesiringai to rĩ, ga pésu unucodé uñáraque iji jogadi uté to rĩ. Ga cucaranenie udire jé jogate iji jogadi uté jé aja dirode udojo to.
10Mu Dupade uruode pi cajo jnungórone udore que ore chungurásipise re iji dayaridi uté iji yote quedéjnai gatócoro jé aja ujetiga israélgosode ore chimate Yocangarádejnai Dupade ojningane cucha jnese uje ore chudute udore iji Josué pijnani nanique. Ga jé u nanique uje Josué ore pésu Moisés casica ojningane cucha jnese uje chingome Josué nanique uje qué uté eca to nanique.
Uje qué Dupade uruode pi cajo jnungórone ore déji dayaridi uté enga gáguegotó ore chaquesu tié ga ibisoguipise ore aja daqui tuté iji yote quedéjnai uécha uñai. 11Mu uje e gáguegotó ore chimate rágaja uécha uñai enga jé u uje Dupade uruode pi cajo jnungórone ore jno to ga ore doi guesi ga ore chajningare darasade ore iquei uje qué ore chijnoque dajnui uté Dupade uruode pi cajo aja dajesui uté. 12Mu rubéngosode qué ore chácariji yote quedéjnai uécha uñai iji guedé garani yui, jé aja gádgosode, manasésgosode peque uñai ore. Mu jõcaratáguebéode iji ore, ore chaquesu yote quedéjnai to ga ore chijna dõrachade iji dajmainie jnese uje bajac ore aja darasade israélgoso ore iquei. Ga cucha dacadode udore jé upúsu Moisés casicaite ojningane cucha nanique uje qué eca to nanique. 13Enga 40.000 u ore nanique iji ore jochai uje ore pésu Yocangarádejnai ojningane cucha nanique, ga ore chijna dorãchade iji dajmainie jnese ome pocaningai yui. Enga jõcaratade udore ore quítequigája ore idai Jericó ujetiga ore doi pocaningai ome ore to. 14Enga diri tuté u nanique uje israélgosode ore irasiguipise raque jnese, ga Yocangarádejnai pésupúsu Josué úringai pangaranipise ome darasade ore, ga jé chopise Moisés casica ome ore uje adode cunguésõripísi Moisés adode to iji ore ujade uje qué uté eca to nanique.
15Ga Yocangarádejnai catecã́ri Josué nanique. 16Enga chojningame Josué nanique: "Angome yuruode ome yuruode pi cajo jnungórone ore jeta ore doi guesi iji tiédaté Jordán to."
17Ga Josué chingome Dupade uruode ome ore enga chojningame ore: "¡Beyoi guesi iji tiédaté Jordán to é!" 18Ga jĩraque ore doi guesi ga ore chise yote quedéjnai edógai enga jé u uje yote quedéjnai e chungurase re iji jnumi ga jé u uje chayopo aja dajochai to rĩ iji ore aquesupídi. Enga ore pañaji jnese nanique uje iragupo rĩ ga chayója quedéjnane. Uje adi jé u iji dirode udore uje chayója edógade pijnanane údode.
19Enga dirode e chejna yijmanáyone nanique iji guedosi baja casé uje israélgosode ore chaquesu tiédaté Jordán nanique. Ga ore jno nanique ga ore pésapo darengúi iji garáijnai ajénique rĩ, ga ore chapapóji rĩ ga ore apáringa ejoi uté i tu Gilgal nanique. Ga e didéguiji ore idai Jericó iji guedé garani yui. 20Mu jé u nanique uje Josué doi ore jnunguenie cucaranei nanique uje gare ore iji yirídai nanique, ga pésu unucodé iji ore irengúi gatócoro to iji Gilgal uté nanique uje ore ijnimei cucaranenie u udiji iji yote quedéjnai jochai uje yote quedéjnai uté i tu Jordán nanique. 21Ga Josué chojningame darasade ore: "Uacape disi ejórigo jetiga ore catecã́ri uágome yimátadie cucaranei jne ga a ore chojningame uaque: '¿Oyo ringome uacamátadie cucaranei jne a?' 22Mu ojnichome ore to jne: 'Cucaranenie udire chimo cuchade arĩa. Ujetiga pajirique udire enga a ca potigayaquérique déji uñeque uje israélgosode uyoque yaquesúgo yote quedéjnai Jordán nanique ga yirijoi jnumone aja uécha uñai nanique. 23Chamáñaje Yocangarádejnai Dupade chaquĩ́ra yote quedéjnai nanique ga chajuque re ga nóña ga dajeque cajnore iji gatócoro ome yoque. Ga jé yoquisocade cunguésõri yocayode jnani bajácho ore isocade to uje yote quedéjna uñai chajuque re ome ore to nanique uje yote quedéjnai uté i tu Yote Quedéjna Caratai. 24Uje Dupade chajuque yote quedéjnai Jordán ome yoque ga gaidi u gu ujetiga ujnomédatéi chubu erámi údode jnese uje chaquĩ́ra yote quedéjnane ome cutejma dajopíedaté. Gaidi upo rĩ ujetiga israélgosode yimóngo átedatéode udore to enga yejnángo yógaja adode to iji deréjna pitade jnese.'"
Currently Selected:
Josué 4: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
