Jonás 1
1
Jonás que pota Dupade iroquei nanique ga jno ga gaidi tu jeta pógu re ome Dupade
1Pangarádejnai Dupade chucué jnani bajai Amitai ujnacari Jonás nanique. Gaidi tu gu jeta chiroque aja daroquei. 2Ga chojninga nanique ome Jonás: "Bo ga acáji ore idáidaté cuchábi uje i u Nínive, ga angongara yuruode aja ore iji uté uje a yejna ore ¡jaripe! jne iji ore idáidatéi Nínive jnese. Chamáñaje yudute ore ujnomei gu uje gajnareque ore adode jnese."
3Mu Jonás que pota Dupade iroquei gotique. Mu jno ga gaidi tu jeta pógu re ome Dupade. Ga Jonás chicai cucode batigábei uje i tu Jope ga chimo cucórique iji uté uje qué idógosi ujetiga chicáji ore idai uñai uje i tu Társis. Ga catecã́ri cucode gajnesórone ome dabírique cuco ujeta doi oré tome ga chicáji ore idáidaté uñai uje i tu Társis. Ga chise dabírique cuco ga jé u uje jno. 4Mu Dupade chimo Jonás nanique ga jé u uje chiroque guetṍrai aja Jonás ore iji yote quedéjnai ajei. Enga garósi ujetiga ore pi cuco cṍra ome ore. 5Enga cucoi eduguéjnai irógode ore todópisa guetṍrai jnese ga jé u uje ore catecã́ri jórongui dangurenone dupa quedéjna. Quigade enga jé u uje ore doi cuchade ga ore tṍraja guesode iji yote quedéjnai ajei. Mu jé ate uje que cho jnaque guetṍrai gotique. Ga ore ajéode u jórogu ujetiga cho pujnúrique cucoi mu que cho jnaque gotique ome ore. Ga Jonás chicáji ajé uñeque iji ore údi uje cuchade jogate. Ga Jonás e mopise iji cuchade jogadi uté. 6Ga ore eduguéjnapisi uje pésu cuchade aja quitígo iji cucoi uté nanique, ga uté chicáji cucoi ajidé uté mu chimo Jonás iji uté uje mopise. Ga chojningame:
–¡Jnani mocucha chá, ja ãriji iji dati ome ua! Ga atṍri banguretique Dupa to ome yoque. Jé socaseti chosõre yoque ga chaquĩ́ra guetṍrai ome yoque ga yapícome.–
7Enga eduguéjnai tuté irógode ore catecã́ri ñane to nanique ga ore chojningame ñane:
–A máraque yocuñeque jecute uté gosi anguretique cucha a chiroque guetṍrai aja yoque iji de cucoi ajei iji yote quedéjnai ajei. Boyo ga yicoi tábla péode ome ñane ga yirajágo máratíque jne iji yoque.–
Ga jé u uje ore doi tábla péode ome ñane mu Jonás yuque ome ore ga jé u uje ore chiraja uje Jonás u. 8Ga jé u uje ore chojningame Jonás:
–¿Jé bapesutique uje bajnime bangureni Dupa ájningai ome ua? ¿Jé bagaitique jne iji ore idáidatéi Társis? ¿Jé barãtique déji rique? ¿Banínique írique? ¿Jé barasade gosode a?–
9Ga Jonás chajnai ore uruode ga chojninga:
–Yangureni u Pangarádejna Dupa Uecai, ga hebréogosi u yu to. Ga yiji yangureni uté adode to. Ga yangureni Dupa uté u uje ipesute gaté, erámone, yote quedéjnane ore jnese.–
10-11Ga jé u uje Jonás chingongara raja ore ga chojninga:
–Yangureni Dupa uté chiroque yu aja nínivegosode ore yui diríca. Mu que yiji uruode ga yibai a jé u ome. Ga yacája uacachidi cuco ajei uje yayome Pangarádejnai Dupade utoquei gu.–
Ga jé u uje cucoi ijocayasórone ore chajire yote quedéjnai mu e chijnoque raja gatéode ga ore todópisa yote quedéjnai. Ga jé u uje ore catecã́ri Jonás gaté ga ore chojninga:
–¿Jé gotique gu a uje angoninguite parique ua ome bangureni Dupa uruode diríca? ¿Jé yoco ringome ua jne ujetiga bangureni Dupa chaquĩ́ra guetṍrai ome yoque?–
12Ga jé u uje Jonás chojningame ore:
–Que potigayaquérique déji ome yu uje yangureni Dupa guetei jé u yu, ga jé chiroque guetṍrai uté aja yoque ga chijocase yoquibi cuco edodie iji gaté. Jecute beyoi yu enga óraño yu aja yote quedéjnai ga jé u jne jeta guetṍrai cha dajocarãi ome uaque jne, enga tijode cho jnángome uaque.–
13Mu eduguéjnai irógode udore que ore tangári Jonás gotique ome uruode quigode. Ga jé u uje ore chungurase danguráñanie ga jec u uje etoque ore aja danguráñanie aja daqui guese yui. Mu que ore chise guesi gotique uje guetṍrai que cha dajocarãi gotique gu. Ga doi gatéode gaté ga ore chungurásiji jóroque danguráñanie udire. 14Ga jé u uje ore catecã́ri Dupade to ome raque enga ore chinguíra dabijnanone aja Dupa uecai ga ore chojninga:
–Urénga, Pangarádejná, ¿jé o ringome yoque jne uje bájningai gajnesṍri urásu uté ga jé yitogórasi jnese jne a? ¿A jé yocorási ringome uté jne a? ¿Ujetiga yórango uté aja yote quedéjnai mu que bai u ga a ajérase yoque jne a? Yirajágo gu uje Dupa uecai tu ua ga jecucha baruode tocade ome cuchade jnese, ga yitodógo bei.–
15Mu que yote quedéjnai cho jnaque gotique ga jé u uje ore chisa Jonás ga quene ore tṍraja yote quedéjnai ¡uoo! Uje ore tṍra Jonás aja yote quedéjnai ga jé u uje guetṍrai cha dajocarãi ome ore ga tijode quene cho jnángome ore. 16Uje eduguéjnai irógode udore ore chimo guetṍrai uje cha dajocarãi, ga jé u uje ore chiraja uje Pangarádejna Dupa Uecai u uje chaquĩ́ra guetṍrai ome ore. Ga jogadi u uje ore tẽrája Pangarádejnai Dupade, ga ore chojningame: "Dupa ũrepísi tu ua, ga a ca toc ujetiga ca yicoi yocuruode quigode jne ome ua uje yisi ome ua que iji de."
17Uje cáma ore tṍra Jonás aja yote quedéjnai mu e Pangarádejnai Dupade chiroque oyite cuchátique aja cucoi dosadi ga dimane iji ome Jonás yui. Ga jé u uje ore tṍra Jonás aja yote quedéjnai ga oyite cuchábi doi ga jé u uje tagu ga chinire gai pórecajna. Mu que chigase ajnoquéode gotique. Enga gadioque dirode ome Jonás iji oyite cuchábi ajei nanique, ga gadiógapo dejade rĩ.
Currently Selected:
Jonás 1: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
