Juéces 17
17
Micaía cãra daguíjnai ajé uñai ome dangurenone ayoré gajnúo ga cho dadupade iji udore nanique
1Israélgosi déji nanique uje i tu Micaía. Ga uté uniri tu ore uniri to nanique uje déji cucaranone uje Efraín ape disi ejode cho dajnéngu udire nanique iji taningai. 2-3Ga uté toria daté iplátadie. Diga chatatapome daté doridedie rĩ. Enga chojninga:
–Ité á, bapláta poridé casidé uje bacacãre orisónique diríca ome baru gajnaréngone, udire déji yari iji de. Uje uyu u uje yoria baplátadie udire. Ga yatire gu uje yudute to uje bangara udire jogadi jeta apésu bangarátique dupa iji udire. Ga yudúdapo rĩ uje a apésu ayoré gajnua iji udire ga bamese gáyode ome guebeque póroro nanganata ga pláta u jnese. Enga que toc jeta diga yoria Pangarádejnai Dupade gajnenie plátai udire, jecute yatirépo rĩ.–
Enga chatire ga daté chojningame:
–¡Yababi á, Dupade a chusípise beo jne, uje ueradéjna basocade udore gu!–
4Uje Micaía chatire plátadie ga daté jno údi aja ayoré gajnúone orasṍri. Enga chojninga:
–E yimate ua ome pláta guebéode uje chise 200. Enga apésabu yajnetique ayoré gajnu oréraque jne. Ga apésupúsu gai jnese ome guebeque póroro nanganatágode.–
Uje ayoré gajnui ipesusṍri chimate ga chequé uaté jno údi aja dajnacari iguíjnai uje i tu Micaía.
5Enga Micaía iguíjna ajé uñai cuse uje jecucha catecã́ri dangurenone dupa iji uté. Ga pésu arobé gaminóri efod uje sacerdóteode ore chicháji daróbedie ga ore úringane sacerdote pijoque ome uté. Ga chichaji daguíjna ajei to ga cho dangurete dupa iji to. Ga uté chicha dupa uñane oredie aja to jetiga abode, acoté ore catecã́ri dajegaitígo iji dupade udore. Enga uté pésu dabode uñai ga cho sacerdote iji dajnacari uté ome ore angurenone udore dupa adode. 6Quedéjna Micaía adode udore mu iji dirode udore nanique ga cáma israélgosode ore eduguéjna cuchátique cuse, ga israélgosode jé ore doi dajequigode ome raque, ga Dupápisi adode bijna ome ore nanique.
7Enga jnani déji to uje idai u Belén nanique. Ga levígose jnani uté mu cho darása iji judágosode ore to. 8Ga uté jnoji judágosode ore jeta chucué dajogate uñeque iji punirone. Ga uté chicáji garáyode iji cucaranone ujade uje cucaranone udore íode u Efraín Gajnéone Garáyo. Enga uté chise Micaía iguíjnai ga chicáji dosadi.
9Uje Micaía chimo ga chojningame:
–¿Ṍraji rique a?–
Ga jnani uje chajnai uruode ga chojninga:
–Yṍraji Belén, ga levígose yu. Yucuei tu yijogatique iji udojo.–
10Ga Micaía chojninga:
–Ácariji yocari iji de to ga a yoco sacerdote iji ua jne, enga a yoco yocaji ua jne enga a yangácoi ua jne. Enga a yimate ua ome pláta orerane jne iji siqueredie jnese ga a 10 u yeranenie ome ua gatuaque jne iji siqueredie. Jé aja baguidérigui, babotígo ore to.–
11Enga jé u uje levígosi uté chimesẽre Micaía uruode ga chácariji iguíjnai. Ga Micaía cho jeta abipise levígosi, ga ore irasiguipise ñane. 12Enga Micaía cho dangaráni iji uté ga pésu úringai sacerdote ome ujetiga catecã́ri Dupade ome ore. Ga levígosi uté cho daguíjnai iji ore iguíjnai nanique. 13Enga Micaía chojninga: "E yiraja uje Pangarádejnai Dupade a chatapísaja yu jne, ga a jé ca cuchárique chósi tiji yu gu uje e levígosi déji yiguíjnai ome úringai sacerdote."
Currently Selected:
Juéces 17: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
