Juéces 1
1
Judágosode, simeóngosode ore chisa cananéogosode ore eduguéjna cuchábi Adoni-bezec nanique
1Iji Josué úringai toque quigade ga israélgosode catecã́ri Dupade ga ore chojninga: "¿Dupade á, gosi te jne a iji yocuáguedie jeta sué cananéogosode ore gai iji yocuniri udé údode? Jeta bajéo ga yocuague chojmaráraque chedu rome ore, jeoga yejnángo yógaja udore ore. ¿Jé bajátigui iji yoque jne jeta cho dajocaningame udore ore?"
2Ga Dupade chojningame israélgosode: "A judágosode u jne jeta ore cho bajágu re ome cananéogosode udore ore. Ga yigaidi u jeta judágosode ore cho dajnéngu cananéogosode ore uniri tuté jne gu. Ga a yujuéga jne jeta judágosode sué cananéogosode ore gai jne."
3Uje judágosode ore chudute dajnéone Dupade uru quicho ga jé u uje ore catecã́ri simeóngosode ore ga ore chósi tome ñane: "Beyoi ga átayope uágaja yoque to ome yoquijocaningai uje yoco yoquijocaningai ome cananéogosode iji yocujade. Ga a yejnángo ore jne ga a judágosode uyoque a yoco yocajnéngu ore unirone jnese jne. Ga quigade jne enga a yátago uacajocaningai aja uaque to jne jeta ejnáño purása quedéjnane uñéngo to jne." Ga simeóngosode ore doi judágosode ore utoquei nanique.
4-5Ga judágosode ore socárome cananéogosode ga ore sué ore gai jnese, jé aja ferezéogosode ore to rĩ. Enga chopise jeta Dupade chicha punirone udore aja ore jmainie ¡paque! Judágosode ore yugode jiei iji ore idai uje i tu Bezec nanique, ga ore chisecãru degode iji ore nanique ga ore yugode chise 10.000 jnese nanique. Mu iji ore jocaningai uté ga qué cananéogosode ore asuté eca iji pocaningai ga uté i tu Adoni-bezec nanique. 6Ga ore asuté uaté chayome judágosode ore ga chapite iji pocaningai, mu jé judágosode ore chajna uté iji jnumone. Ga jé ore chayo uté gai iji ta ga ore chaparu gai iji jogadi uté. Ga jé u uje ore chisa iji te. Ga ore cho damitiguei ome cananéogosode ore asuté tuaté ga ore chaquesu jmanédatédie jnese iji jmainie. Ga ore chaquesuapo guídedatédie jnese rĩ iji guídade.
7Ga cananéogosode ore asuté Adoni-bezec narare ga chojninga: "Yo yijocaningame yujode ayoré uñane to nanique, ga yisa ore eduguéjnane nanique uje ore chise 70 nanique ga yaquesu ore jmanédatédie, jé aja ore guídedatédie nanique ga yo cuchiso iji ore nanique ga ore tagu yibose abejnanie nanique uje basája jnumone iji yimésa gai. Mu uacangureni Dupade gotique jé dopísi yijmapié casica ome yu." Ga ore jno Adoni-bezec uté údi aja Jerusalén ga uté toji ore idai tuté nanique.
Judágosode ore sué Jerusalén idaisórone ore gai iji dajocaningai nanique, jé aja Hebrón idaisórone ore gai to
8Jerusalén uté u uje judágosode jĩraque sué ore gai iji dajocaninga bajai uqué diríca. Ore chujé Jerusalén idaisórone ome queségodogóde ga ore chujé ore ¡jaripe! Ga ore chãru ore idai gai to nanique.
9Uje judágosode ore chejna bezéquegosode ore ga ore quítequiguíji ore idáyode uñane uje déji curutedie ójodie. Ga ore chejnapo cananéogosode ore to rĩ iji curuté uaté údode jnese. Ga ore chicapóji punire uñai te rĩ uje i tu El Neguev ga ore doi unirisórone ore jeta ore chejnapo ore rĩ. 10Judágosode sué cananéogosode uñane ore gáyode to iji ore idai uñane uje ore íode u udojo: Hebrón u uñai uje i uñai u Quiriat-árba, jé aja ore idai uñai to uje i tu Sesai, jé aja ore idai uñai te rĩ uje i tu Ahimán, jé aja ore idai uñai to rĩ uje i tu Talmai.
Caleb chisíome daro Ácsa ome Otoniel nanique ujetiga chóji gari uje irasique adode gu uje sué ore gai iji ore idai Debir nanique
11Enga ore suépo cananéogosode uñane gai te rĩ uje ore idai i tu Debir, uje i bajai u Quiriat-séfer nanique. 12Ore idai Debir u nanique uje Caleb chojningame darasade ore: "Jeta uacuñeque sué cananéogosode ore gai iji ore idai Debir uté jne, enga a yijna yuro aja uaque uñeque jne jeta uacuñeque chóji yuro uaté gari uje i tu Ácsa." 13Ga Caleb desai ujnacari u nanique uje sué ore gai iji ore idai Debir uté. Ujnacari uté i tu Otoniel nanique. Ga jé u uje Caleb doi daru casodica jeta chisi ome daro Ácsa ome Otoniel uté uje sué cananéogosode ore gai gu iji ore idai uté.
14Uje Caleb uro e ore nóna ñane ga Otoniel nejé dacoté Ácsa údode ujetiga chutai dayé gaté ome jnumi petique ujetiga ore cho dajnéngu. Enga Caleb uro uaté e choru burica quedéjnai aja dayé jogadi, mu e doi jnumi tiji gai ga dayé chojninga:
–¿Bapotigátique cucha ya?–
15Ga Ácsa catecã́ri dayé ga chojningame:
–Yajéode u ujeta osõrape yu gaté, ga asi yóguiji jnumi petique jne enga ajiripise yote uórique jogatígome yoque jne iji yocajnepídi Neguev ajénique jne.–
Ga Caleb chosõre ore ga chisi ome yote uoi gárode ome ore, uje tṍraji jnumi ga uñai déji casaque yui, jé uñai déji umusoi garani yui.
Judágosode, benjamíngosode ore guejnane pidáyo u udojo nanique
16Moisés iyoquíjnai uté uje quinítagose nanique ga i uñai tu Hobab. Ga uté ujnacare disi ejode ore déji ore idai nanique uje i tu Picadebui, uje e ore cho darása iji judágosode to. Mu chise diri nanique uje quinítagosode udore jnoji dedai tuté ga ore nóna judágosode uñane aja erãpetarei iji judágosode uniri ajei ga déji umusoi garani yui. Ga idógosi ore idai uje i tu Arad. Ga ore chácariji uté, ga ore cho dedáji uté.
17Ga jé u nanique uje judágosode ore chutai siméongosode jeta ore cháta raja ore to ome dagaidi punire unirisórone ujeta ore chejna ore ga ore cho daniri iji ore uniri. Ga ore nóna ñane aja cananéogosode ore idai uje i tu Sefat. Ga ore socárome ore idai tuté ga ore chejna idaisórone ore jnese. Ga judágosode chécãre cananéogosode ore idai i nanique, ga i ejoi u Hórma, ga Hórma i qui u guidai pajnangarañai. 18Judágosode pota jóroga nanique jeta ore sué pidáyode uñane gáyode to nanique uje ore íode u Gáza, Ascalón, Ecrón ore, jé aja acorásadie iji ore idáyode dosadode, mu que togome ore uje ayoré uajádejna ore gu ome pocaningane.
19Ga Dupade nóna judágosode ore aja curutebúode udore, udore, udore ga ore chimate curutebúode udore aja raque. Mu iji curutedie dosadi ga que toc jeta judágosode sué ore gai iji ore unirone atétadie udire, udire. Chamáñaje ore gachidode burica cuse gu, jé aja guebéquedatéode uje pipesucho udore iji guebéode ga uajácho.
20Uje ore chajuque dei casodé ore unirone ome ñane ga Caleb gajneque ore idai Hebrón nanique. Uje qué Moisés eca nanique ga uruode jé upúsu ome Caleb nanique jeta cho dajnéngu jnumi iji te. Ga Hebrón unirisórone jnani yoríco ore nanique ga ore gãrapi u dáqui jnani bajaque yorícojnai uje i tu Anac nanique. Mu Caleb uté jé sué udore ore gai nanique ga cho dedáji udore ore unirone. Ga jnani yoricode ore asutérigui gadióguerigui qué déji ore uniri tuté nanique mu que ore ujñapegome Caleb uje chijócãre ore iji dajade. 21Jé basa ga israélgosode uague uña benjamíngosode que ore chijnime jebuséode ore ãrírique iji ore idai Jerusalén uté. Jecute benjamíngosode, jé aja jebuséogosode qué ore cho darása iji ñane jé aja deréjnane udojo to uje ore cho dedáji Jerusalén jnese gu.
Jnani bajai José ape disi ejode uje ore uáguedie gare nanique ga ore sué Betel idaisórone ore gai
22-23Dirode uñai nanique ga Israel ujnacarode uñai José ujnacare disi ejode ore pésu dáyipiedie jeta ore doi dajocaningai ome betélgosode uje ore idai uté i bajai u Luz nanique. Ga ore chiroque darasade uñane aja ore idai Betel jeta chajmita ore iji ore idai uté. Ga Dupade nónapísa guidáyode udore aja ore ajesúode iji ore idai údode. 24Ga guidáyode ore chajire daquei ga ore chimo jnani iji ti ga chicáji guesi iji ore idai Betel uté ga ore tibágui ga ore catecã́ri jnani uté enga ore chojninga: "Ope uacasocárique quigome yoque jeta ajucho uaquedai uté. Ga a ca yujégo ua jne jeta o quigome yoc. Enga a jé ca yujuséjopo ua jne rĩ." 25Ga jnani uté cho dedai isocade quique ga chojningame ore: "Acayóji piagoi uñai ga a jé ca yurasade chimo uágaja yoquidai ajei jne jeta acáyoja uté ajei." Ga guidáyode ore chacája ore idai uté ajei ga ore chujé idaisórone ore iji jnese ga ore chejnápise ore jnese. Ga ore oidedie u dasṍrenie ome dajocaningai. Mu ore chiqueta deyaque bajai tuté jnani iji uje cho ore idai quigome ore que. Ga ore chiquetápo acoté, abode ore to rĩ. 26Ga jnani uté jno ga chicáji hitítagosode ore uniri ga pésapo ore idai iji ga chĩ́care Luz aja ore idai tuté rĩ. Jé aja deréjnane udojo ga ore idai uté qué i tu Luz iji dirode udojo.
Manasésgosode, efraíngosode ore cho dajnéngu cananéogosode uñane idáyode nanique mu que toc ujetiga ore chijnime cananéogosode udore iji ore idáyode udore nanique
27Israélgosode uague uña manasésgosode ore pota jóroga jeta ore sué cananéogosode idáyo uñane gáyode jé aja acorásedie iji pidáyode dosadode, mu que togome ore gotique. Ga ore idáyode udore íode u: Bet-seán, Taanac, Dor, Ibleam, Meguído ore nanique. Jecute cananéogosode jé ore jogate dedáyode udore iji manasésgosode ore ujade. 28Mu chise diri uje manasésgosode ore chijna damenuringuei aja ore ga ore cho daróguiji cananéogosode udore ore iji dajade, mu jé ate uje que toc jeta ore chijócãre ore jnese iji dajade. 29Ga adi jé upo ome israélgosode uague uña efraíngosode ore rĩ uje que toc jeta ore chejna cananéogosode iji ore idai Gezer nanique. Ga cananéogosode jé ore cho dedáji udore ore ujade to iji dedai Gezer uté.
Israélgosode ore uáguedie uñanie ore cho dajnéngu cananéogosode ore idáyode to mu que toc ujetiga ore tṍra cananéogosode iji dedáyode udore
30Ga jé chopome israélgosode ore uague uña zabulóngosode ore rĩ, uje que toc jeta ore sué cananéogosode gai iji ore idáyode uje ore íode u udojo: Quitrón, Naalal ore. Ga cananéogosode ore doi zabulóngosode ore iroquéode bisideque ga ore cho daróguiji cananéogosode iji dajade.
31-32Israélgosode uague uña asérgosode que toc jeta ore suépo cananéogosode ore gai iji ore idáyode to uje ore íode u udojo: Áco, Sidón, Ahlab, Aczib, Hélba, Afec, Rehob ore. Uje que asérgosode ore chijnime ore ãrírique ga ore cho darásaji ore iji ore uniri uté jnese.
33Ga jé chopome israélgosode ore uague uña neftalígosode to rĩ uje que ore sué cananéogosode gai gotique iji ore idáyode uje ore íode u: Bet-anat, Bel-semes ore. Mu neftalígosode ore cho daróguiji cananéogosode ore iji dajade.
34Israélgosode uague uña dángosode ore pota jóroga jeta ore sué amorréogosode gai iji ore unirone atétadie, mu que toc jeta ore sué ore gáyode. Chamáñaje amorréogosode ore chucajningárome ore aja quedéjnane gu iji daniri ga dángosode jé ore charite danirone cucarãte ujade. 35Enga amorréogosode jé ore jogate dedáyode udore uje ore íode u udojo: Héres, Ajalón, Saalbim. Mu udojo quigade ga jiépisi José ujnacare disi ejode ore to ga ore doi amorréogosode ga ore sué ore gai iji dajocaningai, ga ore cho daróguiji amorréogosode ore iji dajade.
36Ga amorréogosode udore uñane ore unuchui u edómgosode nanique. Ga edómgosode udore uniri eruéode chajna tuijnai iji jnumi nanique uje i tu Acrabim ga chichaga raja ore idai uje i tu Séla, ga tuijnai tuté chicáji curuté ójo iji uécha uñai.
Currently Selected:
Juéces 1: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
