Éxodo 5

Moisés, Aarón ore catecã́ri Faraón ujetiga juéga doi ome israélgosode ore

1Udojo quigade ga Moisés, Aarón ore chicáji eduguéjna cuchábi Faraón iquei. Ga ore chojningame:

–Pangarádejna Dupa Eyúgojmai chiroque yógaja bei jeta yingongo uru quigode udojo aja ua. Uje chojningame ua: 'Ajuéga doi ome yuague cásidicáite ore jne enga ore jnomíji uaquedai jne enga ore chicáji erãpetarei ga ore chopo dajñare iji sañeque jne rĩ jeta ore tẽrája yu iji ome dachidode aquirájna uñéngo jne.'–

2Ga Faraón chojningame Moisés ore:

–¿Jé gosi te bangaráni tuté jeta yujuéga doi ome Israel ujnacare disi ejode ore iji yocujade? Que yimo bangaráni uté gosi to gu. Ga que toc jeta yujuéga doi ome bojningane udore Israel ujnacare disi ejode ore.–

3Mu Moisés, Aarón ore chojninga:

–Jé hebréogosode yocangaráni Dupa urúo ome yoque jeta yicagóji ojningai uté erã́petaréque ga yejnángo dire gadiótigo iji yui jeta yico yoquiqui uté. Ga a yutuãjóa uté iji ta jne enga a yẽcója uté jne ome yocachidode aquirájna uñéngo. Ujeta jé ca yicoi uru quigode ome yoque jne enga a cho yoquiba iji udore jne, ga a chujé yógome quesérigo, jeoga asṍreringui, jeoga chujé yógome dequejnareque cuchátique.–

4Mu eduguéjnai Faraón chojninga:

–Moisés á, Aarón á, ¿gotique gu a uje uacajnicho jnanione udore ore iji ore isagode cucha pisacho gáyode ga que ore chimate cuchárique ome uaque uje uacapéso unerotiguei ome ore? Jé dóji ga ore doi dasagode dejo, ga boyome uacasatígo cucha to. 5Israel ujnacare disi ejode ore jiépisiji yocuniri udé jeta ore pésu cuchade iji, jecute yijnórango ore isagode ome ore. Mu uaque ga apótayo ajnáño ore aja uacajesúrique erãpe. Úngare, a ca yujuéga ore ome uaque jne uje uacapótayo jóroga ore.–

6Diri tuté jé upo to rĩ uje Faraón tibidi ore ajirisórone capata ore, jé aja capatadie iróquegatéode uje Israel ujnacare disi ejo ore to jeta jé ore chiroque dojode israélgose.

7Ga chingo dáyipiedie quigode aja ore ga chojninga:

–Jé ca beyopoi jnacarai ome Israel ujnacare disi ejode udore ore jne rĩ, mu arócho ore aja jne jeta ore chaquesu ga ore chijna detígo aja doradie adobe ejode jne uje jecucha ga uacabeyoi ome ore diríca. 8Angome ore jeta ore oradie jecucha jiei iji adóbedie gatuaque. Mu uje ore doi jnacarai bajaque ga jé ore oradie chopise doradie batigade gatuaque iji deréjnane. Ujeta ca ore chise doradie eruéode ga ajé udore aja ore gaidi yoquiroqué jeta ore jnusi rángome. Mu ujetiga jé amírataque chojmára iji yui marínga, que ore chimate enga ore bai tu ome uaque.–

Ga chojningame ore:

–Cachi ore cutame yoquiroquéode gu ga ore chãra re iji doi enga ore chojninga: 'A yico ga yẽcója yocangureni Dupa iji sañeque jne.'–

9Faraón catecãrápoi daróguedie capatai udire rĩ uje ore jõra Israel ujnacare disi ejode aja ore iroquéode jeta ore chajire ore aja quedéjnane. Enga chojninga:

–Apéso jeta uásejnapise yoquiroquéode ome udore ore. Ga yoquigaidi u gu ujeta ore isagode dejo chimochẽre ore, ga jé ca ore tangári Moisés uté urupatáringane quigode ome ore uje chiese Dupade gotique utocaite, mu taque.–

10-11Ga ore ajirisórone capatai udire, jé aja ore iróquegatéode ore jnome dajesúode ga ore chingo Faraón uruode aja Israel ujnacare disi ejode ore. Ga ore chojningame ore:

–Faraón uruode u udojo ome uaque que jeta jé uacagaite jnacarai ome uaque jne jeta amechóji dachabei údode ome uacoradie adóbei, jeta ca yicopome uaque to jne rĩ. Beyoi datã jeta eso ga ajnóchoja erui ejoi uaquetígo jnacaracho. Uje uacabeyoi jnacarai ga que ojningai u gotique jeta uacorárigui déji uacorabedie yui gotique.–

12Israel ujnacare disi ejode ore chĩro erámi ome dacuegode jnacaracho ga ore chijnime daju casodica étasode jeta ore chimeri dachabei ujade uje ore chiro adobe iji. 13-14Mu jecucha isoca iji dirode gatuaque ga jé ate uje ore iroditodie capata chiroque Israel ujnacare disi ejode ore aja ore oradie adóbei jeta jecucha chise oradie iji deréjnane, mu jé isocai u uje egíptogosode ore chujé daróquegatéode Israel ujnacare disi ejo uje ore oradie adóbei jé déji yúode. Ga chojningame ore:

–¿Gotique gu a uje uacoradie que chise uacora bajé casidé diríca, mu uacoradie iji de que chisápo cuchárique rĩ a?–

15-16Uje ore iróquegatéode chacho dáringane chucho ome capatadie ga ore tibágui Faraón enga ore catecã́ri. Ga ore chojningame:

–Yoqueduguéjná, yachógopise yocajnéone pejopo uje yoquigaidípiso baru quigode ome yoque mu uje bangome yoque, ga yicoi quigode. ¿Chimo jóroque re uje bajuéga udojo ome yoque? Uje uacajéode u diríca ome yoque jeta yicoi jnacarai ome yocoradie ga yocoradie jé chopise yocora casidica uje uacagaite jnacarai ome yoque ica. Que toc jeta chopise uje yoco bajágu cucha uñai gu. Mu yoqueduguéjná, barógode capata udire jé ore u gu uje que ore dopoi jnacarai ome yoque, jecute yocoradie jé déji yocora casidica yúode gatuac.–

17Mu Faraón chojningame uté uruode:

–Cachi ducutáquechoquí uaque, jecute uacaraño uáguiji doi ga uacojnicho: 'Yico ga yẽcója Dupade gotíguiji sañeque.'–

18Faraón chojninga:

–Boyóji yejode ome uaque. Ga beyoi uacasagode cucha. Yuruode u udojo ome uaque: A jé ca pigaite jnacarai ome uaque jne, ga jé uacagaite ome uaque enga uacorárigui jé cho uacora casidica gatuaque jne.–

19Uje Israel ujnacare disi ejode ore angaránone darása chudute Faraón uruode quigode ga ore chojninga: "Faraón uruode jé chajo yógaja jeta yocorárigui jé cho yocorabedie iji deréjnane, mu sué yoquibai uje jé yoquigaite jnacarai gu ome yoque." 20Uje udore ore doi guesi iji Faraón gari ga ore chise Moisés, Aarón ore iji ti uje ore chirote ore iji. 21Jnanione udore ore chojningame Moisés, Aarón ore:

–Uaque u uje uacapéso Faraón ájningai ome yoque, ga iroquéode chácariji yocúdode ome uacaringaquéode ome yoque ga jé areque jeta Dupade cho dajuñame uaque jne. Yejnárejo yógome capatadie, Faraón ore gu uaque diríca. Cho jetiga asíñome asṍrerangome Faraón ga chujé yógome uaquerané uaté uacasõre uje iróguedie capatai que ore chajire dejopoi ome yoque gu uaque diríca.–

Moisés chejnáreque re ome urasade ipojnaquéode ga catecã́ri Dupade ome re nanique

22Uje Moisés chudute ore uru dosógode ome re ga chojningame Dupade:

–Yocangaráni á, ¿jé gotique uje baroque yu aja ore idai tudé diríca? Uje cuchade tṍraji dajñarenie gatuaque iji guidai tudé údode ome yujode Israel ujnacare disi ejo iji yiríringai casé quigade. ¡Chimo jóroque re uje bajuéga udore ore ujuredie ome yurasade israélgoso!–

23Moisés chojningame Dupade:

–Uje yingo yúringai batocaite aja Faraón diríca mu chiborátaja udojo uje barása cásodicáite Israel ujnié disi ejode udore ore chejnáreque re ome Faraón cutejmane iroquéo uje que chajire daroquéringome ore. Baraja udore mu que ajuque yurasade ore gajnenie pijosipiei iji ore gánique gotique.–

Currently Selected:

Éxodo 5: Ayore

Highlight

Copy

Compare