Daniel 5
5
Pijmanai chiqueta raja eduguéjnai Belsasar nanique enga churúsãre ore iguíjnai pajei ome dajmané
1Uje Belsasar basája dáringai eduguéjna iji Babilónia ga chise diri uje tibidi darasade ore angaránone iji daniri údode jeta ore chimáta raja uté gari iji jogadi. Ga ore batigai chise 1.000 jeta ore taguíji uté gari ga ore chóji jódode víno to, ga ore ujuya dajódode iji uté gari. 2-3Uje e ayuquiso eduguéjnai Belsasar uté ome dajódi víno ga chiroque ore aja dáqui Nabucodonosor añerane ore jopicho uje pipesucho udore iji óro, pláta ore. Uje eduguéjnai Nabucodonosor ijnimicho udore iji Dupade iguíjnai ajei nanique iji Jerusalén uje ore doi pocaningai ome israélgosode ore. Uje ore di ore jopidode udore údi ga ore chojne víno aja udore ga eduguéjnai Belsasar chóji to. Jé aja acotedie, mochápasadie ore chóji to aja ore jopidode udore. Jé aja uté ibaguiésórone ujo eduguéjna, ore chóji aja jopidode udore to, uje udore déji Dupade iguíjna cuchábi ajei nanique iji Jerusalén. 4Ore chóji dajódi víno jnese ga ore jodi pésu ayuquisoi iji ore jnese, ga ore catecã́ri danguretígo dupa uje ore ipesucho ore catecãrainone udore iji pláta, óro, poridie, bronce, guebéode, cucaranenie ore. Ga jé ore chóji aja dajopidode udore uje Dupade iji gaté gajnecho udore mu.
5Iji ore jódode udore quigábode enga pijmanai chiqueta raja eduguéjnai uté iji jogadi uje churúsãre ore iguíjnai pajei ome dajmané. Churúsãre iji ore apósode udore ujai uje díreca enga ore pañaji udore jnese. 6Ga jé u uje eduguéjnai Belsasar uté serẽrája iji uté jmainie ga pésu cochóya iji re ome dasadodéringai. Itãrarachúringai que cho eruei uje tãrara. 7Ga jé u uje tibidi dejode jeta irajatade, daijnane ore tibágui, jé aja babilóniagosode ore angaránone uje ore chiraja cuchade gu guédodie. Ore di ga eduguéjnai Belsasar chojningame irajatade udore ore:
–Jetiga gosi chiraja purusarane ga gosi chajire purusarane udore quitígo, ga gosi jeta chiraja ga chatata quigode ome yu, ga a gosi chigui boraidie jne uje eduguéjna cuchábode iguidei, jé aja jeta gosi tujúna yeranéraque uje pipesudéji óro, ga yurasade ore cho deduguéjnai iji uté gosi to, ga ore eduguéjna cuchábode gadioque yóguiji yocuniri udé jne. Uje a ore eduguéjnapisi tu yu jne, jé basa ga yátajasórone peduguéjna cuchábio gare ore jne.–
8Uje irajatade, daijnane ore chajire purusarane udore quigode mu que ore chiraja quitique gotique. Que uñeque chatata imórique cucha ome eduguéjna cuchábi uté. 9Ga jé u uje eduguéjna cuchábi que chiraja dasocáringome re, ga enochai perupi ome dasadodéringai. Ga eduguéjnai uté ibaguiésõríso que ore chiraja dasocáringome raque to ga ore chojningame ñane: "¿Yoco ringome udore jne?" 10Eduguéjna cuchábi uté daté chudute dabi, jorane ore pijnacaraidie uje ore tibidi iji dejode, ga jĩraque chacája ore iguíjnai ajei uñai uje ore pésu daninaquéode iji uté. Uje e chiraja cucha dacate tocachugode enga jé u uje cho dabi uté quique. Enga chojninga:
–¡Peduguéjná, picotaque opejã ua gatuac! Ca o báyugu ua, ga aya báringai sadodé gotique, uje perupi benochai ome basadodéringai.–
11Eduguéjnai uté daté chojningame dabi:
–Jnani déji Babilónia udé to uje baroguipise uté to. Ga uté u uje Dupa Eyúgojmai uje puyaguipise uté, uté ujopié ingoque cuchade aja uté. Jecute a uté chiraja udore quigode gu uje báqui Nabucodonosor iroguipise uté to nanique uje qué uté eca. Jnani uté enga cuchade choqui guesode ome gu uje pirajatigai jiéji uté. Ga uté cho jetiga jé dupa uté to uje ayuquetotiguei que eruénique cuse.–
Daté chojningame:
–Báqui Nabucodonosor guẽrate uté úringai eduguéjna ome nanique jeta irajatade, daijnane, guédodie irajasórone iji yocuniri Babilónia udé ore cho deduguéjna iji uté jnese ome úringai irajataque. 12Daniel uté u uje báqui chécãre i nanique, ga ĩcarai tu Beltsasar aja uté. Báqui casica chimo uje Daniel uté jnuéngai dojode jnacáño ome dáringai ũré ga angureni u nanique. Ga uté chiraja purigode quigode, ga chirajápo imone cucha rĩ uje que pirajaque udore quigode mu uté chiraja. Uté chiraja parecujaidie imone cucha to. Uje cuchárique quitique chacája ñane marínga, uté jé chiraja quigode. Peduguéjná, abidi Daniel uté uje a chingo purusarane udore quitique aja ua jne iji guiguíjnai pajei uté.–
13Ga jé u nanique uje eduguéjnai tibidi Daniel. Uje ore di Daniel údi iji eduguéjnai enga eduguéjnai catecã́ri ga chojninga: –¿Daniel u ua ya? uje yáqui casica Nabucodonosor isaque ua iji baniri Judéa nanique. ¿Agúsi barasade uñane ore gari to nanique uje ore isaque ore? 14Yudute to uje Dupa gotique ujopié déji ua ga que cuchárique piragome ua ome báringai irajatac uje áyuquetotinguerã́que ua. 15Jnani irajatade ore déji de jnese jeta ore chajire purusarane udore quigode mu érãtique uñeque chiraja quitique. Uje udore ore irajatigade suépise irajatade ore irajatigade gai iji yocuniri udé údode jnese, mu que ore chiraja purusarane udore quitique, jé aja imórique cucha. 16Yudute to uje a cuchárique quitique chacája ñane marínga, jé baraja quigode. Ujetiga araja purusarane udore quigode ga a yisíome peduguéjnane iguidedie ome ua enga a agui to, jé aja ore ujunéraque uje pipesudé iji óro ueque, jeta yadíja ua ga a agúsapóji báringai eduguéjna to jne rĩ iji yocuniri enga a eduguéjnane gadioque yoque jne iji yocuniri Babilónia udé.–
17Daniel chajnai eduguéjnai uté uruode ga chojninga:
–Yoqueduguéjná, a yingo purusarane udore quitígo ome ua jne uje déji baguíjnai dosate uñai, mu jé ca asi ome bojningane udore ome yu, ga asi ome uñeque jeta gosi pota dáringárique eduguéjna iji baniri tudé.–
18Daniel jĩraque chatata purusarane udore quigode ome uje déji guiguíjnai pajei. Ga chojninga:
–Dupa Ujopíerã́quedatéi guẽrate báqui Nabucodonosor úringai eduguéjna cuchape ome nanique, jeta picotaque uté ome úringai eduguéjna cuchape. 19Ga ore dosónime uté iji erámi údode jnese. Ga uté ujnomei que eruénique punire cuse ome dáringai pirosobate. Báqui Nabucodonosor pota chui ome gosi nanique, ga chujé gosi, mu jeta juéga pucuecaringuei ome gosi ga que chuque gosi. Ujeta pota chosi gosi iji gaté, ga jé chosi, mu jetiga chosi gosi tiji jnumi, ga jé chosi gosi iji jnumi. Mu 20uje dicotare báqui Nabucodonosor uté nanique ga ducusuréchoquí, ga Dupade u uje chosi uté iji jnumi gu icotaquédatéode ome re. Ga Dupade chijnime uté iji úringai peduguéjna, jé aja úringai picotaque nanique. 21Ga Dupade cãra uté jogadi ome urasade ore ga cho cuchiso norátique aja dajesúode nanique. Ga uté jorane u burica quedéjna aségode, uje tagu ugarabia aja dajesúode ga jé chopise aquirájnane ome dáringai noraque. Ga que chacapója guiguíjnarique jne rĩ, ga guejnatui yore uté gai aja ajesúode ga chaco uté aoi gai. Báqui isocai u uté nanique jé aja uje quene chiraja Dupade uje sué cuchade gai jnese, ga u to uje ichajapite eduguéjnane ore aja ore úringane eduguéjna. Uje que ore u gu uje ore ipesute dáringane pirosobate ome darasade ore, mu Dupade uté u. 22Ga yósi tome ua, yoqueduguéjnai Belsasár: uje yujúdi uté ájnape gaté ua, mu jé bopise báqui gaté uté. Mu barajapise uté uje pujuya nanique ome úringai dicotárechoquí, mu betéquetí acájnaru ua ome báringai dicotárechoquí to. 23Mu Peduguéjná, gajnareque basocai uje babé ore jopite orerane uje jogate Dupade iguíjna cuchábi ajei nanique, mu uacójiyo víno aja udore. Ga uacajñietáyo Dupade ome udore. Uje uacójiyo uacajodé aja Dupade gajnéone udore ore jopicho ga uacacotáyo uacangurenone dupa quedéjna uje pipesucho udore iji óro, pláta, bronce, hiérro, dachabéode, poridie, cucaranenie ore. Uje uacangurenone udore dupa, que chudute uacarúrique, ga que chimópo uaque rĩ, ga que chiraja cuchárique. Mu a uacacotai urásu Dupápisi uje ichajapite ua aja báringai eduguéjna gu, uje bacuecaringuei jogadi u uté jmainie, ga ajéode enga chisíome batoringai ome ua. 24Jecute uté chiroque pijmanai uté aja ua uje churúsãre guiguíjnai udé pajei. 25Uruode quigode u udojo uje churúsãre iji guiguíjnai pajei ga chósi te: MENE, MENE, TEKEL, PÁRSIN ore. 26Udore imone cucha quigode u udojo:
MENE: ore uruode mene uté qui u pisecarãtígo cucha; uje Dupade e chisecãru cuchade to, ga chiraja dirode eruei ome báringai eduguéjna.
27TEKEL: ore uruode tekel uté qui tu puguheyatígo cucha; uje puguheyaque bate omone iji kílode jogapírique mu Dupade ojningane cucha ome ua imenuringuei sué bate omone gai uje que apésu Dupade ojningane udore uñeque gu, ga badode udore jesabío.
28PÁRSIN: ore uruode pársin uté qui u pajugutígo cucha; uje a pajugucho baniri uté iji ñane jne, ga a pẽrate ome pérsiagosode udore ore jne, jé basa ga médiagosode ore gajneque baniri udé uécha uñai.
29Ga jĩraque eduguéjna cuchábi Belsasar chadia Daniel iguidedie aja uje eduguéjnane ore iguidei udire. Ga chadíapo ore ujuné aja rĩ uje ore ipesudé iji óro. Ga chingongara uté aja daniri údode jnese uje a ore cho deduguéjnai iji uté to jne, ga eduguéjnane e gadioc iji ore uniri ome Daniel uté.
30Mu dejai tuté jé u nanique uje chuque caldéogosode ore eduguéjna cuchábi uté uje i tu Belsasar. 31Ga médiagosode ore eduguéjnai Darío chácariji Belsasar uté charidi iji iguíjna cuchábi ga 62 años Darío uté nanique uje chijna Belsasar uté úringai eduguéjna iji gari nanique.
Currently Selected:
Daniel 5: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
