Daniel 3
3
Eduguéjna cuchábi pésu ayoré gajnu cuchábi nanique iji óro ueque jeta urasade ore cho dadupade iji uté jnese
1Ga jé u nanique uje eduguéjna cuchábi Nabucodonosor chiroque darógode ore aja jeta ore pésu ayoré gajnui oréraque iji óro ueque jeta abubíe iji gaté chise 30 métros, jé basa ga pajei chise 3 métros. Ga chiroque ore aja jeta ore jno údi aja guesáringarique gatócoro uje ore chojningame jogadi uté Dúra, ga déji ore idáidatéi Babilónia ejoi. 2Ga eduguéjna cuchábi uté tibidi dojode eduguéjna uñane iji ore jogadode jeta ore chajire ipesudi ayoré gajnu uté to; jé aja adode ajirisórone ore uje ore chojningame ore 'juéces'; jé aja udore ore to uje ore chuse cuchade oredie guio ome deduguéjnai uté; jé aja soldádode eduguéjnane to. Que eduguéjnarique déji jeta ca chise uté ipesudé ayoré gajnu uté jogadi iji ojningai dire uté. Tibidi ore gu jeta ipesudi ayoré gajnu cuchábi úringai dupa quedéjna pijógome ore jnese. 3Ore eduguéjna cuchábi Nabucodonosor pésu pininaquei ome dapesudi ayoré gajnui uté nanique iji daniri uté ome dabijnángaidóde udore ore ga ore di jnese ga ore cháguena ayoré gajnui iquei jnese. 4Uje udore e ore déji ayoré gajnui uté ejode ga eduguéjna cuchábi iróquegatéi chague ga chejnapúsu daruode ga chojningame dabijnane: "Jnanione oyope paracho á, uje uacṍranoi uaquedáyode iji yocuniri údode jnese. 5Angachobi yuruode udojo. Ujeta adúcho pubuchugode jocarane jne ga jé u jeta acatecãchoi ayoré gajnui uté jne uje yoqueduguéjna cuchábi Nabucodonosor ipesucho iji óro ueque uté. Ga a ore chujé degode iji uté iquei jne, ga ore ubuchugode chayúji ñane to iji uté iquei, ga a jé u jne jeta achacho uacagataidie aja jnumi iji ayoré gajnui uté iquei jne enga jogadi a u uté jne jeta acotáyo uté to. 6Mu ujeta jé ca gosi chichaga dagataidie iji uté iquei to, jeta jé ca catecãrápoi to rĩ ga a jĩraque parãte uté gosi aja ore ipota hórno cuchabe jne uje pioque cuchábi déji uaté."
7Ga gáguedaté uaté jogosórone chudute ore ubuchugode jocarane ga jé u uje ore chichaga dagataidie aja jnumi iji ayoré gajnui iquei, ga ore catecã́ri ayoré gajnui uté jnese.
8Mu uñane uje ore uniri tu Caldéa ga ore chimo judíode iji dajade uje que ore chichaga dagataidie aja jnumi to iji ayoré gajnui uté iquei. Ga jĩraque ore chayóji eduguéjna cuchábi Nabucodonosor uté yui jeta ore chatatame. 9Ore chojningame:
–Picotaque opejã ua gatuaque, Yoqueduguéjná. Ga yipésupú ga ca picadique bei jne jõ iji erã́tique udé. 10Yoqueduguéjná, baroque báyipiedie aja yoque iji yocaquíningai jogadi uté jeta yudúco ore ubuchugode jocarane ga yichajo yoquigataidie aja jnumi iji ayoré gajnui uté iquei ga yicatecãcoi. 11Mu ujeta gosi chetaque uté ga jĩraque parãte gosi aja pioque cuchábi uje déji hórno ajei. 12Mu judíode udore uje basíome ore úringane eduguéjna ome ore diríca iji yocuniri Babilónia udé, ga que ore doi baruode to uje que ore catecã́ri yocangurenone dupa to, ga que ore chichagápo dagataidie aja jnumi iji bapesudi ayoré gajnu iquei to rĩ. Yojningane udore judío ore íode u udojo: Sadrac, Mesac, Abed-nego ore.–
13Nabucodonosor uté chudute caldéagosode ore júdode udore ome jnacarode udore ore, ga jĩraque cho júruru. Ga jĩraque chojningame darógode ore: "Ajnáño udore aja yiquei iji de. Yojningane u jnacarode udore uje ore íode u Sadrac, Mesac, Abed-nego ore." 14Uje udore ore chise eduguéjna cuchábi iquei ga jĩraque catecã́ri ore enga chojninga:
–¿Ama jé ũré enga ca acatecãchoi yangurenone dupa to a? ¿Ama ca oyo dupa iji ayoré gajnui uté uje pipesute iji óro ueque uje yiroque ore aja úringai pipesute diríca?–
15Ga Nabucodonosor chojningame jnacarode udore ore rĩ: –¿Ama dimane uágome jeta acatecãchoi yipesudé ayoré gajnu uaté to jne a? jeta adúcho ore ubuchugode agoyedie. Uje a jé ca achacho uacagataidie aja jnumi iji uté iquei to gajiné, ga jogadi u jeta parãte uágaja hórno cucháberaque jne uje pioque cuchábi eteque toi iji uaté ga a jé ca dupárique déji jne jeta chiqueta uágome uaté.–
16Ga jnacarode udore ore chajnai eduguéjnai uruode ga ore chojningame:
–A jé ca yibotáco ua ome udore jne, enga a jé ca yĩraraco yoquibáyode iji baquei jne.–
17Ga ore chojningame Nabucodonosor uruode:
–Yocangureni Dupa déji jeta chãraque yógome bojninga uaté hórno ocarate cuchábedie udire. Jé aja bajuyaqué uñéngo jeta uté chãraque yógome to. Uje a jé Dupade uté ajéode u jeta chiqueta yoque.–
18Ga jé ore jno daruode údi ome eduguéjnai uté ga ore chojninga:
–A yocangureni Dupa jeta jé ca ajéo enga jé ca chiqueta yoque ga yitogoi. Ga jé ueradápo to ome yoque rĩ jeta yoco yoquiba yocangureni uté. Uje a jé ca yocuñeque doi jne ga catecã́ri bapesudi uté ayoré gajnu to jne uje bapesute iji óro, enga a jé ca yichajo yoquigataidie aja iquei.–
Ore tṍra Sadrac, Mesac, Abed-nego ore aja hórno, mu que pioi chósi ti iji ore gotique
19Uje eduguéjna cuchábi Nabucodonosor chudute udore ore uruode udore uje que ore pota ore catecã́ri ipesudé ayoré gajnu oré to, ga u uje edodie caraté ome udore ore uje ájningarãque ome ore. Ga jé u uje chiroque darógode ore aja jeta ore chipota hórno uaté ga gare iji ti jeta ore chipota ga gaidi u jeta uaté dotãripise ome jnacarode udore ore yui jeta ore tṍra ore aja. Que ore isoca uté iji deréjnane jeta ore ipota hórno uaté ocaraidie doi jnumi gotique. 20Ga jé u uje eduguéjnai chiroque dasoldádode aja ore jeta ore chigaru Sadrac, Mesac, Abed-nego ore aja ñane. Uje soldate yoríco udore ore ga jiei petotiguei iji ore. Chojninga: "Agacho ore jne enga óraño ore aja hórno uaté jne." 21Enga jé u uje soldádode ore chigaru ore enga jé ore chigui daguidé ueradedie aja dajnei uté hórno ajei uje ore tṍra ore aja. 22Ore ipota uaté hórno ocaraidie chachẽre dejode ga chachẽre soldádode udore ore uje ore garãte jnacare gadiógode udore aja hórno ajei que, ga hórno ocaraidie chujé udore ore iji guesi uje ore garãte jnacarode udore aja hórno ajei. 23Jnacare gadiógode ore déji pioi ocaraidie ajei ome ore úringane pigaricho aja ñane, uje ore chigaru ore guídade, ore jmanecade aja ñane.
24Ga Nabucodonosor chajire jnacarode udore iji quedéjnai, ga jĩraque chague. Ga jĩraque tija uje chimo jnacarode udore ore uje que pioi chósi ti iji ore gotique. Ga jĩraque catecã́ri daroguipísode ore iji dejode. Ga chojninga:
–¿Ama yocaraníso jnacare gadioque aja hórno que uje yigaco ore aja ñane a?–
Ga ore chojningame:
–Ejẽ́, gadioque ore que.–
25Mu eduguéjna cuchábi uté chojninga:
–Cachi yimone iji hórno uaté ajei gagájni ore arĩa, uje ore diguiji hórno uaté ajei ga que cuchárique chósi tiji udore ore. Ga yoquigaripidíso dejñúji udore ore údode.–
Ga eduguéjna chojninga:
–Jnani gagájnia uaté enochai cho gaté unirisórone ore enochai.–
26Ga jé u uje eduguéjna cuchábi Nabucodonosor chose hórno uaté piagoi yui ga tibidi jnacarode udore ore iji ajei ga chojningame dabijnane:
–¡Sadrác! ¡Mesác! ¡Abed-nego á! ¡Beyoi guesi iji hórno ga boyóji te á! ¡Dupa Pujnuéngaisṍri irógode uaque á, beyoi guesi é!–
Ga jé u uje jnacare gadiógode udore doi guesi iji pioque ocaraidie ajei. 27Ga jé u uje eduguéjnane iji ore idáidatéi údode ore tibágui jnacarode udore ore jeta ore chajire. Ga ore chojninga jnese: "¿Jé gotique uje que pioi chijocase udore ore aode gotique?" Ga ore chojare jnacarode udore ore iguidedie mu que pioi anique chusaque gotique. Jé aja uje ore chajire jnacarode udore ore gatúode mu que pioi tagu uñeque gatui eruétique gotique. Ga ore chajirápo udore ore iguidedie to rĩ mu que pioi chujé uñeque iguidéraque gotique, enga que ore iguidedie anique mita gotique.
28Ga jé u uje eduguéjnai Nabucodonosor chojninga: "¡Picotaque opejã Sadrac, Mesac, Abed-nego ore angureni Dupa gotique! Uje chiroque daroi gaté unirísõre aja danguresórone jnacare parácho udore ore jeta chiqueta ore ome ore gajnei yujuyaquei uté. Uje que déji udore ore ajénique to jeta ore catecã́ri yipesudi ayoré gajnu uté to uje a jé ca ore angurete gotique, ga que ore cho dupáji uté to. Dimane ore ome pitoringai ujetiga ore topísirási iji hórno uté ajei, uje ore etéquetí ore dosóñime yu uje ore eduguéjnai u yu mu. 29Ga jé u uje yósi tome udore ore angureni: jeta gosi urúrigo gajnarécho ome jne, ga a pajuguque uté gosi aja jnumi jne. Ga a pajnangarañacápo uté gosi iguíjnai to jne rĩ ga urúji jnumi. Mu que cucha jetiga yocurása gosi iji de yocuniri, jeoga purása quedéjna gosi, mu a yuruode udore tocade jne, uje que dupa uñeque déji erã́tique jeta jé cho udore ore angureni ome dáringai piquetasõre."
30Ga jé u uje eduguéjnai uté chosi jnacarode udore ore iji gaté ome daroquédatéode cucha iji daniri Babilónia uté údode.
Currently Selected:
Daniel 3: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
