Héchos 24

Páblo narare dabai iji Félix iquei

1Dirode chejna yijmanai iji udojo quigade enga sacerdóteode ore eduguéjna cuchábi Ananías di to. Enga nóna judíode ore angaránone uñane, jé aja ore utocaidi Tértulo ujetiga uté catecã́ri eduguéjnai Félix ome ore enga chingo ore guetétigade ome Páblo aja. 2Uje ore chijna Páblo aja ore enga jé u uje ore utocaidi Tértulo catecã́ri eduguéjnai Félix enga chojninga:

–Jé yacaranguipise ome ua, eduguéjna, uje tijode cho jnángome yoque iji yocuniri gu ua. Bayuquetotiguei u gu uje bajusípise yoquio. 3Jecucha ga yimóngo bapesudode cucha iji yocuniri údode jnese enga yocacaranguipise ome ua. Eduguéjnapise ua, enga jé tiógara yoquicotaquéode ome ua. 4Chamáña ujetiga diyajmaque yóguiji bari. Mu angarami yoque chojmárarique. 5Mu yingongome ua uje jnani udé pésupúsu judíode yocujuredie iji erámi údode jnese. Chamáñaje chacate ore ujetiga ca ore tangárapoi cuchárique rĩ, enga jogadi u uje judíode ore chajuque ñane ajéode ome cuchade. Enga yingongopome ua rĩ uje nazarétgosi casicaite Jesús anguretasórone angarate jnani udé to. 6Que gusu udore mu jnani udé chiraja Dupade iguíjna cuchábi úringai puyaque ome purása quedéjnane mu jé chijna udore uñai aja diríca ujetiga chacája. Jé u uje yisago diríca. Enga yocajéode u ujetiga yicoi yocai jnani bajai Moisés urusarane quigode enga yoco yocujuñame uté. 7Mu soldádode eduguéjna cuchábi Lísias chacája yoque enga chijnáji yocari uje jorane soldádode jiei. 8Enga eduguéjnai Lísias chingome yoque ujetiga yatatago yoquetétigade ome uté ome ua iji de. Jec ango gojnia Páblo uté ujetiga jec ũré yógome udojo.–

9Jé u uje judíode uñane uje ore déji uté to ore chajo raja jnese uje jé ũrepíso ore utocaidi ojningane cucha jnese. 10Enga eduguéjnai e chusẽre Páblo to ujetiga narare dabai. Enga Páblo chojninga:

–Yiraja uje iyajmaque ua ome báringai eduguéjna iji yocuniri. Jecute que yagutu yu ome yuruode gotique uje yĩrarare yibai iji baquei. 11Ujetiga acatecãrirási yujode judío ore iji Jerusalén enga a ore chingo ua uje quene dirode gare iji yirídai uje yĩríji Jerusalén diríca. Uje cachi yigaidi upúsu ujetiga yiji judíode yoquisocade ome Dupade iji iguíjna cuchábi. 12Enga que uñeque chimo yu ujetiga yibotare ayorérique. Que yijnime pájningáringome yoqueduguéjnarique gotique rĩ uje yugúsi Dupade iguíjna cuchábi ajei. Jé upo rĩ uje yugúsi judíode aquiningamei guiguíjna. Jé upo iji yoquidai rĩ. Cachi yo paraguipise iji jogadode udore jnese. 13Jecute obiréjna uje cachi ore urúo uje ore chaguhéta yibai iji baquei. Enga que toc ujetiga ore chise datatagode udore úringane ũréo gotique. 14Mu jé yingome ua uje yayode jnani bajácho ore angureni Dupa jé yidupade u to enga yiji uté adode to. Mu yiji pisoca ichade ome yigaidode udore. Chiese ca Dupade acho Jesús anguretasórone yoquijmapié ichadie udire. Mu Dupade acho arĩ́e. Chamáñaje que yiya yangureta Dupade uruode atatasórone ore urusarane to jnese, jé aja Moisés urusarane jnese to rĩ. 15Yadi jé u jnanione udore ore adi to uje ore changureta Dupade ome togode ucuecaringuérique yui. Que gusu ayoré ate ujñapetade, mu yanguretágo to uje sijnángone jé u ore to ujetiga ore ecápo to jne rĩ. 16Jecute yajéode jecucha u ujetiga ca yagutéraque cho jora ome Dupade, jnanione ore rĩ ome yipesutique cucha gajnarétique.

17Uje diyajmaque yu iji yajesúode erámio enga quene yajniápo aja yuniri diríca rĩ. Yĩri gu ujetiga yisi ome yujnunguenie plátai ome yocurása jmatágode iji yidáidatéi. Jé upo rĩ ujetiga yẽrája Dupade. 18Uje qué yugúsiji udore gai mu judíode uñane chise yu iji Dupade iguíjna cuchábi ajei uje ore tṍraji Ásia, uje quene yiya yúringai puruque ome Dupade. Enga ayorérigo que jiei ore iji yocari gotique, enga que pichorárique cusapo rĩ. 19Ásiagosode udore a ore urásu ujetiga ore tibágui uyóguiji de ujetiga ore chaguhéta cuchárique yibai ujetiga ore chetaque yatique. 20Jeoga jnanione udore uñeque iji de chatatame ua ujetiga judíode eduguéjnane chise yibárique diríca uje yugúsiji ore aquiningamei. 21Jeoga yibai u uje yinguíra yibijnani aja eduguéjnane ore diríca uje yojninga: "Uacajicho yadode iji de gu uje uaquetácho uje yangureta uje togode ecápo jne rĩ."–

22Uje Félix chudute Páblo ojñane udore enga cha tangári ore. Chamáñaje que agúpurai go ome Jesús anguretasórone isocade. Jecute chojninga:

–A quene yajirápo Páblo adode aja quigode rĩ ujetiga diga eduguéjnai Lísias di. Enga chingo yu gaté cucha dacadode udore quitígo.–

23Jé u uje eduguéjnai Félix chingome eduguéjnai uñai ujetiga suruápo Páblo gai rĩ. Mu chojninga:

–Ujetiga uté jorane pota ore tibágui enga ca ãrácho Páblo yui tome ore. Jec areque ujetiga ore cháta cuchade aja.–

24Dirode jiei iji udojo quigade enga eduguéjnai Félix diapo rĩ enga nóna dacoté. Acoté i tu Drusíla, enga judía uaté. Enga Félix chiroque ore aja Páblo ujetiga ore di údi enga chacadape ore ome danguretarétigade ome Jesucrísto adode to. 25Jecute Páblo chacate ore ome pisocade ujetiga yico yocúringárique ayoré ujñapetaque ome Dupade. Chacadápo ore rĩ ujetiga ore susípise dadode guio ome Dupade. Enga chingome ore to uje Dupade a chajire erámi unirisórone uyoque yocadode aja quigode jne. Enga Páblo acajnaquéode udore chajuque Félix aguté. Jecute chojninga:

–Bo. Yangárapoi bacajnaquérigo jne rĩ ujetiga ca yisa yejórique.–

26Félix ajéode upo rĩ ujetiga Páblo chisi daplátadie iji enga chijnimíji úringai pujurúgai. Jecute chãra re iji Páblo acajnaquéode enga jecucha ga tibidi. 27Sequeredie gare mu jé ate udore. Mu udojo quigade enga Félix cha dáringai eduguéjna iji uté, enga Pórcio Fésto doi jogadi. Mu Félix noñome Páblo iji te uje ore suru gai. Chamáñaje que pota gu ujetiga judíode chetaque atique.

Currently Selected:

Héchos 24: Ayore

Highlight

Copy

Compare