2 Samuel 9
9
Caniranguipise David ome Jonatán ujnacari Mefi-boset nanique
1Chise diri nanique uje David catecã́ri daroguipísode ore ga chojninga: "¿Yoqueduguéjna casicaite Saúl qué jogasúode uñeque chapite to a? ujetiga yosṍrape gosi jne iji yocujade. Uje yedójnaripíse Saúl ujnacari Jonatán nanique, ga yipotapísa jeta jé yajnera yijnoraquei údi ome uté jogasu uecárique."
2Ga Saúl irógode uñai qué eca to uje i tu Síba enga ore di uté údi iji David jeta David catecã́ri uté. Enga David catecã́ri Síba uté ga chojninga:
–¿Yoqueduguéjna cuchábi casicaite iroi Síba u ua ya?–
Enga Síba chojninga:
–Yugúsi de, Yoqueduguéjná, jeta acatecã́ri yu.–
3Enga David chojninga:
–¿Ama qué Saúl jogasúode uñeque qué eca to a? Yigaidi u gu ujetiga qué yẽrája gosi. Ga cho jeta Dupade jé icaniratiguei u yicaniratiguei ome uté gosi to.–
Enga Síba chojninga:
–Jonatán abi qué eca to uje uté chugutána dagutadedie uje guídogorodíe chosi taque nanique iji úringai disi.–
4Ga eduguéjnai David chojningame Síba:
–¿Déji rique Jonatán ujnacari uté?–
Ga Síba chojningame David:
–Déji ore idai to uje i tu Lodebar. Ga déji Amiel ujnacari iguíjnai uje uté i tu Maquir.–
5Ga David chiroque darógode aja uté yui jeta ore doi ga ore chijnóngaja David iguíjnai to.
6Uje Saúl ájnami, Jonatán ujnacari diji David ga chichaga dacuruté aja jnumi iji David iquei. Ga David catecã́ri ga chojningame:
–¿Mefi-boset, Jonatán ujnacari u ua ya?–
Ga Jonatán ujnacari Mefi-boset chojningame David:
–Yugúsi de, Yeduguéjná, iji baquei jeta acatecã́ri yu ome cuchárique.–
7Ga David chojningame:
–Jé ca atodo, uje yibidi ua gu jeta yañuru beo uje jé yurúo ome bai casicaite Jonatán nanique. Enga a yiroque ua aja báqui casica gajnei jnupe jne jeta ajníja uté ga o bajnenguíji jnumi uté jne. Enga a jecucha aguíji yari gatuaque to iji yatigabié udaque gai.–
8Mu Mefi-boset chojningame David:
–Jé go uje barúo udojo ome yu uje que yujñapeque gu ga yajnui tu tamoco godoque pérotique uje que pañeraque uté.–
9Enga David tibidi Saúl casica iroguipísi Síba enga chojningame:
–E yẽra barósõri Saúl casica gajnéone cucha jnese ome ájnami udé ga beyoi iroquéode to jne.
10Enga ajína babode, barógode ore aja uté gajnéone jnumío ga atãchóji udore to jne, enga ajuso uacacatígo cucha guio jne ujeta jé ca cuchárique chona Mefi-boset jogasúode, uaque jne. Mu jé basa ga uyu a u jne ujetiga yañurupúsu Saúl ájnami Mefi-boset uté guio, ga taguíji yari gatuaque.–
Síba abode chejna yirídai chojmarai, jé basa ga ipesudode darócho ore chejna ayoré chojmara.
11Ga Síba uté chojningame ore eduguéjnai David:
–Ujeta aroque yu aja cucha dacatígo ga jĩraque yipésu.–
Ga jecucha Mefi-boset chacásãra David gatuaque ga jé chopise eduguéjna cuchábi David atique to.
12Mefi-boset ababi cusosi to iji uté uje iábi su Micaía. Enga Síba, abode, ore doi Mefi-boset iroquéode gatuaque.
13Mu Mefi-boset chácariji Jerusalén uje noñaque uté, ga jecucha chacásãra David iji atigade gatuaque.
Currently Selected:
2 Samuel 9: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
