2 Samuel 2
2
Judágosode ore dayode ore catecã́ri Dupade ome David úringai eduguéjna jeta ore cho dasuté iji David iji ore uniri Judá uté
1Ga David catecã́ri Pangarádejnai Dupade ga chojninga:
–¿Ga jé areque jeta yajníja judágosode ore idáyode uñeque?–
Ga Pangarádejnai Dupade chojningame David:
–Jé areque, acáji ore idáyode uñeque.–
Ga David chojningápome Pangarádejnai Dupade rĩ:
¿Yiquitíguiji ore idáyode jne?–
Ga Pangarádejnai Dupade chojninga:
–Acáji ore idai Hebrón.–
2David chicáji ore idai Hebrón ga nóna dacoté gáredie udire uje ore íode u udojo: jezreélgoto Ahinoam, carmélgoto Abigail, uje abai togué uaté nanique ga abai toi i tu Nabal nanique. 3Ga David jorane jnanío ore nóna dacotedie aja uté to, ga ore cho dedai iji uté jnese, jé aja acorásedie iji Hebrón uté dosadode. 4Ga judágosode ore dayode ore di iji Hebrón uté to ga jĩraque ore chanire peduguéjnane ore pijogúsõri aceite aja David ójo jeta ore cho dasuté iji David iji ore uniri Judá uté.
Uje David chudute to uje galaádgosode ore chijóchame Saúl uje ore idai tu Jabés ga David irasique udore ore ujnomei. 5Enga David chiroque darógode uñane aja ore yui. Uje ore chise ore ga ore chósi tome ore: "Yoqueduguéjnai David chiroque daruode aja jabésgosode uaque, ga chósi tome uaque que: ¡Yipésupú ga Dupade chusípise uaqueo jne jõ! Uje uacosṍchopíse uaqueduguéjna cuchábi Saúl diríca ga uacajóchayome. 6A Dupade chatapísaja uágome uacasocade udore, ga jé chome yu to uje a jé ca yujuseque uágome uacasocade udore to jne. 7Mu anínaño uaque uje a jé ca tita uacajade jne ome uaqueduguéjna cuchátique. Jec ũré uje yoqueduguéjnai Saúl e toi mu judágosode ore dayode e ore chanire peduguéjnane ore pijogúsõri aceite aja yójo ujetiga ore cho deduguéjna cuchábi iji yu iji Judá."
Judágosode, israélgosode uñane ore doi pocaningane ome ñane
8Ga Saúl casé iroguipísi Abner uje soldádode asuté uté diríca ga uté doi Saúl ujnacare uecai uje i tu Is-boset, ga jno údi aja ore idai uje i tu Mahanaim. 9Ga chimáta israélgosode ore angaránone aja ñane iji uté jeta ore cho deduguéjna cuchábi iji Saúl ujnacari uté iji ore uniri Israel jnese. Ga ore tṍraji israélgosode ore unirone uje ore íode u udojo: Galaad, jé aja Gesuri, jé aja Jezreel, jé aja Efraín, Benjamín ore. Jé gusu judágosode uje que ore chise to ga ore cho deduguéjna cuchábi iji David.
10Uje Saúl ujnacari Is-boset guejnanie siqueré chise 40 años nanique ga quene ore cho deduguéjna cuchábi iji uté iji israélgosode ore unirone údode. Ga ore cho dasuté iji uté aja siqueré gáredie nanique. E mu judágosode ore cho deduguéjna cuchábi iji David uté. 11Ga David guejnanie siqueré 7 nanique ga nóna pei uje judágosode ore cho deduguéjna cuchábi iji uté nanique. Ga uté chicha daguíjna cuchábi aja ore idai uje i tu Hebrón.
12Iji dire uñai ga israélgosode ore isoldádode eduguéjnai Abner nóna jorane soldácho ga ore jnoji Mahanaim ga ore chicáji ore idai Gabaón yui jeta ore doi pocaningai iji uté ome judágosode. 13Jecute David chiroque darógode uñane aja uté to jeta ore doi ore jocaningai to, ga chiroque nero Sárvia ujnacari Joab jeta soldádode ore cho deduguéjnai iji uté. Ga ore jnoji dedai uje i tu Hebrón ga ore tuangóa Is-boset irógode soldácho iji ore jopidi eruque uje déji ore idai Gabaón ejoi. Enga ore cãra dajogadode ome ñane iji ore jopidi uté uéchade. Uñane chácariji uécha uñai, jé uñane chácariji ujoi uécha uñai. 14Ga Abner tibite dojoi eduguéjna gai uje i tu Joab. Ga chojninga:
–Jnacarode doi ñane bajaque ga ore chujé ñane bajaque.–
Joab chojninga:
–Jé areque é. Aroque bajorane jnacare ore aja bei, ga yiroque yijorane aja ore yui to.–
15Ga Abner chojningame jnacarode:
–¡Benjamíngosode uaque, ajnusoi uágome uaqueduguéjnai Is-boset to enga úringárique pisígai jogadi tu ome yoque!–
Ga ore basája David urasade jnacare ore yui uje ore doi pocaningai ome ñane. Ga, ga gare ore iji yirídayode jnese. 16Ga jĩraque ore chisa ñane gatúode ga ore chose dasṍrenie aja ñane ga ore toi jnese, benjamíngosode, judágosode ore jnese. Ga ore pésu pajmini uté i ga ore chojningame uté 'Pumajótigade Jogadi,' ga i tu Helcat-hazurim ome israélgosode ore uruode nanique. 17Mu soldádode uñane uje qué ore eca ore chejna deréjnai iji diri tuté ome dajocaningai ga que ore cha dajocaningai ome ñane ga jé ore chuságaja dayápidi ga David urasade jnacare ore yuchome desórone udore ore. Ga Abner, jorane israélgose ore chayome judágosode ore. 18Ga David nero Sárvia ujnacare gadiógode ore nóna David urasade jnacare ore to aja pocaningai uje ore íode u udojo: Joab, Abisai, Asael ore. Ga jnacare cugujnachuque Asael uté. Ga gajnui u erámoro quedéjna cugujnachuguéraque ome dáringai cugujnachuque. 19Asael uté chucajningárome benjamíngosode ore eduguéjna bayai Abner uté. Ga jé jogate uté quigade ga que cho uja gotique. 20Ga Abner chajire dacajningásõri uté ga chojningame uté iji daquigade:
–¿Ama Asael jé u ua ya?–
Enga Asael chojninga:
–Baraja uje Asael jé u yu iji baquigade.–
21Enga Abner chojninga:
–Aya acajningárome yu, ga be bojórique jnacare ga acajningárome uté jne. Jé seca ajé gosi ga ajna gosi ugúcharigo jne.–
Mu Asael que cha chucajningárome.
22Ga Abner jé ate uje chaquĩ́ra Asael ome re ga chojninga:
–¡Cangarami yu á! Ujetiga jé ca aya yúringai pucajningati unerai jne, enga ajé yu gajneri, ga a yujé ua to gajiné. Ujeta yujé ua ¿ga jé yorási ringome yu jne e, jeta yise bayai Joab iquei?–
23Mu Asael que cha chucajningárome. Ga Abner chichagu uté iji daquigade ga chichagu pajei ome dasõre eruei ga tṍraji uéchai. Ga Asael cachodi jé u uté ga topísi iji uté. Ga Asael jorane ore ucajningásoño base jnese uje ore chimo Asael iji cachodi uje e ore chujé.
24Mu Asael uyade uje ore íode u Joab, Abisai ore, que ore cha chucajningárome Abner gotique. Guedé e chaca uje ore chise curuté ome dacajningatíode. Ga curuté uaté ore gajmite ga ore chojningame Amá, ga déji ore idai Gía iquei uje dajei garani tu erãpetarei iji ore idai Gabaón yui. 25Enga benjamíngosode uje ore chisite raja quedéjnane ga ore tṍraji quedéjnane uje ore diji Abner iji curuté uaté to, ga ore choru curuté uaté ga ore jochai chojmára aja gaté. Ga ore chirote dacajningasórone iji uté. 26Enga Abner chimo Joab ga tibite gai ga chojningame:
–¿Ama ca ayáyopo uacajocaningai ome yoque jne a? ¿A yiyágo jeta yejnángo ñane jnese, enga quene yiyágo a?–
Ga Abner qué jno daruode údi ome Joab ga chojningame:
–Angome bajorane udore ore ga ore cha dajocaningai ome yoque uje jé yitojmárango iji jnumi uje israélgose ueque yoque.–
27Ga Joab chojningame Abner:
–¿Gosi uje ijnimique pocaningai ome jnacarode ore que? Ua u arĩa. ¿Gotique gu a? uje que ojningame yoque durasede: 'Jé yitojmárango iji jnumi uje israélgose yoque jnese.' Ujeta ca barúraso udojo enga a qué yicórase jeta guedé tocaderase ome uacáringane pajnaque. Mu a e yiyágo jne.–
28Ga Joab chiroque púpuridie ubuchungórone ore aja úringanie pubuchui. Ga soldádode ore chudute púpuridie ga ore chiraja uje ore cha pocaningai, ga ore cha chucajningárome israélgosode ore. 29Ga jé u uje Abner, jorane ore chajni to ga ore diguiji dejai údode aja ore idai yui uje i tu Mahanaim. Ga ore chaquesu garai uje i tu Arabá, ga ore chajna dajei uje chimere yote quedéjnai Jordán edúdi iji. Ga ore chaquesu yote quedéjnai ga ore chicáji uéchamitó ga ore chaquesu jómioi iji pajei uje pajmite uté ga i tu Bitrón, ga jé u uje quene ore chise dedai Mahanaim.
30Uje Joab ore cha pocaningai ga uté chimáta dasoldádode. Ga chajire ore íode ujetiga chiraja totígo iji darasade udore. Ga e chiraja ore yugode uje ore chise 19 iji David isoldádode eduguéjnane ore, jé aja Joab desai uje i tu Asael. 31Ga David urasade ore yugode 360 iji Abner urasade benjamíngose ore. 32Ga ore jno Asael údi aja ore idai Belén jeta ore chijóchame uté iji dai ode ejoi. Ga Joab, jorane soldácho ore diguiji dejai údode jeta ore chise dedai Hebrón to iji durasé.
Currently Selected:
2 Samuel 2: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
