2 Reyes 24

Judágosode ore jnuéngaisónique cucha chise ore ga gose Pangarádejnai uté, uje pésu ujetiga umajosórone tṍraji dajñarenie ome ore nanique

1Uje Josı́as ujnacari Joacim uté qué déji dáringai judágosode ore eduguéjna nanique, mu chise deréjnai nanique enga babilóniagosode ore eduguéjna cuchábi Nabucodonosor uté cugujnáji ore uniri Judá uté, enga sué judágosode ore gáyode nanique. Enga jé u uje Nabucodonosor chiroque Joacim uté aja ujetiga cho doré ome uté gatuaque. Ga siqueredie gadiógome nanique uje Joacim dopı́si Nabucodonosor ojningane cucha udore nanique. Mu chise siqueré gadióguedie eruei nanique ga Joacim pésu dáyipiedie jeta tagu Nabucodonosor uruode aja ga quene cha tangári uté nanique.

2Enga chise deréjnaringo iji udojo quigade nanique, ga Pangarádejnai chiroque pachamite uñane unirı́soningo aja Joacim, ore uniri Judá ujetiga ore chejna uté. Enga uñane tṍraji ore uniri uje i tu Caldéa (mu i uñai tu Babilónia); jé uñane tṍraji Sı́ria; jé basa ga uñane tṍraji ore uniri Moab uté; enga uñane tṍraji puniri uté uje i tu Amón. Udore tṍraji dajñarenie ome judágosode, ga ore chijna dõráchatigo uje ore pésu dajochade aja quedéjnane ome doriquéode, jé aja uje ore chajnangarase cuchade iji ore uniri Judá uté údode. Enga cucha tocachugode udore jé péropı́siji Pangarádejnai uru cásodicáite uje irógode proféta chajnerame judágosode ore nanique.

3Jecute que potigayaquérique déji arı̃a uje Pangarádejnai u uje chutṍri cucha gajnareque tocachugode udore ome judágosode ore nanique. Gaidi tu gu ujetiga chijócãre ore iji dejode nanique. Enga gose ore eduguéjna casicaite Manasés isijnaringuéone, jé aja ipesudode cucha jnese. 4Enga cuchiyi tu uje Manasés urasade que ore bárique cucha cuse, mu a jé chujé ore bisideque. Uje que máraque ore, mu Manasés uté chı̃retápise Jerusalén uté údode ome degode udore iyojnanie nanique. Enga que Pangarádejnai áyipieraque dépisi jeta chamurase cucha dacate gajnarénguipı́sode udore iji dajénique nanique.

Uje judágosode ore eduguéjnai Joacim toi nanique ga ujnacari Joaquín basája charidi nanique

5Enga cucha dacate amirone jnese iji Joacim uté úringai eduguéjna, jé aja ipesudode cucha jnese, ga purusãracho udore jnese iji darujna aode uñane nanique uje ore churúsãre judágosode ore eduguéjnane adode iji udore.

6Uje eduguéjnai Joacim uté toi nanique ga ujnacari uté uje i tu Joaquín basája dayé charidi nanique ome dáringai judágosode ore eduguéjna.

7Iji dirode udore nanique ga egı́ptogosode ore eduguéjna cuchábi que pésapo dajocaningárique ome punirone uñeque iji darosatique rı̃, mu gusu uje chácariji daniri Egı́pto ajénique nanique. U gu uje babilóniagosode ore eduguéjnai chajnose egı́ptogosode ore eduguéjnai uté ome gajné cásodicáite punı́ño jnese nanique, jé iji egı́ptogosode ore gajné tié uaté uje déji ore uniri eruei iji casaque garani yui, enga jé chuságaja tié Éufrates uaté nanique. Jecute e babilóniagosode ore eduguéjnai gajnecho udore nanique.

8Enga Joaquín guejnanie siquerei chise 18 años nanique uje quene basája dayé uquécasicá charidi ome dáringai judágosode ore eduguéjna iji dedai Jerusalén uté. Mu gusu guedosı́ode gadiógome úringai eduguéjna nanique. Enga Joaquín uté daté i tu Nehusta, ga uaté dayé i tu Elnatán, uje garani u ore idai Jerusalén.

9Uje Joaquín uté déji dáringai eduguéjna nanique, ga gajnarécho adode iji Pangarádejnai edominone gatuaque, enga chijnime dai casica Joacim jmapié noñánguenie ¡janipe! nanique.

Quene chise dı́nique nanique uje babilóniagosode ore eduguéjna cuchábi cho dasaguı́ji Joaquín, urasade judágose udore nanique, ga jno ore údi aja daniri Babilónia uté nanique

10Uje Joaquín uté qué déji dáringai judágosode ore eduguéjna nanique enga babilóniagosode ore eduguéjnai Nabucodonosor chiroque darógode soldácho dipeséo ore aja Jerusalén yui ujetiga ore cugujnáji judágosode ore idai uté. Ga Nabucodonosor isoldádode chise Jerusalén uté, ga ore chaparu gai uje ore cho ¡to-to-to! ore gai, jeta jé ca jerusaléngosode uñeque qué dopoi guetı́guiji uté rı̃. 11Uje babilóniagosode eduguéjnai isoldádode jé qué ore déji daparúgai Jerusalén gai nanique, mu ore eduguéjna cuchábi Nabucodonosor uté quene chise ore iji gai.

12Mu uje judágosode ore eduguéjnai Joaquín chiraja uje babilóniagosode ore eduguéjnai Nabucodonosor e chise Jerusalén, enga jé u uje jı̃raque chachai uté iji garãtique. Enga Joaquín tẽra rome Nabucodonosor uté nanique. Mu que gusu Joaquín uté uje chisi rome ome uté, mu Joaquín daté upo rı̃, jé aja Joaquín yuminórone eduguéjna ore to nanique, jé aja iroguipísode ore to, jé aja isoldádode ore eduguéjnane to. Enga Joaquín quene chise dáringai pisaque uje Nabucodonosor guejnanie siquerei e chise 8 años iji dáringai eduguéjna iji Babilónia.

13Ga Pangarádejnai uru cásodicáite ome Jerusalén úringai pasique iji jnumi quene tocade iji diri uté nanique. Uje babilóniagosode ore eduguéjnai Nabucodonosor uté chacája Jerusalén uté ga chase Pangarádejnai iguı́jnai ajei údode ome jogonórone cucha oreránguejna jnese nanique, ga chorei ore iji daniri Babilónia uté. Mu a jé ca gusu jeta chacája Pangarádejnai iguı́jnai nanique, mu Nabucodonosor chacája eduguéjna cuchábi iguı́jnai iji Jerusalén to nanique. Ga jnopo cucha orerane údi aja daniri rĩ uje chise iji eduguéjnai charidi uté. Enga uté chisapo eduguéjna cuchábi casicaite Salomón orade cucha oreránguejna rĩ uje pipesute iji óro nanique ome Pangarádejnai iguı́jnai. Mu Nabucodonosor chaquesu órodie iji udore jnese ga chorei dajnimingone óro pecho iji daniri nanique rı̃. Enga jé ũré uje cucha dacate tocachugode udore péropı́siji Pangarádejnai uru cásodicáite uje púcho nanique.#24:13 Iji 2 Reyes capítulo 20:17-18 ore, enga Pangarádejnai angúromei proféta Isaías e chingo babilóniagosode isocade ome Jerusalén úringai pasique iji jnumi ome Ezequías nanique iji cucha dacadode udore tocachúringane iquéode.

14Enga que gusu usodi cucha uñáiso uje Nabucodonosor jno údi nanique, mu jnopo jerusaléngose ponáyone jnese údi aja daniri uté rı̃. Enga soldádode ore eduguéjnane u uñane; jé basa ga soldate ibijoguipı́sode u uñane, jé aja jnani irajatáguipı́sode ome cuchade úringane pipesucho ore to nanique rı̃, jé aja guebéode irajasórone to rı̃ uje ore chirajapise guebéode úringane pipesucho nanique. Ga Nabucodonosor oidode jerusaléngose ore batigai chise 10.000 nanique uje chorei ore iji Babilónia nanique. Gusúpusu ayoré jmataguipı́sode uje Nabucodonosor noñome ore iji judágosode ore uniri uté nanique.

15Enga jé u nanique uje Nabucodonosor jno judágosode ore eduguéjnai Joaquín údi aja Babilónia ome úringárique pisaque. Que gusu Joaquín uté, mu daté jé upo rı̃, jé aja acotedie, jé aja yuminórone eduguéjna, jé aja jnani ibijóguipı́sode iji judágosode ore uniri. Ga Nabucodonosor cho dasaguı́ji ore nanique iji ore idai Jerusalén uté, enga chorei ore iji Babilónia jnese.

16Iji Nabucodonosor uté isagode judágose uje uté jno ore údi aja Babilónia, ga jõcarataque ibijógode jnese déji, uje ore batigai chise 7.000. Jé basa ga jno dasagode uñane údi aja Babilónia uje irajatáguipı́so ore ome cuchade úringane pipesucho, jé aja ore uje ore chiraja guebéode úringane pipesucho, ga ore batigai chise 1.000 nanique. Enga uajate ore ome pocaningane jnese, ga irajataque ore ome pocaningane isocade.

Sedequı́as chise dáringai judágosode ore eduguéjna nanique, uje babilóniagosode ore eduguéjnai uté ichajapite aja charidi

17Cucha dacadode udojo quigade ga babilóniagosode ore eduguéjnai Nabucodonosor chicha Joaquín daquerámi Matanı́as uté aja Joaquín charidi nanique ome dáringai judágosode ore eduguéjna. Mu Nabucodonosor ipesute Matanı́as i ichai, ga chı̃́care Sedequı́as aja uté.#24:17 Babilóniagosode ore eduguéjnai Nabucodonosor ichajapite Matanías aja úringai eduguéjna, mu gusu urása jmataguipísode ore uje qué déji Judá uté nanique.

18Enga Sedequı́as uté guejnanie siquerei chise 21 años nanique uje quene basája dáringai judágosode ore eduguéjna nanique. Ga guejnanie siquerei chise 11 años uje chácariji dáringai eduguéjna iji Jerusalén uté. Enga daté i tu Hamutal, ga uaté dayé i tu Jeremı́as uje garani tu ore idai Libna nanique.

19Uje Sedequı́as déji dáringai eduguéjna nanique mu pésupúsu pisijnaringuéone iji Pangarádejnai edominone; enga Sedequı́as uté iradi jé upúsu eduguéjna baja casica Joacim uté aja jmapié noñánguenie uje pésu ome Pangarádejnai uté nanique.#24:19 Sedequías hermano tu Joacim uté nanique; ore dayé u Josías jnese, mu ore datedie cãra rome ñane.

20Jecute uté adode udore chiborátaja uje Pangarádejnai ájningamı́e quene tocade ome Jerusalén idaisórone, jé aja ore uniri Judá jnese unirisórone. Enga jé u uje Pangarádejnai chijócãre jerusaléngosode, judágosode ore iji ore uniri nanique, uje que pota jeta chimópo ore iji denomitique rı̃.

Enga udojo quigade nanique ga judágosode ore eduguéjnai Sedequı́as tagu babilóniagosode ore eduguéjnai Nabucodonosor uté uruode aja, ga que dopoi uru quitique rı̃.

Currently Selected:

2 Reyes 24: Ayore

Highlight

Copy

Compare