2 Reyes 17

Gajnareque israélgosode ore eduguéjna Oseas isocade nanique

1Uje Acaz guejnanie siquerei chise 12 años ome dáringai judágosode ore eduguéjna, enga Ela ujnacari Oseas quene basája dáringai israélgosode ore eduguéjna nanique, enga chácariji dáringai edugúejna 9 años iji dedai Samária uté nanique. 2Enga Oseas uté pésu cucha gajnaréngone to nanique iji Pangarádejnai edominone, mu a jé ca urénga chopise israélgosode ore eduguéjna bajade ore adode, uje ore adode úringane gajnarécho sué Oseas uté ate gajnaréngone gai nanique.

3Uje Oseas e déji dáringai israélgosode ore eduguéjna, enga ası́riagosode ore eduguéjnai uje i tu Salmanasar chicáji israélgosode ore uniri ome dagaidi pocaninga uté, ga sué israélgosode ore gai. Jecute ası́riagosode ore eduguéjnai Salmanasar chiroque Oseas uté aja ujetiga cho doré ome ası́riagosode ore eduguéjnai uté iji siqueredie jnese gatuaque. 4Enga israélgosode ore eduguéjnai Oseas jecucha chorei dapláta iji ası́riagosode ore eduguéjnai uté iji siqueredie jnese gatuaque. Mu chise dı́nique nanique uje israélgosode ore eduguéjnai Oseas chachopise ası́riagosode ore eduguéjnai iroquei uté. Jecute Oseas uté cha cho doré ome uté, ga chiroque datocaidode aja egı́ptogosode ore eduguéjnai uje i tu So, jeta chátaja israélgosode ore jeta ore pésu dajocaningárique ome ası́riagosode ore.

Uje quene ası́riagosode ore eduguéjnai chiraja uje Oseas pésu dáyipie jeta tagu uruode aja ga que chopo doré rı̃, enga jé u uje chiroque datocaitı́go soldácho ore aja jeta ore chisa israélgosode ore eduguéjnai Oseas uté. Enga ore suru uté gai iji ore ujuyágaidóde jogatique nanique. 5Quigade enga ası́riagosode ore eduguéjnai Salmanasar, isoldádode ore chisite raja israélgosode ore uniri údode jnese ome dajocaningai. Ga uté chise israélgosode ore idáidatéi Samária to nanique ga isoldádode ore chaparu ore idai Samária gai jeta jé ca samáriagosode uñeque qué dopoi guetı́guiji uté rı̃. Ga siqueredie gadioque uje ası́riagosode ore isoldádode chaparu samáriagosode ore idai gai gatuaque.

Israélgosode ore chise dáringane pisacho nanique

6Uje israélgosode ore eduguéjnai Oseas guejnanie siquerei chise 9 años ome dáringai eduguéjna nanique enga quene ası́riagosode ore eduguéjnai uté sué israélgosode ore idáidatéi Samária gai nanique. Ga jno israélgosode udore údi aja Ası́ria nanique ome dáringane pisacho. Enga ası́riagosode ore eduguéjnai chiroque dasagode israélgoso udore aja pidáyode uñane iji uté uniri ujetiga ore cho dedáji udore. Ga uñane cho dedáji Halah; jé basa ga uñane cho dedáji ore idai Gozán uje uté déji tiédaté Habor uaté edúdi nanique. Jé basa ga chijna uñane aja médogosode ore idáyode uñane to nanique rı̃.

Israélgosode e ore ba gajnéone cucha jiei ome Pangarádejnai uté, jecute juéga ore ome damajosórone ore nanique

7Cucha dacate gajnarénguipı́sode udore tocade nanique gu uje israélgosode ore pésupúsu pisijnaringuéone ome dangureni Dupapı́si nanique. Uje Pangarádejnai jé upúsu uje ijnimique israélgosode ore iji Egı́pto uté, jé aja egı́ptogosode ore eduguéjnai Faraón josipiedie jmainie nanique. Mu israélgosode ore cho dedobóya dangureni Dupade uté, ga ore chisi dupa quedéjnane gáyode. 8Enga ore chirate daniri uté achamisõre bajade jmapié noñánguenie to nanique. Mu Pangarádejnai chijócãre purása quedéjnane udore iji israélgosode ore iquéode nanique gu ore isoca noñángone udore. Enga a jé ca gusu uje israélgosode ore chirate puniri uté achamisõre bajade jmapiedie, mu jé u to uje ore chirate deduguéjna bajaque sijnángone aja ore isoca noñángone uje ore chacate ore ome nanique. 9Enga israélgosode ore bai jé u uje ore pésu cuchade uje que arécho gotique ome Pangarádejnai, uje ore angureni Dupade u uté mu, enga ore pógu jórogu dasocade udore. Que gusu uté, mu ore chiro dangurenone dupa quedéjna cochocoidie nanique iji jogate umarone. Enga que chimoque pidánique uñeque jeta jé ca ore iguı́jnarique déji. Mu ore chapuse dedáyode aja jnese, jé iji ore idai ajámamone sudire, enga jé chuságaja ore idáidatéode jnese uje ore ujuyaquéode déji ore gáyode. 10Enga que gusu israélgosode ore bade udore nanique mu jé qué ore chajnera daba gajnéone cucha údi ome Pangarádejnai uté. Uje ore chijna dangurené dupa quedéjna Asera gajnéone cucha uje chiese puyácho udore, ga ore chicha udore aja oroné umarenie ójodie jnese nanique, jé aja pore uburutedie údode jnese rı̃, ujetiga jecucha israélgosode ore chisi uaté gai iji jogadode udore gatuaque. Enga ore angurené Asera uaté gajnéone cucha puyácho udore u cucarãte uejade uje pipotingarãcho nanique, jé aja uaté oredie udire uje pipesudei iji pore pajéode nanique. 11Enga ore chãru cucha ai unérone iji dangurenone dupa quedéjna gajnepı́dode jogate umáño udore jnese. Enga jé israélgosode ore iradigode upúsu puniri uté unirı́sõre bajade, uje Pangarádejnai chijócãre purása quedéjnane udore iji israélgosode ore iquéode nanique gu ore isoca noñángone udore. Mu israélgosode ore chajo raja daniri uté achamisõre bajade jmapiedie, enga ore adode udore chijnimipise Pangarádejnai ájningai ome raque nanique. 12A jé ca agúpurai israélgosode ore ome cuchade udojo jetiga jé ca ore pésu. Uje Pangarádejnai e chingo ore bajaque jeta jé ca ore chisi dupa quedéjnane gáyode, mu jé ore gaite dajéode ome raque nanique. 13Mu Pangarádejnai jecucha chaquı̃́ra jóroque israélgosode, judágosode ore ome date gajnaréngone, uje chiroque dangúroméone proféta ponáyo jnese aja ore ga ore chajnerame Pangarádejnai uru quigode ome ore nanique, uje chojninga:

–Ajı́oñome uacate gajnaréngone udore iji te jmete, ga ajuso yiroqué gajnéone cucha guio ome uaque, jé aja yáyipie quigode uje estatutos u, uje purusãracho udore jnese iji Moisés uté urusarane yuru pirosobácho uje yisı́ome uacai cásodicáite. Enga yirógapo yirógode proféta aja uaque gatuaque ujetiga ore chajnerame udore quigode ome uaque rı̃.–

14Mu que pangarate Pangarádejnai angúroméone proféta nanique ome israélgosode ore, mu ore chijarója re ome udore ore aquı̃raquéode, ga ore jmapiedie jé chopise ore dai cásodicáite jmapiedie to nanique uje que ore chibéro rome date gajnaréngone, ga que ore chicha danguretigai aja Pangarádejnai, uje ore angureni Dupade u uté. 15Enga israélgosode jé ore isoca dasocai uje ore dojnóngaja Pangarádejnai áyipie quigode uje estatutos u, jé aja uru iyiejnane uje chisı́ome ore dai cásodicáite ore, jé aja dajnéone Pangarádejnai aquı̃raquéo nanique. Enga ore chejna raja dangurenone dupa quedéjna udore adode, uje cucha bisidécho ore angurenone udore mu. Jecute ore chise dáringane cucha bisidécho to. Enga ore iradigode u dejominórone punı́ño unirisórone ore, uje Pangarádejnai garéngone u purása quedéjnane udore isoca noñángone mu. 16Enga israélgosode jé ore ate uje ore chicha Pangarádejnai uru pirosobádode jnese aja ti yui, uje ore angureni Dupade u mu. Ga pudatı́ngajna nanique enga ore chiro aquirájna ape ucatoque gárode oredie, uje pipesudei udire ome óro nanique, ga jé u uje ore cho dadupáji dorade udore. Ga ore pésapo dangurené oréraque ome pore pajénique nanique rı̃, ujetiga ore chisi gai, ga ore angurené uaté i tu Asera. Que gusu udore mu ore chichaga dagataidie aja jnumi iji gaté jogonórone cucha jnese iquéode to nanique rı̃, guedé, guedoside, guédodie ore, ome udore úringáringo pisı́gai. Enga ore chisi ayoré gajnui Baal gai to rı̃. 17Enga jé qué ore jno dapesute gajnarénguipı́sode údi ome dangurenone dupa quedéjna udore nanique. Ga israélgosode ore tẽra dabode, dabidie ore ome dangurenone ayoré gajnúo uje ore chiquetame ore nanique.

Enga que gusu uje ore tẽra dabode nanique, mu ore chetingarápo pujopié noñánguenie nanique rı̃, ga ore chucué pujopié quedéjnanie irajasórone ujetiga udore ore chatata cucha tocachugode iji piquéode ome ore. Enga ore tẽra rome cucha gajnaréngone úringane pipesucho iji Pangarádejnai edominone gatuaque, enga jé u uje ore chiroque Pangarádejnai aja sumájningai nanique.

18Uje Pangarádejnai chopise júruru ome israélgosode ore nanique ga chucuase ore aja quedéjnane iji dejode. Ga gusúpusu puniri Judá jogosórone ore uje qué ore déji dajnepı́di jnupe uje Pangarádejnai gueranome ore dai cásodicáite nanique. 19Mu quigade ga jé chuságaja judágosode ore to uje que ore susı́pise Pangarádejnai uru pirosobádode guio. Ga e ore chicha dangureni Dupade uru quicho aja ti yui, ga ore chiradápo israélgosode ore acajnaqué noñángone to nanique rı̃, ga ore chajna udore iji jnumone. 20Ga jé u uje Pangarádejnai cho ayoré piyáguiji israélgosı́so, judágosı́so ore jnese nanique, ga chopise dajuñame ore. Ga chicha ore aja ore ajnoñasórone ore jmainie gatuaque nanique. Enga jé chuságaja diri uje Pangarádejnai chucuase ore aja ti yui ujetiga jé ca chimópo ore iji denomitique rı̃.

21Uje Pangarádejnai chijna israélgosode ore uague uñanie iji David casicaite ape disi ejode ore gari nanique, enga jé u uje judágosode, israélgosode ore cãra deduguéjnane ome ñane. Enga israélgosode ore cho deduguéjnaji Nabat ujnacari Jeroboam nanique.#17:21 Pangarádejnai áyipiedie, jé aja isocai uté uje chajuque ore uáguedie iji ñane déji 1 Reyes, Capítulos 11, 12 ore. (Pangarádejnai isocade u udojo ome israélgosode ore uáguedie nanique uje doi nanique ga chajuque ore iji ñane nanique. Ga jnani bajai David ape disi ejo gajné ore uague uña Judá, jeta chácariji dáringai judágosode ore eduguéjna. Jé basa ga israélgosode ore pésu deduguéjna uñai nanique uje i tu Jeroboam uje uté dai i tu Nabat, ga uté gajnei ore uague uñanie uje ore chejna yijmanáyone ga eduguéjna ome ore nanique.) Mu cucha dacadode udojo quigade ga Jeroboam uté u uje chorei darasade israélgose iji quedéjnaringome Pangarádejnai úringai pajnaque nanique, ga inejerãte ore aja pisijnaringuédatéi úringai pipesute. 22Ga israélgosode ore chirate Jeroboam uté aja isoca gajnaréngone jnese, ga jé ore chajnera údi, údi, ga e uajate ore iji pisijnaringuéone jmainie. Que ore chejñu re iji. 23Enga jé chuságaja diri uje quene Pangarádejnai cãra israélgosode ore jogadi ome re nanique. Enga uté isocai uté jé péropı́siji uru cásodicáite uje angúroméone proféta ore chajnera jórogome israélgosode gatuaque nanique. Jecute poite israélgosode iji dajnepı́di jnupe ga ore umajosórone ası́riagose chorei ore iji daniri Ası́ria uté ome dáringane pisacho. Enga jé qué ore déji punire unejai uté jé aja deréjnane udojo to.

Purása unejángone e ore cho danirı́ji israélgosode ore uniri casica nanique

24Uje israélgosode e ore déji ası́riagosode ore uniri nanique ga jé u uje ası́riagosode ore eduguéjna cuchábi chorei purása quedéjnane ore iji israélgosode ore uniri casica, ga chécãre purása quedéjnane udore aja israélgosode ore ida arode iji ore achamini Samária uté údode. Enga purása quedéjnane udore uje poite ore aja israélgosode achamini Samária uté údode, udore ida arode ı́ode u udojo nanique: Babilónia, Cuta, Ava, Hamat, Sefarvaim ore. Mu uje e ore chise israélgosode ore uniri uté, achamisõre ejode udojo ore chopise dedáji israélgosode ore idáyode udore iji ore achamini Samária uté jnese. 25Uje purása quedéjnane udore quene cho dajnéngu israélgosode ore uniri uté iji taningai, mu que ore dosóñime Pangarádejnai yui ome úringai Dupa. Jecute Pangarádejnai chiroque caraté quedéjnanie aja udore ore yui nanique ga chujé ore urasade ujade. 26Enga jé u nanique uje ası́riagosode uñane cho gojña puniri uté achamisõre ichade isocade ome uraque deduguéjnai uté, enga ore chojningame uté:

–Yoqueduguéjná, ¡chimo jóroque re! uje caraté quedéjnanie tṍraji dajñarenie ome purasade udore uje barógaja israélgosode ore ida arode iji ore achamini Samária uté. Mu a jé ca urénga achamisõre ichade ore chiraja puniri uté achamisõre casodica ore angureni dupa gotique ajegaidode cucha. Jecute ore angureni uté chejnáreque uje que ore chiraja jmapiedie, enga jé u uje chiroque caraté quedéjnanie aja ore ujetiga chujé ore.–

27Uje ası́riagosode ore eduguéjnai chudute gojñane ome achamisõre ichade uje caraté quedéjnanie chujé uñane, enga chojningame datocaidode ore:

–Acueyoi sacerdóteode uñeque jne iji uacasagode israélgoso ore ujade, ga boyo uté údi aja ore achamini Samária jne. Ga a uté chácariji ore ujade jne, ujetiga chacate uniri achamisõre ichade udore ome israélgosode angureni dupa ajegaitı́go cucha. Uje dupai uté gotique a cho daniri iji ore uniri uté gu ga a gajneque.–

28Enga jé u uje ası́riagosode eduguéjnai uté utocaidode chucué sacerdóteode uñai iji ası́riagosode ore isagode israélgosı́so ujade, uje garani u ore achamini Samária ica. Enga sacerdote uté chajnésarapo daniri casica Israel rı̃, ga cho dedáji Betel uté. Ga cho puniri uté achamisõre ichade ore quique ome Pangarádejnai úringai pirosobate, úringai pisı́gai ore.

29Mu purása quedéjna ponáyone udore jnese angurenone dupa cuse uje cãra rome ñane to. Enga achamisõre ichade udore qué ore chajo raja dangurenone dupa oredie udire úringanie pipesudei. Enga ore chicha dangurenone dupa oredie udire aja dangurenone dupa gajnéone guiguı́jna iji jogate umarone udore iji daquigode pidáyo iji Samária údode jnese. Uje achamisõre bajade israélgosı́so ore oratı́go dupa quedéjna iguı́jnane jé jogate gatéode uje ore chiro nanique. Jecute achamisõre ichade chicha dangurenone oredie aja udore ajéode ome udire úringanie pisı́gai. 30Enga ore jnese chiro dangurenone dupa quedéjna oredie. Babilóniagosode ore chiro dangureni dupa quedéjna Sucot-benot oredie nanique. Jé basa ga cutágosode pésu dangureni dupa quedéjna Nergal oredie to; enga jé chome hamátgosode udore, uje ore pésu dangureni dupa quedéjna Asima oredie. 31Ga avágosode ore angurenone dupa quedéjna gare nanique uje ore ı́ode u Nibhaz, Tartac ore, enga avágosode chiro udore oredie to. Enga sefarvaı́mgosode ore pésu dangurenone dupa quedéjna oredie, uje ore angurenone ı́ode u Adramelec, Anamelec nanique. Ga sefarvaı́mgosode udore ore chibore dabode ome dangurenone dupa quedéjna udore nanique. 32E mu achamisõre ichade purása quedéjna jnese uje ası́riagosode chorei ore iji israélgosode ore achamini Samária uté, ore chapuse dasocade aja. Uje ore chisi Pangarádejnai gai, mu ore chimere uté adode iji dangurenone dupa adode. Ga ore pésu sacerdote ponáyone iji dajade bisideque, uje que israélgose udore mu. Ga ore ipesudode sacerdóteo tẽra darasade gueranone cucha ome Pangarádejnai uté iji ore angurenone dupa quedéjna ore iguı́jnane to nanique. 33Ga jé u uje ore chisi Pangarádejnai gai, mu ore isı́gayode upo dangurenone dupa quedéjna nanique rı̃. Uje ore dáqui cásodicáite jecucha chisi dangurenone dupa quedéjna gáyode gatuaque iji deda aro cásodicáite, ga jé qué ore chajnera dangurenone udore adode údi iji danire ichai uté to.

34Enga jé ore chajo raja dajmapié cásidicáite jé aja dirode udojo to. Que ore chedu Pangarádejnai ome úringai pisı́gai, mu ore chapuse dasocade aja. Enga que ore pusi Pangarádejnai uté áyipie quigode uje estatutos u, jé aja arecujaidie udire, uje que ore suse udire guio to. Enga que ore gaidode upo Moisés uté urusarane Pangarádejnai uru pirosobácho úringane pipesucho rı̃, jé aja iroqué gajnéone cucha. Pangarádejnai chirógui jóroque jnani bajai Jacob ape disi ejode aja daroqué gajnéone cucha udore úringane pipesucho yui, mu que ore doi. Enga ore dáqui Jacob uté u uje Pangarádejnai chécãre i nanique ga chı̃́care Israel aja uté. 35Uje Pangarádejnai chisi ome daru iyiejnane ome israélgosode ore, ga chósi tome daru pirosobádode udore nanique:

–Jé ca ası́yo dupa quedéjnarique gánique. Enga jé ca achacho uacagataidie aja jnumi iji ore iquéode. Jé ca beyoi udore adode, enga ca ẽchopója ore rı̃ ome uaquẽratique cuchiso. 36Mu eduyo Pangarádejnai uyu ome yúringárique pisı́gai. Achacho uacagataidie aja jnumi iji yiquei, enga ẽcho uaquẽrapáidode cucha ome uyu. Uyu u uje yijnime uáguiji egı́ptogosode ore uniri uté nanique, ga jé yipijógome yúringai etotinguerãque, yúringai ujopı́erã́quedaté ore iji uté. Enga jé yitiógarapı́sa yúringai pisı́gai ome uaque. 37Ajusópise yáyipie quigode guio uje estatutos u, jé aja yarecujaidie udire, jé aja yuru pirosobádode, jé aja yiroqué gajnéone cucha udore jnese uje yurúsãre ome uacai cásodicáite jé aja uaque. Uje uacajnepı́di turásu ujetiga jecucha eduyo udore úringáringo pajnacho iji jnumone gatuaque. Enga jé ca ası́yo dupa quedéjnarique gánique. 38Jé ca amuráso yuru iyiejnane iji uacajéningo uje yisı́ome uaque nanique, enga jé ca ası́yo dupa quedéjnarique gánique. 39Mu eduyo Pangarádejnai uyu ome yúringárique pisı́gai, uje uacangureni Dupa uyu. Enga a jé u jne ujetiga yijnime uáguiji uacamajosórone josipiedie jmainie jnese.–

Enga Pangarádejnai uru iyiejnane jé u udojo ome darasade israélgoso ore nanique. 40Mu jé ore ate uje que ore tangári dajnéone paquı̃raquéo, enga jé ore chajo raja dajmapié cásidicáite uje ore chapuse dasocade aja ome Pangarádejnai uté úringárique pisı́gai. 41Enga pachamite ichade jé ore ate to, uje qué ore déji dacotaquéode gai ome Pangarádejnai uté, mu jé qué ore chisi dangurenone dupa ayoré gajnúo gáyode to, uje ore chimere ore adode iji ñane. Enga ore abode, ájnamone ore chirate ore ga qué ore chajnera dayode ore isoca noñángone údi, jé aja deréjnane udojo to.

Currently Selected:

2 Reyes 17: Ayore

Highlight

Copy

Compare