2 Reyes 15
15
Amazı́as ujnacari Uzı́as basája dáringai judágosode ore eduguéjna, ga Pangarádejnai irasique adode nanique
1Uje israélgosode ore eduguéjnai uje i tu Jeroboam disi ejoi uté guejnanie siquerei chise 27 años ome dáringai eduguéjna enga quene Aması́as ujnacari Uzı́as basája dáringai judágosode ore eduguéjna nanique.#15:1 Uzías uté íode uñai tu Azarías nanique. 2Ga Uzı́as uté guejnanie siquerei chise 16 años iji yui uje quene basája dáringai judágosode ore eduguéjna nanique iji Jerusalén. Ga chácariji dáringai eduguéjna 52 áños. Enga jerusaléngoto Uzı́as uté daté ga uaté i tu Jecolı́as. 3Enga Uzı́as uté pésu cucha arégode iji Pangarádejnai edominone gatuaque nanique, enga uté isoca omone chopise dai Aması́as isoca omone to. 4Mu gajnarétigai u uje Uzı́as uté que chajnangarase ore aseradéjnane jogadébeode iji cucarãte umarone, orónenie iji daniri uté. Enga urasade jé ore ate uje ore ijo ore aseranone udore jogadode ome dẽrapáidode cucha, jé aja uje ore chãru cucha ai unérone iji to, uje que ore gajnepı́di urásu mu.#15:4 Nanique uje cáma eduguéjnai Salomón chimate Pangarádejnai iguíjna cuchábi uté, enga jecucha israélgosode ore chicha dẽrapáitigo cucha aja ore aseradéjnane jogadébeode iji cucarãte umarone, orónenie iji ore uniri uté. Mu uje Salomón e chimate dorai uté, enga urasade ore gajnepídi tu ujetiga ore chedurase Pangarádejnai uté iguíjnai iji Jerusalén ome dẽrapáitigo cucha udore jnese. Uje e puyágome Pangarádejnai ujetiga ore chapuse dẽrapáitigo cucha jogadode aja, mu uñane doi dáyipiedie ome cuchade udore.
5Mu chise dı́nique nanique ga Pangarádejnai chutṍri dequejnaréquedatéi lépra ome Uzı́as uté, ga que dequejnarei tuté chejñu riji uté gotique. Jecute uté que chácarapóji dayaripi guiguı́jna nanique rı̃, mu cãra dajogadi jé aja dagachodi ome dáringai lépra isaque.#15:5 Iji 2 Crónicas 26:16 - 22, ga Dupade Uruode chatata uje Uzías chisi dabai ome dáringai eduguéjna etoque, enga jé u uje pota chãru inciénso gai ome Pangarádejnai uté, mu puyaque gu uje gusu sacerdóteode ore gajnepídi turásu ome Dupade uté. Jecute Dupade chutṍri dequejnaréquedatéi lépra ome Uzías uté. Jecute Uzı́as chutṍri dajnacari Jotam ome dajnepı́dode ujetiga chijocase cuchade iji iguı́jna cuchábi uté jé aja ujetiga chajire darasade ore adode aja quigode iji ore uniri Judá uté nanique.
6Enga cucha dacate amirone jnese iji Uzı́as uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre judágosode ore eduguéjnane adode iji udore. 7Uje Uzı́as uté toi ga ore chicha ode taja dayode eduguéjna bajácho udore ódedie jogadi to nanique iji eduguéjna casicaite David idai Jerusalén uté. Ga jé u uje uté ujnacari Jotam uté chácariji dai uté charidi nanique ome dáringai judágosode ore eduguéjna iji quigade.
Israélgosode ore eduguéjnai Jeroboam disi ejoi uté ujnacari Zacarı́as uté chirate dai bajade aja ore ate gajnaréngone nanique
8Uje Uzı́as guejnanie siquerei chise 38 años ome dáringai judágosode ore eduguéjna, enga quene Jeroboam disi ejoi uté ujnacari Zacarı́as basája dáringai israélgosode ore eduguéjna to nanique. Mu gusu uté guejnane guedosi chojmára iji ti ome dáringai eduguéjna iji dedai Samária uté. 9Enga Zacarı́as uté chirate dai bajade aja ore jmapié gajnarénguenie uje ore pésu iji Pangarádejnai edominone gatuaque. Enga que chicai siñéngome Nabat ujnacari Jeroboam jmapié gajnarénguenie udire quigode gotique. Jeroboam uté u uje inejerãte darasade israélgose ore aja pisijnaringuéone nanique enga ore chiradája ipesudode cucha gajnarécho. Enga Zacarı́as uté qué chajnera uté jmapié gajnarénguenie udire údi.
10Uje qué upo Zacarı́as iji dáringai eduguéjna nanique, mu Jabés ujnacari uje i tu Salum yuque uté. Uje Salum, jorane ore cháta dáyipie taja ñane ome uraque deduguéjnai Zacarı́as úringárique chuque yui. Enga Salum uté chachẽre uté, ga chimate Zacarı́as uté aja jnumi iji idaité edominone nanique. Quigade enga Salum uté chácariji dei casé charidi ome dáringai israélgosode ore eduguéjna.#15:10 Salum uté cugujnáji Zacarías uté iji ore idai nanique uje i tu Ibleam, enga chicha uté cachodi aja ore idai uté uje chujé. 11Enga cucha dacate amirone jnese iji Zacarı́as uté úringai eduguéjna, purusãracho jnese iji darujna aode uñane nanique uje ore churúsãre israélgosode ore eduguéjnane adode iji nanique. 12Uje Zacarı́as basája dáringai eduguéjna ome israélgosode ga jé u uje Pangarádejnai uru cásodicáite chise dáringane tocachucho uje chingome Zacarı́as dáqui casicaite Jehú nanique. Uje chósi tome Jehú uté:
–A yipésu jne enga bape disi ejórigo uñéngo a ore basája báringai eduguéjna jogadi iji baquigade. Ga a gagájni ore jne jeta ore basája uñane quigade ome dáringáringo israélgosode ore eduguéjna. Enga a quene báringai eduguéjna eruei tu ome gagájnia tuaté jne.–
Ga Pangarádejnai uruode udore úringane tocachucho jogadi jé upúsu.
Salum uté chácariji dáringai israélgosode ore eduguéjna, mu que ujñapeque nanique
13Uje judágosode ore eduguéjnai Uzı́as guejnanie siquerei chise 39 años nanique ome dáringai eduguéjna, ga quene Jabés ujnacari Salum uté basája dáringai israélgosode ore eduguéjna to. Enga Salum chácariji dedai Samária uté, mu garósi deréjnane ome. Gusu guedosi chojmarámi nanique ome dáringai israélgosode ore eduguéjna. 14U gu uje Gadi ujnacari Menahem chujé uté. Uje Menahem uté tṍraji ore idai Tirsa nanique, enga chicáji Salum idai Samária uté. Ga chachẽre israélgosode ore eduguéjnai Salum uté, ga chujépise iji ore idai nanique. Enga jé u uje Menahem chácariji dei uté charidi ome dáringai israélgosode ore eduguéjna.
15Enga cucha dacate amirone jnese iji Salum uté úringai eduguéjna, adójnacho uje purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. Enga ore urusarane udore chatata Salum, jorane ore isocade uje ore cháta dáyipie taja ñane ome uraque deduguéjnai Zacarı́as úringárique chuque to.
16Iji dirode udore nanique ga Salum yusṍri Menahem uté tṍraji dayaridi Tirsa uté ga chise pidáyode uñai Tı́fsa aja dajesui. Ga cugujnáji ore idai uté, ga chejnápise tı́fsagosode jnese, jé aja ejominórone pidáyo achamisórone jnese. Enga tı́fsagosode ore cho daba gu uje que ore chuchẽre dedai ujuyaquéode jorı́dedie gai ome Menahem uté nanique uje chise ore idai. Ga ı́jnoque posongaquei iji Menahem uté ajénique, ga uté josipiedie udire jé chuságaja chequé icarenie uje chajuque udire ore iji gatócorodie to nanique.
Pangarádejnai Dupade chetaque Menahem jmapiedie iji úringai israélgosode ore eduguéjna nanique
17Uje judágosode ore eduguéjnai Uzı́as guejnanie siquerei chise 39 años nanique ome dáringai eduguéjna, ga quene Gadi ujnacari Menahem basája dáringai eduguéjna to ome israélgosode ore. Ga Menahem uté idai u Samária nanique ga guejnanie siquerei chise 10 años ome dáringai eduguéjna iji uté. 18Enga Menahem uté pésupúsu cucha gajnaréngone iji Pangarádejnai edominone gatuaque. Enga que chicai ti yui ome Nabat ujnacari Jeroboam jmapié gajnarénguenie udire iji dacuecaringuei jnese nanique jé aja dagachodi. Uje Jeroboam uté u uje inejerãte darasade israélgose ore aja pisijnaringuéone nanique enga ore chiradája ipesudode cucha gajnarécho.
19Uje Menahem uté qué déji dáringai israélgosode ore eduguéjna, ga ası́riagosode ore eduguéjna cuchábi Tiglat-piléser chise israélgosode ore uniri ome dagaidi pocaninga uté yui. Mu Menahem uté nejé ası́riagosode eduguéjnai uté údode ga cho doré ga chisı́ome deranenie pláta ome. Ga pláta guebedie udire imenuringuei batigai jiépisi nanique ga chise 33.000 ikı́lode nanique. Enga Menahem cho doré ome Tiglat-piléser nanique gu jeta Tiglat-piléser cháta raja uté ga pésu uajatiguei iji úringai eduguéjna.#15:19 Tiglat-piléser íode uñai tu Pul nanique. 20Ga Menahem uté gueranenie pláta tṍraji darasade israélgose ore. Uje israélgosode eduguéjnai Menahem chiroque jnani atade, ibijógode ore jnese aja ujetiga ore cho doré ome impuéstos. Ga jnani ataque chojmara, chojmarane ore jnese gajnepı́di tu jeta ore chisı́ome pláta guebedie ome deduguéjnai uté, ga pláta imenuringuei batigai ome jnani chojmarai chise médio kı́lo. Enga jé u uje Menahem tẽrája ası́riagosode ore eduguéjnai Tiglat-piléser nanique. Udojo quigade ga ası́riagosode ore eduguéjnai cha israélgosode ore unerai, ga jnoji israélgosode ore uniri nanique, ga chajnésaru aja daniri.
21Enga cucha dacate amirone jnese iji Menahem uté úringai eduguéjna, jé aja ipesudode cucha jnese, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore. 22Uje Menahem toi nanique, ga ujnacari Pecahı́as basája charidi ome dáringai israélgosode ore eduguéjna.
Menahem ujnacari Pecahı́as isocade gajnarécho iji dáringai israélgosode ore eduguéjna nanique
23Uje e chise 50 años nanique uje judágosode ore eduguéjnai Uzı́as chácariji dáringai eduguéjna, ga quene Menahem ujnacari Pecahı́as basája dayé charidi ome dáringai israélgosode ore eduguéjna. Enga Pecahı́as uté guejnanie siquerei gare ome dáringai eduguéjna iji dedai Samária uté. 24Enga Pecahı́as uté pésupúsu cucha gajnaréngone iji Pangarádejnai edominone. Enga que chicai ti yui ome Nabat ujnacari Jeroboam jmapié gajnarénguenie udire quigode gotique. Uje Jeroboam uté u uje inejerãte darasade israélgose ore aja pisijnaringuéone nanique enga ore chiradája ipesudode cucha gajnarécho. 25Mu chise diri uje israélgosode ore eduguéjnai Pecahı́as iroguipı́sode uñai uje i tu Pécah chimate deduguéjnai uté aja jnumi. Enga Remalı́as ujnacare Pécah uté. Enga Pécah, jorane ore cháta dáyipie taja ñane ome uraque deduguéjnai Pecahı́as úringárique chuque yui. Enga ore nóna ñane aja deduguéjnai iguı́jna cuchábi yui iji Samária uté. Enga ore chacája iguı́jnai ajépisi uté uje ujuyaquéode uajádiji gai ome Pecahı́as úringárique pãreque. Mu ore chise ajei uté, ga Pécah cugujnáji deduguéjnai ga chujé uté, jé aja Pecahı́as iroguipı́sode uñane uje ore déji gari, uje ore ı́ode u Argob, Ariel ore.
Enga Pécah jorane jnanı́o udore batigai 50 uje ore cháta raja uté ome uraque deduguéjnai uté úringai chuque, ga ore achamini u Galaad uté iji ore uniri Israel.
Uje e chuque Pecahı́as, enga jé u nanique uje Pécah uté chácariji dei charidi ome dáringai israélgosode ore eduguéjna.
26Enga cucha dacate amirone jnese iji Pecahı́as uté úringai eduguéjna, jé aja ipesudode cucha, adójnacho uje purusãracho udore jnese iji darujna aode uñane nanique uje ore churúsãre israélgosode ore eduguéjnane adode iji udore.
Israélgosode ore eduguéjnai Pécah adode gajnarécho gatuaque nanique iji Pangarádejnai uté edominone
27Uje Uzı́as uté guejnanie siquerei 52 nanique ome dáringai judágosode ore eduguéjna, enga quene Remalı́as ujnacari Pécah uté basája dáringai israélgosode ore eduguéjna. Ga Pécah idai tu Samária, ga guejnanie siquerei chise 20 años ome dáringai israélgosode ore eduguéjna iji dedai uté nanique. 28Enga Pécah uté pésupúsu cucha gajnaréngone iji Pangarádejnai edominone gatuaque. Enga que chicai ti yui ome Nabat ujnacari Jeroboam jmapié gajnarénguenie udire quigode gotique. Uje Jeroboam uté inejerãte darasade israélgose ore aja pisijnaringuéone nanique enga ore chiradája ipesudode cucha gajnarécho.
29Iji deréjnane udore u uje Pécah qué déji dáringai israélgosode ore eduguéjna, enga ası́riagosode ore eduguéjnai uje i tu Tiglat-piléser chisápo Israel uté rı̃ ujetiga cho dajocaningame israélgosode udore.#15:29 Tiglat-piléser íode uñai tu Pul nanique. Ga chijna ore gajnéone jnupe uñane iji ore gari, ga cho dajnéngu ore idáyode uñane uje ore ı́ode u udojo: Ijón, Abel-bet-maaca, Janoa, Cédes, Hazor, ore. Enga ası́riagosode ore eduguéjnai uté chijnapo israélgosode ore achaminone iji ore gari to rı̃ uje ore ı́ode u Galaad, Galiléa ore, jé aja ore uague Neftalí gajnéone jnumı́o jnese. Uje ore chajnosipise israélgosode ore ome dajnéone pidáyo udore, ga ası́riagosode ore eduguéjnai uté chisa idaité ore ga ore jno udore údi aja daniri Ası́ria uté. 30Mu cucha dacadode udojo quigade ga Ela ujnacari Oseas, jorane ore cháta dáyipie taja ñane ome Remalı́as ujnacari Pécah uté úringárique chuque yui. Enga Oseas uté cugujnáji Pécah uté, ga chimánaja jnumi, enga chácariji dei tuté charidi iji quigade nanique.
Uje Ela ujnacari Oseas quene basája dáringai israélgosode ore eduguéjna, enga Uzı́as ujnacari Jotam uté guejnanie siquerei e chise 20 años ome dáringai judágosode ore eduguéjna nanique.
31Enga cucha dacate amirone jnese iji Pécah uté úringai eduguéjna, jé aja ipesudode cucha jnese, ga adójnacho uje purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.#15:31 Jé ũré uje gusu Jotam guejnanie siquerei 16 años ome dáringai eduguéjnapise iji Judá uté. Mu uté gajnepídi cuse iji siqueredie uñanie uje chijocase cuchade iji ore uniri uje cáma dayé Uzías toi (adójnacho 2 Reyes 15:5).
Uzı́as ujnacari Jotam chácariji dáringai judágosode ore eduguéjna, ga Pangarádejnai irasique adode nanique
32Uje Remalı́as ujnacari Pécah guejnanie siqueré e gare ome dáringai israélgosode ore eduguéjna, enga Uzı́as ujnacari Jotam quene basája dáringai judágosode ore eduguéjna to nanique. 33Ga Jotam uté guejnanie siquerei chise 25 años uje quene chácariji dáringai judágosode ore eduguéjna iji Jerusalén uté. Ga guejnanie siquerei chise 16 años ome dáringai eduguéjnapise nanique. Ga Jotam daté i tu Jerusa, ga Sadoc uro uaté. 34Enga judágosode ore eduguéjnai Jotam uté pésu cucha arégode iji Pangarádejnai edominone. Ga adode udore jé cho dayé adode to uje dayé i tu Uzı́as nanique. 35Gusu cucha gajnareque chojmarai uje qué déji Jotam uté, enga u uje que chejnápise ore aseradéjnane jogadébeode jnese gotique iji cucarãte umarone, orónenie iji daniri uté. Enga urasade judágose jecucha ijo ore aseranone udore ome dẽrapáidode cucha, jé aja uje ore chãru cucha ai unérone iji to, uje que ore isocade urásu mu.#15:35 Nanique uje cáma eduguéjnai Salomón chimate Pangarádejnai iguíjna cuchábi uté, enga jecucha israélgosode ore chicha dẽrapáitigo cucha aja ore aseradéjnane jogadébeode iji cucarãte umarone, orónenie iji ore uniri uté. Mu uje Salomón e chimate dorai uté, enga urasade ore gajnepídi tu ujetiga ore chedurase Pangarádejnai uté iguíjnai iji Jerusalén ome dẽrapáitigo cucha udore jnese. Uje e puyágome Pangarádejnai ujetiga ore chapuse dẽrapáitigo cucha jogadode aja, mu uñane doi dáyipiedie ome cuchade udore.
Jotam uté u uje pésu Joride Umarejna uaté iji ujuyaquei uté uje chaparu Pangarádejnai iguı́jna cuchábi gai nanique iji casaque garani yui.
36Enga cucha dacate amirone jnese iji Jotam uté úringai eduguéjna, jé aja ipesudode cucha jnese, ga purusãracho iji darujna aode uñane uje ore churúsãre judágosode ore eduguéjnane ore adode iji udore nanique. 37Iji dirode udore uje Jotam uté déji dáringai judágosode ore eduguéjna, enga quene Pangarádejnai chiroque sı́riagosode ore eduguéjnai Rezín uté aja judágosode ore uniri ujetiga doi pocaningai ome ore. Mu que gusu sı́riagosode nanique uje ore doi pocaningai ome judágosode ore, mu israélgosode ore eduguéjnai Pécah dopoi pocaningai ome ore rı̃. Ga Pécah uté dayé i tu Remalı́as nanique. 38Uje Jotam uté toi ga ore chijóchame iji dáqui cásodicáite ore ódedie jogadi iji dáqui casicaite David idai Jerusalén to nanique. Ga jé u uje Jotam uté ujnacari Acaz basája dayé charidi ome dáringai judágosode ore eduguéjna nanique.
Currently Selected:
2 Reyes 15: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
