2 Reyes 1

Pangarádejnai angúromei proféta Elı́as uté cho darúja israélgosode ore eduguéjna cuchábi Ocozı́as uté nanique

1Uje israélgosode ore eduguéjna cuchábi Acab qué eca nanique ga jecucha purása quedéjnane doi uté uruode gatuaque, iji ore uniri Moab uté. Mu uje uté toi ga jı̃raque moábgosode ore tagu ujnacari Ocozı́as uté uruode aja uje basája dai casé charidi.#1:1 E iyajmaque uje israélgosode ore sué purása quedéjnane udore gai iji ore uniri Moab uté. (Ga 2 Samuel 8:2 chatata eduguéjnai David isocai uje sué udore gáyode.) Enga moábgosode ore cho ayoré piróguiji re iji udore ore jmainie. Ga jecucha ore cho doré ome israélgosode ore eduguéjnane gatuaque. Mu uje israélgosode ore eduguéjnai Acab uté e toi, ga moábgosode quene tagu israélgosode eduguéjna ejode uruode aja.

2Enga chise diri nanique uje Ocozı́as uté déji daguı́jna cuchábi ajei uñénguiji gaté yui nanique iji dedai Samária uté. Ga tajirome jnumi iji daguı́jnai bocadi uje pipesucho bocadode erásorone iji táblade nanique uje ore chiramı́sara. Mu uje Ocozı́as uté qué tajirásome guesi mu bası́ji bocadi uté ga chiborátaja uté úringai ejnarétaque nanique. Enga jé u nanique uje Ocozı́as uté chiroque datocaidode aja purása quedéjnane ore angureni ayoré gajnu yui ome uté úringárique picatecãraite. Enga Ocozı́as chósi tome datocaidode udore:

–Boyo jne ga ajnáñoji purása quedéjnane ore angureni dupa Baal-zebub iji ore idai Ecrón uté,#1:2 Ore idai Ecrón uté déji filistéogosode ore uniri uté. ga arı́ño údi uru quitı́gome uyu jne, jeta ninguira yúdode jne.–

3Uje eduguéjnai utocaidode ore jnome daqui uté yui, mu Pangarádejnai utocaidi gaté unirı́sõre catecã́ri tı́sbegosi Elı́as uté, Dupade uruode júsõre, enga chósi tome uté:

–Elı́as, ãriji, ga ajningare Ocozı́as utocaidode udore ore iquei, samáriagosode ore eduguéjnai uté irócho. Enga ojningame ore: "¿Cuchárique u gu a uje uacacueyoi ecróngosode ore angureni dupa Baal-zebub uru quitı́gome beduguéjnai uté? ¿Ama ome uacajéode ga jé ca Dupapı́sirique dépisi uacaniri Israel udé, ujetiga beduguéjnai chidójnangarása uté uru quitı́gome re? 4Adójnacho uaqueduguéjnai gajnéone Pangarádejnai urúo, uje chósi te: 'Jé ũrepise yu uje a atopı́si jne, enga gose basocade udore. Baterẽtáji bamochápi uté gai ome báringai ejnarétaque, mu a jé ca be jnumi iji uté jne rı̃.'"–

Uje Pangarádejnai iroi gaté unirı́sõre quene chatata Ocozı́as gajnéone Pangarádejnai urúo ome Elı́as uté nanique, enga Elı́as niji ga chajningare Ocozı́as utocaidode ore iquei, enga chingo Pangarádejnai uruode ome ore ujetiga ore chajnerame ome deduguéjnai uté gaté. 5Enga jı̃raque ore chajniápo deduguéjnai uté gai rı̃. Mu Ocozı́as a tṍra rome datocaidı́so ore uje jı̃raque ore di, enga chojninga:

–¡Chimo jóroque re! ¿Cuchárique u gu a uje jı̃raque uacarı́ño?–

6Mu ore chajnai deduguéjnai uruode, enga ore chojninga:

–Jnanı́rique chajningare yoquiquei que, ga chojningame yoque: "Boyo ga ajnésacho uaqueduguéjnai gai. Ga angoño Pangarádejnai uruode udojo ome to, uje chósi te: '¿Cuchárique u gu a uje baroque barógode aja ecróngosode ore angureni dupa Baal-zebub yui ujetiga acué uté uru quitı́gome ua? ¿Ama ome bajéode ga jé ca Dupapı́sirique dépisi baniri Israel udé, ujetiga adójnangarása uté uru quitı́gome ua? Jé ũrepise yu uje a atopı́si jne, enga gose basocade udore. Baterẽtáji bamochápi uté gai ome báringai ejnarétaque, mu a jé ca be jnumi iji uté jne rı̃.'"–

7Enga ore eduguéjnai Ocozı́as uté chojninga:

–¿Ama cho rique que uaqueyai jnani atı́go? uje uté chachai uaque ga chatata cuchade udore ome uaque que.–

8Ga ore chatata adode nanique, deyai jnani uté. Ga ore chojninga:

–Iguidé ojorẽ́ ga uté chigaru dapajei ome dagarubi uje cucha ao.–

Ga jı̃raque Ocozı́as chiraja uje Dupade uruode júsõri Elı́as u, ga chojningame darógode udore ore:

–¡Tı́sbegosi Elı́as u arı̃a!–

Israélgosode ore eduguéjnai Ocozı́as chiroque darógode soldácho aja Elı́as uté úringárique pisaque yui nanique

9Iji udojo quigade enga Ocozı́as uqué jı̃raque chiroque dasoldádode ore eduguéjnane uñai aja Elı́as yui ujetiga chisa uté. Enga soldádode ore eduguéjnai uté nóna darógode soldácho to uje ore batigai u 50, ujetiga Elı́as nóna ore aja deduguéjnai iquei. Ga ore jno ga ore chise Elı́as iji dapácadi iji cucarãte oronéraque ójoraque. Enga jé u uje soldádode ore eduguéjnai tibágui Elı́as uté iji charidi enga chojninga:

–¡Dupade iroi chá, be jnumi ga ajı́na yoque, uje yoqueduguéjna cuchábi chiroque ua aja dari gu!–

10Mu Elı́as chajnai soldádode ore eduguéjnai uté uruode ga chojningame:

–Ujetiga jé ũré ua ga Dupade iroi tu yu, enga ¡yipésupú ga pioguéjnarique tṍraji gaté ga basája uacabai jne jõ, ga chejna ua, jé aja barógode soldácho jnese to, uje ore batigai u 50!–

Ga jé u nanique uje pioguéjnai tṍraji gaté ga basája soldádode udore ore gai nanique. Ga 50 ore mu jé pioi chejna ore jnese, jé aja ore eduguéjnai uté, que uñeque chapite nanique.

11Ga Ocozı́as uqué chimo uje iroque bajade que ore di, ga chirógapo soldádode eduguéjna uñai jé aja irógode soldácho ore aja Elı́as yui gaté rı̃, jeta uté nóna ore aja deduguéjnai iquei. Ga soldate ejode ore batigai jé upo 50 rı̃. Ga ore jno ga ore chise Elı́as charitique uté iji cucarãte oronéraque ójoraque. Ga soldádode eduguéjna ejoi uté doi baja casé uru quigode to uje chósi tome Elı́as uté:

–¡Dupade iroi chá, be jnumi jé iji de, ga ajı́na yógaja yoqueduguéjnai Ocozı́as, uje yoqueduguéjnai tibidi ua gu!–

12Ga Elı́as jé uru qui chojmara ome ore nanique, uje chojninga:

Enga jé u nanique uje pioguéjnai tṍraji gaté ga basája soldádode udore ore gai nanique. Ga chejnápo 50 udore nanique rı̃, jé aja ore eduguéjnai uté, que uñeque chapite nanique.

13Ga jé qué jno dádi uje Ocozı́as chacho ore yui nanique uje que ore di, ga dopoi soldádode ore eduguéjnane uñai gaté rı̃, jé aja irógode soldácho udore uje ore batigai chise 50. Enga chirógapo ore aja Elı́as yui gaté rı̃, jeta uté nóna ore aja deduguéjna cuchábi uté.

Mu uje soldádode ore eduguéjna gadióguei uaté chise Elı́as uté iji charidi enga jı̃raque chichaga dagataidie aja jnumi iji uté iquei. Enga chijócha ajei údi ujetiga chosõre ore, uje chojninga:

–¡Dupade iroi chá, yijócha bajei údi ujetiga ajuse yucuecaringuei guio! Enga ajusápo barógode jnani udojo ucuecaringuei guio to rı̃ uje ore batigai u 50. 14Yirajapise arı̃a uje pioguéjnai tṍraji gaté ga chejnápise eduguéjna baja casodé uje gare ore, jé aja ore irógode soldácho to rı̃. Jecute yósi tome ua, ga yijócha bajei údi ome uyu iji de ujetiga ajuse yucuecaringuei guio.–

15Uje soldádode ore eduguéjnai chejna dajei jochaquéode udore aja guesi ome Elı́as uté, enga jé u uje Pangarádejnai iroi gaté unirı́sõre chojningame Elı́as:

–Be ga ajı́na uté, enga jé ca atodo.–

Enga jé u uje Elı́as niji ga nóna soldádode ore eduguéjnai uté. Enga ore doi jnumi tiji cucarãte oroné uaté, enga ore nóna ñane aja eduguéjna cuchábi Ocozı́as iquei. 16Enga Elı́as chósi tome eduguéjna cuchábi uté:

–Pangarádejnai chojningame ua: "Baroque barógode aja ecróngosode ore angureni dupa Baal-zebub yui ujetiga acué uté uru quitı́gome ua que. ¿Ama ome bajéode ga jé ca Dupapı́sirique dépisi baniri Israel udé, ujetiga adójnangarása uté uru quitı́gome ua ya? Jé ũrepise yu uje a atopı́si jne, enga gose basocade udore. Baterẽtáji bamochápi uté gai ome báringai ejnarétaque, mu a jé ca be jnumi iji uté jne rı̃."–

Acab ujnacari Ocozı́as toi, ga desai Joram basája datigate charidi ome dáringai israélgosode ore eduguéjna nanique

17Enga chise diri nanique uje Ocozı́as topı́si, enga jé u uje tocadepise Pangarádejnai uru casodé uje Elı́as chajnerame eduguéjnai uté.

Mu Ocozı́as uté que ape diyoquı́rique cuse nanique, jecute desai Joram basája uté charidi nanique ome dáringai israélgosode ore eduguéjna. Ga judágosode ore eduguéjnai Josafat ujnacari Joram uté guejnanie siqueré e gare ome dáringai eduguéjna nanique uje quene Ocozı́as desai Joram uté basája charidi ome dáringai israélgosode ore eduguéjna to nanique.#1:17 Israélgosode ore eduguéjnai Acab chĩ́care Joram aja dabi nanique; jé basa ga judágosode ore eduguéjna cuchábi Josafat ujnacari uté i jé upo Joram nanique rĩ.

18Enga cucha dacate amirone jnese iji Ocozı́as uté úringai eduguéjna, ga purusãracho jnese iji darujna aode uñane nanique uje ore churúsãre israélgosode ore eduguéjnane adode iji udore.

Currently Selected:

2 Reyes 1: Ayore

Highlight

Copy

Compare