1 Samuel 9
9
Samuel chimo Saúl ga chiraja uje Dupade ajegaite ujetiga israélgosode ore cho deduguéjnai iji uté
1Jnani déji benjamíngosode ore ujade to uje i tu Cis. Enga Cis uté dai u jnani bajai Abiel nanique, jé basa dáqui i tu Zeror to nanique. Cis tuté dáqui gaté u jnani bajai Afía ujnacari uje i tu Becorat nanique. Ga jecucha benjamíngosi Cis uté ujode ayoré ore tangaripísi uté nanique. 2Cis uté ujnacari cuse uje uté i tu Saúl. Qué jnacarape uté ga jnacare uome uté ga que israélgotique déji jeta cho Saúl garode ome abubíe uje jnacare iménujna ome ore jnese. Israélgosode uñane umare ore to ome dabubíe mu Saúl cutejma abubíe chãraja udore ore jnese.
3Chise diri nanique uje Saúl dayé tibidi ga chojninga:
–Yujnacarabi á, bo ga acué yocachidedie burica quedéjnai iji data ga ajína yoquirógode uñeque jne ga a cháta cuchade aja ua jne.–
4Saúl jno ga chicáji cucarani edúdi uje déji efraíngosode ore gajnei jnupe ajei ome dacueguedie burica quedéjnai mu que chise gotique uje chĩro jóroque erámi ome dacueguedie udire. Ga chicapóji pachamite uñane uje ore íode u Salisá, Saalim ore ga chĩro erámi ome dachidedie burica quedéjnai mu que chise ore gotique. Ga chucuepo jóroguiji benjamíngosode ore uniri údode rĩ, mu que chise gotique. 5Mu uje qué ore déji pachamite uñai uje i tu Zuf ga Saúl chojningame dajõrai, dayé iroque:
–Yico, ga yajníngo to, uje a iapade cho dáyugu dachidedie burica quedéjnai, mu a chopise dáyugu yoque uje e iyajmaque yógome iapade gu.–
6Mu Saúl jõrai daroque chojningame Saúl:
–Dupade uruode júsorone uñai déji ore idai tudé. Jeta bajéo ga yibájobí uté to uje urasade ore jute uté gotique ome ujnomei. Ja seca uté chatata yocucueguedie burica quedéjnai ajnasónique dajeque ome yoque jne á.–
7Saúl chojningame daroi:
–¡Boco, yico! Mu ¿jé yoco ringome Dupade uruode júsõri tuté jne, uje que yajmitágo cuchárique jeta yisígome Dupade uruode júsõri tuté? E yejnángopíse yoqui casodé arurécho ga e ajéguesáque pi casodé.–
8Saúl jõrai daroque chojninga:
–Yipláta amirámia qué désiji jeta yisígome Dupade uruode júsõri uté jne. Ga a chingo dajei quitígaja yoque jne jeta yico yocucueguedie burica quedéjnai iji sañeque.–
9(Iji taningai nanique uje israélgosode uñeque pota chiraja dasocáringome cuchárique enga chojningame darásarigo: "Yico, ga yibájobí cuchade imósõri uje i tu vidente ga chingo quitígaja yoque jne." Mu iji dirode udojo ga disi ejode yojnijome cuchade imosórone udore 'Dupade uruode júsorone.')
10Saúl chojningame daroi:
–Que yotigase ua. Boco yico, yico ga yibájoi Dupade uruode júsõri uté ga a asi ome bapláta ome jne ga a yicatecãcoi ome yocucueguedie burica quedéjnai udire ajnasónique dajeque.–
Enga Saúl, ore cáputaji Dupade uruode júsõri uté jogapi pidai jogadi. 11Uje Saúl ore chise ore idai gabi uje chicáji oroné gaté, ga ore chise gapudíe iji ore idai tuté ejoi uje ore gaidi tu yodi, ga ore catecã́ri udire ore iji uté ga ore chojningame ore:
–¿Ga ore idai tudé u a, uje cuchade imósõri déji jeta yibájobí to a?–
12Enga ore chojningame Saúl ore:
–Ejẽ́, déji, mu qué chicáji ore guẽrapáidode dachite cuchiso jogadi to que, uje deréjnai tudé u gu uje ore chujé dẽrapáidode dachite ome Dupade gu. Ga aguitóyo iji uté yui jeta apótayo acatecãchoi uje cáma diji daqui tuté.–
13Ga udire ore chojningápome Saúl rĩ:
–Aguitóyo yui uje a qué déji dajei jõ, uje a tagu ore pose unérone to iji ore guẽrapáidode jogadi uté to jne. Uje que toque gu jeta ipesusórone ore tagu bajaque jeta cáma uté déji. Uje cucha bajai u gu jetiga uté chacãre Dupade gai ome ore posode, ore guẽrapáicho cucha ãrío bajaque. Jecute aquejnáñoji uté yui iji te uje a qué atuãchóa uté jne iji garani.–
14Uje Saúl ore cha catecã́ri gapudíe ga jé u uje ore jnome guidai uté yui. Ga ore tuangóa Dupade uruode júsõri Samuel iji uté. Ga Samuel e chicárasiji Dupade iguíjnai yui to.
15Uje cáma Saúl chise ore idai uté to diríca mu Pangarádejnai Dupade jĩraque chiqueta raja Samuel enga chingome cucha dacadode uje a tocade jne iji dire uñai dirome. Ga chósi tome daruode ome Samuel: 16"A yiroque benjamíngosode uñai aja bei dirome iji guedé batigai jeta jé chopise udé dirome. Ga be uté enga ojne aseque puyai aja uté gosi ójo dirome ga úringai eduguéjna cuchape jogadi u jne ome yurasade israélgose ore jnese. Enga a uté u jne ujetiga chijnime darasade iji filistéogosode ore josipiedie jmainie jne. Yudute yurasade israélgose ore agoyedie uje ore poji dejode enga yosõripísi jóroque ore uje ore chetágui jóroque dajnenie filistéogosode josipiei ome raque gu."
17Uje Samuel chimo Saúl iji ti ga Pangarádejnai Dupade chojningame uté: "Samuél, yojninga casé jnacari déji uaiti. A uté u ujeta yurasade israélgose ore cho deduguéjna iji uté iji daniri tudé."
18Uje Saúl chimo Samuel iji chaguesiringai iji ore ujuyaquei piagoi ejoi enga chose Samuel yui. Ga catecã́ri ga chojninga:
–Atataba cuchade imósõri jogatique ome yu iji siñeque. Uje a qué yicatecã́rirási uté gu.–
19Ga Samuel chojninga:
–Cachi bojningai uté cuchade imósõre jé u yu á.–
Enga Samuel chojninga:
–Ajína yu aja Dupade iguíjnai iji deréjnai tudé ga agábu yibosode to jne iji Dupade iguíjnai ajei. Enga a qué yicatecã́ri ua dirome iji durasé ome bajegaitique cucha enga quigade dirome ga jé u uje bacáji baquitique. 20Uje bacué burica quedéjnamone diríca uje dirode e gadiógosi ome sudore uje bijnási, mu jé ca o báyugu uje e piyai udire gu. Mu angaripísi yuru quigode udojo ome ua uje qué bagúsiji yari iji de. Uje cuchade iji Israel udé údode ga jé gajnesṍri tu ua jnese iji yocuniri udé údode. Enga bajogasúode a ore chagutíyame ua jne ome cutejmane bagúcha dipeséo jne.–
21Saúl chojningame Samuel uruode udore:
–Cachi benjamíngosode uña yu, mu yocujode israélgose uague uñanie ore sué benjamíngosode yoquibai ome dabetígajnane. Jé basa ga yoco saque iji yocujode israélgose ore ujade. Mu yijogasúode ore uyoque ga que yocuñeque ujnomérique cus ome yocurasade ore gotique to iji yoquidai. ¿Jé go uje barúo udojo ome yu uje chiese ataguipise yu jne?–
22Samuel jno Saúl, iroi ore údi aja ore atigabié, ga chicha Saúl aja ore charipi ueradi gai uje eduguéjnane charipío. Samuel ibidigode jnani ore chise 30, mu ajegaidipísi u Saúl ga que chuseque uté.
23Samuel chojningame cuchade ãraquesṍri:
–Be aquirájna ãri casé uje yingome ua diríca jeta angara jogatique ga ajnája udé.–
24Enga cuchade ãraquesṍri chijnime ore yugué casé aquirájna uépei ga chijnáji ome Saúl ga chicháji bajo ajei. Ga Samuel chojningame Saúl:
–Jé bajneque uté ome yoque diríca jecute yichagóji ti ome ua. Be ga agu. Bajneque gu jecute yicháji ti ome ua diríca uje yibidi yocurasade uñane ore aja yoquininaquei jogadi udé.–
Ga jé u uje Saúl chacásãra Samuel iji deréjnai uté nanique.
25-26Uje Samuel ore cha datigai ga jno Saúl údi aja daguíjnai uje ore doi guesi iji Dupade iguíjna cuchábi ajei. Ga pésu Saúl mochápi iji daguíjnai ajé uñai iji gaté. Iji durasé ga Samuel tibidi Saúl ga chojningame:
–Diri e u jetiga ãriji to, ga bome baquitique.–
Samuel nóna Saúl aja ore idai eruei ga ore catecã́ri ñane aja dajesúode. 27Uje Samuel, ore chise dedai eruei ga Samuel chojningame Saúl:
–Aroque baroi aja doi ga jno bajaque, ga a qué yatata Dupade uru qui casodé ome ua jne ujeta gusu yóguiji ñane gari.–
Currently Selected:
1 Samuel 9: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
