1 Samuel 5
5
Filistéogosode ore jno Dupade uruode pi cajo údi aja dedai uje i tu Asdod
1Uje filistéogosode ore chijna Dupade uruode pi cajo iji israélgosode ore apáringaméi uje i tu Eben-ezer, ga ore jno údi aja dedai uje i tu Asdod. 2Enga filistéogosode di uté údi iji dedai ga ore nája dangureni dupa iguíjnai to uje i tu Dagón. Ga ore chicha uté aja dangureni dupa Dagón gajnui ejoi. 3Iji durasé ga asdódgosode ore chobéri dangureni dupa quedéjna yui, mu ore chajire mu ore angureni casé chorei dajei iji jnumi tiji Dupade uruode pi cajo uté iquei. Ga cho jetiga ayorérique ucuayágaja jnumi. Enga jé u uje filistéogosode ore chipotingarápo Dagón uté aja gaté rĩ, ga ore chichapóji jogadi te rĩ. 4Ga adi jé upo rĩ uje asdódgosode udore ore tibágapoi uté rĩ iji dire uñai, mu jé ate uje cho pucuayade aja jnumi iji Dupade uruode pi cajo uté iquei. Filistéogosode angureni dupa Dagón etabi cãra dajogadi, jé aja jmainie ga cho jetiga ore ujórique ayoré chicháji guiguíjnai piagoi gai iji jnumi. Gusu gosi iji jogadi uje qué catája ñane ore angureni casé dupa Dagón. 5Enga e que toc jetiga Dagón añerasórone sacerdote qué ore chuchiéjnapo guiguíjnai piagoi uté gotique rĩ jeta ore chacája ajei, ga jĩraque ore chó gai uje ore angureni Dagón gatoi, jmanáyone ore déji gai diríca gu, ga chiese puyaque ome anguresórone jeta ore chuchiéjna jogatique.
6Ga Pangarádejnai Dupade cho dájningame asdódgosode ore ga chisi ome chiga uase ome guidai tuté idaisórone ore jnese, jé aja acorásedie iji ore dosadode to ga chisi ome chiga uase ome ore jnese to. Ga pisadodéringai chise ore to. 7Jecute uje asdódgosode ore chimo uje chiga uase chise ore urasade enga ore chojninga: "Jé ca Dupade uruode pi cajo chácariji yoquidai tudé to jne, uje a israélgosode angureni dupa u gu uje cho dajuñame yoc. A chejna yoque jne enga a cháta yógaja yocangureni Dagón uté to jne ome cutejmai dajuyaquédaté."
8Ga ore tibidi filistéogosode angaránone ga ore chojningame ore: –¿Jé yoco ringome israélgosode ore angureni Dupa uruode pi cajo uté jne iji yoquidai uje e yejnárejo yógome uté?–
Ga filistéogosode ore asutedie ore chojninga:
–Boyo údi aja ore idai uje i tu Gat, ga ajíñoñomiji uté jne.–
Ga jé u uje ore jno údi aja gátgosode ore idai. 9Uje ore di Dupade uruode pi cajo údi ga chigadíe udire tṍraji gátgosode ore gai to, jnanione, jé aja chequedíe, disiode ore jnese. Ga jé u uje ore cutáji udire jmainie uje que ore tiógarapo gotique rĩ. 10Ga jé u uje filistéogosode ore jnopo Dupade uruode pi cajo údi rĩ aja ore idai uñai uje i tu Ecrón. Ga idaisórone ore chimo uté ga jé u uje ore tibite ga ore chojninga: "Ore di israélgosode angureni Dupa uruode pi cajo údi iji yoque gu jeta yoco yoquiba uté to, ga yejnárejo yógome uté to."
11Ga jé isoca uje ore di Dupade uruode pi cajo údi ga chigadíe jĩraque tagu ecróngosode ore to ga jĩraque ore chapu re iji udire jmainie uje ore todo pitoringai yu. Ga ore tibidi filistéogosode asutedie ga ore chojningame ore: "Boyo israélgosode angureni Dupa uruode pi cajo uté údi aja jogatique. Uje a chejna filistéogosode uyoque jnese jne."
12Dupade chequésãre ecróngosode uñane, jé basa uñane qué eca mu chigadíe déji ore gáyode jnese. Jecute ore popise iji ore idai údode ga ore pijnacaraidie chichagu gatajnoquei uje ore chutṍri Dupade ome re.
Currently Selected:
1 Samuel 5: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
