1 Samuel 31
31
Saúl, ujnacarode ore chejna raja toi jnese iji dajocaningai nanique
1Uje israélgosode, filistéogosode ore doi pocaningai ome ñane iji israélgosode ore uniri ajei ga filistéogosode ore yugode iji israélgosode jiei iji cucarani ejoi uje pajmite uté ga i tu Gilbóa, ga ore chayome filistéogosode iji uté. 2Ga filistéogosode ore chucajningárome Saúl, ujnacarode ore. Ga ore chujé Jonatán, Abinadab, Malquisúa iji dajocaningai uté, ga Saúl ujnacarode e ore chejna raja toi jnese. 3Uje ore chucajningárome Saúl ga docojique oisórone ore chicho Saúl iji quedéjnai. Ga Saúl todópisa ore yui. 4Ga Saúl chojningame dajõrai uje jnuque õrachade:
–Ajnime baquesei ga achagu yu ome. Uje que yipota jeta jõcarataque serẽrachugode udore ore chise yu iji de ga ore cho damitiguéode ome yu, ga dupa quedéjna anguresórone udore ore chujépise yu jne.–
Mu Saúl jõrai daroque todópisa jeta chigota israélgosode ore eduguéjna cuchape Saúl. Uje iroi que chujé ga Saúl chisa daquesei ga jé u uje chajója darobé ga cṍraja quesei uté gai. 5Uje Saúl jõrai chimo deduguéjnai uqué uje chichagu rome daquesei ga e toi, ga jé u uje Saúl jõrai tuqué daroque chichagu rome daquesei to ga patĩ́ora dasuté Saúl iji cachodi. 6Saúl cachója ore jocaningai uté ome filistéogosode ga patĩ́ora dajnacarode ore iji jnese, jé aja iroguipísi, jé aja Saúl jõra casodé dasoldate uase ore. 7Uje israélgosode ore chudute Saúl, ujnacarode ore ujnomei uje filistéogosode chujé ore, ga ore todópisa filistéogosode ore yui, ga ore jnoji dedáyode iji udore ga ore chayome filistéogosode ore. Ga filistéogosode cho dedáyode iji ore idáyode udore. Yojningane israélgose ore idáyo u uje déji turéjnai qui iji yote quedéjnai Jordán uécha uñai iji guedé garani yui.
8Iji pocaningai quigade ga filistéogosode isoldádode chobéri degode israélgose yúode jeta ore chijna ore õrachade, ga ore chise israélgosode eduguéjna casé Saúl iji pajmini Gilbóa ójo uje cucarãte choqui udore, jé aja Saúl ape gadiógode ore to rĩ. 9Enga ore chaquesu Saúl etabi ga ore chijna Saúl õrachade to. Ga ore chiroque darógode aja filistéogosode uniri údode jeta ore chatatame darasade uje ore chujé israélgosode ore eduguéjna cuchábi Saúl. Ga ore chatata udore iji dangurenone dupa quedéjna iguíjnane ajéode. 10Ga ore chijna Saúl õrachade aja ore udupa quedéjna iguíjnai uje uaté i tu Astarté. Ga ore chijna Saúl gosi aja ore idai uje i tu Bet-sán, ga ore chadíja Saúl aja gaté iji ore idai ujuyaquéode ujetiga ore idai idaisórone ore toji israélgosode ore eduguéjna cuchábi casé gai iji gaté. Mu que gusu Saúl mu ore chátaja ujnacarode uje ore chadíja ore aja gaté to.
11-12Uje jnanione iji ore idai Jabés chudute to uje filistéogosode ore chigaru Saúl aja gatérique ga ore pésu dáyipiedie jeta ore tibágui bet-sángosode ga ore toria deduguéjnai casé Saúl, ujnacarode ore ga ore chijóchame ore. Ga galaádgosode ore idai u Jabés uté nanique. Ga jnani dicaséode ore diguiji dejai údode jeta ore di Saúl, ujnacarode ore pépitade údi jeta ore chijóchame ore pépitade iji ore idai Jabés uté. Ga ore chipotame Saúl, ujnacarode ore pépitade bajaque. 13Ga quigade ga ore chijóchame ore ajnoqueguipísode iji poria ero. Ga guidai idaisórone ore chejna dire gare iji tíode ome dagoyedie iji Saúl quigade. Iji udojo ga que cucha pibotique dépoji israélgosode uñeque ajénique rĩ.
Currently Selected:
1 Samuel 31: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
