1 Samuel 25
25
Samuel toi nanique ga urasade ore poji ejode
1Uje Dupade uruode júsõri Samuel toi ga israélgosode ore chimáta ñane aja uté ga ore poji Samuel ejode jnese iji úringai toque. Ga ore chijóchame iji gajnei jnupe ajei iji iguíjnai ejoi. Ga uté ode déji ore idai Ramá nanique. Iji uté úringai toque quigade ga David chicáji erãpetarei uje puniri uté i tu Parán.
Abigail chaquĩ́ra David ome jocaningai ome abai nanique
2Jnani déji ore idai Maón nanique ga ataguipise uté. Uté gachidedie áyasai chise 3.000, jé basa ga gachidedie erámoro quedéjna chise 100. Uté jecucha doi oredie ome dachidedie ojode iji ore idai Carmel uté. Ga di gatuaque jeta ore chuju ojode. 3Jnani bajai Caleb ape disi ejo uté, ga i tu Nabal. Mu jnani chérecheré uté ome dojode ayoré ga que chise dojórique ayoré unétique. Jé basa ga uté acoté ga chequé parague ga áyipierẽ́po rĩ. Ga chequé omé uaté.
4-5Uje jecucha David, jorane ore chacája ñane iji erãpe tarétigai, ga David chudute to uje ayoré atai uqué qué chidójnanga dachidedie áyasai to iji ore idai Carmel uté, uje tẽra dachidedie áyasai ojode que. Enga David chiroque darógode uñane aja Nabal uté yui uje ore chejna yijmanáyone, jeta ore chingo David irasitigai aja uté iji ore idai uté. 6Enga ore jno David uruode údi ome uté rĩ ga ore chojningame uté: "Yoquirósõri chósi tome uaque: 'Yijorámi á, ¡yipésupú ga Dupade chatapísaja ua, jé aja bacoté, babode uaque jne jõ! 7Yiraja uje badójnanga bachidedie áyasai udire uje e uacajúyo udire ojode jeta ẽcho. Uje jecucha yisõcóji garáyode udojo uje i tu Carmel, ga yico bachidedie irodisórone udore gatuaque. Mu que yipéco ore ujuréraque gotique ga que yoriago ore irodedie bachidé uñáraque gotique. 8Jeta apota ga angoma barógode udore ore to ome udojo, jeta ore chatatame ua to. Ga a ore chojningárasome ua: 'Jiei ore mu que ore chijocase yocatique gotique.' Mu qué yutai ua ome cucha pibosode jeta asi yu iji, jé aja yijorane ore to. Ga a yacãco babai ome bosongaquérique ome yoque. Yiríngo iji uaque iji uacaninaquéode ga opise disi dacatígo ome yoque jne iji barasade ujade.'"
9David irógode ore chatata udore jnese ome Nabal ga ore pota jetiga Nabal chiroque daruode aja David gaté. Jecute qué ore chirote uté urúrigo yui. 10Mu Nabal chojninga:
–¿Gosi a David uté uje uacojnichome uté Isaí ujnacare? Uje iji dirode udojo ga ore irógode jiei ore uje ore chayome darósorone ga ore cho dedai iji erã́petarégode. David uté gotique a bayágome darósonique to ¡jõ! 11¿Ama ajoso ati yi yirógode ore gajnéone cucha pibose ga yẽrárasa ome uacarósõri uté gotique? Uje que yiraja gosi. Uje que cucha ome yu jeta yiraja uté garãtique punire. Uje yirógode ore dopísi yiroquéode uje ore chuju yachidedie ojode ga ore gajneque yoquiborigode áyasa ãrío jeta ore tagu.–
12David irógode ore chajniapója David gai ga ore chatata Nabal uruode ome David jnese iji uté. 13Ga David chojningame darógode ore jnese:
–Asayo uacõrachade ga yicoi uté ga yoco yoquijocaningame ore jne.–
Enga jé u uje David jorane ore chisa daqueséode ga ore cho dagarubu, jé aja David. 400 iji David jorane ore nóna David aja pocaningai uté. Jé basa 200 ore chácariji ore irengúi jeta ore chirote ore ugúchade iji uté. 14Uje Nabal irógode uñai chudute darósõri uru noñángone udore que, ga jno ga chingome Nabal acoté uje i tu Abigail. Ga chojningame Abigail:
–David irógode ore tṍraji erãpetarei que, ga ore di deduguéjnai David irasitigade údi iji yoquirósõri babai que. Mu que chise David uruode unétique ga tagu dejode ome irógode udore ore. 15Uje yirajagopise jnanione udore ore gu uje iyajmaque yóguiji ore ujade mu que ore chijocase yóguiji dajade ga que ore toriapo yocatique rĩ. 16Jecute uerate uje udore ore chajire yoqui to ga que cuchárique chósi ti iji yoque gotique iji garáijnane udore uje yiroco uacachidedie áyasai iji udore. 17Mu babai adode noñanguipísome udore ore que, ga iyieja David jocaningárique yui ome babai, jogasui uaque jnese. A pota cho dajocaningame yoque. Jecute acué basocáringome David uté jeta aquĩ́ra uté ome ájningai. Ja seca tangári ua jne enga ¡jé ca socárome yoque jne é!–
18Ga jĩraque Abigail chucué David ore posode. Ga pésu arurégode ome ore ga 200 u ipesudode ome ore. Ga chĩreta aquirájna ao gárode ome úvadie otadi. Ga chibore áyasadie uje chejna yijmanai ome David ore. Ga charore guejnane ga chise 40 lítros jnese. Enga pésu tórta gajnúone iji úva cajnorenie ga chise 100 ipesudode. Enga pésapo tórta gajnúone to rĩ iji poridie uñai adie uje i tu hígo ga ipesudedie chise 200 to. Enga chiroque darógode aja dapesudode udore jeta ore chujé aja burica quedéjnane gáyode ga ore jno údi ome David ore. 19Ga uaté chojningame darógode:
–Boyo ga ácayoji yiquei. A jé yijogate uacaquigade jne.– Ga uaté que chingo raja dabai gotique. 20Uje uaté chujé raja dachidi burica quedéjna gai ga chise jõri údi ga doi jnumi tiji oroné uaté gai aja erãpetarei yui, uje pógu rome dabai. Uje uaté chimo David jorane jõcaratácho ga Abigail chayóji ore yui.
21David áyipie déji Nabal uru noñaiso ome re aja dajesúode ga chojninga iji dajei: "Que cucha gotique ome uté uje yujuco gachidedie áyasai, irodisórone ore guio diríca ga yirotágo ore ome cucha dacadode jnese mu. Jogadi urásu ujetiga uté cho yoquicaniratiguéode oré. Mu que posongaquérique déji uté ajéninque ome yoque, enga gusu uté áyipie gajnarénguenie uje déji uté ajei. 22Jecute yurúo udojo iji Dupade iquei ome uté jeta guedé batigai udé jé u dirome ga a ca uté iguiotique jnani chapídapo to dirome rĩ ome yoquijocaningárique. Ujetiga jé ca yejna udore ore dirome ga jé basa ga Dupade chujé yu dirome."
23Uje David qué déji dáyipiedie udire gai ga Abigail di. Uje chimo David ga jĩraque doi jnumi iji dorutábi burica quedéjnape gai ga tecúja ore yui. Imoi tu uje dosóñime David uté. 24Uje uaté chague ga catecã́ri David ga chósi tome:
–Jé dóji ga yabai angoninguite paritigade udore chajni yibai, ga ca ajé yocurasade ore jne. Yangaráni á, ajuéga darai ome yu ga angarami yuru quitígo ome ua jne iji baquei tudé. 25Yijócha bajei údi jeta jé ca ejnáreque yabai Nabal uru dosógode ome ua jne uje uté jé isoca uje jĩraque cho tire ome cuchade. Uje yabai u uté ga que yipógu uje josipíerãque uté ga que chiraja cucha dacatique. Ga jecucha uté isoca udore. Enga que gusu jeta isoca udore ome ua, mu jé ate ome dojode ayoré ore gatuaque. Mu barogué uyu ga que yimo batocaidode jnacare udore ore to diríca gotique, jecute que yisi ome batocaidode udore ore utaidode cucha ome uaque diríca. 26Yangaráni á, yachai ua gu iji de ujeta jé ca Pangarádejnai Dupade juéga ome ua enga jé ca ajnime piyo quedéjnarique. Yudúco bajnomei to uje que basocai u to jeta o bajnutabádu ua ga ajnime bojórique ayoré iyoi ome bajmainie. Uje Pangarádejnai Dupade gajneque gu jeta cho dajnutabádu uyoque ujetiga gajnareque gosi isocárique ome yoque. Jé ũrepise uje a Pangarádejnai Dupade u jne jetiga cho dajuñame yabai uté. ¡Yipésupú ga betesórone jnanío ore jé cho yabai uté ome dajnetígo Pangarádejnai Dupade ujuyaquéo jne jõ! 27Be ga asa yeranone udojo ome ua ga ajuguína bajorane udore ore jnese. 28Enga yijócha bajei údi ujetiga osõre uacarogué uyu jne uje yo yiba yabai angoninguite paritigade to ga acadígui yadode udore jne. Uje yiraja gu ujetiga ga ese báringárique yoqueduguéjna cuchape jne, ga a Pangarádejnai Dupade pésu ua jne enga etoque ua iji báringárique eduguéjna cuchape jne. Uje obiréjna ome uyu gu uje bacuegode u Dupade ajequigode iji yocuniri udé údode ¡ga yipésupú ga jé ca cuchárique chósi ti iji ua iji bajocaningáringo udore jne jõ! 29Ujetiga gosi cho damajo ua jne mu a ca toque jne jetiga pujnuéngai ua uje barotangóri u Pangarádejnai Dupade gu. Mu ome bamajosórone ga ore gajnui tu cucaranépitábidie jne iji baquei. Ga cho jetiga Dupade chichóngara udire iji baquéode bu, bu jne. 30-31Ga yise ua iji de gu ujetiga yaquĩ́ra ua ome bajocaningai uté. Ga a Yocangarádejnai pésu ua jne ga a agúsiji báringárique israélgosode eduguéjna dirome ga a jé ca bojórique ayoré yoquiyórique déji bajmana ujánique dirome. Enga a jé ca bojórique ayoré chojningame ua jne: "Uté chijnime dojode ayoré yoquiyode ica ome dajmainie udire uje cho dajnutabádu re ica." Ujetiga Pangarádejnai Dupade e tẽrája ua ome báringai eduguéjna cuchape dirome ga ajnusina barogué uyu dirome uje yirasé yu ome báringárique eduguéjna yui.–
32David chojninga:
–Pangarádejnai, israélgosode yocangureni Dupa isocade ueradipísome yu. Uje uté u gu uje chiroque ua aja yi iji de uje bachai yóguiji yocarani. 33Enga ueradipise basocade udore to uje bo yiquique ome cutejmane báyuquetotiguéo udore. Uje ua u gu uje baquĩ́ra yu jeta ca yo yujnutabádu yu ome uaque. Jecute que yijnime yujórique ayoré iyórique iji de gajiné. 34Ujetiga jé ca esírase yoque ga a yejnangorase babai, ujode jnani, jnacarode jnese iji diri tudé, enga a jé ca jnanírique deporási uaquedai dirome rĩ. Enga Pangarádejna Uecai, Israélgosode yocangureni Dupa chirajapise uje ũré yu ome yojningane udojo.–
35Ga David chisa uaté gueranone ga chojningame:
–Bo yico. Ajníño to. A jé ca cuchárique chósi ti iji ua jne aja baguíjnai yui. Uje a yiji baru quigode udore jne, ga a ca yujé uaque jne.–
36Uje Abigail chajni aja daguíjnai ga chise dabai, jorane ore mu chimo dabai iji dayaripi gai ga cho eduguéjna cuchábode iji dayaripi cuchábi gai. Ga ore tagu dabose unérone iji uté, ga ore jodé yuque Nabal uté. Jecute Abigail que catecã́ri dabai uté, ga chirote dire uñai yui ome jeta catecã́ri. 37Iji dire uñai ga chise durasé uje Nabal ũrusoringuéone e íjnonguiji ga acoté Abigail chingo dojña quigode aja uté jnese. Uje Nabal chudute David ujnomei uje chujérase ore que, ga chajuque uté aguté ga nóña ga pinoñai chisa. 38Mu Nabal guejnane dire chejna yijmanáyone ome dáringai pinoñai isaque ga jé u uje Pangarádejnai Dupade chequésãre enga jé u uje uté topísi. 39Ga Nabal ujnomei chise David ore to uje uté toi ga David chojninga:
–Picotaque opejã Pangarádejnai uje cho dajnutabádu yu ga cho dajuñame Nabal gu ate gajnaré casodé ome yoque. Mu jé basa ga uté chaquĩ́ra yu ome Nabal diríca ga que yujé Nabal mu uté isijnaringuéone u uje chequésãre.–
Mu David chiroque darógode aja Abigail yui jeta David cho dacoté iji uaté.
40Uje David irógode ore déji Abigail iguíjnai ga ore chojningame uaté:
–David chiroque yógaja bei gu uje pota jeta chóji bari.–
41Ga Abigail chachietáji udore ore uruode ga chichaga dagataidie aja jnumi iji David irógode udore ore iquei. Enga catecã́ri ore ga chojninga:
–Cachi David irogue yu arĩa. Ga yachietai uté iroquéode ome yu. Jeta chiroque yu aja cuchárique ga jĩraque yipésu. Mu ujetiga chiroque yu aja darótique ayoré gajnareque guídade marínga, a jé yuru, uje uté urúo ome yu gu.–
42Ga uaté pésu dagúchade aja ñane ga jno ga nóna David irógode udore ore aja ore ajesui. Ga uaté iróguedie nóna uaté to uje ore chejna yijmanai. Ga ore chujé raja burica quedéjnane jnese aja David ore yui. Uje chise David ore ga jĩraque pusi David jeta chóji gari.
43Uje cáma David chisa Abigail uaté mu e chisa jezreélgotodie uña to bajaque uje i tu Ahinoam. Jecute David cho dacotedie iji udire ore jnese. 44E mu David acoté bajépise, Saúl uro Mical uaté, ga Saúl chisi ome uaté ome galímgosi Lais ujnacari uje i tu Pálti, ujetiga uté chóji gari.
Currently Selected:
1 Samuel 25: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
