1 Samuel 21
21
David chayome Saúl
1Uje David jno ga chicáji ore idai uje i tu Nob. Chicáji gu jeta catecã́ri Dupade iroi Ahimelec uje ipesudode u cuchade iji Dupade iguíjnai ajei. Ga chachai David iji garani mu chajuque aguté uje gusu David, ga chojningame:
–David á, ¿gotique gu a uje gusu ua, uje que ajína barótique?–
2David chojningame Ahimelec:
–Ore eduguéjna cuchábi Saúl chutṍri yu ome datoquei diríca. Mu que pota jetiga yatata yiqui ome uñeque. Jecute que toc jeta yatata cucha dacadode.–
David chojninga:
–Yijína yirógode soldácho que. Mu yaquĩ́ra ore iji ta que.–
3David qué jno daruode údi ome Abimelec enga chojninga:
–Yicai de gu jeta yucué cucha pibotíguiji ua jeta arurétigo déji bari ga asi yu iji uñéngo. Ujeta chejna yijmanai marínga, jé u. Ga asi ome yu, uje que cho cuchárique. Jetiga ca arurétique déji bari marínga, gusu baríjogonónique cucha jeta déji ua ga yirógode ore yajo jne.–
4Mu Dupade iroi Ahimelec uté chajnai David uruode ga chojninga:
–Arurégode déji. Mu jé yẽco udore ome Dupade ga e puyácho.–
Mu Ahimelec chojningápome David rĩ:
–A yisi ome uaque jne mu gusu ome uaque ujetiga jé ca amóñopoi uacacotedie gari to rĩ. Barajapise uje gosi a moji dacoté gari ga que toc jeta chijocase Dupade gajnéone cucha iji iguíjnai ajei, jé aja jeta e churu re ga úringai icha jogadi jé upo rĩ.–
5David chajnai uruode ga chojninga:
–Cachi e iyajmaque uje yicome yocacotedie ica ga icha yoque jnese. Uje yico ica ga que yimongomíji chequéraque gari ica, jétapũré uje iyajmaque yoque ga ichápise yoque.–
6Ga jé u uje Ahimelec uté chisi ome Pangarádejnai Dupade gajnéone arureque puyácho ome David iji uté. Que arureque uñéngo cuse gu jeta chisi ome ore. Quene Ahimelec chijnime arureque ichade uje chibore iji Dupade aseradéjnai gai. Ga jno udore údi aja bajade jogadi iji mésa, ga jé basa chisi ome bajade ome David. 7Uje David qué catecã́ri Ahimelec mu Saúl iroi déji Dupade iguíjna cuchábi ajei to ga tangári ore uru quigode iji uté ajei. Ga purása quedéjna uté uje uniripísi tu Edom nanique. Ga uté i tu Doeg. Saúl gachidode irodisórone ore eduguéjnai tu uté jnese.
8David qué jno daruode údi ome Ahimelec ga chojninga:
–¿Ama, jé cõráchatique déji bari a? Asṍreraque, quesérique uñeque. Uje yedójnaringuéo diríca gu uje ibisoque yógaja yocajesui ome eduguéjna cuchábi Saúl diríca. Jecute que yucué yõráchacho to diríca.–
9Ga Ahimelec chojningame David:
–Bei casica Goliat iquesei déji ti uje bajé ica iji uacajocaninga casica ome filistéogosode iji turéjnai uté uje i tu Éla. Ga déji ti uje yujuse guio iji efod uéchai ga yigaru gai ome yiguidé nañoré. Jeta apota ga ajna uje que cõráchatique uñeque déji yari iji de.–
David chojningame:
–¡Jé ũré uje que quesérique uñeque cho uté, jõ! ¡Be, ga yijna!–
10Mu David jnopo rĩ uje chayome Saúl ga chojningame re: "Yi, ga yipógu yu iji filistéogosode ore ujade jne." Ga jé u uje chijna dagajñua aja filistéogosode ore idai uje i tu Gat. Ga quítequiguíji ore eduguéjna cuchábi uje i tu Aquis. Ga que chatatarása dei ome ore eduguéjnai uté. 11Mu eduguéjnai uté irógode uñane ore chiraja David ga ore chojninga:
–¡Chimo jóroque re uje Saúl iroguipísi David upúsu uté, mu jé chingo raja yoqueduguéjnai! Uté upúsu uje chujé yocasuté Goliat nanique ga urásadie chequei ore chicota uté ome dachachagúgode nanique ga ore chojninga:
"David yugode iji filistéogosode ore chise 10.000. Jé basa yoqueduguéjnai Saúl yugode 1.000 iji ore."–
12David chudute uje filistéogosode ore chiraja ga todópisa filistéogosode ore eduguéjnai Aquis yui iji ore idai Gat uté. 13Enga jé u uje David chécãre dajequigode ga cho ũruso iji re. Ga chibica filistéogosode ore iguíjnane jorídedie aja dajesúode. Ga ajñone cho chirígaja jnumi iji pijnátuaráinie ga chajna abuayé aja jnumi. 14Ga filistéogosode ore chisa David ga ore jno údi aja ore eduguéjnai Aquis iquei. Mu chojningame darógode ore:
–Aráñome ga jno. ¡Uje uacarajáyo úringai ũruso mu qué uacaboyo údi aja yu iji de! 15Que ũrusode erué filistéogosode ore uyoque gotique uje uacajnáñopo jõrai taja de rĩ. Jé uacaríño ore údi iji yiguíjnapisi udé. Boyo údi ga chicáji dajesúriguiji sañeque.–
Currently Selected:
1 Samuel 21: Ayore
Highlight
Copy
Compare
Share
Want to have your highlights saved across all your devices? Sign up or sign in
© 2021 Ethnos360
