1 Reyes 5

Salomón, ujoi eduguéjna cuchábi Hiram ore chisı́ome daru iyiejnane ome ñane nanique

1Enga jé u nanique uje tı́rogosode ore eduguéjnai Hiram chudute Salomón ujnoméone to uje e ore changuñéra aseque puyai gai to ujetiga chácariji dayé charidi ome dáringai israélgosode ore eduguéjna cuchape. Jecute chiroque daroguipı́sode aja Salomón yui jeta ore jno irasitigade údi ome uté, uje Hiram uté jecucha chijnóra eduguéjna casica David nanique gu. 2Ga jé u uje Salomón chiroque daruode aja tı́rogosode ore eduguéjnai Hiram uté to. 3Ga chósi tome daruode ome uté:

–Bamo uje yai casicaite pota jóroga ujetiga chiro guiguı́jnarique ome dangureni Dupade uté, ujetiga Pangarádejnai uté gajneque uté ome dáringárique pisı́gai. Mu que togome nanique uje pocaningane gaisõre uté ga jecucha umajosórone udore ore tṍraji dajñarenie ome dajocaningane ome uté iji dosadode jnese. Enga jé chuságaja pocaningane eruéode uje Pangarádejnai uté quene chimate umajosórone udore aja uté údi. 4Mu e tijode cho jnángome yoque, uje pajesereringai déji yoquirosadode jnese, ga gose Pangarádejnai uté, uje yangureni Dupade u. Ga e ı́jnoque yocumajósonique, ga que cucha dacate gajnarétique chisápo udé rı̃. 5Enga e Salomón uyu yipésu yáyipie ome Pangarádejnai gajnei guiguı́jna uté yui jeta yipésu ome yangureni Dupade uté, ga pisi uté gai iji. Chamáñaje Pangarádejnai uté chı̃́care udore ome yai casicaite David nanique uje chojninga:

–Bajnacari uté uje yicháji bayaripi cuchábi gai ome dáringárique eduguéjna cuchape iji baquigáningo ga a uté gajnepı́di u jne jeta pésu yajegaidi guiguı́jna uté ome yi úringárique pisı́gai.–

6Ga Salomón jnopo daruode údi ome Hiram uté rı̃ uje chojninga:

–Be ga aroque barógode ore aja uacaniri jogosṍri cucarãte uje cucarani uté i tu Lı́bano. Ga a ore chaquesu pórechoquı́die ome yu jne, uje udire i tu cédro. Ga a yirógode uñéngo ore nóna barógode uñéngo to ga ore chaquesu pórechoquı́die to jne aja jnumone. Bamo gu uje que uñeque déji yocujade ujetiga irajatigade jé cho barógode sidóniogose udore ore irajatigade ome pórechoquı́die isocade gotique. Jecute ẽ́care barógode udore itrabajádode oredie udire ome yu, ga a yimate ua ome bajegaidedie udire orei jnese jne.–

7Mu uje quene Hiram chudute Salomón áyipie quigode udore to enga irasiguipise re ome udore. Ga chojninga:

–Pangarádejnai uté jé tiógarapı́sa dáringai pisı́gai iji deréjnai udé, uje chisı́ome David ujnacari ome uje áyipierãque enga jé chácariji dáringai eduguéjna cuchape ome israélgose dipeséjnane udore ore.–

8Enga jé u uje ore eduguéjnai Hiram uté e chirócapo daruode aja Salomón yui to, ga chósi tome daruode to:

–Pujnoméone e chise yu uje barógaja gadoi dirı́ca. Ga e dimane yu jeta yipésu bojningane cucha jnese ome bajegaidedie pórechoquı́ udire uje ore ı́ode u cédro, pı́no ore. 9Enga yirógode iji cucarani Lı́bano uté a ore jno pórechoquı́ paquesudie udire údi aja jnumi yui jé aja yote quedéjnai uté. Ga a yipésu jne jeta padı́ja ñane iji uté, ga a jé u jne ujetiga ore chicháji yote quedéjnai ga ore churugúsaja gai jé aja bojningárique cuco batigárique. Iji bojningai jogadi uté ga yirógode a ore chejñu poridie iji ñane jne, ga barógode a ore jno údi aja bedai uté to. Ga a oré tu jne jeta aroque uacacade cucha uñéngo aja yijogasúode, yurane ore iji yiguı́jna cuchábi iji de. Enga a jé u jne ujetiga amate yáyipie quigode aja jnumi to.–

10Enga jé u uje Hiram uté chisı́ome Salomón ipotigádedie pórechoquı́ udire jnese ome uje poridie udire ı́ode u cédro, pı́no ore. 11Jé basa ga Salomón cho oré iji cucha pibosode uje Hiram jé ipotigádode u gu ujetiga Salomón chiroque cucha pibosode aja to ome jogasúode, urane ore jnese iji iguı́jna cuchábi uté. Ga gueranone chise 4 millón lı́trode, mu nónapo 400 mil lı́trode iji ore acade trı́goi iji siqueré chojmara, chojmaranie jnese. Ga chátapója aceite rı̃ uje ichapise aceite uté, ga lı́trode chise 4.400 iji siqueredie jnese to. Enga Salomón jé isocabeque nanique ome Hiram uté gatuaque.

12Ga Pangarádejnai uté chisı́ome pirajatı́gadatéode ome Salomón uté, uje tocachucho uruode udore gu uje chichagája uté yui nanique. Enga pajesereringai déji Salomón, Hiram ore ome ñane, ga ore chisı́ome daru iyiejnane ome ñane.

Salomón chamáta cuchade aja ñane ome Dupade iguı́jna cuchábi úringárique poraque yui

13Eduguéjna Cuchábi Salomón uté chijnime jnanione, jnacarode udore uñéngo iji israélgosode ore ujade, ujade jeta chiroque ore aja daroquéode úringane pipesucho, ga udore ore batigai chise 30.000 nanique. 14Enga Salomón chiroque ore aja puniri Lı́bano uté ome daroquéode, mu pésu uague gadióguedie iji ore, ga jé u uje ore chijnire ñane aja doi. Ga ore batigai chise 10.000 gatuaque ga ore chuságaja guedosi chojmarai eruei. Mu uje chise ore gajnei guedosi eruei, ga jé u uje ore chécãre re, ga ejode 10.000 udore ore chácariji ore charidi. Ga jé ore jmapié uaté, uje ore chácariji daguı́jnane iji guedosi gárode údode, mu uje e chise ore gajnepı́di iji guedosi gadióguei uaté, ga ore jnome datrabajádi uté, uje ore doi Salomón iroquéode bisideque. Ga Salomón iróquegatéi u Adoniram uje chajire udore ore yúode gatuaque. 15Enga Salomón irógode uñane ore chijócha cucaranenie uñanie gai iji jnumi iji cucarãte orónenie udire ujade, ga irógode udore ore batigai chise 80.000 nanique. Jé basa ga irógode uñane isai tu jeta ore chijnoque cucaranenie aja quedéjnane to ga cuchade jnungórone udore ore chise 70.000 to nanique.

16Mu que gusu udore, mu Salomón iróquegatéode cuse to uje ore chidójnangapı́sa cucha pisagode udore, ga ore gajnepı́di tu ujetiga ore chiroque Salomón irógode udore to, ga chajire ore yúode. Ga udore batigai u 3.300. 17Uje eduguéjna cuchábi chiroque ore aja enga jé u uje ore chijnime cucarané querújnapisedie, uje orerẽ́pisei udire, ga ore chujé eruéode to jeta tiroguipise eruéode jnese. Uje Pangarádejnai iguı́jnai uté irı́bidóde gajneque cucaranenie udire. 18Ga Salomón irógode udore ore, jé aja Hiram irógode udore ore cháta raja ñane ome dasai uté, jé aja gebálgosode udore ore. Ga ore pésu pórechoquı́ yorı́codie, cucaranenie udire jeta dimane ome Pangarádejnai uté iguı́jna cuchábi yui.

Currently Selected:

1 Reyes 5: Ayore

Highlight

Copy

Compare