1 Coríntios 10

Páblo cho ore quique ome ore icatecãrainone ayoré gajnúo

1Yujode Dupade anguresõre uaque á, yipota ujetiga arajáyo uje Dupade isocade jé chojmára ome yocayode jnani bajade ore jnese nanique. Uje chicha gue abuja taja gaté nanique enga ore chajna jnese iji erãpe eyutiguei. Uje Dupade chajuque yodi iji yote quedéjnai uje i tu Yote Quedéjna Caratai enga nóña enga dajere cajnore iji yote quedéjnai tuté gatócoro. Enga jé u uje ore chiramísara jnese. 2Uje yocayode jnani bajácho ore chajna Moisés nanique uje gue abuja chicáji ore iquéode enga imoi tu uje ore cho dangaráni iji Moisés jnese. Jé u to uje ore chiramísara yote quedéjnai to nanique. 3Uje Dupade chiroque cucha pibosode aja ore uje tṍraji gaté enga ore tagu jnese. 4Ore chóji yodi to jnese uje tṍraji cucarané cuchabé ome ore. Mu cucarané tuaté gajnui tu Crísto. Enga Crísto upúsu to uje nóna ore aja ore ajesúode erámio nanique enga cho ujetiga yote unéri tṍraji uté to ome ore enga ore agutíñamáite uté jnese nanique. 5Udore ore chimo Dupade ate ueradode udore ome raque, mu uásejnapise ore uje ore chajo raja date gajnaréngone. Jecute Dupade que chise udore ore unétique enga noñome ore iji ti ujetiga ore toi iji erãpe eyutiguei tuté.

6Cucha dacadode udore jnese cho ejémplo ome uyoque, ga chacate yoque ujetiga jé ca yiraco udore ore aja ore isoca gajnaréngone udore to. Enga jé ca yipótago cucha gajnaréngone to. 7Yirajágo uje yocayode jnani bajácho uñane ore catecã́ri ayoré gajnúone to nanique. Mu jé ca aracho udore ore aja ayoré gajnúone úringane picatecãraicho to. Ore urusarane Dupade urúo déji to uje chojninga: "Jnani bajade udore ore pésu dajñamítedatéi nanique uje ore tagu dabose unérone iji. Quigade enga ore doi baile tiji dapesudi cabáyu ucatoque ejode." 8Yirajágo to uje yocayode jnani bajácho uñane que ore moji jnutígome chequé unejánguenie ore nanique. Jecute Dupade cho dajuñame ore. Enga togode iji ore chise 23 mil nanique iji dire chojmarai. Jecute ajusópise uaqueo ome chequé quedéjnanie, jeoga jnani quedéjnane ore. Enga ca amóñoji ore gari. 9Yirajágo uje yocayode jnani bajade ore pésu Dupade ejóporinguéone to nanique enga Dupade cho dajuñame udore ore enga chiroque ugade aja ore nanique. Enga uásejna ugade equesarane iji udore ore nanique. Jecute beyoi enga yujucópise yocadode guio ome Dupade enga jé ca yipéco ejóporinguéringo to. 10Yirajágo to uje yocayode jnani bajácho uñane ore cho chere, chere ome Dupade to nanique uje ore chetaque adode. Jecute Dupade chiroque daroque gaté unirísõre dequejnangóri aja ore ujetiga chujé ore. Enga uásejna togode. Jecute ajuso uaqueo to enga ca oyo chere, chere ome Dupade to.

11Yirajágo uje Dupade chiroque daruode urusãrasórone nanique ujetiga ore churúsãre yocayode jnani bajácho udore ore adode aja quigode. Gaidi tu gu ujetiga disi ejode uyoque uje yugúcoji erámi eruei yúode yajico enga ca yiraco ore aja ore ate gajnaréngone to. 12Ísenga uacuñéngo uacajoso ati etoguipise uaque iji Dupade adode. Mu yósi tome uaque: ajusópise uaqueo ujetiga ca abasója pisijnaringuéone ajñonie to. 13Uacajnéone petingaquéo que gusu ome uaque go, mu petingaqué ponáyone déji ome erámi unirisórone uyoque jnese. Mu ũrepise Dupade ome daruode uje a ca chõre uacajnéone petingaquéo rĩ ome uaque ujetiga ca atiócho. Ujetiga petingaquérique e chise uaque mu a jĩraque Dupade chisi ome petotiguei ome uaque ujetiga adotáyo uaque ome udore. Enga a chingo uacasocárique ome uaque jne ujetiga eso petingaquei tuté uéchai.

14Yósi te ome yujode Dupade anguresóño uaque uje yijnóra uaque gu: jé ca acásoi uágome ayoré gajnúone úringáringo picatecãraicho to. 15Yiraja uje áyipierãque uaque enga e uacarajáyo cucha uréone, cucha tágode ore iji ñane. Jecute ajicho yacajnaquéode aja quigode to ujetiga jé ũré yu. 16Uje yójigo Jesús iyoi gajnui cucha otate enga yacãco Dupade gai ome Jesús átegoningáne ome yoque. Enga Dupade anguresórone uyoque yocáyipiedie chojmára iji jnumi jnese uje yujnusinángo Jesucrísto itoringai uje uté chojne ome dayoi ome yoque nanique. Jé basa uje yajujo arurei enga yajo, enga yocáyipiedie déji Jesucrísto aoi to jnese uje chejnáreque re ome yoque to nanique. 17Uje jiei Dupade anguresórone yoque marínga, gusu arurei chojmára uje yajo uje yujnusinángo Jesús itoringai. Enga gajnui tu ujetiga Crísto anguresórone uyoque jé yitojmárango iji jnumi jnese to.

18Yingo judíode isocade aja uaque to: udore ore jnese uje ore tagu peranone cucha ome Dupade, enga obiréjna uje ore áyipiedie chojmára iji jnumi to ujetiga pẽrate cuchade ome Dupade iji Dupade gajnei gaserãte gai. 19Ca ajoso ati yo ujopíeránguiji ayoré gajnúrique. Yiraja gu uje cucha bisidécho, enga ujetiga pẽrate cuchisórique ome ayoré gajnúrique mu cachi cuchisoi tuté arágajñua tuaté cucha bisidegue enga jé chopise cucha arágajñunie jnese. 20Mu yiraja to uje cho ujetiga Dupade anguresórojmane ore tẽra cuchisode ome ayoré gajnúone, mu ore gueranone udore gajnesõripísode u Satanás utocaidode. Enga que Dupade gajnenguipíso ore gueranone udore to go. Jecute yaquĩ́ra uágome cucha pibosode udore uje pẽrate ome ayoré gajnúone uje que yipotapísa ujetiga ajocáso Satanás utocaitígo gajnetígo cucha to. 21Gajnareque ujetiga ójiyo Yocangarádejnai iyoi gajnui cucha otate, mu uacaboyópo rĩ enga uacátayopo uágaja Satanás utocaidode gaisórone rĩ uje ore chóji dacatecãrainone ayoré gajnúo gajnéone cucha. Que pujuegate gu ome yoque ujetiga yajo iji Yocangarádejnai atigabié mésa, mu yajópo iji Satanás utocaidode atigabié mésa to. 22¿Ma arei tu ome uaque a ujetiga yipéco Yocangarádejnai ejóporinguéringo enga chajire yoc ome ayoré gajnúone a? Que arei tu gotique arĩ́e. ¿Ma yoquetotiguéode sué Yocangarádejnai etotiguei gai ome uaque a? Uacarajáyo uje que ũré udore gotique.

Cucha arei tu ujetiga yujuco yocujode Dupade anguresórone ore guio

23Jé ũré ore uje ore chojninga: "Pujuegate cuchade jnese ome yoque ujetiga yipéco." Mu jé ũré to uje que cucha dacatique tṍraji pipesutígo jnese go. Enga que cuchade jnese pésu ujetiga gosi quérã iji Dupade adode. 24Que yocajnei tu ujetiga yajico yoquíode gatuaque, mu arei tu ujetiga yajicópise yocujode ayoréo ore yúode.

25Apúsoja cucha arágajñunie aja ujetiga beyoi oredie ome iji ore gueranone cucha batigade. Mu jé ca acatecãchoi ore ome ujetiga ore catecãrainone ayoré gajnúo gajnei. Socaseti arajáyo uje ore catecãrainone ayoré gajnúo gajnei enga uacagutedie cho jora ome jne. 26Mu yirajágo uje Yocangarádejnai gajneque erámi, jé aja cucha ponáyone jnese uje déji erámi tuné.

27Jé cho to ujetiga Dupade anguresórojmárique dejéna uacuñeque aja daguíjnarique ujetiga agu posode to enga apota ajína enga jé arec ujetiga ajína. Mu arei tu ujetiga ca achase uté posode, enga ca acatecãrápoi rĩ ome posode gãratique ujetiga ca baguté cho jora ome. 28Mu ujetiga gosi chojningame ua: "Ayoré gajnúone gajnei yoquibotedie unaji." Enga jé ca agu to. Báyipie déji bacatecãraisṍri uté gu ujetiga chimo uje ũrepise ua ome banguretigai iji Dupade. Jé upo rĩ ujetiga uté agutéraque ca cho jora ome udore to rĩ. 29Que yojningai tu baguté joráraque mu yojningai tu bacatecãraisṍri uté aguté joráraque, ujetiga ca aguté cho jora ome ujetiga unejátique tagu dacatecãrainone ayoré gajnúo gajnéone cucha.

Mu ísenga uacuñeque pota catecã́ri yu ome yuruode udore enga chojningárasa: "Chiese pujuegate cuchade jnese ome yu, mu ¿gotique gu a uje a ca yagu cuchárique ujetiga yijõrárique aguté cho jora ome? 30Ujetiga yacãre Dupade gai bajaque ome yibotique, ¿ma ca gajnareque a ujetiga uñeque doi enga cho yiyoguei iji uje yagu yibosode udore?" 31Ujetiga agu cuchárique, jeoga óji bajótique, jeoga apésu cucha uñeque, mu acha báyipie aja Dupade uje qué bagúsiji bapesudi tuté gai. Uje bagaidi tu gu ujetiga ca pujñiete Dupade ome uñeque gu basocárique, mu bacuei turásu ujetiga picotaque Dupade gatuaque ome bapesudode jnese. 32Jecute ajusípise badode guio ujetiga ca judírique, jeoga purása quedéjnarique, jeoga bojórique Dupade anguresónique ca chise batígo iyoguérigo, enga ore doi enga ore cho caru ome Dupade adode. 33Uyu ga yigaidi tu ujetiga yujode ayoréo ore nína raque jnese ome yatígo jnese. Enga yo yidobóya yipotigádode cucha, mu yáyipie jecucha déji yujode ayoréo ujetiga ore chise dáringáringo piquetacho to ome Dupade.

Currently Selected:

1 Coríntios 10: Ayore

Highlight

Copy

Compare