Nsengo sa Vanandeje 27

UPawulo itwalwa ku lijumbi lya Luumi

1Baheene uFesito wálamula kiija tishuule#27:1 Tishuule: Apa, uLuuka umuyandikhaaji uwa litaafili ili, akhandi lumo nu Pawulo. kwa shipugo ishikhome kiluta mu lijumbi lya Luumi mu nyi ya Italiya. UPawulo na vadindilwa avanji vatwalwa kwa muyimililaaji yumonga wa vasulukhali, ilitaawa lyakwe wátambulwagwa Yuliyo. Uyu muyimililaaji wa shipuga sha vasulukhali va Kayisaali uAgusito, umutwa wa Valuumi. 2Baheene tayangala mu shipugo ishikhome shimonga shina shihumile ku lijumbi lya Adulamatiyo. Tikhandi tiiluta ku malowokho ga fipugo, ku mwani ya Asiya. Pina tiwuukha apo, tikhandi lumo nu Alisitaliko, umukhaaya wa lijumbi lya Tesalonike mu nyi ya Makedoniya.

3Kwaganile kiisha, taafikha ku lilowokho ilya lijumbi lya Sidoni. Apo uYuliyo wámugahila wunofu uPawulo, wámutawula kiija alute atangaane na vamanyi vaakwe, kiija vamutanjilise ifiinu fina ashepushiilwe. 4Pina tiwuukha, ilipepo ilikhome lyatusivila kiluta kumwandi. Baheene taashila kunena ya shigunguli sha Kipulo, kuna kusikhandi ni lipepo likhome. 5Talowokha ibahali iyo kishilila ulubali lwa nyi ya Kilikiya ni ya Pamufiliya, taafikha mu lijumbi lya Mila mu nyi ya Likiya. 6Apo, umuyimililaaji wa vasulukhali yula, wáshaaga ishipugo ishikhome shina shihumile ku lijumbi lya Alekisandiliya shiiluta ku nyi ya Italiya, tayangala woona mu shipugo isho.

7Tashuula lushe lushe kwa nsiku nyinshi, khanji kwa kilava mandu mbakha taafikha nkholeela ni lijumbi lya Nido. Apo ilipepo lyope lyatusivila kigolokha kuna tikhandi tisakula kiluta, baheene taashila uluvala lwa kunena lwa shigunguli sha Kileete, nkholeela ni nyi inyuumu yina yihulwite mu bahali yatambulwagwa Salumooni. Inyi iyo yikhandi ndoodo yipiliimwe ni bahali. 8Taaluta, taashila mulubali lwa bahali kwa kilava mandu, taafikha pina pitambulwa Lilowokho Linofu, nkholeela ni lijumbi lya Laseya.

9Luhaavi lutali lukhandi lushilile tipishuula, mbakha ishiwungo sha kilekha kiilya#27:9 Ishiwungo sha kilekha kiilya: Ishiwungo ishi shikhandi sha lijuva lya kivalingaania nu Nguluvi. AVayahuudi vakhandi viilekha kiilya, umutambule umukhome akhandi iihumya ishadanda isha kigubikha uwunansi waanave. Yimba mu litaafili lya Njowo sa Valaawi 23:26-32; Luvaso 29:7-11. Uluhaavi ulo ilipepo lihonsaaga amavingu makhome mu bahali na kihonsa uwulugu kishuula kwa shipugo ishikhome. shaafikha. Khanji, kukhandi kuvi mandu kiyitenekha kishuula mu bahali, lulwene uPawulo wávapavila avayine wáaja, 10“Omwe vagoosi, niiwona kiija ulushuulo lwesu ulu lusinanje ifiinu finshi, ndeeno tisiyambulile, ifiinu hambi finyamanjikha mandu. Ishipugo ishi lumo na masigo goona, gakwiliile kiyaga mu bahali. Khanji na yuuse woona, tikwiliile kiifwa.”

11Umuyimililaaji wa vasulukhali yula asamupuliisa uPawulo kwa ago gina wálogola, leelo wáyiitikha amaswi ga yuna akhandi ijensa ishipugo, nu munya shipugo shila. 12Ililowokho ilyo, lisikhandi linofu kikhala uluhaavi ulwa lipepo likhome mu bahali, lulwene avaanu vinshi mu shipugo shila tikhapulinkheene kiija tiwuushe pala. Awo vahuvililaga kifikha ku lilowokho ilinji ilya Kileete lina likhandi litambulwa Foyinike. Apo baheene ndi vasigalaga uluhaavi ulo ulwa lipepo ilikhome. Ililowokho ilyo likhandi liloleelile paakhati ya nyagamo iya kusikha na kunyiikho ya kusikha.

Ishimfulumbwe mu bahali

13Kuunyuma, ilipepo lina livateeme lyayansa kikutukha lushe lushe, kihuma ulubali lwa kunyagamo. Avasenga nsengo va shipugo shila vahiiva kiija ilipepo ilyo, lisitutanje tiyiteneshe kishuula. Baheene vayangasa ishiinu ishifuno isha kiyiimya ishipugo,#27:13 Ishiinu ishifuno isha kiyiimya ishipugo: Kwa Shiswahili shitambulwa, nanga. tawuukha pala, taaluta taashila mulubali lwa shigunguli sha Kileete. 14Uluhaavi ludoodo taagana kiwuukha pala, kwava kuna shimfulumbwe. Taaluta, taashila ku shigunguli sha Kileete, shina shikhandi shitambulwa “Lipepo lya Nyiikho Kunena.” 15Ishimfulumbwe isho shashitova ishipugo mbakha shapootwa kiluta kumwandi, baheene tashilekha shitutwale kuna ishimfulumbwe shiiluta. Kiiva talavaga nasho ishimfulumbwe, shatumena, tashilekha shitutwale paakhati naakhati ya bahali.

16Taashila ulubali lwa kunyagamo ya shigunguli ishidoodo shina shitambulwa Kawuda, ulubali luna lukhandi lukitusivila padoodo ni shimfulumbwe shila. Tashiyangasa na kishipinya kwa kilava mandu ishipugo ishinangʼana isha kikulusisa avaanu, shina shikhandi mu malenga. 17Taganaga kishikwehela ishipugo ishidoodo pashaanya, avasenga nsengo vashipinya kihuma pansi kwa ngalawo ishipugo ishikhome, kiija shisikhadenyekhaga. Vakhandi vitiila kitwalwa na kitenga mu luhankha lwa Siliti ku mwani ya Libiya. Baheene vayiisa ishiinu ishifuno isha kitanjilisa ishipugo shijendaje lushe lushe, vashilekha shibunshilisiwe kwa lipepo ilyo. 18Ilijuva lya wuvili avasenga nsengo vayansa kitaaga amasigo mu bahali kwa kiiva ishimfulumbwe shashitovaga mandu ishipugo shila. 19Ilijuva lya wutatu, vafitaaga ifiinu ifinji ifya kijensesa ishipugo mu bahali, kwa mawokho gaanave vaveene. 20Sashilaga nsiku nyinshi, ilijuva ni nondwe sisiwonekha, ishimfulumbwe shikhandi shipikutukha, mbakha tahiiva kiija tisikulukha.

21Avagoosi vala, vaganile kimala nsiku nyinshi vasiliile shoshoona, uPawulo wáyiima paakhati naakhati yaanave, wávajovela wáaja, “Vagoosi omwe, uluhaavi lula pina nikhavapaviile ku Kileete kiija tisikhawuukhaga pala, leelo musikhanipuliishe. Nda mwali munipulisaaje, ifiinu fyenyu ndi fisananjikha na kiyaga ngaja ndeeni. 22Lino nikivalomba kiija, mujimfyaje inumbula, kiiva kusiina umunyaayumo weenyu yuna asiifwe, leelo ishipugo ishi sheene duguli shisinanjishe. 23Nilimeenye ilyo, kwa kiiva one nili wa Nguluvi, khanji yumwene nikimusenjela. Ishilo sha minsiyaano, wámufilikha umalayikha waakwe kunyangu. 24Umalayikha uyo wánijovela wáaja, ‘Pawulo, usikhatiilaga! Wisakulwa kiluta kiyiima pa Kayisaali, umutwa wa Valuumi. Khanji umanyaje wunofu kiija, uNguluvi asivakuluse kwa lusungu lwakwe woona ava vina vishuula lumo noowe.’ 25Lino vagoosi omwe, mujimfyaje inumbula, kiiva nikimuhuviilila uNguluvi kiija, gasisenjeshe ngaja shina najovelwagwa. 26Leelo, tisakulwa kitaagwa ku nyi inyuumu iya shigunguli shimonga.”

UPawulo na vayine woona viifikha ku nyi inyuumu

27Taamala majuva ishumi na gana tishaanali tibunshilisiwa ni lipepo ilikhome ilyo, lina likhandi likutukha kuno na ukho mu bahali ya Adiliya. Kwaganile kiiva shilo paakhati, ilijuva ilyo lya ishumi na gana, avasenga nsengo va shipugo ishikhome, vahiivaga kiija vasiive vavejeela kifikha ku nyi inyuumu. 28Baheene vayiisa ishijelo mu malenga, vaawona kifikha pansi kuna miita mashumi gatatu ni fungati. Vaganile kihejeela pamwandi padoodo, vayiisa khanji ishijelo shila mu malenga, vaawona kifikha pansi kuna miita mashumi gavili ni fungati. 29Vatiila kiija ishipugo shingabamila mu mangʼanga amakhome, vafiyiisa ifyuma ififuno fina (4) ifya kiyimisisa ishipugo mu malenga, fina fikhandi kunyuma ya shipugo ishikhome. Vaava vifuunya kiija kushe nyangu.

30Avasenga nsengo va shipugo isho ishikhome, visakulaga kitula kwa shipugo ishinangʼana isha kikulusisa avaanu. Ndeeno vayiisa ishipugo ishinangʼana mu malenga, vayigaha ngaja visakula kiyiisa ifyuma ififuno ifya kiyimisisa ishipugo ulubali lwa pamwandi ya shipugo ishikhome. 31Leelo uPawulo wámujovela umuyimililaaji wa vasulukhali, lumo na vasulukhali vaakwe, wáaja, “Avasenga nsengo ava, nda vasisigala lumo noose mu shipugo ishi, omwe musikulukha.” 32Baheene avasulukhali vala vadumula ulugalawo luna lupinyile ishipugo ishinangʼana, vashilekha shijensewe ni bahali.

33Pina kwali nkholeela kiisha, uPawulo wávalomba avayine woona kiija valye ishakiilya, wáaja, “Iminsiyaano mwamala majuva ishumi na gana mupitungumeele, khanji musiliile shoshoona. 34Lino, nikivalomba mulye, baheene muve wuumi. Kusiina umunyaayumo mu omwe, yuna asiluyase hata uluyele lumo mu mutwe gwakwe.”

35UPawulo wáganile kimala kilogola ndeeno, wátoola umukhaate, wáfuunya kwa Nguluvi pa vaanu woona vala, wámenyulania, wáyansa kiilya. 36Baheene woona vayikhangasa, woope vaalya. 37Ose toona vina tikhandi ku shipugo ishikhome shila, tikhandi vaanu magana gavili na mashumi fungati na mutanda (276). 38Awo woona, vaganile kiilya na kiyikuta, vataaga imbumbulu mu bahali, baheene ishipugo isho shipeefushe.

39Kwaganile kiisha, avasenga nsengo va shipugo shila vayaaga inyi, leelo vasikhayimeenye kiija yikhandi nyi nshi. Khanji valwaga uluvala luna amalenga ga bahali giyinjila mu nyi yina yikhandi nu luhankha. Vahiiva kiija nda yikwiliile, vashitwale ishipugo ukho. 40Baheene vadumula ingalawo sina sikhandi sipinyile ifyuma ififuno ifya kiyimisisa ishipugo, baheene fyatwina mu malenga. Vahudula nasi ngalawo sina sikhandi sipinyile ishilongoseso isha kilongosesa ishipugo, baheene vagutansa umwenda#27:40 Umwenda: Kwa Shiswahili gutambulwa, tanga. Umwenda guna gutanjilisa kishibunshilisa ishipugo pina ilipepo likutukha. kumwandi ya shipugo isha kijendesesa, kiija ilipepo libunshilise ishipugo isho ku nyi inyuumu. 41Leelo ishipugo shila, shaganile kivejeela padoodo pamwandi pa shipugo shila, shayinjila kwa ngufu mu luhankha luna lukhandi mu malenga, shasagama umo. Uluvala ulwa kunyuma ulwa shipugo shila, lukhandi lwitowa na mavingu amakhome, baheene shayansa kideenyekha.

42Baheene avasulukhali vahiiva kiija vavabude avadindilwa woona, kiija pasikhaveesaga hata umunyaayumo yuna angatula kwa kiyojeela. 43Leelo umuyimililaaji waanave asikhadobweshe kiija vamubude uPawulo, wávakhaana. Baheene wálajisa wáaja woona vina vameenye kiyojeela vatale kiyitoosa mu malenga, baheene valowoshe ku nyi inyuumu. 44Vina vasimeenye kiyojeela vatoole imbawo, awu ifipande fya shipugo fivatanje kiyojeela. Shiisho ndeeno ose woona talowokha, taafikha ku nyi inyuumu, tipili wuumi.

Currently Selected:

Nsengo sa Vanandeje 27: Shisangu

Highlight

Copy

Compare