Nsengo sa Vanandeje 12

UPetulo idindulilwa mu shifungo

1Mu nsiku iso, umutwa uHelode uAgilipa#12:1 UHelode uAgilipa: Yimba iliswi Helode mu Maswi aMahensa. wáyansiise kivakhata avaanu vamonga mu shipuga sha vahuvililaaji ukho ku Yelusalemu kiija avalafye. 2Wálajisa kiija, vamubude kwa panga uYaakobo#12:2 UYaakobo: Uyu akhandi mwana va Sebedayo, na akhandi munyaayumo mu vamanyisiwa ishumi na vavili ava Yeesu. umaame wa Yohana. 3Wáganile kigaaga ago gavashendeefya aVayahuudi, wálajisa vamukhate nayu Petulo. Sikhandi nsiku sa shiwungo sha makhaate gina gasiponyisiiwe ishiwumulilo.#12:3 Shiwungo sha makhaate gina gasiponyisiiwe ishiwumulilo: Yimba iliswi ili mu Maswi aMahensa. 4Vaganile kimukhata uPetulo, uHelode wámudindila mu shifungo. Wámutwala mu fipuga fina (4), ifya vasulukhali vina vakhandi vana (4) vana (4) kiija, vamuyangalile wunofu. Wáhiiva kiija, pina hambi shaashila ishiwungo sha Pasaakha,#12:4 Pasaakha: Yimba iliswi ili mu Maswi aMahensa. baheene amuhije uPetulo pa vaanu. 5Mu nsiku iso sina uPetulo wádindilwagwa mu shifungo, ishipuga sha vahuvililaaji vakhandi vikiyihumya mandu kimufuunyila uPetulo kwa Nguluvi.

6Paashilo, ilisiku lina uHelode akhandi apanjile kimuhiga uPetulo, uPetulo wágonile mu shifungo. Akhandi paakhati naakhati ya vasulukhali vavili, vamupinyilisaaga mu mawokho gaanave na manyololo gavili. Pa mulyango gwa shifungo vakhandi vakwali avasulukhali avanji vina vakhandi viyangalila.

7Baaho wáyinsa umalayikha wa Mutwa uNguluvi, wáyiima pina akhandi uPetulo, uwuvalafu wangʼalikha mu shumba shila isha shifungo. Umalayikha wámudegensa uPetulo mu luvafu ikimulamusa, wámujovela wáaja, “Lamukha nyangu!” Amanyololo gina vamupinyaga uPetulo mu mawokho, gaagwa pansi! 8Umalayikha uyo wámujovela wáaja, “Yipinya ulukhova lwakho, ufwale indaatu.” UPetulo pina wáganile kimala kigaha ndeeno, umalayikha wámujovela wáaja, “Fwala ilikhooti lyakho, unifwate!” 9Baheene uPetulo wámufwata umalayikha, vaaluta kunja ya shumba. Asikhamanyile kiija, ago gina umalayikha wágagahaga gakhandi ga shiyooli, akhandi ihiiva kiija, aga mahilu. 10UPetulo nu malayikha uyo vaashila kwa vayangalilaaji va wutasi, na va wuvili, vaafikha ku mulyango gwa shuuma kipoola mu shifungo, kiluta mu lijumbi. Umulyango ugo gwadindukha gwene duguli, vapoola kunja. Pina viishila mu nsila yimonga, baaho umalayikha uyo wámulekha uPetulo.

11Baheene uPetulo wáamanya gina gasenjekha, wáaja, “Lino naamanya shiyooli kiija, uMutwa uNguluvi wánileetela umalayikha waakwe kiija, anikuluse mu mawokho ga Helode, na mu mavi goona gina aVayahuudi vahuvililaga kiija, asinigahile.”

12Wáganile kimanya ago, wáaluta ku nanda ya Maliya, umaayi wa Yohana. UYohana uyo, ilitaawa ilinji akhandi itambulwa Maluko. Mu nanda iyo, vakungaanile avaanu vinshi vina vakhandi vikimufuunya uNguluvi. 13UPetulo akhandi ihoodesa ihoodi pa mulyango gwa lukeeke lwa nanda iyo. Umuhinja yumonga umuvanda, ilitaawa lyakwe wátambulwagwa Looda, wáaluta pa mulyango kipuliisa kiija yu naani. 14Wáganile kipulikha kiija, shawuti ya Petulo, wáshendeeva mandu, wásaamwa kimudindulila, wásijila mukhati ya nanda. Wávajovela avayine wáaja, “UPetulo ayiimile pa mulyango!”

15Avayine vamujovela vaaja, “Una lukwale!” Leelo umuhinja yula wáashisa kilogola kiija, wápulikha ishawuti ya Petulo. Baheene vamujovela vaaja, “Uyo yu malayikha waakwe.” 16Uluhaavi ulo uPetulo akhandi apikiyitenekha kihoodesa pa mulyango. Vaganile kidindula umulyango, vamwaga, vatinukha. 17UPetulo wányenyula iliwokho kiija vasisime tototo, wávajovela shina wáhumisiwa nu Mutwa uNguluvi mu shifungo. Wávajovela wáaja, “Aga gina gasenjekha, mumujovelaje uYaakobo#12:17 UYaakobo: Uyu akhandi munangʼana wa Yeesu, khanji akhandi muyimililaaji wa shipuga sha vahuvililaaji ava ku Yelusalemu. na vahuvililaaji va Yeesu avanji.” UPetulo wáwuukha pala, wáaluta uluvala ulunji.

18Kwaganile kiisha, avasulukhali vala vaava vatungumeele mandu, kwa kiiva vasikhameenye gina gamupataga uPetulo. 19UHelode wálajisa avasulukhali kiija, vamusakule mandu uPetulo. Leelo vaganile kigombola kimupata, wávaposa vala vina vakhandi vikimuyangalila, vapootwa ilya kimugomosesa. Baheene wálajisa kiija, vavabude. Kuunyuma uHelode wáwuukha ku nyi ya Yudeya, wáaluta ku Kayisaliya, wáakhala kwa luhaavi.

Umutwa uHelode iifwa

20Lino umutwa uHelode wávakhalalilaga mandu avaanu va lijumbi lya Tiilo ni Sidoni. Avaanu va majumbi ago, vaava shipuga shimo, vavafilikha avaanu kiija vatangaane nu Helode. Vamuhonsa uBulasito, yuna akhandi ikiyiyangalila inanda ya mutwa, wáava ulubali lwanave, valomba ilisiku lya kimwaga umutwa. Vakhandi vagulumiile kilomba uwulindamafu, kwa kiiva vahuviliile kiija, vaveesaje viipata ifyakiilya mu nyi ya mutwa.

21Lyaganile kifikha ilisiku lina umutwa uHelode wáhagulaga vatangaane, wáfwala amenda gaakwe aga shitwa. Wáakhala mu shitengo shaakwe isha kihijila, wáyansa kivajovela avaanu vina vakhandi vakungaanile apo. 22Baheene avaanu vala vayansa kilyova ilyowo kwa wushendeefu vaaja, “Iyi yisili shawuti ya muunu! Iyi shawuti ya nguluvi weesu!” 23Vaganile kimusufya uHelode ndeeno, vasikhamutupiishe uNguluvi. Baaho hela umalayikha wa Mutwa uNguluvi wámutova nu wutamu uwa kiliiwa na mayokha ga mu wutumbu, wáafwa.

24Iliswi lya Nguluvi lyayitenekha kiyalaalila na vahuvililaaji vakhandi viyonjelela mandu. 25UBalinaaba nu Sawuli vaganile kimala insengo yaanave,#12:25 Yimba mu litaafili lya Nsengo sa Vanandeje 11:30. vawuukha ku Yelusalemu lumo nu Yohana yuna akhandi itambulwa Maluko, vaaluta ku lijumbi lya Antiyokiya.

Currently Selected:

Nsengo sa Vanandeje 12: Shisangu

Highlight

Copy

Compare