KUMAHEBHERE 1
1
UKristu uNyana kaThixo uphakamile kunezithunywa zezulu
1UThixo wayethethile nje kudala ngeendawo ezininzi, nangeendlela ezininzi, koobawo ngabo abaprofeti, uthethe ngale mihla yokugqibela kuthi ngoNyana; 2awammisayo wayindlalifa yeento zonke, awathi kwangaye wayenza indalo yonke; 3othe, elubengezelo lobuqaqawuli bakhe, nombhalo wenkqu yakhe, ezithwele nokuzithwala zonke izinto ngalo ilizwi lamandla akhe, wesuka, akuba eyenzile ngokwakhe intlambululo yokusihlambulula ezonweni, wahlala phantsi ngasekunene kobuKhulu, enyangweni; 4ethe waba ngonamandla ngaphezu kwezithunywa zezulu, ngangoko azuze ilifa legama eligqithiseleyo kunelazo.
5Kuba sisiphi na isithunywa, awakha wathi kuso,
ÙnguNyana wam wena,
Mna ndikuzele namhla?
(INdum. 2:7)
Nokuthi,
Mna ndiya kuba nguYise wakhe,
Yena abe nguNyana wam?
(USam. II 7:14)
6Nangexa athi amngenise owamazibulo kwelimiweyo, uthi, Maziqubude kuye zonke izithunywa zikaThixo. 7Okunene ngazo izithunywa zezulu uthi,
Ulozenza izithunywa zakhe oomoya,
Nababusi bakhe ilangatye lomlilo;
(INdum. 104:4)
8kodwa ngaye yena uNyana uthi,
Itrone yakho, Thixo, isa ephakadeni lasephakadeni;
Yintonga ethe tye intonga yobukumkani bakho.
9Wathanda ubulungisa, wathiya okungendawo;
Ngenxa yoko, uThixo, uThixo wakho, ukuthambise
Ngeoli yomgcobo ngaphezu kowenu.
(INdum. 45:6,7)
10Abuye athi,
Ekuqalekeni, wena Nkosi, waliseka ihlabathi,
Nalo izulu lingumsebenzi wezandla zakho;
11Wona aya kutshabalala, ke wena uhlala uhleli;
Aye onke njengengubo eya konakala,
12Nanjengesambatho ùya kuwasonga,
Asuke abe ngawambi;
Ke wena ùkwanguwe,
Nayo iminyaka yakho ayiyi kuphela.
(INdum. 102:25-27)
13Sisiphi na ke isithunywa, awakha wathi kuso,
Hlala ngasekunene kwam,
Ndide iintshaba zakho ndizenze isihlalo seenyawo zakho?
(INdum. 110:1)
14Azingomoya ababusayo zonke na, zithunywe ukuba zilungiselele abo baza kuba ziindlalifa zalo usindiso?
Currently Selected:
KUMAHEBHERE 1: XHO75
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1975. Used with permission. All rights reserved.