उत्पत्ती 12
12
बोगवानान उगे रेन अब्रामान हादावणी
1बोगवान अब्राहामाह केयो, “तारो देस एने तारी जेल्मान बुय, एने तारा आबाख ने गेराह सोड़ीन ता देसाम जातरे जो मी तुवाह देखाडुह।#प्रेरितान काम 7:2-3; इब्रानियो 11:8 2मी तुवाह बोरकेत आपुह एने तार पोर रेन एक मोटलो देस बाणावुह एने तारो नाव मोठो केरूह, एने तु बोरकेतीन मुल रिहे।”
3“एने जा तुवाह बोरकेत आपी, ताह मी बोरकेत आपुह,
एने जो तुवाह टुके, ताह मी हाराप आपुह;
एने देरतीन आखा माणहे तारी उगे रेन बोरकेत सापड़ावती।”#गलातीयो 3:8
4तेवी बोगवानान ज्या वचन मानीन अब्राहाम हरान सोड़ीन लुताह बी तान आरही लेन गीयो; एने जेवी अब्राहाम हारान देस सुड्यो, तेवी तो ती टेम माय पंच्याहत्तर सालान इतो। 5इह केरीन अब्राहाम तान बायकु सारे एने तान बोतेरजाहक लुताह, एने जो मालदेन एने जेनवारे हारान माय हेंगालेल इतो।
आखाह लेन ता कनान देसाम आव लागा, 6अब्राहाम कनान देसाम रिगीन शेकेम माय आवो, एने जाहरी मोरेन चोखालो जाड़ हे, ताहरी पुचनो। ता काला माय ता देसाम कनानी माणहे रेताला। 7तेवी बोगवान अब्राहामाह देरसेन आपीन केयो, “ज्यो देस मी तारी वोसीह आपुह।” एने तो ता बोगवानान केरता, जो ताह देरसेन आपेल इतो, एक वेदी बाणायो।#प्रेरितान काम 7:5; गलातीयो 3:16 8ओवतो ता रेन ओंगाण चालीन तो बेतेल गावान बोयड़ा पोर आवो, एने ता तो तोम्बु बांदिन पाड़ावो टाक्यो, ता रेन पुर्व उगे बेतेल; एने आई हियोर पश्चिम उगे हे; ताहरी बी तो बोगवानान केरता एक वेदी बाणायो; एने बोगवानान बोक्ती किऱ्यो। 9एने अब्राहाम ओंगाण जाएन कनान देसान देक्षिण उगे नेगेब ईलाका माय जात रिनो।
मिस्र देसाम अब्राहाम
10ती टेम माय ता देसाम काल पुड़नो : केरीन अब्राहाम मिस्र देसाम जात रिनो काय ता पाराया देसावालो बोणीन रेय काहाकाय देसाम जुलूम मुठो काल पुड़ेल इतो। 11ओवतो ओहलो एनो काय मिस्र देसान आहने पोचीन, तो तान बायकुह साराह केयो, “हुमेल माहु मालुम हे, काय तु एक जुलूम हाजी बायकु हे; 12एने जेवी मिस्री माणहे तुवाह देखती, ते केती, ‘ज्यी ज्यान लाडी हे,’ केरीन ता माहु ते मार टाकती, पुण तुवाह जीवताली मेल लेती। 13तेवी : तु ताह इह केरीन किज्ये, काय मी ज्यान बोणीख हे, ता माय तार केरता मारो हाजो एय एने मारो जीव तार कारेण वोची।”#उत्पत्ती 20:2; 26:7 14एने ओहलो एनो काय जेवी अब्राहाम मिस्र देस माय आवो, तेवी मिस्री तान बायकुह देख्या काय ज्यी जुलूम हाजी हे। 15एने मिस्रान राजा फिरोनान आदिकारी तीह देखीन फिरोनाह तीन बाराम केया, केरीन तीह फिरोनान मेहेल माय पोचाड़ाय गीयो। 16एने फिरोन तीन केरता अब्राहाम ने बोलो किऱ्यो, एने ताह मेंड्रा बोकड्या, डोरे, पावोर पावेरन्यु, गेदड़ा गेदड्यु एने उटड़ा जुड़ना।
17तेवी यहोवा बोगवान अब्राहाम ने बायकु सारान कारेण फिरोन एने तान गेराणा पोर जुलूम मोठ मोठी पिड़ा टाक्यो। 18तेवी फिरोन अब्राहामाह हादाड़ीन केयो, “तु मार हिऱ्यो ज्य काय किऱ्यो? तु माहु काहा नाह केयो काय ती तारी बायकु हे? 19तु काहा कियेल काय ती तारी बोणीख हे? मी तिह मारी बायकु बाणावणेन केरता लेन गीयो; पुण एवी तारी बायकुह लेन न्या रेन जातरे!” 20एने फिरोन तान माणहाह तीन बाराम उकुम आप्यो, एने ता ताह तान बायकुह, एने आखो मालदेन आपीन मोकली दिनो।
Currently Selected:
उत्पत्ती 12: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
