Utu 47
47
1Hinu Yosefu akahamba kwa Falao, akamjovela, “Dadi wangu na valongo vangu pamonga na mambelele na ng'ombi na vindu vyavi vyoha, vabwelili kuhuma mulima wa Kanaani. Hinu vavi ku Gosheni.” 2Yosefu avatolili valongo vaki mhanu, akavamanyisa kwa Falao. 3Falao akavakota, “Lihengu linu ndi loki?” Vakamyangula, “Mkulu, tete vatumisi vaku ndi vafuya, ngati chevavi vagogo vitu.” 4Kangi vakamjovela Falao, “Tete vatumisi vako tibweli kutama ngati vayehe pamulima uwu ndava muni njala ndi yikali kula Kanaani na mifuya yitu kawaka chakulya. Hinu, mkulu, tikuyupa, tete vatumisi vaku utiyidikila kutama pandu pa Gosheni.” 5Falao akamjovela Yosefu, “Dadi waku na valongo vaku vakubwelili veve. 6Mulima woha wa Misili uvi pahi yaku, vapela dadi waku na valongo vako pandu pabwina neju pamulima uwu. Uvaleka vatama pandu pa Gosheni. Na ngati ukuvamanya vandu vevimanya bwina mambu ga mifuya pagati yavi, vahagula vavyayi vayimilila wa mifuya yangu.”
7Kangi Yosefu akamleta dadi waki Yakobo kummanyisa kwa Falao, na mwene Yakobo akammotisa Falao. 8Falao akamkota Yakobo, “Uvi na miyaka yilinga?”
9Yakobo akamyangula, “Nivi na miyaka miya yimonga na selasini ndi yenavili mulugendu lukumbi lwoha kuhuma pandu mbaka pandu pangi. Ndi miyaka yeniyo yidebe yimemi mang'aiso yilandana lepi na miyaka yevatamili vadadi vangu mulugendu lwavi.” 10Kangi Yakobo akamotisa Falao, akawuka. 11Hinu, Yosefu akavapela dadi waki na valongo vaki pandu pepikewa Lamesesi, pandu pana ludaka lwabwina pamulima wa Misili, pandu penapo vapewili pavyayi pavi, ngati chamlagizi Falao. 12Yosefu akavya akuvapela chakulya dadi waki na valongo vaki na vandu voha munyumba ya dadi waki kuwanangana na mvalangu wa vandu hati vana.
Njala yivaha pa mulima wa Misili
13Mwanakandahi chakulya chavili lepi pamulima woha. Njala yivaha yavili yikali neju hati yikavakita vandu voha pamulima wa Misili na ya Kanaani kuganda. 14Yosefu akatola mashonga goha ga mulima wa Misili na Kanaani kuhuma mabenu gevagulisi, akazipeleka mashonga ago kunyumba ya unkosi wa Falao. 15Vandu va ku Misili na Kanaani pevamalili mashonga gavi kwa kugulila chakulya, vakamuhambila Yosefu na kumjovela, “Utipela chakulya. Ndava kyani tifwayi palongolo ga mihu gaku? Mashoha gitu gamaliki.”
16Yosefu akavajovela, “Ngati mashonga ginu gamaliki, hinu munipela mifuya yinu, na nene yati nikuvapela chakulya.” 17Ndi vakamletela Yosefu mifuya yavi, falasi na ng'ombi na mambelele na mene na punda, na mwene akavapela chakulya. Mwaka wenuo Yosefu akavya kuvapela chakulya na vene vampela mifuya yavi yoha.
18Mwaka wewagelekili vakambwelela kavili na kumjovela, “Mkulu, uchakaka ndi kuvya masonga gitu goha gamaliki, na hinyama hitu ndi yavi yaku. Hinu, mkulu, tete vatumisi vaku tivi lepi na chochoha chetihotola kukupela manya nga makakala gitu na migunda yitu. 19Ndava kyani tete tifwa palongolo ga mihu gaku na kuyileka migunda yitu? Utigula tete pamonga na migunda yitu, tete na migunda yitu tivya va Falao. Tipela chakulya, muni tokotoka kufwa, utipela na mbeyu ndava ya migunda yikotoka kuvya waka.”
20Chenicho Yosefu akamgulila mulima woha wa Misili uvya waki Falao. Kila Mmisili yamganili kugulisa mgunda waki, ndava ya njala cheyavili yikali. Mulima woha ukavya wa Falao. 21Yosefu akavakita vandu kuvya vavanda, kuhuma upandi mmonga mbaka upandi wungi wa mulima wa Misili. 22Ndima ndi Yosefu yangaigula ndi yila yeyavili ya vamteta. Venavo vagulisi lepi ndima yavi muni vavii na chakulya chamahele kuhuma mumashonga gevapewili na Falao. 23Yosefu akavajovela vandu, “Mlola, nimali kuvagula nyenye mwavoha na migunda yinu kuvya va Falao. Yati mwipewa mbeyu na nyenye yati mwimija migunda yinu. 24Lukumbi lwa mabenu, yati mukumpela Falao lilundu limonga mukila malundu muhanu. Malundu mcheche gegisigalila yati givya mbeyu na chakulya ndava yinu na vandu va munyumba zinu na vana vinu.”
25Vakamyangula, “Mkulu, uhusangwili wumi witu, utihengili lipyana laku, tete yati tivya vavanda va Falao.” 26Chenichi ndi Yosefu avikili lilagizu limonga lelivi mbaka lelu pamulima wa Misili, lilundu limonga mumalundu muhanu yati livya la Falao. Migunda ya vamteta ndu ndi yaguliwi lepi na kuvya ya Falao.
Malovi gamwishu ga Yakobo
27Hinu, vandu va Isilaeli vakatama pandu pa Gosheni pamulima wa Misili. Kwenuko, wakapata vindu vyamahele, wakavelekana na kuyonjengeseka neju. 28Yakobo atamili pamulima wa Misili kwa miyaka kumi na saba. Wumi waki woha weatamili wavili miyaka miya yimonga na alubaini na saba. 29Lukumbi lwa lifwa lwaki Isilaeli pewahegalili, akamkemela mwana waki Yosefu, akamjovela, “Ngati chakaka ukunigana, vika chiwoko chaku pagati ya mawondo gangu, unilapila kuvya ukunikitila kwa utopesa na kuvya msadikika kwangu. Ukoto kunizika uku ku Misili, 30ndi unigoneka pamonga na vagogo vangu. Nitola kuhuma ku Misili, ukanizika kumatinda gavi.” Yosefu akamyangula, “Yati nikita ngati cheujovili.”
31Yakobo akamjovela, “Nilapila!” Yosefu akamlapila. Kangi Isilaeli akang'anamuka upandi wa kumutu wa chitanda chaki na kumgundamila Chapanga.
Currently Selected:
Utu 47: Ngoni
Highlight
Share
Copy
Want to have your highlights saved across all your devices? Sign up or sign in
Ngoni New Testament © The Word for the World Southern Africa and Pioneer Bible Translators, 2020.
