Utu 42
42
Vahaja vaki Yosefu vihamba ku Misili
1Yakobo peamanyili kuvya kuvi na vyakulya ku Misili kula, akavajovela vana vaki, “Ndava kyani mwitama ndu penapa kuni mwilolesana changali kukita chindu? 2Niyuwini kuvya Misili kuvi na vyakulya. Muhelela muhambayi kwenuko mkagula chakulya tikoto kufwa njala.” 3Ndi valongo kumi va Yosefu vakahelela kuhamba ku Misili kugula vyakulya. 4Nambu Yakobo amlekili lepi Benyamini mweavelekiwi kwa mau mmonga na Yosefu, ahamba pamonga nawu muni ayogwipi kuvya ngaapatili gahakahu.
5Hinu, vana va Yakobo mewa akemiwi Isilaeli vahikili ku Misili ngati vandu vangi vevahambili kugula, muni hati pamulima wa Kanaani kwavili na njala. 6Lukumbi lwenulo Yosefu avi ndi mkulu wa pamulima wa Misili. Mwene ndi mweavagulisili vandu vyakulya kuhuma milima yoha. Hinu, vahaja vaki vakabwela na kumgundamila Yosefu mbaka pahi kwa utopesa. 7Bahapo Yosefu peavawene valongo vaki, akavamanya, nambu akajikita avamanyili lepi na kulongela nawu kwa ukali, akuvakota, “Nyenye mwihuma koki?” Vakamyangula, “Tihumili ku mulima wa Kanaani tibweli kugula chakulya.”
8Pamonga Yosefu avamanyili valongo vaki, vene vammanyili lepi. 9Ndi Yosefu akumbwiki ndoto zaki kuvavala vene, akavajovela, “Nyenye ndi vamang'omesi! Mubweli kulola pandu pamulima witu pangali na ulonda.”
10Vakamyangula, “Lepi mkulu witu. Vatumisi vaku tibwelili kugula chakulya. 11Tete tavoha ndi vana va dadi mmonga. Vatumisi vako ndi vandu vasadikika, lepi vamang'omesi.”
12Akavajovela, “Lepi! Mubweli kulola pandu pamulima witu pangali ulonda.”
13Nambu vakamyangula, “Vatumisi vaku vavi kumi na vavili, ndi vana wa mundu mmonga mweitama pamulima wa Kanaani. Nambu mbena witu wa mwishu asigali na dadi witu na yungi afwili.”
14Nambu Yosefu akavajovela, “Ngati chenijovili. Nyenye ndi vamang'omesi ndu. 15Chenichi ndi cheniumanya uchakaka. Nilapa kwa lihina la Falao, yati mwiwuka lepi pandu apa mbaka mlongo winu mdebe abwela penapa. 16Mumtuma mmonga winu akamleta mlongo winu mwenuyo, vangi mwisopiwa muchifungu malovi ginu galingiwa kumanya ngati mwijova chakaka. Ngati lepi, nilapa kwa lihina la Falao kuvya nyenye ndi vamang'omesi!” 17Kangi akavasopa voha muchifungu kwa magono gadatu.
18Ligono la datu Yosefu akavajovela, “Nene namundu mwamtopesa neju Chapanga, yati nikuvakoma lepi ngati mkakita lijambu limonga. 19Ngati chakaka nyenye ndi vandu vasadikika, mmonga winu na asigalila pachifungu, na vangi vavapelekela chakulya valongo vinu vevavi na njala. 20Kangi mumleta kwangu mlongo winu mdebe. Yeniyi yilangisa uchakaka wa malovi ginu, na nyenye yati mwikomiwa lepi.” Hinu, vakayidakila kukita chenicho.
21Kangi vakajovesana, “Chakaka tete tamuhokili mlongo witu. Pamonga tamuwene peavili mumang'aiso, na mwene patiyupil, tetetamuyuwanili lepi. Ndi mana mang'aiso aga goha gakutikolela.”
22Lubeni akavajovela, “Wu, nene navajovili lepi tikoto kumbudila msongolo? Nambu nyenye mwaniyuwanili lepi! Hinu ting'ahika ndava tamkomili.” 23Vene vamanyili lepi kuvya Yosefu ayelwayi gevajovayi, muni pealongili nawu yavili kwa njila ya mdandaula. 24Yosefu akajibagula nawu akatumbula kuvemba, kangi akavawuyila na kulongela nawu kavili. Akamtola Simeoni akamkunga palongolo yavi.
Vahaja vaki Yosefu viwuya kunyumba
25Yosefu akalagiza mumagunila vyavi vimemeswa vyakulya, kila mmonga wavi awuyisiwayi mashonga gaki muligunila laki, na vapewa chakulya cha munjila. Vakakitiwa mambu ago goha. 26Vakavagegesa punda wavi mizigu yavi ya vyakulya, na vakawuka. 27Yikavya pevahikili pandu pa kugona vayehe ku njila kula, mmonga wavi akawopola ligunia laki muni apata kumliha punda waki, akakangasa kukolela mashonga gaki mumlomo wa ligunia laki. 28Akavajovela valongo vaki, “Mashonga gangu gawuyiswi. Aga apa mumlomo wa ligunia langu!” Pevayuwini ago, makakala gakavamalika. Vakalolesana kuni vivagaya na kukotana, “Ndi lijambu gani lenili leatihengili Chapanga?”
29Pevahikili pamulima wa Kanaani kwa dadi wavi Yakobo, vamjovili goha gegavakolili, vakamjovela, 30“Mkulu wa mulima wula ajovili na tete kwa ukali, na kutikotekesa kuvya tete ndi vamang'omesi pamulima waki. 31Nambu tete tamjovili kuvya tete ndi vandu vasadikika, na lepi vamang'omesi. 32Tamjovili kuvya tete tivi valongo kumi na vavili kwa dadi mmonga, na kuvya mmonga witu afwili na yula mdebe avi kunyumba kumulima wa Kanaani pamonga na dadi witu. 33Ndi mkulu wa mulima wenuwo akatujovela, ‘Ndi chenimanya ngati chakaka nyenye ndi vandu vasadikika. Mumleka kwangu mlongo winu mmonga, na nyenye vangi mpeleka mabenu kunyumba kwa valongo vinu vevavi na njala. 34Kangi mumleta kwangu uyo mlongo winu mdebe, na penapo yati nimanya kuvya nyenye lepi vamang'omesi, nambu ndi vandu vasadikika. Mkakita chenicho yati nikumulekelela mlongo winu, na nyenye yati mwiyidakiliwa kukita uchuuzi pamulima uwu.’”
35Pevakutulayi vyakulya kuhuma mumagunila gavi, vakangisi kulola kila mmonga wavi awuyisiwi chihaku chaki na mashonga mugati ya ligunia laki. Pevawene ago, voha pamonga na dadi wavi, vakayogopa. 36Dadi wavi Yakobo, akavajovela, “Hinu mgana nivayagisa vana vangu voha! Yosefu avi lepi, Simeoni avi lepi, hinu mwigana kumtola na Benyamini. Goha ago gakunikolela nene!”
37Penapo Lubeni akamjovela dadi waki, “Ngati nimuwuyisi lepi Benyamini, vakomiwa vana vangu vavili. Muleka Benyamini mumawoko gangu, na nene yati nikumyangalila na kumuwuyisa kwaku.”
38Nambu dadi waki akamyangula, “Mwanangu ihamba lepi na nyenye, mlongo waki amali kufwa, na mwene asigalili. Nene ndi mgogolo neju ngati msongolo uyu gakumkolela gahakau gogoha mulugendu lwemwihamba hinu, yati mkunikoma kwa mvinisu muugogolo wangu.”
Currently Selected:
Utu 42: Ngoni
Highlight
Share
Copy
Want to have your highlights saved across all your devices? Sign up or sign in
Ngoni New Testament © The Word for the World Southern Africa and Pioneer Bible Translators, 2020.
