Utu 18
18
Vayehe vadatu
1Bambu amuhumalili Ibulahimu papipi na mikongo mivaha ya Mamle, lukumbi peatamili pamlyangu wa kuyingalila mulindanda laki lukumbi lwa lupyupu lwa muhi, 2na peayinwili mihu gaki akavawona vandu vadatu vayimili patali chidogo na mwene. Ndi peavawene, akayumbatika kuhamba kuvapokela. Akavagundamila cha kukupama. 3Akajova, “Bambu wangu, ngati uyidakila chondi ukoto kunipita nene namtangatila winu, ubwela uwela kwa nene kwa lukumbi. 4Yati mletewa manji chidogo muni musanja magendelu na mpumulilayi pamkongo uwu. 5Lukumbi pempumulila, yati nikuvatendelekela chakulya chidogo mlyai ndi mpata makakala na kuyendelela na lugendu lwinu, muni muyidakili kubwela kwa nene mtangatila winu.”
Vakamyangula, “Ena! Kitayi ngati cheujovi.”
6Ibulahimu akayumbatika mulindanda na kumjovela Sala, “Tendelekela kanyata uhembe weuyagiwi bwina hipimu yidatu na uteleka mabumunda.” 7Kangi akawuka kanyata akahamba kumsambi wa ng'ombi, akahagula mpapakasi mmonga wabwina neju na mweakulupili, akampela mtumu waki na akatendekela nyama kanyata. 8Mewa Ibulahimu akaleta siyagi na mavele na nyama yeyatendekiliwi, akavatendelekela vayehe vala chakulya, na mwene akayima papipi nawu kuvalindila pevalyai pahi ya mkongo.
9Vayehe vala vakamkota, “Avii kwoki mdala waku Sala?”
Ibulahimu akayangula, “Avii mulindanda.”
10Mmonga wavi akajova, “Chakaka yati nikukuwuyila kavili kumwaka lukumbi ngati ulu, na mdala waku sala yati ivya na mwana mgosi.” Sala avii kuyetu ya mlyangu wa lindanda iyuwanila.
11Ibulahimu na Sala vavii vagogolo, ni mwene Sala lukumbi lwaki lwa kuveleka lwamaliki. 12Hinu, Sala akaheka chakumtima na kujova, “Nene namgogolo, na mngana wangu mewa mgogolo. Wu, yati nihotola kuhekelela kugona na mngwana wangu na kupata vana?”
13Penapo Bambu akamkota Ibulahimu, “Ndava kyani Sala ahekili na kujikota, chakaka ‘Yati nihotola kuveleka mwana na hinu nene namugogolo?’ 14Wu, livili lijambu loloha langahotoleka kwa Bambu? Yati nikuwuyila lukumbi lwelupangiwi, lukumbi ngati ulu mwaka weubwela, ndi Sala yati ivya na mwana mgosi.”
15Nambu Sala ayogwipi, akabela na kujova, “Nahekili lepi,” Nambu Bambu akamjovela.
“Ena ukahekili!”
Ibulahimu akuvayupila vandu va ku Sodoma
16Kangi vandu vala vakawuka, vakahika pandu pevahotwili kuuwona mulima wa Sodoma kuni Ibulahimu avii pamonga navu kuvahindikila. 17Ndi Bambu akajova, “Wu, nimufihayi Ibulahimu lijambu lenihamba kukita. 18Ibulahimu yati ivya dadi wa mulima uvaha weuvi na makakala kupitila mwene na vandu va milima yoha yati vimotisiwa! 19Muni nimuhagwili mwene na viveleku vyaki. Mwene yati akuvawula viveleku vyaki kuniyidakila na kukita gegiganikiwa. Ngati vakakitayi chenicho na nene yati nikumkitila kila chenamujovili.”
20Ndi Bambu akajova, “Kuvii na malovi gahakahu neju kuvavala vandu va Sodoma na Gomola, na kumbudila kwavi Chapanga ndi kuvaha neju. 21Hinu yati nihelela kuhamba kwenuko nikalola namwene ngati chakaka vakitili kulandana na malovi gahakahu geganihikili. Nigana kumanya.”
22Kuhuma penapo, vandu vala vakakamula njila kuhamba ku Sodoma, nambu Ibulahimu asigalili, ayimili palongolo ya Bambu. 23Hinu, Ibulahimu akamuhegelela Bambu, akamkota, “Wu, yati ukuvakomakesa vandu vangahoka na pamonga vevahokili? 24Wu, yikavyai vavii vandu hamsini vangahoka pamuji wenuwo, wu, yati ukuukomakesa mulima wenuowo na yati uleka lepi ndava ya vandu avo hamsini vevahokili vevavii mwenumo? 25Niholalela yati ukita lepi chenicho! Kuvakoma vandu vangahoka pamonga na vevahokili, vangahoka kuvakitila ngati vevahokili! Lepi! Muhamula wa mulima woha ileka lepi kukita gegiganikiwa?”
26Bambu akajova, “Nikakolelayi vandu vangahoka hamsini kumuji wa Sodoma, yati nikuulekekesa mulima woha ndava ya venavo.”
27Ibulahimu akajova kangi, “Nene nilingili kulongela na Bambu, kuni nene chindu lepi, mwenivi lububu na malyenge ndu. 28Pangi yati vivya vandu vangahoka alubaini na mhanu pahala hamsini. Wu, yati ukomakesa muji woha muni vapungwili vandu mhanu?”
Bambu akamjovela, “Ngati nivakolili vandu venavo alubaini na mhanu yati nikomakesa lepi.”
29Ibulahimu akajova kavili, “Wu, kwenuko ngati vapatikini vandu alubaini ndu?”
Akamyangula, “Yati nikomakesa lepi ndava ya vandu alubaini venavo.”
30Ibulahimu akayonjokesa kujova, “Bambu kotokayi kuniyomela, ni nene yati nijova kavili. Pangi yati vivya selasini ndu?”
Bambu akamyangula, “Yati nikita lepi chenicho nikavakolela selasini venavo.”
31Ibulahimu akajova, “Chondi Bambu nilekekesa muni niyendelili kulongela na veve. Pangi vipatikana vandu ishilini?”
Bambu akamyangula, “Ndava ya ishilini venavo yati nikomakesa lepi muji wenuo.”
32Ibulahimu akajova, “Kotoka kuyoma Bambu, nambu yati nijova kangi mala yimonga ndu. Wu vakavyai vandu vangahoka kumi ndu, yati yivya wuli?”
Bambu akamyangula, “Ndava ya vandu vangahoka kumi yati nikomakesa lepi muji wenuwo.”
33Bambu peamalili kulongela na Ibulahimu, akawuka, ndi Ibulahimu akawuya kunyumba yaki.
Currently Selected:
Utu 18: Ngoni
Highlight
Share
Copy
Want to have your highlights saved across all your devices? Sign up or sign in
Ngoni New Testament © The Word for the World Southern Africa and Pioneer Bible Translators, 2020.
